خَفايَــا السرايَــا للكاتبة ميرا ياسر | القلم الناجح
روايات ليبيه كاملة

خَفايَــا السرايَــا للكاتبة ميرا ياسر

جميع الحقوق محفوظة

رواية خَفايَــا السرايَــا للكاتبة ميرا ياسر


الحلقة الثانية عشر ~ 🖤

جلنار ناضت تجري لغرفتها وقطعت الملف ستين طرف ولوحاته في السلة وقعمزت علسرير تاخد نفسها ……

من هدا الي يعرف عليها السر هدا ، كيف حد ممكن يوصل لحاجة خاصة جداً زي هيا ! 💔

خشت عليها جيهان كيف مروحة من برا…. ماما نبي السكارف الاسود متاعك ونبي….وسكتت لاحظت وجها قالب علاصفر ، خيرك ماما ؟

جلنار سارحة وانتبهت .. اه ؟ لا شي نحس ف روحي مصدعه

وجت جيهان حطت ايدها ع جبهتها.. شن تحسي ؟
جلنار.. لالا متاخديش فبالك هوا شوية دوخة وتوا تمشي
جيهان.. ماشي … اني بناخد السكارف الاسود متاعك
جلنار ابتسمت بالسيف.. ماشي حبيبتي زي ماتبي

وخداته جيهان وطلعت ……. وقعمزت جلنار علكرسي وحطت ايدها ع راسها ورجعت بالوقت للتالي وقعدت تتفكر وترجع بزمانها……..

……… ياماما قتلك منبييششي مش طايقاته خيركم عليا هادي حياتي اني واني الي نقرر شن نبي وشن منبيشش !

الأم… ياغبية من زيك تطيح واقفة واحد معبي وفلوس وخدم وحشم تي والله لما يعيشك ملكة

جلنار…. اني منبيش ! خيرنا حني شن ناقصنا حتى الفلوس عندنا وبزيادة علاش تجبريني
الأم.. باش تعيشي ف نفس المستوى الي انتي عايشة فيه توا تبي فكاكة هادي !!
جلنار.. اووووف
الأم.. غير صلي علنبي
واطلعي المقابلة الشرعية متعتك توا بعدين ساهل
جلنار.. ياماماا
الأم.. بنت !

~~~~~~~~~~~~~~

جلنار.. السلام عليكم
صلاح ..وعليكم السلام

كانو الزوز متحشمين والتوتر زايد فلاجواء

صلاح.. اني اسمي صلاح ، عمري 34 سنة … حاليا مش ح نقول حاجة بس لو انتي تبي تعرفي اي شي عليا ح نجاوبك
جلنار بغرور.. مفيش شي محدد محتاجه نعرفه
صلاح طبس راسه ورد بأدب.. شوفي ؛ عارف ان فكرة زواج تقليدي و حد متعرفيشي صعبة عليك … وصعبة عليا حتى اني.. بس اعطينا فرصة خلي نتعرفو ع بعض لعل وعسى نتفاهمو اني وياك .. لعله خيراً وانتم لا تعلمون
جلنار ……….

~~~~~~~~~~~~~~~~

رِوايــات تُـلامِس الوَاقِـــع 🔥🔥

👑 مِــيرآ يـاسِــــر 👑

خشت للدار فتحت الباب قعدت تهوي من الريحة القذرة وفتحت الرواشن

الأم.. يانهاري الاسسود ريحة الدار كلها سكير … قاعد تشرب في البلي هدا غبااارتك ….. هاتموووتني ناقصة عمر وربي
نزار … شافلها بنص عين و رجع يكمل السيجارة الي ف ايده
الأم.. خوك مشي يدير فمقابلة شرعية نحسابك مشيت معاه فيوم زي هدا مش مفروض تبدا معاه !
نزار..وشن بنمشي ندير هوا الي بيخطبها ولا اني ؟
الأم.. ياحليييلي منك يارب صبرني علمصيبة الي ابتليتني بيييها .. اني والله ماجبتش غير فارس وصلاااح بسس …. كل واحد فيهم راجل ملوي هدومه انت لمن طالع هكيييي صااايع مفهمتششش …انت ابتلااء من ربي
نزار.. طالع لخوك خالي فوزي مجبتاش من برا
الأم… هداكا مات بغضب امي عليه حسبي الله ونعم الوكيل بنتحسب ع ضناي ف اخر عمري يارب اهديييه وصبرني وخللاص

~~~~~~~~~~~~~~~

رِوايــات تُـلامِس الوَاقِـــع 🔥🔥

👑 مِــيرآ يـاسِــــر 👑

أم جلنار… شن قلتي !
جلنار.. مش عارفة ؛ بس مبدئياً يبان كويس
ام جلنار.. قتلك كويس مالا شن كان تشوفي الفيلا الي بيسكنك فيها قصصصر يابنتي قصر.. هاتعيشي هانم وبرنسيسة
جلنار.. قالي غدوة تقدري تجي انتي وامك تشوفي الفيلا لو موافقين ولو تبو اي تعديل حابة تضيفيه عادي
امها..اييييي عين العقل

توا علاش نجيبلكم اني ف ماضي جلنار هي وصلاح ؟ كل مرة بنحكيلكم على حاجات من الماضي

وشن السر الي كلكم تبو تعرفوه ؟

ح نقولكم.. بس مش توا 😌😂

خلونا قبل نشوفو وسن شن صار معاها

وسن.. كيف عرفت مكاني؟؟
تيم بجفاف.. عرفت وخلاص ؛ وجاي بيخش سكرت عليه
وسن .. اسفة ، اني وامي بروحنا

تيم نسي روحه انه ميجيش يخش وهما بروحهم🙂

تيم .. به تقدري تقابليني فلكافي الي لوطة ؟ نبي نتكلم معاك شوية
وسن.. مفيش داعي تيم ، منبيش نتكلم فلموضوع كل شي انتهى
تيم…..بحدة ، اني مناخدش ف رايك تدوي معاي او لا قتلك نبي نتكلم معاك ….. هانستناك لوطة

ونزل وطلعت امها من الدار… هدا من؟

وسن تنهدت … تيم
امها …. شن يبي ؟؟؟؟

~~~~~~~~~~~~~~~~~~

رِوايــات تُـلامِس الوَاقِـــع 🔥🔥

👑 مِــيرآ يـاسِــــر 👑

كان تيم مقعمز علطاولة فلكافي الي تحت فلفندق يراجي فيها

ونزلت وسن وهي واضح من ملامحها ان نازلة بالسيف عليها

وقعمزت مقالتش ولا حرف….

تيم.. شن تشربي ؟
وسن.. شي
تيم…. لو سمحت ؛ وشاور ب ايده….. زوز قهوة عربية وشاف لوسن .. قهوتك معدلة ولا؟ …..وحدة سادة والتانية معدلة لو سمحت
وسن………..
تيم .. توا نبي نفهم بهدوء شن الي درتيه
وسن.. الصح ولي مفروض يندار
تيم…….. من جبرك عالشي هدا وسن ؟
وسن …… ماحد ؛ وطبست راسها
تيم…….وسن ؟ تكلمي…….. عارف ان جلنار قتلك حاجة
وسن بدت الدموع تتعبى فعيونها… ماقالت شي
تيم……. وسن ، عمي صلاح حطك فلمكان هدا لان عارف انك بتحافظي ع كل شي هوا بناه
وسن … بصوت اقرب للبكي … بس اني مش قد المسؤولية هادي ياتيم
تيم… لا قدها ونص….والي درتيه هدا كأنك رميتي كل شي هوا داره علارض.. انتي مفكرتيش ف الي ممكن يصير لما تسيبي الوقت هذا بالذات ! حني خاشين ع صفقة كبيرة مش وقت قرار زي هدا بكل !!
وسن.. تيم اني مش ح نقدر والله 💔 اني هكي ح نفسد كل شي صدقني و……
تيم… به ش علاقة استقالتك ب انك تسيبي الحوش !!؟

و وسن كيف بتتكلم قاطعها تيم ومعطاهاش فرصة…….

تيم.. اني عارف كل شي ! وعارف ان جلنار ابتزاتك باش تديري هدا كله وتبيني انه الموضوع منك انتي مش منها هيا باش متنحرمش من الميراث والفيلا !

وسن…….. سكتت شوية وبعدين الدموع بدت تنزل منها من غير صوت ..وقالت ؛ كل شي تعرفه ؟
تيم.. كل شي ياوسن ….

و وسن غطت وجها من الشعور بلاهانة الي حساته وبدت تبكي 💔

تيم….وسن نزلي ايدك ،
وسن……
تيم.. نزلي ايدك ياوسن!
وسن… لو مدرتش الي هي تبيه هاتفضحني
تيم بحنية… محدش هايقدر يتعرضلك طول ما اني موجود …… صدقيني……
وسن.. بس اني ….وامي
تيم… خوديها كلمة مني جلنار هاتكلمك توا وتترجاك باش ترجعي الحوش وترجعي الشغل
وسن..وعلاش ! وشن الي مخليك متأكد بالشكل هدا !
تيم…. لان اني لما نحط حاجة ف راسي نديرها نديرها ……. ميغركش منظري بلبدلة والتسريحة المنظمة هادي انا صايع قديم 🙂

وسن ضحكت وسط دموعها😂

وسن.. مظنش ح تكلمني .. جلنار تبينا نطلعو من حياتهم ب اي طريقة …. ومستحيل تتنازل
تيم.. هههههههههههه ح تتنازل.. صدقيني ………

ورن تليفون وسن فنفس اللحظة ، قاماته لقت جلنار الي طالبة ! .. شافت لتيم بخوف وقالها ردي …….

ردت…. الو
جلنار.. اه وسن حبيبتي كيف حالك
وسن استغربت ف نبرتها المتغيرة 180 درجة…. كويسة ؛ شن مزال متصلة تبي !
جلنار.. نبي نجي نتكلم معاك ضروري …..
وسن…. معاش في كلام بيني وبينك
جلنار.. اسمعيني بس ياوسن …. الي درته كان غلط اني عارفة ؛ بس اعطيني فرصة نوضحلك وجهة نظري……. اني جاية فلطريق توا قريب نوصل الاوتيل… هي نتلاقو وسكرت

وسن.. مستحيل للي نسمع فيه… انت شن درت !
تيم تنهد.. كل واحد فلدنيا هادي عنده حاجة يخاف منها ويخاف ان تنكشف ….
وسن..وشن هي الحاجة هادي ! الي خلت جلنار تنقلب معاي هكي !

ابتسم تيم بمكر …… الاحسن متعرفيش
وسن.. به انت كيف عرفت ان جلنار ابتزتني ؟
تيم…….. صدقيني مش كل شي لازم تعرفيه… المهم اعرفي اني معاك ف كل شي
وسن.. علاش تدير ف هذا كله معاي ؟
تيم…… ههههه هادي ح نجاوبك عليها ، بس مش توا

وسن… اني مش ح نقدر نرجع للحوش بعد الي صار ياتيم… ولا نبي نرجع للشركة خلاص نبي ننسى كل شي..وبدت تبكي ؛ اني تعبت ….نحس ف كل شي فوق من طاقتي

تيم تعصب وناض واقف خدي جاكيته وبيمشي ….. لو عمي صلاح يندري عليك ضعيفة بالشكل هوا مكانش سلمك كل شي …من اول مطب طحتي فيه كنتي تحسابي مثلا ان جلنار بتفرشلك الطريق ورد؟ وعمي صلاح فاهم هكي ؟ …….. هايجيك مسج علواتس بعدين افتحيه وهاتعرفي السبب الي خلا جلنار تنقلب هكي…… مفيش سبب يخليني نبعتهولك الا باش تتأكدي ان مفيش حد خير من حد….وكلنا عندنا عيوب ونغطو عليها وكلنا نغلطو.. بس في ناس تصلح ف غلطها وتوب..وفي ناس تصلح فلغلط بغلط !

ومشي ………

اما وسن الكلمة وجعتها فنص قلبها 💔 معقولة هي ضعيفة فعلا زي ماقال………وخانت الامانة الي خلالهالها صلاح …. حست روحها ضايعة ومشتتة ..وقبل ماتفيق من ضيعانها لقت جلنار خاشة قدامها…….

جلنار …ويسسو حبيبتي سامحيني علتأخير

~~~~~~~~~~~~~

تيم ركب سيارته وجاه تليفون ………

ورد…

… شن صار ؟

تيم…. نفذت كل الي قلت عليه ….. وهانبعتلها صورة التحاليل زي ماطلبت …..

.. تمام قولي شن يصير معاك اول ب اول ، وسكر

وقعد هالشخص الغريب من ورا شاشة كبيرة يراقب في كل شي يصير بلحرف الواحد في الفيلا متع صلاح……. كل شي بالتفصيل الدقيق .. كل شي !

بس من هدا ومن يكون ؟ مزال مش ح تعرفو توا

~~~~~~~~~~~~~~~~~~

جلنار…… وسن ، اني ح نخش في الموضوع طول …. اني عارفة اني غلطت في حقك الفترة الي فاتت … بس اني حلمت بصلاح رحمة الله عليه 💔 حلم مكانش حلو بكل مهم فيقني ع كل شي ندير فيه…… انتي بنتنا ومنا وفينا ، وقعدت تقولها في هلبا كلام كان بمثابة تشويش ليها وبالها مش معاها بكل…….

لحد ماوصل المسج ع تليفونها وجلنار مستمرة في الكلام كأنها كاتباته قبل ماتجي وتسمع فيه وحافظاته عن ظهر قلب …..

وسن شافت المسج وقرتها وشافت طول لجلنار الي لاحظت تغير ملامح وسن طول من الصدمة الي قرتها………

جلنار……وسن خيرك ؟
وسن………….. لا شي ، مصدومة م الي تقولي فيه
جلنار…. هدا هوا صدقيني .. اسمحيلي نصلح غلطتي هادي وترجعي معاي انتي وحواء للفيلا … وترجعي تمسكي الشركة تاني وننسو الي فات …….

وسن ف خاطرها…. فعلا كل انسان وليه سره .. كل انسان وليه ماضي يحاول يخبيه ويشطب عليه… كل انسان مهما كان جبروته وقوته ليه نقطة ضعف … كل انسان ليه جانب سيء ميحبش حد يعرفه ولا يشوفه !

عرفت علاش نقلبت جلنار معاها..خوفها من ان هي تنكشف….. وتنفضح و تبدا سيرتها ع كل لسان…….

جلنار بعد ماكملت كلامها الي مكانتش وسن مركزة في ولا حرف فيه من صدمة الي قرتها …..

جلنار… شن رايك ؟ موافقة ترجعي معاي الفيلا….

و وسن استاقضت ان تكلم فيها……..

وسن……. كلامك مخشليش راس
جلنار.. عفوا ؟
وسن….. زي ماقتلك ، اني وامي عندنا كرامة وقدر مش امتى ماتقولي نمشو نطلعو وامتى ماتقولي نجو……
جلنار… به شن تبي واني انفدهولك ؟
وسن.. ههههههههه شن الي قلبك هكي فجأة ياجلنار ؟

جلنار نصدمت لان اول مرة تكلمها باللهجة هادي و اول مرة تقولها جلنار حاف ! .. بتبدا تستقوى ويسو بعد الي عرفاته 😂

بس سكتت وزمطتها ، حكم القوي بقى🙂

وسن…. وقفت بثقة وقالت….. لما يجيني مزاج نرجع هانرجع

وخلتها متنحة فيها ومشت….. و اول ماخشت وسن الاصانسير استغربت فلقوة الي جتها باش ردت عليها هكي ! بس شن ح دير بعد الي عرفاته ! …

كان اخر شي ممكن تتوقعه ويخطر ع بالها ويخطر ع بالكم حتى انتو !

خشت للدار متعها وشافتها امها…. شن صار معاك ؟ هدا كله مع تيم ؟ شن يبي ؟؟

وسن… يقنع فيا نرجع للشركة
حواء..وجلنار ان شاء الله من بيها ؟
وسن.. منعرفش قالي متقلقيش من ناحيتها اني بنتصرف
حواء..وانتي شن بديري ؟
وسن.. منعرفش … ماما اني تعبانة بنخش نرتاح شوية باهي ؟

وخلتها وخشت الدار فتحت تليفونها….

وعاودت قرت المسج الف مرة تتأكد من الي تقرا فيه………

خ نحكيلكم باش تهفت هالدودة الي بتاكلكم كلكم😂….

الملف الي وصل لجلنار كان عبارة عن تحليل DNA ……..

لشكون ؟ … لجيهان…. حسب ما مكتوب في التحليل ان جيهاان….

جيييهان……..

جيييييهان 😂

متكونش بنت صلاح ………….!

اكيد كلكم طبعا مصدومين كيف ومن وعلاش…. بس اكيد عرفتو من خوف جلنار لما شافت التحاليل ان محدش عنده خبر بلموضوع بككككل

والي وسن مكانتش تقل صدمة عليها لما عرفت بالشي هدا…… جيهان تكون بنت من ؟ وكيف صار الشي هدا ! صلاح كان يعرف ولا لا ! وجيهان نفسها تعرف او لا !!!!

ومن الي بعت التحليل هدا لجلنار وكيف داره ومن الي يراقب فيها ؟

هدا مزال مش ح تعرفوه توا ! … منجيبهالكمش كلها ف مرة وحدة باش متنجلطوش 🙂

هي هكي وحيدة وحيدة … مرة شاهي ومرة …؟؟ 😂

~~~~~~~~~~~~~~~~

رِوايــات تُـلامِس الوَاقِـــع 🔥🔥

👑 مِــيرآ يـاسِــــر 👑

جيهان ……. هدا مضاد تاخده مرتين فليوم لمدة 5 أيام … وتجيني بعدها طول نديرلك مراجعة
المريض.. تمام بارك الله فيك ،

وطلع.. اول ماكملت كيف بتطلع جاها تليفون……..

…… الي متفقين عليه ضروري يتنفد خلال يومين …….

جيهان.. شن صار ؟ مش كان في حد يدور ورانا؟؟؟؟

…….. ديري طريقة بحيث ميكشفش بيها حد…… المهم خلال يومين يكون عندي الي نبيه ، سلام……..

وسكر…..

جيهان…اوفففف…. اوف اوف اوفف

وقامت تليفونها اتصلت بعبسي…

جيهان.. الو ؟ عبسي كيف حالك ……………..

~~~~~~~~~~~~~~~~~~~~

تاني يوم…..>>>>>>

نور….. وين البنات قاعدين مجوش !
هناء.. حياة ع وصول
نور.. الفرخة هادي بتجلطني بعمايلها……..

وكيف خشت المكتب بتتصل بتيم تشوف شن صار معاه تفاجئو ب الي جاية قدامهم………

نور وهناء …وسسسن !
وسن.. اي ؛ وسن ………….خيركم ريتو جن ؟

وخشت مكتبها من غير ماتقول ولا حاجة ولا كأن صاير شي؛ وقعمزت علكرسي…

وسن.. نور ، وين ورقة استقالتي ؟
نور وهي مصدومة…. اهيا
وسن.. هاتيها ….وخدتها شقتها نصين………..وقالت ؛ هاتيلي اخر المستجدات الي صارت اليومين الي فاتو …… نص ساعه ويكونو ع مكتبي

نور حلت فمها مش فاهمة حاجة ! وكيف بتتكلم….

وسن.. بسرعة !

نور.. حاضر !

ومشت نور بسرعه تدير الي قتلها عليه وتكلم تيم تلبغه ب الي صار……..

وسن شافت للمكتب وتلمساته ب ايدها..

وسن……وديني لانبكيك بدل الدموع دم ياجلنار ………………….

شن هاتدير زعما وسن ؟ وهل الي عرفاته بيغيرها ؟ وهايغير طريقة تعاملها مع الامور وكيف هاتستغل الكرت هوا لمصلحتها وع شن ناوية ؟! كل هدا تعرفووووه نيكست … On MBC2 😂

يتبع………>>>>>>

#mera 🖤

1 2 3 4 5 6 7 8 9 10الصفحة التالية

اترك رد

زر الذهاب إلى الأعلى