رواية السجينه الحلقة التاسعة عشر للكاتبة فاطمه سالم الورفلي | القلم الناجح
روايات ليبيه كاملة

رواية السجينه الحلقة التاسعة عشر للكاتبة فاطمه سالم الورفلي

رواية السجينه الحلقة التاسعة عشر للكاتبة فاطمه سالم الورفلي

#السجينه
الحلقه :التاسع عشر مقابل الاخيره
…………….
….
منذر :الباين في شي ره لما سألته انت من عيت منو نغص بلماكله طولالمدير :تي بالك غصه عاديه حتى انت حاط عليه!…

منذر :الحق فيا لي نوقض فيك

المدير :تي غر برا برا اعطيه مايه

منذر :ارقد مرقد هاني ماشي

……
اني طول رجعت مكاني وقعدت نكح بس نسيت الباب مفتوح… خش عليا منذر معصب ومش منتبـه وعطاني مايه… عرفت اني هنا ان منذر لي يمدحه وعلى قد ما نديرله كأني نحـرث في بحر …..معناها مرادي في المدير اني هو لي يحل ويربط اصلا وقطع عليا منذر حبل افكاري…

منذر: شجو

اني يا عليك كميه نفاق فيه.. كشخت عليه وقلت :بخير من ربي… “وشبحت فيه بنظره تخوف وكملت “… :لكن من العبد استغفر الله وخلاص

منذر كش في بعضه :امم دايمه ان شاء الله

اني بتفنيصه :ان شاء الله لكن العبد ربي يهديه ولا يظله

منذر زمط ريقه:ان شاء الله

اني بي غل غلي:اميييين

منذر خاف :اني بنوض تبي شي!

اني :لا صحيت

منذر :سلمك سلمك

” وسحب تسحيب لين طلع… الباين منذر يمشي بالعين الحمراء… بس اووك…ح تشوف يا منذر ح تشووف.. وكليت كليت لييين عرفتها ماكله صح.. ونضت رفعت السفره للكوجينه ..وغسلتها وقعمزت على الكرسي…ونسمع في العاملين يحكو كانـو بعاد عليا وبيني وبينهم دولاب يعني يقدروش يشوفوني…

:اسمع معاش ينفع ره لازم ليوم نخنبو الكاصه

:تعرف انت به الرقم السري!

:نعرفه بس منذر يرقد هنا كيف الـراي

:لازم نكلمو الهوادي يساعدنا

:ايييي لكن الهوادي نصاب بياخد نص مبلغ

:احني يالله نوصلو لي ربعه تي تعرف المدير هدا لي يقولوله فطح الله هدا تعرف تي تحته فلوس تي تحته فلوووس يا را ما يغطوش عين الشمس حتى…

:غر يليل الليل بس

:لكن اسمع مش ح نهربو ره ح نقعدو هنا وبعد كم يوم نقولو بنسيبو لكن مش مع بعض كل واحد بروحه

:تم تم غر نتمو الموضوع هدا بسس

……..
اني هنا طووول طلعت من الكوجينه نخاف يشوفوني يديرو فيا كاينه… بس لحظه لحظه اسم “الهوادي “… سامعاته بس وييين وييين!…وحتى اصوات هادو سامعتهم…بس ويييين…اها تفكررررت…

فلاش باك..🌸🍃

طول طلعت من الدار وصكرت الباب بلمفتاح… قعدت قدام الباب.. شن ندير اني بس !؟… غر مني هديم؟…وشن يبو مني بزبط!؟…قعدت ماشيه وجايه بين باب الدار وباب الحوش… ونتلفت يمين يسار خايفه حد يخش… اي حقا الحمام حقا “حشاكم… خلي نمشيله….ومشيت للحمام ويادوب فتحت الروشن .. سمعت صوت

:كيف بنخشوله هدا

:ما عنده كيف يدير ولا يطلع…خلي نمشو للهوادي ونرجعو

:خلي كلاب ” حشاكم “.. هنا خليهم باش يسمع صوتهم يحسابنه مزال قاعدين

:تمام اربطهم بس عن يهربو

:تم تم

…..
انتهى فلاش باك
…………
اممم صار هادو انتووو!. بس من تكونو وشن تبو مني بزبط؟… وليش لحقتوني اصلا! ….بس زعما ليهم علاقه بي المبروك والمنتصر!.. الباين هك!..اني لازم نمشي لحوش الحاج خيري… وبالفعل طلعت من المقهى ومشيت لحوشهم كان باب المربوعه مفتوح قشطت الكتانه كويس وركبت الدرجتين.. ولما رفعت ايدي بنطقطق .. سمعت حمد ومختار يحكو في المربوعه… جيت بناديهم بس شدني الحديث…

حمد :اسمع به مني هادوما لي يبو نجم الدين وعليش مهتمين واجد بيه معقوله توصل لمواصيل لي يلقاه يدفعوله!

مختار تنهد :والله توقع بس الباين هلشبيب مداير كاوصه كبيره

حمد :يستر الله لكن اسمع كان جي نجم الدين ما ديرله شي ولا تكلم جماعه هدوكا مليناش علاقه في شي… كان هو راجل خير ويثمر فيه الخير اهو احني تكفلنا بيه ودرنا لي قدرنا عليه…. وكان هو بيتزوفت يبقى في كلام اخر

مختار :غر اسمع ما تقول شي لي بوي ره معاش يتحمل شي

حمد : تم تم
……
بقلم فاطمه سالم الورفلي

اني هنا اطمنت على اقل في ناس كويسين… قدمت خطوه وطقطقت…

حمد :هي هيا …. وطلع

اني :خير كيف حال

حمد شبحلي من فوق للوطا :احم خير خير كيف حال

اني ابتسمت:حمدالله في نعمه

حمد :ماشي ماشي… وين الايام لي فاتو نقلبت الدنيا عليك وين ديارك؟

اني :رجعت لبلادي

حمد :اممم ماشي ماشي غر نظم امورك ودير بالك على روحك ره في وحدين يدورو فيك

اني بتصنع : بالله؟…ومن هم

حمد :والله ما تشدش عليا واحد يقولوله المبروك و واحد يقولوله منصر ولا منتصر مش عارف الحق

اني :اهااا يستر الله

حمد :ره لفو على الحي كله وحاطينك في راسهم عاد نظم امورك معاهم ولا تبعد عنهم

اني : ان شاء الله ان شاء الله

حمد :ماشي هي تفضل!

اني : لا صحيت منور غر سلملي على الحاج خيري بس

حمد :يوصل يوصل هي في امان الله

اني :سلامات هي تبي شي؟

حمد : لا منور

اني :تمام هي تشاو

حمد :في امان الله
……
وطلعت وكان خاطري نخش ونهدرز عليهم… بس حسيت ان حمد يوزع فيا بمعنى يبيش المشاكل وما تجيبلهناش… والله عنده الحق لكن اني منو بيا… لازم نروح اني… التفتت جيهة الاستوديو عشان هو يمشي للطريق حي العمارات… بس خفت يشوفوني المبروك والمنتصر!… معناها لازم نبرم على المقهى… مشيت جيهةه المقهى وجيت وراها . . ولما جيت وراها كان في روشن متاع الكوجينه… جيت فايته من جنبه بس سمعت نفس اصوات لي مبكري… وقفت شكله توا بيبدو في خطتهم وحاولت نشوفهم بس قدرتش غير نشبح في رجلين بس عشان الروشن واطي هلبا…قلت خلي نقعد وعلى اقل ان نسمع وخلاص ..

:هداكا الجديد مشي وباقي العاملين روحو وحتى فطح الله راوح بس منذر قاعد في الدار عاملين

:خلاص نراجو منذر لين يرقد ونبدو وغدوا نقولو على اساس روحنا الوقت هدا… ساعه كم توا هي؟

:ساعه تسعه توا

:خلاص نقولو الساعه تسعه روحنا وهكي ح تندبس في منذر

:تم تم

……
تبعدت من على الروشن وجيت تحته باش حتى كان شافو من الروشن مش ح يقدرو يشوفوني… بس نبي نعرف من هادو؟… قعدت نستنى ونستنى لييين سمعتهم قالو…

:هيا منذر رقد زود تعال فيسع

ناض ..طاح الكرسي وقال :هيا هي
…….
حييي نبي نخش كيف ندير يارب كيف ندير كيف كيف بسس ومن وين؟؟… لازم نخشش من الباب ولي بيـصير يصير…نضت ولفيت وجيت قدام المقهى… شفت شخص يمشي جنب الاستوديو… بس طوله وعرضه شايفتهم بس منووو شوي سمعت صوت…

:يا داير اللييييل تعال هنااا

داير الليل :هيا هي هاني جاي يا نوري

……
عارفين منو نوري؟…. اي اي خوي نوري… بس ليش جايين المبروك ونوري وداير الليل!…. تي شن للمهم على بعضهـم؟…لا في شي وشي كبير اخرى ولازم نهرب اي اي لازم نهرب… ح ناخد الفلوس منهم وبنهرب…التفتت لقيت الباب مردود خشيت وقعدت نمشي على روس صوابعـي ونسمـع في خشخشه وصوت توشـويش… قعدت نتبع في مصدر الصوت… ونتبع فيه شفت منذر شاده واحد متلتم ويضرب فيه كفوف في جرت بعض ومنذر كله دم وسايخ على الارض وجنبه سلاح… قعدت مدهوله في منظر والتفت و…… يتبع
…………..

 

لمشاهدة جميع اعمال الكاتبة : روايات فاطمه سالم الورفلي

اترك رد

زر الذهاب إلى الأعلى