حوار صحفي مع الكاتب الشاب حسن الجامعي | القلم الناجح
فنون عربية

حوار صحفي مع الكاتب الشاب حسن الجامعي

المحتوى

حوار صحفي مع الكاتب الشاب حسن الجامعي

حوارنا اليوم مع الكاتب الشاب الموهوب حسن الجامعي الذي اثبت وجوده بقلمه رغم صغر عمره

الا وانه اصبح له اسماً بين كتاب ليبيا واليوم هنتعرف عليه اكثر من خلال حوارنا معه الحوار خاص بالقلم الناجح

تقديم وتنسيق المحررة : نورهان مصطفي

الاسم الحقيقي او اسمك الادبي

حسن الجامعي الحقيقي و الأدبي ❤

 

حسن الجامعي

البلد / المحافظة

حاليا عايش في تركيا…بسبب مشاكل صحيه في العائلة وظروف يعني ف اضطرينا ان نحنا نسافر ل تركيا طبعا مشيت في بداية 2020 ❤
وقريبا رح نروح لليبيا / طرابلس

بالسلامة ان شاء الله

طيب كم عمرك

ان شاء الله يارب ❤
مواليد 5 / 8 / 2003 ❤
ماشاء الله عليك

مواليد ف مدينة ( بنغازي )

تسلمي يارب ❤

طيب ايه طموحاتك الادبيه والشخصية

ان نكتب سيناريوهات افلام و مسلسلات و مقاطع سكتشات للقنوات والفنانين ❤

طموحاتك الشخصية
ان نكون انسان ناجح و محقق معظم طموحاتي و مخططاتي ونكمل دراسة للجامعه وناخد الشهادة متع تخرج بإذن الله ❤🙏
باذن الله بالتوفيق والنجاح الدائم في كل مجالات حياتك
 

ماذا تعنيلك الكتابه

الكتابه تعنيلي هلبا حجات…شوفي انا شخصيا لما يصير معاي شي حلو او خبر حلو نعبر عليه عن طريق الكتابه نحكي قداش انا فرحت بالشي هذه عن طريق الكتابه…ولما يصير معاي موقف حزين او مؤسف او موقف مش حلو نكتب يعني نعبر على اللي في داخلي عن طريق الكتابه…الكتابه عندي شي يومي لازم نديره زي الماكلة والشرب تماما ❤

وليس الكتابه تعني لي شهرة زي الكتاب الجدد اللي طالعين حاليا…لالا مش على خاطر ننشهر انا بديت هكي بداية من نفسي بديت بالشي اللي انا نحبه موهبتي بديت فيها نعطي العبرة منها…تخلي الناس يستفيدو منها
وان شاء الله يارب الى كل اللي قرولي تكون عجبتهم رواياتي واستفادوا و خدوا العبره منها ❤

 

طيب مين مثلك الاعلي من كتاب الوطن العربي

الكاتب :- عمر العوضة ❤
الكاتب :- عمرو عبد الحميد ❤
المحلي : ميلو حسسسن زهور جمال الدين اروى الطاهر المسلاتي

 

ممكن نتعرف علي اسماء اعمالك الادبيه

  1.  حكايتين في حكاية ( حقيقية ) 
  2. ليس وطني ( مقتسبة من الواقع ) 
  3. إنتقام الحب ( خيالية ) 
  4. اولاد المدينة ( خيالية )
  5. إغتصاب دمر حياتي ( مقتسبة ) 
  6. رغم إبتزازي ( واقعية ) 
  7. يوميات الثانوية ( واقعية ) 
  8. المرأة الليبية ( واقعية )
  9. جريمة في العائلة ( خيالية ) 
  10. حب إجرامي ( خيالية ) 
  11. نار الإنتقام ( واقعية ) 
  12. عشت وشفت ( حقيقية ) 
  13. الشيطانة ( قريبا )

طيب ايهم اقرب الي قلبك

{ حكايتين في حكاية }
{ اولاد المدينة }

كل وحده فيهم حكيت فيها على حجات صارت قدامي…وكل وحده قصتها واقعية ومش من خيال الواسع وكانوا قراب هلبا الى قلبي لدرجه ان تشجعت ان نستمر في الكتابه بسببهم ❤

 

 

طيب لو حسن الجامعي القارئ مش الكاتب بيحب يقراء رواية يحب تكون اكشن ،رعب،رومانسيه،اجتماعية

ويفضل تكون حقيقية ، ام خيالية
( اجتماعية )
بفضل تكون حقيقية طبعا ❤

 

ولمين تقراء

لحتى ناخد العبرة منها
نقرا لهلبا كتاب يعني عطيني محليين او عالميين ؟
هل في رواية قرائتها وكان نفسك تكون انت الكاتب
 

عالميين

طيب في رواية كتبتها كان نفسك تكون انت البطل بتاعها

اها طبعا
كان نفسي انكون بطل رواية يوميات الثانوية لأن هو شخصيته قريبه مني شخصية ( زياد )
بيحب اصحابه اووي ضحى عشانهم ومضحي يعني وكدا ❤
شخصيته قريبه مني بنسبة 90%
يعني كأنك بتكلم على نفسي ههههه😂❤
طيب ماذا يعنولك القراء

اللي بيقرولي انا ؟

اه متابعينك
بيعنولي عيلتي الثانية يعني لما نبي نمشي للعيلة الاولى وحاب ان نرجع للعيلة التانيه نخش على فيس بوك ونزورهم ونزللهم حلقة من رواية…كلامهم جمييل بكل ورائع محفزز جدا…والمعجبين هلبا بكل بيحسسوني ان حاجه كبيرة من حبهم ليا…وانا نحب نتعامل معاهم زي اخوه ليا والكبار اللي بيقرولي زي افراد عيلتي الكبيرة نحترمهم ونحب نقرا تعليقاتهم…ونشوف حتى اسماء بروفايلتهم نعرفهم ونفرح لما نشوف تعليقات منهم❤…امهات و بنات كبار و صغارو شباب كبار وصغار كلهم عيلتي وعارفهم ونحبهم ( عيلتي الثانية ) ❤🙏

لو حد انتقد حسن الكاتب نقد بطريقة مستفزة  ماهو رد فعلك

واللهي بصراحه مشكلة كبيرة جدا هذه بنسبة ليا … اولا لما نشوف تعليق فيه سب وشتم ولا يمكن نسكت يعني نرد عليه بطريقه عنيفه…ويجوا بعدين يقولولي هذه مش اسلوب كاتب يا كاتب…هو انا مقلتش حاجه عيب او نزلت مستواي لالالا…بالعكس هما فاهمين غلط بين ان انزل مستواي للدرجه هذه وبين الدفاع على النفس…وبعدين بعد ما زهقت ومليت منهم نحدف تعليق ونطلع من الجروب بكل بساطه بدت ردود فعلي بااااردة جدا 😂😂…ومعظمهم رجعوا وتأسفولي وهكي يعني فا بديت معاش نهتم بيهم ابدا ابدا ولما سبتهم ومعاش اهتميتلهم…معاش شفت تعليقات هكي اصلا لأن عارفيني مش رح نرد عليهم❤😂
 

طيب ايه الاكل المفضلة عندك

كل الاكل 😂
 
بمزح
  • عصبان ( اكلة ليبيه ) ❤
  • بيتزا ❤
  • شاورما ❤
  • مكرونة بشاميل ❤
  • همبورجر ❤

ماهي البلاد التي سافرت لها وماهي البلد التي نفسك تسافر لها

جميع مدن ليبيا شفتها 😂❤

اما في تركيا :-

اسطنبول❤
سبانجا ❤

فرنسا ( باريس ) ❤
ايطاليا ( روما ) ❤

 

ماهو اسم رواياتك الجديدة

( الشيطانة )

تتكلم الرواية على مشاكل اجتماعيه بين الناس…وبالتحديد النساء وكيدهن والمشاكل اللي بتصير مع الناس والنفاق الاجتماعي…وكل ده مرتبط بشخصية وحده بتعرف كل اسرار صديقاتها ومن هنا تبدأ رحلة الانتقام منهن…ما سبب الانتقام…وما هي مصلحتها من ذلك…كله رح نشوفوه في الرواية ( الشيطانة ) ❤

ونتمنى تعجب الكل ويستمتعوا بيها زي كل الروايات السابقة ❤

ما رايك في الكتاب والكاتبات اللي بيكتبوا اعمال فيها الفاظ او وصف غير لائق او مخل؟

هادم مش كتاب بصراحه نبي نقوللهم ان هما فاهمين الادب غلط او يشوهوا في سمعة الادب يبوا يخلوه كله هكي كلام غير لائق اسلوب غري او اسلوب يحث على كراهية الادب …وهدفهم واحد طبعا…ان يطلعوا الكتاب كلهم زيهم وزي كتاباتهم اللي غير لائقه اصلا !
ونتمنى انهم ينقرضوا بصراحه ولا يكتبوا كتابات ادبيه محترمه وفيها عبرة ❤

 

لو حد سرق رواية ليك ونسبها لنفسه ماهو رد فعلك

بصراحه اصلا سرقوا مني رواية من رواياتي و شفته كيف منزلها في قروبه وطبعا هو شاب راهو و ليبي…شفته كيف منزلها وحاط اسمه ومنحي اسمي😂…بجديات زعلت عليه لأن هو ياخد في تعب غيره…وطبعا شفت القروب ضعيف جدا ومحد يقراله اصلا…تعرفوا ليش؟
لأنها الرواية ليا انا والكل عارفها ان ليا…وهو اصلا دار هكي عشان انا نتعصب ونزل بوست ان الفانز يروح يهزبوه او يحذروه لالا ردت فعل طبيعية لأن اصلا كنت متوقع انها تنسرق ❤

 

رواياتي تعتمد على اسلوبي وحروفي واي واحد بيحاول بيسرقها رح ينفضح لأن مفيش واحد يقدر يكتب زي اسلوبي بزبط😂❤

وبعد اسبوعين من سرقة قروب متعه تقفل على اخر لأن في من فانز شافوا رواية متعتي عنده عملوا بلاغات وتصكر الحساب مع الاسف🥺…ربي بياخد الحق بدووون ما عملت حاجه اصلا😂❤

عاوزين نتعرف علي حسن الانسان مش الكاتب  هتقولنا ايه

انا انسان عادي جدا جدا…عندي اهم حاجه في حياتي كلها عيلتي افراد عيلتي اللي رح يقروا السؤال هذه هما يعرفوا نفسهم عمتي ، جدتي ، جدي ، خوتي الاثنين ، وصديق عمري واخي التالت محمد❤…اهما اهم حاجه عندي يعني اكتر شي نهتم بيهم بمشاكلهم اكتر من مشاكلي انا شخصيا…يعني مهما يكون عندي مشاكل مش رح نحلها الا لما نحل مشاكلهم هما وامورهم هما❤…مفيش اصلا حاجه تستاهل نزعل عليها الا العيلة…الحياة مش واقفه على حد لا صديق خاين او شخص عزيز عليك من برا العيلة خاين…مبيستهلش واصلا لما الكل بيفوتك او بيسيبك مش رح تلقي غير عيلتك في جنبك في كل الاحوال ف الحزن و الفرح وفي الحلوة و المره…وهذه اهم حلم عندي ان ربي يخليهم ليا ويحفظهم اهم شي العيلة…اما الحب والكلام هذه يجي برووحه مش انت تجيبه لأن نصيب ومكتوبلك يجيك برووحه❤…وربي يحفظ اي شخص لعيلتة ويارب يرحم اللي فقدهم لأن فقدانهم صعب بجد❤…!

كلمة اخيرة تحب تقولها لمحبينك

نحب نشكر كل شخص علقلي وعبرلي على اعجابة على رواية من رواياتي وكتبلي تعليق فرحني وخلاني نستمر في الكتابة❤…وربي يحفظكم ويخليكم ليا ونتمنى انكم تحبوا رواياتي الجايه ونكون دائما عند حسسن ظنكم وتحياتي لكل شخص قاعد يقرا في الحوار سوا عرفني ولا معرفنيش وربي يخليكم لي متابعيني…تحياتي #حسن_الجامعي❤
شكرا ليك كاتبنا الرائع وباسم اسرة القلم الناجح
نتمنالك التوفيق والنجاح على المستوين الاجتماعي والعملي
وشكرا جزيلا لوقتك وسعة صدرك

 

نحب نشكر جميع فريق مجلة القلم الناجح…مجلة ست الحسن سابقا…نحب نشكر الادمن اللي دائما متواصل معاي وذووقكم استقبالي وثقتكم فيا وبكتاباتي ❤
 
ليا الشرف ان درت معاكم حوار رائع وبسيط وحلو هكي استمتعت كثيرا معاكم ❤

حابب تضيف اي شئ ع الحوار

اممممممم
نحب نشكر الكاتبة ميلو حسسسن و صفحة ع الفيس لأن هما اللي دعموني في بداياتي وكتباتي من اول رواية لأخرها ❤

 

اترك رد

زر الذهاب إلى الأعلى