روايات ليبيه كاملة

النصيب اقوه من الحب الحلقة الثانية

جميع حقوق الطبع والنشر محفوظة

النصيب اقوه من الحب الحلقة الثانية

🌹»”قراءة ممتعة” »🌺

غيرت لبست توته رفعت فوني القيت 6مكالمات من عمر عاودت اتصلت مارد
رفعت الكيكه وطلعت
جيت للشباب
فرقت عليهم الكيكه
وقعدنا انهدرزو لين المغرب كل مره ينسحب واحد
تليفوني في جيب التوته رن درته صامت ماحد انتبهلي
طلعت وراه حوش جدي
فتحت الخط
عمر: الو ياعمري وينك اليوم
انا: قاعده امع البنات وخوتي انت عارف الجمعه كلنا انلمو امع بعضنا
عمر: باهي شن جو حبيبتي
انا: تمام بخير وانت
عمر: دوم ياقلبي اني بخير مادم اسمعت صوتك
انا: نجك ليا حبي
وانشوف يد جبدت مني التليفون
سند: في من اتكلمي انتي
انا:وانت شن دخلك
سند حط التليفون ع ودنه وتكلم:الو
بس مافيش صوت الخط مفتوح
سند يتكلم وضغط ع اسنونه: قولي يافرخه من هذا غلا روحي
انا:مدخلكش ماعندك الحق ترفع تليفوني بالطريقه هدي
سند:صار مدخلكش بعد يعرفو خوتك توا شن بتقولي
انا: بري قوللهم توا علاش اتراجي
سند تعصب مني: توا انشوفو اخرتها امعاك
وخر سند بيمشي تليفوني رن عنده (غلا روحي)
طول رد سند ودارلي بيده اني نتكلم (زبطوها الحركه)
اني خفت وجتني رعشه وصوتي متوتر:الو
البنت: ها ياتامي طولت عليك صح امغير ماما نادتني نعطيها الدواه خليتك ع الخط ومشيت علاش سكرتي
اني تريحت 😌 وشبحت في سند اعطيته نضرا ورديت: لاعادي حبيبتي كيف حالها توا امك
البنت:الحمدلله بخير والفتره الخيرا تعبت كيف ماحكيتلك
سند اعطني التليفون ومشي
اني من الفرحه انه ماكشفني سكرت ع البنت قعدت انمروح ع روحي من كثر ما كنت متوتره
وكيف طلعت من القصه هدي
بعده ادكرت انه سكرت عليها اففف عليك غباء
اتصلت بيه
ردت اخت عمر
انا:صحيتي ياقلبي وربي ماني عارفه كيف نشكرك
سماح: هههههه بالشويا عليك والله عادي امغير جاني عمر قالي تامي كبس عليها خوها هاك كلميها ع اساس انتي
انا: وربي انقدتني في اخر لحضه ولد عمي مش خويا
سماح: يمشي ايملح مادخلاش فيك اهو عمر جنبي ايفص يسال شن صار
انا: قولليه تمام مشت ع خير
سماح: اهو يبي ايكلمك المهم في الجديد ردي بالك
انا:ان شاء الله حبيبتي نجك ليا انقديتني قوليله بعدين انكلمك توا ايشكو فيا بتمشي
سماح:اي تمام
سكرت الخط
مشيت لي مكان ما كنا امقعمزين الشباب والبنات في الجنان بحتت مالقيت سند تريحت
كانت جنبي ابرار قرصتني
انا: اححح واعره يافرخه خيرك
ابرار: خيرا وجهك هكي
انا: امغير اسكتي اشويا ورحت فيها
ابرار: بسم الله خيرك شن في
انا: توا سند كبسني انكلم في عمر
ابرار: عيطت وحطت ايدها ع فمها
الكل التفت علينا
كلهم: خيركن
خالد: خير جدك اتعيطي انتي
سندس:خيرك شن في
كلهم قعدو يسالو فينا
امجد: تكلمن خيركن شن في
انا منصدمه انشوف في ابرار وابرار اتشوف فيا وغمزت لي ابرار فهمت عليا فجاء قعدنا نضحكو انا وابرار بصوت عالي انطيرو في الشبهه منا
نور: وربي ركبهن جن وووواك عليا ناضت تجري
والشباب قعدو يضحكو علينا ونحنا انسايرو فيهم
سندس تضحك: شن جاكن توا مافيكن شي
خالد:تي رسمي ركبهن جن وقعدو يضحكو
انا نضحك كيف خافو غلضت صوتي: قعدت انهز في جسمي درت روحي كانه حق ركبني جني 😂😂😂
انا جعفر لقد اتيت لي اقتلكم وقربت ع سندس شديتها من ارقبتها
سندس اتشدها عيطه وحده 😂😂😂😂
سندس: قريب تبكي شن تبي فيا انا اهي اماني ونور واريج ليش انا
انا: لانك انتي احلا وحده فيهن نبي نقتلك ونرفعك امعايا
سندس: قعدت تبكي مانبيش نمشي امعاك قعدت اتعيط الحقوني بيقتلني
الشباب والبنات قعدو يضحكو عارفيني انبصر وعارفين سندس اخوف وحده وبكايه
انا: مافيش حد يقدر ينقدك مني خلاص انا اخترتك بنقتلك ونزوجك 😂😂😂😂😂
سندس: وووووووواه عليا سنننننننننند الحقني
واتعيط
خش سند من الشارع يجري وجاء جدي واجديده وماما وباباومحمد الحاصل كلهم الي في الحوش انخلعو من اعياط سندس جو يجرو
جدي: خيركم بسم الله شن في اتعيطو
اناقعدت نضحك ونحيت ايديا من سندس ونضحك والشباب يضحكو انا من الضحك وجهي بدا احمر
اجديده: طاح سعدكم علاش اتعيطو
مافيش حد تكلم كلنا نضحكو
سندس تجري تحضن سند وتبكي
سند لف ايده عليها ويمسح بيده ع شعرها: اسس حبيبتي خيرها بنتي اهدي
سندس تبكي وضامه وجها في صدر سند: تامي ركبها جن قال بيقتلني ويتجوزني عشان انا سمحه بالله عليك ماتخليش يرفعني وتبكي من جدها
كلهم التفتولي قعدو ايشوفولي
انا نضحك: وربي انبصر عليها
جدي: هدي مش ابصاره شوفي حالة البنت
اجديده: طاح سعدك شن البصاره اشويا وقتلي ابنيتي
انا درت وجه حزين: علاش يا اجديده اطيحي في سعدي ساد طايح ابروحه
اجديده: ساع اديري عقل سعدك ايقوم
نور: هدي مستحيل ادير عقل هذي
انا: خليته ليك العقل ما كملت كلمتي والا نالقه سندس مشبطه فيا وضرب فيا
سندس: خزي حقيره تافهه كلبه هكي اديري فيا
انا نضحك: وراس سنذس خلاص تي يدك واعره
انا: ايدي احح وربي خلاص دوسه حبيبتي
سندس :توا دوسه حبيبتك وين جعفر وين
كلهم قعدو يضحكو علينا
انا رجعت صوتي كيف امبدري:واخيرا جيتيني بيدك مايقدرش حد ايفكك مني ونضحك😂😂😂
سندس وقفت قعدت اتشوف في ملامح وجهي وخرت مني بخوف
انا خلاص ماقدرت نتحمل قعدت نضحك ونجري وسندس ورايا اتحلف فيا
سندس: تي وربي اليوم اتشوفي
انا: تي وينها الكيوت الي تبكي توا
سندس: والله ياتامي ماني امسامحتك
انا وقفت ونضحك:لالا توا اتسامحيني 😂😂😂
سندس: وربي اتشوفي عليها مش امسامحتك باهي
ورجعت لي العيله
انا: تعالي وراس دوسه اتسامحني درت وجه الحزين
نور: ووووه عليا توا يبدن في ادرمة الهنودي سامحيني وجو 😂😂😂
اجديده:ربي ايدوم لمتكم وان شاءالله ديما تضحكو
كلنا امع بعضنا: امين يارب
جدي:تعالو كلكم داخل عندي موضوع بنحكيه وخش داخل
بابا: ان شاء الله خير ولحق جدي وامعاه اجديده
ماما: انشوفو شن يبي الحاج وامشت امعاها عمتي عائشه
اني انوشوش لي البنات: زعما شن يبي جدي
بيسان: مانعرفش

محمد: سند اكيد عارف شن بيقول جدي
سند:اكيد عارف
امجد: شنهو به
سند:اصبر خلي هو يحكيلكم
خالد:ماهو انت الحفيد المدلل حا ايخبرك اول واحد
سند:علاش حاسدني حتي في المحبه
خالد يضحك:لو تقسم عليا اشويا من محبتك
سند:اسكت ساد محبة الفرخات الي عندك كل يوم وحده يا نسونجي
امجد يضحك:قصفوك 😂😂😂😂 بو صاحب
معتصم:خلاص سادكم هدرزه خلي نمشو
خالد: اهو العاقل تكلم😂😂😂😂
سند:هيا انت وياه 😂

كلهم كانو موجودين الا عمتي ابتسام واصغارها وعمي عبدالرحمن مكانش موجود

بابا:خير ياباتي شن في شغلتني جامعنا كلنا
جدي:خير خير ياعلي كل شي خير
كلنا نستنو شن بيحكي جدي
جدي: اسمعوني اكويس
معتصم:نسمعو فيك ياجدي شن في
جدي: اخر فتره الشغل زاد اربحه وفتحنا كم فرع تاني
الحمدلله بخيره رزقنا وكبرنا الشغل الحمدلله بي مناسبة ان كبر اكثر من قبل فا حانقسم الشغل ع الشباب بس بشرط كل واحد بعد يتجوز وعد مني حايستلم مني الفرع كامل ليه بس توا حاتشتغلو موقت كيفكم وكيف الموظف عادي براتبك الشهري الكلام ليكم يا شباب
واما المناسبه التانيه وتو روحكم يوم الاحد حا نمشو زرده وهل مره كبيره حانقعدو اسبوع في المزرعه الي في طريق “””””””” مانبيش اي اعترض

انا: بس ياجدي عندي خدمه ماك عارف انت
جدي: انا قلت مافيش اي اعتراض
انا:بس
سند: خلاص جدي قال كلمه اني بكرا بناخد اجازة لي سندس وتوا نخدلك من دكتور عبدالمنعم مدير الستشفى
انا:اوك
اجديده: لو تسمعو مني علاش يشتغلن بنات اخر زمن مفروض ايقعزن في الحوش ويخدمن اني بعد كنت فعمركن حامل بي ابتسام رابع بطن ليا عجب توا عام شغل
سندس: يا اجديده توا نحنا قرينا واتعبنا ويمشي هكي تعبنا مالناش سنه ونحنا نشتغلو ☹️☹️
انا: اي والله اتعبنا واسهرنا ع الشهاده كيف حصلنها وقرينا وتخرجنا ☹️
جدي: كل شي في وقته حلو انكمل الخدمه الي في يدي ونفضالهن واندير حل
انا:علاش شن بدير يا جدي
جدي: ابتسم شي يرضي الجميع باذن الله وتو ارواحكم لي بعد بكرا وانت يا سند الحقني ومشا

سندس:اوووف شن بيدير جدي علاش يا اجديده حكيتي ع الخدمه توا
وعد:اي صح كلامها اجديده علاش تخدمو و الخير واجد
سندس:اول شي ماطلبت رايك انتي وتاني شي بعد تقري تتعبي ع حاجه عشان اتحققي حلمك
وعد: اهو كلنا قرينا وبطلبنا وازوجنا
سندس:انتي شن عرفك في القرايا طول عمرك ساقطه لعند ايسو هلك منك بطلولك ومتعوده تاخدي حاجه غيرك
وعد: انتي شن دخلك فيا نقرا ولا انبطل ماعندك دخل فيا
سندس: امال غلاش داكه خشمك امعايا اسكتي من البدايه
وعد: محمد شد بنت عمك من عليا
سندس:علاش بنت عمه شن دارت
محمد: خلاص اهدي يا سندس وانتي يا وعد قدامي لي الشقه طلعت وعد ولحقها محمد
خالد: اهدي ياسندس توا جدي ماقال شي لعند شايطه ابروحك
سندس:ابروحك اسمعت كلامها ما دخلها فيا نشتغل ننحرق انموت مادخلاهاش
اجديده: توا يابنتي عجبك الي درتيه اهو زعلتي الوليه
انا: ولية العازه
ماما: عيب يابنتي فالنهايه مرت خوك
نور: خلاص درتو قصه بالله هي زرده بالنفسو علي ارواحنا وانتم كبرتو القصه بي مشاكلكم
اماني: خلي انخططو شن بنديرو
سندس: خططي ابروحك انا بنروح لي الحوش
ابرار: حتي انا لحقتك
انا:جايه امعاك
سندس: انتي التانيه اخطيني مش ناسيه شن درتي
انا: غير تعالي توا نحكيلك
سندس:ماتحكيلي شي ومشت
انا:توا كيف نتفاهم امعاها انا
ابرار:درتيه بيدك زعلت منك دوري كيف اترضيها
انا:هيا امشي امعايا خلي انديرللها حل
ولحقن سندس

اريج: خاطري نفهم علاش ديما امع بعضهن
نور: ماك عارفه من اصغار امع بعضهن لدرجه قرن في نفس المدرسه ونفس الفصل وخشن نفس الكليه ونفس التخصص
بيسان:اي صح صحبتهن قويه مستحيل تنهز
اماني: ربي ايدومهن لي بعضهن
اجديده:…….

انا:……….
سندس:……

محمد:…….
وعد:……..

#يتبع

اترك رد

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock