رواية السجينه الحلقة الخامسة للكاتبة فاطمه سالم الورفلي | القلم الناجح
روايات ليبيه كاملة

رواية السجينه الحلقة الخامسة للكاتبة فاطمه سالم الورفلي

رواية السجينه الحلقة الخامسة للكاتبة فاطمه سالم الورفلي

#السجينه
الحلقه :الخامسه
بقلم فاطمه سالم الورفلي 🍃
………
….
مشيت عنه وقعدت في الكوجينه وقعدت نقب في السمينسه …. شوي وجاني داير الليل وصـدمني بسـؤاله…

دايـر الليل :شني فكرتي!؟

اني غصيت بي قشور سمينسه من الصدمه

داير الليل جي يجري يضرب على ظهري وخدي طاسه من السكفـاري وعباها مايه من الشيشمـه وعطاهلي… قعدت نشرب واني مغصوصه بلقشره وقعد داير الليل يعبيلي في الطاسه واني نشرب لين تحولت القشره بعد شنو 😂 مشناااها لكن…

داير الليل بعصبيـه :بشويه مره تانيه كولي وانتي اطقطقي كل شوي بسمينسـه

اني نتنحنـح عشان رقبتي توجع فيا:احممم اوك اوك المهم…ااا هئحم ااا قتلك اممم بنمشي معاك

داير الليل:متأكده!؟

اني متردده:ااا ايي

داير الليل برفعه حاجب :بااه شن خطر عليك الضمان اليوم بعد هالشهور

اني بضحكه :هكي مـزاج 😂

داير الليل يحك في لحيـته :اممم باهي باه… المهـم مفروض وفرتي تعبك لغدوا عشان بنرحلو ….

اني نصدمـت :بجـديات تدوي!؟…

دايـر الليل بنظره حاده : ومن امتـى نبصر!؟

اني :ماشي ان شاء الله خير

ناض داير الليل… واني قعدت مقعمزه نفكر زعمـا شن ح يصيـر فيا ….ومن التفـكير رقدت في مكـاني بـدون ما نحـس …. نضت الصبـح على صـوت دايـر الليـل ينوض فيا…

السـاعةه :”9:30″

داير الليـل :نوضي هـيا بنتسقـدو

اني حكيـت عيـوني ونتاوب :اوك شوي بـس نتوضى ونصلي

دايـر الليـل :ماشي ماشي… غر اسمـعي اسمـك ح يتغـير والبسي دبشي هوينا تلقيـه بحـدا الروشـن عـلى الكرسـي

اني بصدمـه:ولييييـش

دايـر الليـل:ماهـو يا حنه ايـي مكـان بنمشـيله فيه الشبـاب… وشن بيقـولو النـاس!؟… ها على شنو عابيـه امـالا؟

انـي :ان شاء الله…ان شاء الله

دايـر الليـل :ماشي هي انـي برا ره نراجـي فيـك

انـي: اوك
بقلم فاطمه سالم الورفلي
رواية السجينه الحلقة الخامسة للكاتبة فاطمه سالم الورفلي
نضت من مكاني ورقبتـي توجـع فـيا عشان رقـدت وانـي مقعمـزةه…. وخشيت الحمـام “حشـاكم”… توضيت وطلعـت صليـت الفجـر … ومشيت لي وسـط الحـوش لقيـت سـروال واسـع والفلينيا فضفاضـه هلبـا … لبستها واني منقرفه… وطلعـت لقيت دايـر الليـل يسخن في السـياره… ركبت من الـوراء… وهو قعـد يشـبح فـيا من المـرايا ويضحـك عـلى منـظري ليـن نحـرجت وارتبكـت

انـي :بااااهـي خـلااص

داير الليـل كاتم ضحكتـه بالسيف :به باه اوك 😂


وحرك السيـاره وهو كـل شـوي يشبحلي ويضحـك بـصـوت واطي ليـن انـي غطيـت وجهـي بيديـا 😂..

دايـر الليـل نفلق ضحـك:وربي شكـلك يضحكك

اني كاتمه ضحكتي ودروحنـي معصـبه :به باه خلاااص

وقعد دايـر الليل يضحك واني منحرجه وعاقده حواجـبي وقعـدنا ناقـر ونقيـر💁…. لين وصلنا لي مكـان واااسـع وفـي وسطـه حـوش علـى دوريـن وراقـي بـس قـدامه كواغـط وشجر وحاله الله لا تروعك 😫…. المـهم فتح دايـر الليل باب السيـاره ونـزل… وقعد يستنـى فيـا و دايـر روحـه يشـوف فـي السيـاره… شكـله فـي حـد يشـوف فيـنا!؟… نزلت وانـي مـرتبكه وخـايفه…قـرب منـي دايـر الليـل وقال بهمـس

دايـر الليـل بصوت واطي:اسمعـي مـن توا انتـي ولـد… واسمـك نجـم الـدين… فاااهمه!؟… وباقي معلومـات خليهـم حقيقيـات عن تتلخبـطي وتـاخـدي وتجـلطي وايـي شي يسألـوه قولي منعرفـشش وغلظيه صوتك وما تمرخيش اشحطي روحك… وديري روحك طالعه من السـجن فاهـمه ولا… وما تفتحيش معاهـم دواوي سامعتيني ولا ردييي بالـك تغلطي فـي شي وقتـها مااعنـدي مانـديرلـك….

” ومشـي عني وخلاني حـايسـه في عمـري…قعـدت نمشي خطوه قدام وعشره وراء… تي شن لي درتـه في عمـري هدااا…. نبي نهـرب… شن هدا بس حطيت روحي في مكـان نقدرش نعيـش فيـه ولا لحظـه حتى….شـوي نسمـع فيهـم يقـولو”..

:تي نـاديـه صاحبـك هدا خلي نتعـرفو عليه

دايـر الليـل:يا نجـم الدين ياراجل تعال يا را

“مشـيت وانـي خـايفه لين خـلاص ”

:اهلين شن امورك يا صاحبنا

اني غلظت صوتي :حمدالله في نعمه

:تمام تمام توا خشوا ارتاحو اكيد الطريق طويله … و بعدين عندنا هدرزه طووويله

داير الليـل :تمام يا مقند

“خش داير الليـل وقعد الراجل يشبح فيا بتركيز لين ارتبكت …من خوفي ان نغلط سـرعت خطـواتي وخشيت قابلنـي حمـام خشيتلـه… واسيـت روحي وحمد الله ان فالينيا واسعـه ومـش مبينه جسمـي… وقعدت نغير في تعابيري ولقيت اكتر شي مناسـب ان نعقد حواجبي 😂… اخخ يعنـي ح نقعـد عاقـده حـواجـبي طـول الوقت!؟… الصـبببر وخـلاص…طلعت من الحمام “حشاكم”…ولقيتـهم يهدرزو ومـش منتبهينلي وقعدت نتفحص في المكان وملامحهـم… ملامحهـم حـاده واشكـالهم تخـوف وضخـام وتحت عيـونهم سـواد واصواتهم مشمـئزه وفي نص هدرزتهم كلـهم انتبهولي ليـن رعشـت نـاض واحـد منهـم وقال ”

:معرفتناش على صـاحبك يا دايـر الليـل

دايـر الليـل حك راسه:ااه والله هدا رفيقـي نجـم الدين تفكـرتوه

كلهم بي اصوات متقاطـعه قالـو :اووو تييي وين ياراس…. اهلا حبيبنا والله… تي وينننك يا باشا.. مش معقوله نشوفو فيك كيف هلال العيد عاد يا را

اني شبحـت لي دايـر الليـل بخوف وزمطت ريقي بصعوبة وغلظت صوتي بتوتر: هههه تسلمو والله هدا هوا والله نحبست وبلحيـل طلعـت

رواية السجينه الحلقة الخامسة للكاتبة فاطمه سالم الورفلي

ناض واحد منهم :قـاعد دلدول الشبوب ههههع تي اشحـط روحـك عاد

:زعما تتفكرنا اوو؟

اني بخوف :ههه اا…

قطع عليـا داير الليـل بحزم وقال :ههههه تي يالله يتفكـر اسمه وعيلتـه من كل عقـلك بيتفكركم! .. ولا يا غالي

اني نطربق في صـوابعي :اي والله ههه

:تي نوض خيرك متحشم نوض دوش ونظم امورك يا غالي

:غريبه والله على غير العاده ما ناضش.. قبل ينوض بروحه بروحه

“قعـدو الاربعه يشبحولي ويستنو في رد منـي لين خفت وتنحنحت وقعدت نرقع وقلت ”

اني بصوت غليظ:هئحم تو نوض غر تاعب هدا بيش 😅

:اييي هدا بيش واني نقوول!… ماشي مدام مش متفكرنا خلي نقولك.. اني المبروك “واشر على جنبه “… وهدا المنتصر… وقعد يأشر بلواحد “… وهدا عز الـدين وهدا عثمـان… ” واشر على داير الليـل وقال بتهكم “… وهدا الكل في الكل ولا حتى هو ناسيـه!

اني ارتبكت :ههه لا كيف هو لي جابني وجميـله فوق راسـي … احمم اا اني بنخش الحمام

المنتصر :خود راحتك تفضل تفضل

” خشـيت واني خـلااصصص خايفه ننفضـح خايفـه ندير ابسط غلطه يزبطوني… قعدت نغسل في وجهي من العـرق… و شـوي سمعـت صـوت عـراك لين خفـت… ونفتـح علـيا البـاب بلقوه و…. يتبع
…..

 

لمساهدة جميع اعمال الكاتبة : روايات فاطمه سالم الورفلي

اترك رد

زر الذهاب إلى الأعلى