النصيب اقوه من الحب الحلقة السادسة | القلم الناجح
روايات ليبيه كاملة

النصيب اقوه من الحب الحلقة السادسة

جميع حقوق الطبع والنشر محفوظة

#النصيب_اقوه_من_الحب 🔥🔥

#الحلقه_السادسه

✍️ الكاتبه Meroo Ahmad ✍️

🌹»”قراءة ممتعة” »🌺

طلعت من حوشنا اوصلت لي حوش عمي ايسجمعت كل قوتي ورقيت من الدروج كل درجه قلبي يدق 100دقه شعور كان خوف اول مره نركب لي شقته اوصلت لي الباب خديت نفس عميق وغمضت
انا لازم انكون قويه ونحكيله كل شي والي ايصير ايصير خلاص اتعبتت
سند: خلاص كملتي لين امتي نقعد واقف
انا فتحت اعيوني القيت سند فاتح الباب ويتفرج عليا
انا: كيف عرفتني جيت وانا مزال ماخبطت علي الباب
سند: شفتك وانتي جايه هيا خشي
انا:به خشيت تعرفو شعور اول مره نقعد انا هو في مكان ابروحنا شعور غريب والي مستغربه فيه قلبي الي كانت دقاته مسموعات ماعرفتش خوف او شي تاني خشيت كانت الشقه حلوه بسيطه مفروشه وراقيه كنت منبهره بشكله كيف ولد عزابي قاعد فيها ونضيفه وامرتبه
سند: قعمزي
قعمزت كان واضح علي سند الهدو ماهو زي صبح كان وحش مش سند
سند:شن حالك توا
انا: الحمدلله بخير وانت
سند: كلتي حاجه
انا:تؤتؤ ماعنديش نيه
سند:ان شاء الله علي خاطر الكلب $$
انا شفت فيه: سند احترمي علي اقل بلاش منها الفاظ
سند: به احكيلي امتي تعرفتو
انا: قبل سنتين
سند: بس انتي ليك سنه من تشتغلي امعا في المستشفى
انا: اي بس نعرفه قبل قبل سنتين تعرفت عليه في الكورس الي سجلتني فيه انا وسندس تعرفنا علي بعض
سند😡😡:به كملي
انا:خلاص تعرفنا علي بعض في البدايه كان اعجاب وبعدها حبينا بعض والله كانت علاقتي بيه شريفه ونضيفه
سند:والي شفته بعيني
انا نزلت راسي:ماهو امس انت بعد شفتني نحكي التليفون كان هو اعطاه اي اخته عشان انت ما اتشك فيا وبعد مشت انت صكرت ماكلمته اليوم جا لي المستشفى حامق ومتعصب عشان ماكلامته ولا طمنته عليا بعد اتصل بيا تعركنا قالي ماتسكري ره انجيك سكرت عليه قبل ما ايكمل كلامه كنت انا وسندس انهدرزو خش علينا وطلعت سندس قالي علاش سكرتي قتله مادخلك واطلع ماطلعش قعد ايقرب مني قتله وخرا ماباش بعدها انت خشيت اقسم بالله ماكذبت في حرف ياسند
رفعت راسي القيت سند ملامحه بارده ولا كاني قتله حرف
انا:والله صدقني هدا كل شي
سند: اي نعرف
انا انصدمت: قصدك سندس حكتلك
سند بيبرود:لا ماهي سندس شخص تاني
انا:كيف
سند:بنسالك جاوبي بصراحه
انا:شن
سند: انتي اتحبيه
انا سكتت ماقدرتش نتكلم
سند صبا: خلاص اعرفت جوابك بس ياريت يستاهل خليك اشويا وانجي
خش لي داره جاب امعاه لابتوب
قعمز جنبي
سند:تفرجي وشوفي اختيارك
وفتح علي الفيديو كمل الفيديو
وانا فاتحه فمي مش امصدقه كيف هكي
انا واعيوني امعبيات ادموع:سند قولي كذب صح الي اسمعته
سند:للاسف حقيقه هذا اختيارك
انا حطيت ايدي علي وجهي ونبكي بعبرتي كيف هكي في دقيقيه ينتهي كل شي

كلكم تبو تعرفو شن كان في الفيديو
خلي نرجعو قبل 3 ساعات

سند كانت واقف فوق راس عمر
سند: واخير فقت
عمر: انت
سند:اي عزرائيلك انا
عمر مسح فمه من الدم الي كان امجمد علي فمه : يعني انت الي باعتهم
سند: سلح الجاكة وحطها علي جنب
عمر:شن تبي مني
سند:عندي امعاك احساب ماصفيتاش
عمر:مافيش بينا احسابات
سند:لا في
عمر: لو راجل فكني ماتستقوه علي شخص ايديده مربوطات
سند:يضحك كان فكيتك شن بديرلي 😂😂😂 بتضربني 😂😂 هذا اقوه حلم تحلمه
عمر:فكني توا انشوفو الراجل فيا
سند متحملش فكه:هيا وريني عضلاتك
جاء عمر بيضرب سند بس بي حركه سريعه من سند فصعله ايده وعطاه بوكس علي وجه لعند طاح عمر
سند هو يضحك 😂😂:ماصارلك منها الضربه ارجع تاني المهم عمر خدا من سند طريحه لعند ايده ورجله تكسرو
كان عمر طايح علي الارض ويبكي من الوجع
قعمز سند ركبه ونص: يا اوليد ماما ليش تبكي مره تانيه دير الف احساب حاجه شور سند تقربها
عمر يضحك ويبكي: اتحبها صح
سند:اعطا كف لعند عمر عيط بصوت عالي
سند:توا تحكيلي كل شي
عمرهو يضحك وتفل الدم الي في فمه: قصدك المضحكه هذيك اتحبها
سند اعطاه طريحه تانيه
سند هو داهش😡😡: وربي انخليك اتمنه الموت مش حاتلقها يا كلب $$$🔞
عمر 😂😂: اصلا خودها اشبعت فيها معاش تلزمني كانت تفويت وقت بس عندي الي احسن منها وفرحي شهر الجاي 😂😂 وصلها المعلومه
سند ماتحمل الكلام فيا اعطاه طريحه والله ما ينساها طول عمره 😂😂😂 بعد وقف سندالضرب انتبه انه عمر كان شبه دايخ
سند كان داهش ومتعصب جاب كاس اميه وبزعه عليه
فتح عمر اعيونه بتعب ويبكي:اتعبت خلاص شن تبي من امي
سند:تعرف اتقعمز تحكيلي كل شي بتفصيل ياويلك لو تغلط في كلمه وربي نقتلك ونلوحك لي الاكلاب تاكلك ولا كانه صار شي ننصحك متجربني 😏
عمر خاف علي روحه وشبه تاكد انه سند يقدر ايدير هكي احكله كل شي وكيف تالقو لي عند المشكلة اليوم
وقاله هو خاطب ليه سنه بنت خالته وفرحه بعد شهر الحقير وانه كان ايكلم في تامي هكي ماحبهاش كان مجرد تسليه بس وكان ايكلم في بنات واجد مش فاطمه بس لا كان ايهدد في البنات بصورهم رفع سند تليفون عمر فتشه وحمد ربه انه فاطمه ماكنت بين اصور البنات مسح التليفون بعده كسره قدامه

سند يتكلم بصوت عالي: توا اتشوف يا ولد $$$??🔞
سند: ياثعلب
خش حمزه
حمزه:نعم ياطيري
سند: نبيك تستضيف الكلب هذا عندك نبيه يتعفن كم يوم الحبس ويتعلم انه بنات الناس مش لعبه عنده
حمزه: تم يابوصاحب اعاتبره تنفذ واحلى استضافه بعدك اليوم ايدي تاكل فيا واجد😂😂😂
سند😂😂:عندك الصلاحيه اسبوع بعده اطلقه
حمزه: طحت وين استرحت 😏😏
طلع حمزه وعمر من المخزن وسكر حمزه الباب
حمزه: توا النكلم الجماعه يرفعوه
سند: تمام انا طالع
حمزه:تعال جاي ماقتلي قصة هدا
سند هو طالع: مره تانيه يا احبيب بنطلع
وطلع
حمزه كلم الشباب رفعو عمر لي الكتيبه
عمر عرف روحه انتهى 😂😂😂 امع سند مافيش لعب

نرجعو لي سند وتامي شن صار فيهم

حطيت ايدي علي وجهي ونبكي مش امصدقه انه كان يلعب عليا وما ايحبني ويكذب عليا وكيف سنتين ضيعتهن علي شخص كذاب وكان ايكلم في بنات امعايا
وربي واعره واعره بعد اتحب شخص تبني كل احلامك امعاه ايخونك ويكذب عليك احساب صعب بجد

سند مسك ايدي ورفع راسي وقعد يمسح في ادموعي
سند: نبيك قويه هو مايستاهل دمعه منك وربي خدا حقه انتي ماتبكي عارف شعورك زين وعارف الحب من طرف واحد واعر بس خليك قويه هو ما يستحق حبك ولا تبكي علي خاطره
انا كنت نبكي واعيوني ادموع: صح عرسه بعد شهر 🥺🥺😭
سند مسك وجهي بي ايديه الزوز: تاميتي افهميني وربي مايستاهل رفعت اعيوني وتالقو اعيوني في اعيونه فيه كانو اعيوني امعبيات ادموع وخشمي احمر
حضني سند كان اول مره يحضني فيها كان ضاغط عليا زي الي خايفني نهرب منه حط ايده ايمشي فيها علي شعري: اس اس انا معاك حا انخليك تنسيه وعد مني
انا:صعب ننسى واعره ياسند والله حبيبته من قلبي كان حبي ليه نضيف ليش دار فيا هكي
سند ضغط عليا حسيت اعضامي بيتكسرو
سند:اس معاش اتجيبي سيرته اسمعتي وانا امعاك توا تنسيه
انا:توعدني ماتخليني ابروحي
سند:تبي تنسيه
انا:اي 🥺🥺
سند:توعديني اي شي انديره اتوافقي عليه
انا:اي
سند مسحلي الدمعه الي عالقه في ارموشي
وباس جبيني: مانبيش انشوف دمعه نزله اسمعتي ومعاش اتفكريلي فيه الكلب
انا: وعد مش حا نبكي عليه ولا انفكر فيه
سند:ايوا نبيك هكي خليك قويه توا امشي كولي وتي روحك لي الرحله بكرا حا اتغير هلبا حاجات
انا: شكرا ياسند انك واقف امعايا برغم اني اغلطت وكلت وحدا مايستاهل وكسرت تقتكم فيا وقتلي كلام اخي ☹️🥺💔 بس انا مش رخيصه زي ماقلت

سند ادكر شن كان ايفلم: انا الي اسف اغلطت فيك بس كنت متعصب وانتي تعرفيني بعد نتعصب

انا 🥺🥺: بس مش هكي اتقول فيا
سند:خلاص انسي الي صار ورد بالك يتكرر وربي نقتلك يا فاطمه ورحمة امي نقتلك اسمعتي
انا 💔: الله ثبت مستحيل يتكرر
سند:انا نبي مصلحتك تبي اي شي تحتاجي شي انا جنبك ومعاك تمام
انا:تمام
صبيت بنطلع
مشيت خطوتين والتفتت ورايا كان سند امصبي
قربت منه : شكرا سند مش عارفه كيف نشكرك
سند :تبي تشكريني
انا: هههه اي
سند: بري كولي بس
انا ☺️: به ع فكره حلوه شقتك
سند: عجباتك
انا :امممم حلوه تهبل نيالها الي بتعيش فيها
سند 😂😂😂: ممكن انتي
انا 🥺: انت تستحق الي احسن مني 🥺🥺
سند 💔 : وليش
انا 💔: انت تستحق وحده اتحبك من قلبها وتسعدك انك شخص حنون وطيب
سند كان ايقدم وانا انوخر
سند: وكان سعادتي امعاك انتي
انا: 🥺💔 يمكن ماتعيش سعيد امعاي
سند زاد قرب مني: وليش
انا ثوترت:ااااه تحكي جد انت ولا تبصر
سند: وعلاش نبصر
انا:ااااااه
سند:جاوبي ليش
انا:عشان مريت في تجربه فاشله وانخاف نفشل امعاك
سند: قتلك ماتدكري سيرته توا بري اطلعي
انا: بس
سند:خلاص بري اطلعي
انا نزلت راسي :اسفه وطلعت

سند قعمز اووووووووف شن درت في روحي ليش نضعف بعد انشوف اعيونها ازح لازم انقوي قلبي وانخليها تنسا الكلب لانها ليا انا بس ملكي انا ومستحيل انخليها اضيع من يدي لادم نكسب قلبها هدي اهم مرحله توا هي مكسوره مجروحه لازم انا الي انداوي اجروحها حتي لو كانو اجروحها من شخص تاني
💔💔 بس هي غيبه مستحيل تفهم اني انحبها

رفع سند تليفونه واتصل

سند: جدي قاعد في البيت
جدي:اي
سند: اشويا وانجيك نبيك في موضوع
جدي: تمام
وسكر وطلع لي حدي

اما عندي انا طلعت من سند وكنت سرحانه كيف عمر يكدب عليا طول السنتين واحلامي الي بنيتها امعاه
يعني توا بيكون امع وحده غيري يعني وايقولها حبيبتي واتكون ام اعياله 💔💔 نزلت مني دمعه ساخنه مسحتها خديت نفس:انا وعدت سند مستحيل انفكر فيه ولا نبكي ياربي صبرني
مشيت لي حوشنا فتحتلي نور
خشيت
نور: خشي خشي شن صار امعاك
خشيت وكانت وعد امقعمزه هي ماما
سلمت عليها
وعد:لاباس قالولي تعبانه
انا:الله لايوريك باس
طلعت سندس من الدار
سندس: جيتي حبيبتي
وعد:وين كانت
سندس 😒: تعالي تامي
انا: كنت عند ابرار
ماما: توا كانت هنا علاش ماشيتها اتعبي في روحك
انا: لا عادي مش تعبانه
وعد : انا بنمشي ياعمتي محمد يبيني في الشقه قالي تعالي ضروري نبيك صبت تمشي وتعوجع قريب طاحت 😂😂😂 علي اساس تقهر سندس

نور😂: ليس علي المريض حرج
سندس:تعالي تامي نبيك
خشيت لي الدار ولحقني البنات

انا حكيتلهم كل شي الا كلام الي صار بيني وبين سند اخر شي
بيسان: خزي حقير ماهو ياما حدرتك منه وما تسمعي مني
نور: محقره الكلب بس برد علي قلبي سند كيف عاطيه طريحه لعند ملامحه راحن
سندس: يستاهل الكلب وربي كنت ما متريحتله
انا:تعرفو يابنات صح مضايقه وزعلانه بس حمدت ربي انه كشفه قبل لا انزيد نتعلق فيه اكثر تعرفو ربي ايحبني وراني حقيقته
اماني: والله مايستاهل توا تلقي الي احسن منه
رن تليفون نور
حي يابنات اسكتو
انا والبنات: خيرك
نور: قبل اشويا اتصلت بخالد ما رد توا اتصل حي عليا يابنات شن انقول
انا 😂: ماانتي الي متصله تفضلي حليها ابروحك
سندس:اسكتو خليها اترد
نور: احممم وفتحت الخط
خالد:الو
نور رققت صوتها: هاي
خالد: يانعليا من الصوت
نور:من امعايا عفوا هدا هاتف سومه
خالد كان امتنح في الصوت: عادي انولي سومه علي خاطرك
نور ضحكت: هههههههاي لا يابيبي شكلي غطانه
خالد: يانعليا بيبي مره وحده ذبت 🤤🤤🤤 ياناس
نور:باي بنسكر واحد مجنون
خالد :تي انتي خليتي فيا عقل يابنت
نور:ههههاي اتشاو يابيبي وسكرت
نور:ووووووه عليا 😂😂😂😂
كلنا نضحكو 😂😂😂😂
انا:حي مانحساب خفيف هكي
سندس:طاح بوجهه
نور:وتضحك حي علمها شوفي قلبي 😂😂😂
اماني: حي لو يعرف انتي حي انتي ماتعرفيش خالد
نور:ماتزيدي اتخوفيني من وين بيعرف
اشويه توصلها رساله من خالد
(الحلو مخطوب لا ايراجي في المكتوب)
ئبعدها رساله تانيه
(والله حبيتك تريحتلك ممكن نتعرفو )
نور شوفو شن دزلي

انا:تي كيف ايحب في دقيقه
نور: وربي اتشوفي كيف انشفعه
سندس:😂😂 وربي متشوقه شن بديري

بعتتله نور رساله
(كيف يعني اي حد اتحبه قلبك فندق يستقبل كل دقيقه)

خالد(نعتبره قصف ولا كيف)

نور (اعتبره زي ماتبي )

خالد قعد يتصل بنور هي ما تردش
ادير في جو اني تقيله 😂😂😂

قعدنا انخططو انا والبنات شن بنديرو لي الزرده بكرا لانه ماشين اسبوع وشن بنرفعو

عند وعد
وعد: تي مزال المفعول انا اعطيتك الفلوس
بسمه مرت عمي: مزال يا بنتي حتي المره الي كلمتها اليوم قالت ياخد ايام وبعد يبان تاثيره وتموت
وعد: اوووووف اتشوفي فيها قاعده لوطه اكيده امعا انا ماصدقت اتجوزته بعد شنو
بسمه: انا امعاك تاخدي الي تبيه توا ديري كيف ماوصيتك
وعد: قبل اشويا هاله اختي كلمتني
بسمه: اي توا كيف صكرت منها
وعد: وربي عقلها جنهم الفرخه هذي
بسمه: اكيد طالعتي
وعد: هههههه والله كلنا طلعنالك ناخدو الي نبو
بسمه: هيا سكري خلي نمشي اندير العشاء لي عمك
وسكرت

سند: …..
جدي: تمام زي ما اتفقنا خليها لين نرجعو من الزرده تمام
سند:… تمام

هاله:…….
بسمه:……..

#يتبع

اعطوني رايكم فيها
توقعاتكم لي الحلقه الجايه شن بيصير في الزرده
نبي تتفاعلو حبايبي فتحت اقروب خاص بيا اسمه روايات ميرو احمد

اترك رد

زر الذهاب إلى الأعلى