رواية السجينه الحلقة العشرون والاخيرة للكاتبة فاطمه سالم الورفلي | القلم الناجح
روايات ليبيه كاملة

رواية السجينه الحلقة العشرون والاخيرة للكاتبة فاطمه سالم الورفلي

رواية السجينه الحلقة العشرون والاخيرة للكاتبة فاطمه سالم الورفلي
#السجينه
حلقه :عشرون والاخيره
بقلم :فاطمه سالم الورفلي
………………….
…………
اهـدائـي…
وبعد ختام تسع عشر حلقه وكلمـات وايام… اليـوم ختامنـا العشـرون 🍃…قراءه ممتعه…
………
عند غزاله:غزاله :نعم يما

امباركه :قتلك معاش كلمك خوك؟

غزاله :لا الحق ليش

امباركه :لا شي

….
وقعدت عمتك غزاله تستنى في رد من المبروك وكل يوم اول ما تنوض طول تشوف التليفون على امل يرد عليها وقعدت خايفه على خوها… وفاتت اشهر ولا سمعت خبر على خوها ولا شي… لين في يوم من الايام كانت تسيق في الحمام حشاكم…

امباركه :يا غزاله زودي الباب يطق

غزاله حطت السياقه:افف باهي به هاني جايه

….
وطلعت من الحمام حشاكم وفتحت الباب ولقت…. يتبع


……..
عندي انـا…..
عارفين منو نوري؟…. اي اي خوي نوري… بس ليش جايين المبروك ونوري وداير الليل!…. تي شن للمهم على بعضهـم؟…لا في شي وشي كبير اخرى ولازم نهرب اي اي لازم نهرب… ح ناخد الفلوس منهم وبنهرب…التفتت لقيت الباب مردود خشيت وقعدت نمشي على روس صوابعـي ونسمـع في خشخشه وصوت توشـويش… قعدت نتبع في مصدر الصوت… ونتبع فيه شفت منذر شاده واحد متلتم ويضرب فيه كفوف في جرت بعض ومنذر كله دم وسايخ على الارض وجنبه سلاح… قعدت مدهوله في منظر والتفت وخدي السلاح ولما قوصه عليا… قعدت نجري لين وصلت في الباب شفت نوري وداير الليل…شفت وخيي لي باعني لي اصغر مني ما عمري شفت منه احترام ليا حتى….قعدت واقفه في مكاني من هول المـوقف… جي يجري داير الليل شدني والتفتت لي نوري طول وقال …

نوري :يا هوادي حول غادي وبرا جيب السياره فيسع

اني قعدت نشـوفله كيف مزال عنده قلب ومستمر في طغيانه وحقارته… تي اني معاش عندي مقاومه للهروب معاش عندي لي ولا شي…

هوادي :شورك الموضوع!

نوري :تي عدي دير لي قتلك عليه وخلاص

هوادي :تم تم

رواية السجينه الحلقة العشرون والاخيرة
التفتت لي داير الليل لي كان جنبي وشادني من كتوفي بقوه… شبحتله بنظره كلها امل وترجي.. بس خاب املي لما قال..

داير الليل :اسمع تبي تقتلها ولا!

نوري :اي الناس كلهم قلتلهم ماتت خلاص توا ويبقى لازم تموت “وشبحلي بنظره كلها غل وشر ”

داير الليل :تم تم والمبروك وين!

نوري :مشي قال الصبح بيجي

داير الليل :ماشي ماشي جيب لي اوراقها وشهاده الميلاد وكل شي يخصها خلي اني نظم الامور وقتي والليله وما يصبح الصبح الا ما تكون في قبرها

نوري :تم خليك هنا هي دقايق بس

“قعدت نستنى في داير الليل يهربني او ايي شي قاعده مكدبه روحي من لي نشوف فيه … على اقل يرخيني مش معقوله يدير فيا هكي.. استغليت فرصه هدي وقلت ”

اني دمعت عيني :د… داير الليل

داير الليل شبحلي بقرنه حاجب..

اني :خليني نهرب ساعدني

داير الليل :هههه نفرط في الفلوس ونساعدك!.. مسكينه انتي هههه

اني نزلت دمعتي بغصه وقهرة وندم ويـاريتني ما تكلمت… بس شن يبو مني خلي نسافر ونرتاح ويرتاحو… يارب يارب ديرلي طريق ياارب … شوي وجي نوري ومعاه شنطه…

نوري داهش :اهيا الشنطه وفيها الاوراق وفكني من هدي “اشر عليا بي اشمئزاز وكمل “… فكني منها بي ايي طريقه لوحها اقتلها المهم ما تكونش في مكان اني فيه

داير الليل :تم تم ما يهمك شي

” تعرفو ما صدقتش ان خوتي يبيعوني حتى زمان لما قال لي داير الليل خوتك هم لي قالو لي اخطفها… ما صدقتاش ولعند توا مش مصدقه… كميه الكره وقداش متقرف مني تقول اني مدايره شي يوطي الراس… والله نتحشم نحكي لحد لان مش ح يصدقني حد… متقولش اني كنت نخدم فيهم وغر شن تبو وحاطتهم علـى كفوف الراحه… بجد حسيت انه هدا مش خوي الكائن لي واقف جنبي ما كأناش خوي…تي خاطري نحضنه ونقول له استحشتك خاطري و خاطري ياما… تي هانت عليا مصايبي كلها ورايفت لي عدابكم عشان اهون من لي عشته… بس تاريته لا لا الوجع لي من الغريب اهووون بمليون مره من القريب..ضغط داير الليل على كتفي وجرني وراه وقاعده نشبح في نوري نبيه يستاقض على يدير فيه… نبيه يقول لي حتى بلكدب ان يبصر عليا او يتأسف مراعاة لمشاعـري.. اقل شي…وقفنا على الكياس وجت سياره درست وطلع منها الهوادي فتح الكوفني وجرني داير الليل للجيهة الكوفني وقال لي

داير الليل :اركبي ما عنديش ليك جهد

اني خفت عن يلوحني فيها لين ننكسر او شي.. التفتت جيهة اليمين نبي نهرب بس شدني داير الليل ودفني على الكوفني لين جيت مقعمزه فيها…لميت رجليا ودخلتهم في الكوفني وصكرها عليا بقوه لين رعشت من الصوت..قعدت نبكي ونخمم زعما شن ح يصير… زعما حقا داير الليل ح يدير فيا هكي؟… لا ياربي لا ما تكتبهاش عليا ياربي …. قعدت طول وقت نبكي ونخمم وفات وقت طويل لين عرقت وعطشت…تلمست مكاني بيدي لقيت فراغ حطيت راسي على وطا وكمكمت رجليا … معقوله نوري هاينه عليه اني لهدرجه… غر وين بيلقاك ربي ياوخيي ويين بس قول لي وين؟.. قعدت نبكي وخايفه ونفكر كيف بيقتلني وزعما حقا بيقتلني داير الليل؟… لييين رقدت ..ومعاش حسيت بي شي الا بي ضي جي على عيوني…. قعدت نفتح في عيوني بصعوبة من قوه الضي عشان قعدت وقت طويل في الظلام…

داير الليل:اطلعي فيسع

اني حتى بنتكاسل مقدرتش خفت يشدني يدفدرني على وطا نتفشـخ… حطيت رجليا على بدايه الكوفني وقعدت نسحب في روحي بيديا لين لامست رجليا الوطا ونضت وقفت…ونفتح بصعوبة في عيوني بصعوبة الشمس قويه هلبا…قعدت نشبح لي داير الليل امتى بيطلع المسدس ويقتلني… وهوب طلع المسدس لين رعشت…تقول يستنى فيا نقولها.. زمطت ريقي وقلت

اني برجفه:بتقتلني!

داير قال بهمهمه :هههه اممم امشي امشي..

التفتت على يساري لقيت محلات وفي وسطهم باب ازرق صغيرون … شبحتله مستغربه مش وين نمشي!…

داير الليل ابتسم وتنهد شدني من ايدي… وقعد يمشي ونمشي وراه وطلع المفتاح من جيبه بيده التانيه وفتح الباب وخششني…وطلع… هدا خيره؟.. مش بيقتلني… هه وخيرني نستنى في موتي ومستغربه بدل ما نفرح!…. بس هو قال يبيش يفرط في الفلوس!..لا لازم نهرب اي نهرب… قدمت خطوتين وحطيت ايدي على قفل الباب بنفتحه ما فتحش.. اوفففف مصرع صكره.. نعيط! … بس بلكي هو قاعد بـرا!… يارب استر عليا يارب يارب.. خشيت للحوش لقيته مأثث وفيه كل شي… غريييب؟… قبل ديما داير الليل يرفع فيا لي حياش قديمه وفاضيه الا حوشهم الوحيد لي كان فخم….حسيت روحي جيعانه قعدت ندور في الحوش ندور على الكوجينه… لقيتها خشيتلها لقيت ميولكه اجمل ما يكون ودولاب فخم وفي تلاته تلاجات وتلاجه مايه وغاز فيه سته روس… منظرها يشهيك اطيبي فيها قعدت واحله فييها وفاتحه فمي ومبهوره مششش مصدقه كل شي من ارقى واجود ما يكون… طول جيت للتلاجه الاولى لقيت فيها خضره فيها قد ما يسمي فمك من الخضره طلعت منها طمطمتين وخياره.. فتحت تلاجه التانيه فيها كل معلبات مهمه ولي مش مهمه والعاديه والفخمه… قعدت ناخد ونطلع… فتحت تلاجه تانيه مليانه شكاليط وحلويات قعدت ناكل معاش قدرت نقاوم قعدت حاجه في الايد وحاجه في الفم لين شبعت… رديت طمطمتين والمعلبات..ومشيت جيهة السكفاري خديت اكبر طاسه وعبيتها مايه وشربتها وطلعت للصاله فتحت تلفزيون…شوي سمعت الباب نفتح… نضت من مكاني لقيت داير!…. ومعاه شكاره… اللطف هدا خيره!

داير الليل جي يجري وقال بصوت واطي :هاك هادم البسيهم

اني بهزوه :وليش بنلبس اللطف باش تكفني بي حوايج جديده!

داير الليل قرن حواجبه :ديري لي نقولك عليه وفكيني من قطافك ترا

“وحط الشكاير وطلع صكر الباب بلمفتاح… طبست فتحت الشكاره لقيت فيهن عبايه ومحرمه زي متاع العزايز… خديتهم وخشيت داخل لبست العبايه وحولت الكتانه ولبست المحرمه وربطتها وقعمزت نستنى في اجلي… شوي وخش داير الليل ونسمع في صوت شيباني!… شن في؟

الشيباني :السلام عليكم يابنتي

اني مستغربه :وعليكم السلام!

داير الليل :تفضل تفضل يا حاج …تفضلو يا شباب تفضلو

” وخشو زوز وحدين قعمزو ومعاهم خوي ابراهيم اي اي ابراهيم .. قعدو عيوني في ابراهيم يا قداش استحشته وقداش تغير اخخخ….بس شكله هادو يبو يقتلوني حقا لكن ليس معاهم شيباني!!…. ”

الشيباني :احم يا بنتي تقبلي تتزوجي ياسين البرنوص

اني قعدت مستغربه ونشوف من ياسين هدا!

داير الليل ضحك :اني اني

اني زعما نقبل زعما لا…. مش بيقتلني!.. بس ليش معاه ابراهيم!… اني ما عندي وين نمشي ولا كيف نهرب وهو ح يقعد حابسني خلي نوافق وربي يستر يارب اكتبلي فيه الخير يارب يااارب زمطت ريقي وقلت بتردد: ا اي نقبل

الشيباني :على بركه الله… تقبل يا ولدي ياسين ان تكون نجمه فرج زوجتك

داير الليل :نقبل ان شاء الله

الشيباني :على بركه الله

رواية السجينه الحلقة العشرون والاخيرة

حط الشيباني كتانه بيضه على ايدين ابراهيم وداير الليل وقعد يقول :وجعل الله الزواج اية من اياته فقال في قرءانه … وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ…. واشهد ان لا اله الا الله وحده لا شريك له واشهد ان سيدنا محمد عبده ورسوله صلى الله عليه وسلم رقب بزواج وامر به وقال :يا معشر الشباب من استطاع منكم الباءة فليتزوج..فأنه اغض للبصر واحصن للفرج.. ومن لم يستطع فا عليه بالصوم فأنه له وجاء…وقال رسول الله صلى الله عليه وسلم…تخيرو لنطفكم فأن العرق دساس … عَنِ النَّبِيِّ ﷺ قَالَ: تُنْكَحُ الْمَرْأَةُ لِأَرْبَعٍ: لِمَالِهَا، وَلِحَسَبِهَا، وَلِجَمَالِهَا، وَلِدِينِهَا، فَاظْفَرْ بِذَاتِ الدِّينِ تَرِبَتْ يَدَاكَ… وعن أنس رضي الله عنه أن رسول الله صلى الله عليه وسلم قال من رزقه الله امرأة صالحة فقد أعانه على شطر دينه فليتق الله في الشطر الباقي “…ونسأل الله تعالى ان يجمع بين العروسين وان يألف بين قلوبهم ويطرح البركه فيهما ويجعل بينهما السكن والموده والرحمه وان يرزقهما ذريه الصالحه اللهم امين قولو جميعا استغفر الله العظيم لا اله الا الله تبنا لله ورجعنا لله وندمنا على ما فعلنا وعزمنا عزما اكيد لا نعود للمعاصي ابدا ورضينا بالله ربا وبلاسلام دينا وبمحمد صلى الله عليه وسلم نبيا ورسولا … قول يا ابراهيم استخرت الله تعالى زوجتك اختي البالغه البكر الرشيد زواجا شرعيا لنفسك دون غيرك على كتاب الله وعلى سنة رسوله صلى الله عليه وسلم وعلى مذهب ابو حنيفه نعمان وعلى كل مذهب يستحق العقد عليه وعلى الصداق المسمى بيننا عاجله واجله

ردد وراه ابراهيم كل لي قاله الشيخ…

الشيخ : ردد وراي يا ياسين..بسم الله وعلى بركه الله اني استخرت قبلت منك زواج اختك نجمه البالغه البكر الرشيد على نفسي دون غيري على كتاب الله وسنه رسول الله صلى الله عليه وسلم وعلى مذهب ابو حنيفه بن نعمان وعلى كل مذهب يستحق العقد عليه وعلى الصداق المسمى بيننا عاجله واجله……

وردد وراه داير الليل..

الشيخ :ردد وراي يا اسماعيل زوجتك موكلتي نجمه البالغه البكر الرشيد على هدا والله خير الشاهدين وبارك الله لكم وبارك عليكما… وحولها الكتانه لي على ايديهم وطلقو ايديهم…وقرو الفاتحه مع بعض…

ملاحظه :طبعا الشيخ كل كلمه يقولها يرددو فيها وراه غر اني حبيتش نقطع الكلام كل شوي وقلته مع بعضه فهمتو كيف متابعه ممتعه بقلم فاطمه سالم الورفلي….

” اني طول الوقت نفكر هل اني فتحت على روحي باب من جنة ولا من جهنم… ربي يستر يارب… بس كيييف نوري قال لي داير الليل اقتلها وابراهيم هو الولي!… امم اكيد القصه فيها فلوس لان ابراهيم كلب فلوس (حشاكم).. ” …. وطلع الشيباني والرجاله وحتى ابراهيم وداير الليل ….وقعدت بروحي نخمم زعما شن بيصير شن مزال يراجي فيا يارب الهمني الصبر على شقاي… شوي وخش داير الليل..

اني :ممكن تفهمني شن لي قاعد يصير؟

داير الليل قعمز وبرفعه حاجب قال:مافيش اني انسان مانحبش ندير الغلط صح نخطف لكن القتل لاا… “وبهزوه قال “… او حبيت يعني نستر عليك ونساعدك تزوجتك

اني عصبت من حقارته وقلت :يكون في علممك لا تقربني ولا تلمسني فاهم او لا!

رواية السجينه الحلقة العشرون والاخيرة
وخشيت الدار وصكرت الباب عليا… وقعدت الحال تنافر… هو يطلع من الحوش اني نطلع من الدار نطيب وناكل ونخش وهو يروح ياكل ويرقد ولا يطلع ولا يقابلني ولا نقابله واستمر الحال على ما هو عليه لمده قريب سته اشهر… لاني حاسه روحي منقرفه منه صح تصرفه حلو لكن كلامه قهرررني… وفي يوم من الايام تلامسنا اطراف الحديث…

نضت من سريري… لميت شعري…زعما طلع؟… غريبه اليوم ما دارش صوت ولا قربع ولا شي!… نضت من مكاني خديت المشط من على الزيانه وطلعت من الدار..لقيته متكمكم في الصالون ومتغطي بي بطانيتين و وجهه باين عليه مرهق هلبا… قعدت نمشط في شعري ونتأمل فيه قداش ليا معاش شفته كويس… بس سمح العطيب😄.. قعدت نتأمل بتمعن في لحيته لي مرسومه رسم وكحله وهدوبه لي طوال اطول من رموشي.. وحواجبه داكنات وحلواات…صح لبسه وطريقه نظراته وشعره تخوف وطوله وعرضه تحسيه كيف مصارعين بس رغم هك نقشه حلووو.. بس هو ديما عاقدها لين حواجبه مشنقات فوق 😂… ابتسمت بحنيه بجد على عجرفته الا انه تصرفاته معاي سمحه زي سماحته … حطيت المشط على الطاوله وربطت شعري بربطه لي كانت على ايدي… وخشيت الحمام حشاكم وتوضيت وطلعت صليت…ولما سلمت نسمع في داير الليل يكح.. نضت من مكاني مصدومه…حطيت ايدي على جبينه لقيته ساااخن كيف الكوشه… طول انطلقت لي الكوجينه خديت منشف وبليته بي مايه وحطيته على جبينه… ناض عاقد حواجبه…. شبحلي وحط ايده على جبينه..

داير الليل :تي شنو هدا؟

اني حطيت ايدي على كتفه :ارقد خليه على جبينك راك ساخن تركرك

داير الليل :تيي مصقع

اني :تي ارقد مش وقتك راك رايح فيها

….
” رجع رقد وهو يتأفأف كيف عيل صغير… وكانت لاول مره في التاريخ داير الليل يسمع كلامي 💁…. ابتسمت ونضت للكوجينه فتحت تلاجه خديت شيشه خل ومشيت للدار خديت شخشير ومشيتله جيت عند رجليه.. فتحت شيشه الخل وصبيت في ايدي شوي خل وقعدت ندهن في رجليه ”

داير الليل:تي شن تلبزي

اني :اهفففت مش وقتك ره بتموت

داير الليل :مش كان مريض تستقوي عليا حولي اللبز هدا

اني :تي قتلك اهفت اهفت اعقل حتى وانت مريض تريش اعقل خلاص مش ح نسممك

داير الليل :لا اديري اكبر انتي

اني :الحق فيا لي نداوي فيك ارقد هي

“لبستله الشخشير ونضت ”

داير الليل :تعالي هنا وين ماشيه

اني :خليني في خالي

داير الليل :تي تعاالي

اني :اخطاااني
….
خشيت للكوجينه وولعت على البراد الشاهي… وخديت زبادي من تلاجه وخديت فازو زنجبيل من دولاب وحطيت كاشيكين في الزبادي وخلطته ومشيتله…

اني :هاك كول

داير الليل فتح نص عين :شنو هدا؟

اني :صبي كول واسكت

داير الليل ناض قعمز وخدي مني كلي اول كاشيك قعد متقهقر :هاك هاك شن اللبز هدا

اني خديت منه وشبحتله بي اصرار:تي كول بلا جو صغار

داير الليل رقد وعطاني بلظهر:عدي عني عدي

اني :وراسي هي كول

داير الليل تأفأف وما ردش

اني يأست وجيت بنوض عرفت عنديش خاطر عنده وقلت :ان شاء الله ينقطع راسي هي اقعد مقعد

داير الليل ناض شدني من كتفي وخدي مني الطاسه زبادي وقعد ياكل بسرعه كاشيك وراه كاشيك ويشبح فيا وقارن حواجبه…قعدت نشبح فيه واني كاتمه ضحكتي كان منظره يضحك كيف عيل ولقطته عفويه هلبااا …. خديت منه الطاسه ونضت فرحااانه بس نكابر… يا اخي والله حبيته …نضت للكوجينه بدون مانحس لقيت روحي مطيبه ومجهزة كل شي لاني كنت هايمه فيه… يارب ان شاء الله يكون يحبني … خديت السفره ورفعتها واني متشوقه لي رايها في كل شي..

اني :نوض كول

داير الليل :ملحي

اني :تي نوووض

داير الليل معاش رد…

اني قعمزت قعدت ناكل ونشوفله نراجي فيه ينوض وكل شوي ناخد الكاشيك ونطق على الطاوله وصفره نبي ينوض..

داير الليل :اهفتتتييي

اني :وراسي نوض هيا

داير الليل :عرس هو كل شوي وراسي وراسي والنبي ملحي هي

اني زعلت ونضت من مكاني وخشيت لدار…وصكرتها عليا… اففف تي نبي نعيش زي ايي مخلوق يا ناس..قعمزت على السرير واني طايرتلي نبي نرتاح وربي نعيش زي ايي متزوجين شن هدا ياااربي.. قعدت مقعمزه ساعه وساعتين وتلاته لين مليت..اممم اكيد صقع ونقع وهو ماناضش خلي مالا اني نوض وجعنه لا كلي ونغسل الماعين ونحط الغدي على النار… نضت فتحت الباب وطلعت لقيت السفره ممسوحه مسح شاامل كامل 😂😂.. وداير الليل راقد..مشيت خديت السفره وغسلتها.. و ولعت على الغدي على النار.. وطلعت

اني :ياسين نوض ارقد على السرير

داير الليل فتح عيونه وشبحلي مستغرب: اول مره تناديني بي اسمي شن صاير في دنيا؟

اني :افف الحق فيا لي انوض فيك اقعد مالا

داير الليل :خيرك رحتي نفسيه زمان زينقو ما يأثر فيك شي

اني :برا على حالك برا

مشيت ولعت الغساله على الدبش وقعدت نبرم ونضم…. شوي جاني داير الليل ولي نديرها اني يديرها هو دروحه يعاون فيا

اني ضحكت :مش مريض؟… برا ارقد

داير الليل:مدخلكش

اني :اففف به اسمع

داير الليل قعمز :همم

اني :نبي نسألك من سؤال

داير الليل: ولي هو!

اني :اممم كيف ابراهيم هو الولى ونوري قالك اقتلها و…

داير الليل :اخخخ قصصصه كنت عارف ح تسألي ياستي عاد خلي نحكيلك… لما مشيتي واني قعدت قعدو يعدبو فيا بعدين قالو لي كان لقيته خود شن تبي… مهم عرفت وقتها مصممين عليك قلتلهم تم وقعدنا ندورو عليك في يوم المبروك شافك وبعتلك زوز وحدين تبع واحد اسمه الهوادي يكون ولد المبروك… شكله ما لقوكش قلبو عليك دنيا المهم مشي لما لقيتك يومها درت روحي اني لي لقيتك… ولما عرفت المبروك روح عرضت عليه اني لي بنقتلك وطبعا هو حاطلي جهاز تنصت في تليفون لانه منه هو… هدا بيش قتلك
….
فلاش باك
….
اني :خليني نهرب ساعدني

داير الليل :هههه نفرط في الفلوس ونساعدك!.. مسكينه انتي هههه
……
انتهى فلاش باك
رواية السجينه الحلقة العشرون والاخيرة

داير الليل كمل :مهم توا احني في الشرق والحوش هدا شريته زمان من ايام الحلبه والكمون ومحدش يعرفه ومره مره نمشيله ونحط فيه حاجات ونقعد فيه وهادي الحكايه

اني بعفويه :ربي يخليك ليا

داير الليل ارتبك وقعد يكح بلعاني

اني فطنت لروحك وفنصت ومشيت نجري متحشممه
…..
وفاتت الايام واحني ماشيه امورنا خير من قبل وكل مره داير الليل يجيبلي حاجه شاريهالي مره حوايج ومره تليفون ومره فتحلي نت💙… وفي من الايام كنت نطبق في الحوايج..جي داير الليل وقال لي..

داير الليل :نجمه

اني نمضع في المستكه:نعم!

داير الليل:قتلك نبي نمشو لي هلي نشوفوهم قبل ما نسافرو

اني :ليش بنسافرو؟

داير الليل:هكي البلاد معاش اطمن ولازم نطلعو على اقل نقعدو غادي سنه سنتين لين ينسونا

اني حطيت القفطان من ايدي وقلت :يا ياسين ياودي معقوله بتهجر امك ووخيتك على خاطري والله ما يجي هلكلام

داير الليل ابتسم وتنهد طبس راسه :نجمه… ياودي انتي مرتي ولي يمسك يمسني وجلاله الله نحبك وما نرضى فيك دغه الشوكه مش مستعد نخسرك ولا بي ايي شكل… ويهديك الهادي خلينا نتوكلو غدوا نشوف اني ونقعدو عندها كم يوم نشوفو شن ناقصها ونسافرو من غادي واعبي بعباك من هنا ها شن قولك؟

اني تحشمت وطبست راسي وقعدت ساكته

داير الليل ضحك :ها شني صافيه يا لبن؟ 💙

اني ابتسمت نشبح لوطا وقلت :صافيه

داير الليل باس راسي وقال :تنام يا قشطه هي مالا وتي روحك وشناطيك من توا

رواية السجينه الحلقة العشرون والاخيرة
وطلع داير الليل وخلاني واني قلبي يرقص رقيص وفرحااانه 💙وقعدت نوتي في الحوايج ونغني واخيرا قالها قال احبك قالها 💙… وكل شوي نتفكر في حاجه وكيف تلاقينا 💙هههه تاريتكم ياخوتي درتو خير ليا وانتم ما تندرو وخديتو رزق الدنيا وجبتولي رزق وسند دنيا والاخره 💙… و وتيت الشناطي وتعشينا ورقدت.. واصبح الصبح ونضت درت الفطور وفطرنا اني وداير الليل فيسع واسقدنا..

اني :عبيت بنزينه؟

داير الليل :اي عبيت

اني :ره يصيرلنا زي يومها فكنا عاد من الرعايش

داير الليل :هههه لالا يستر الله ان شاء الله

اني :هههه به حقا ما قلتليش كيف عرفت لغتهم التبو؟

داير الليل تنهد :زمان بوي الله يرحمه كان يدير في الحضاري ويتنقل من بلاد لبلاد المهم في مره من مرات قعد عنده صحاب من التبو يجونا ونمشولهم و وينك يا مناسبه ليهم احني الاولين فيها المهم تعلمت منهم لغتهم وهدا هوا

اني :علمني اني به

داير الليل :ايح هههه ناسيها غر يومها مش عارف كيف تفكرت هلكلمتين

اني :اطير في العين شكلك

داير الليل غمزلي :هههه اي وليش لا

رواية السجينه الحلقة العشرون والاخيرة
وقعدنا ناقر ونقير طول الوقت ومره نضحكو ونهدرزو ومره نتعاركو 😂… لييين وصلنا ونزلنا ونزلت معاي شنطه وحده يادوب تمشيني هلايام وخلاص… وطلع داير الليل المفتاح حطه على قفل ما باش يفتح

داير الليل :شكله مغيرين القفل

اني :اممم مساكين زاد فجعه يومها

داير الليل :الله لا يجيبها والله فاتت ايام مش عارف مي فاتت

اني :حمد لله وخلاص… طقطق هيا الشمس حرقتني

قعد يطقطق داير الليل بقوه…وفتحت غزاله بشهقه…

ملاحظه :هادي النقطه لي وقفت فيها فوق لما فتحت نجمه الباب… وتوا بنكملو الباقي مع بعض 🍃🌸..
رواية السجينه الحلقة العشرون والاخيرة

داير الليل :غر خيرك غر قول لي حمدالله على سلامه

غزاله تبكي:اهلين حمدالله على سلامه بس وينننك وين كنت معقوله هك تخلينا

داير الليل :هدا هو مشاغل غر وين امي بس

امباركه جت تبكي وتشهق :ربي يهديك يا وليدي معقوله هكي ادير فينا معقوله

داير الليل :الله غالب يما قدر الله ما شاء فعل

امباركه :اهلين بنتي كيف حالك كيف حال صحتك غر خشو تفضلو تفضلو

اني :حمدالله بخير كيف حالك انتي

امباركه :حمدالله تفضلي بنيتي تفضلي
رواية السجينه الحلقة العشرون والاخيرة
خشينا وشي غزاله ما سلمت تقول خايفه من كورونا 😂… وموضوع يجيب موضوع لين قال داير الليل

داير الليل :يما ره نجمه زياره هدي مش ايي زياره مقيمه مرات

امباركه فرحت :نورتنا والله وعادي والله على قلبي زي العسل

داير الليل ضحك :لا مش هكي قصدي كيف بنجيبهلك… يعني بالعربي الفصيح قعدت كنتك

امباركه طول زغرطت :لولولي وهادي البركه يا ولدي وين نلقو خير منها والله يا خير ما اخترت وامتى صار…

هوووب طاحت السفره من غزاله وشهقت..

امباركه ناضت:بسم الله بسم الله بشوي يما خيرك… خدي سوك غر بري خودي حبه بركه كويسه للرعاش عدي تو نلمه هدا

مشت تجري غزاله ولون وجهها مخطوف… نضت اني

اني :امي تو نلمه اني قعمزي ارتاحي

امباركه :لا عاد زايرتنا ومش ايي زياره ومن اولها هكي لالا بنتي لا ارتاحي صحيتي

اني :لا والله ما صايره تو نلمه اني

امباركه قعمزت :كبر قدارك صحيتي بنتي..

“لميت المرش والفخار لي تكسر ومسحت العصير ونشفته وجاب ربي تبزع على الزليز.. وقعمزت”

امباركه :حقا يومها في نفس يوم لي طلعت فيه جي المبروك صاحبك يبيك وسأل عليك.. وعطاته نجمه رقمك التاني العفو من امتى عندك رقم؟

داير الليل مستغرب :رقمي التاني؟

امباركه :هكي قالت نجمه خيرك شن في

داير الليل :ها لالا شي

“وناض داير الليل وجي في الجناح وقف كان قبالتي الجناح نشوف في كل شي… شوي قعد واقف وخش لدار نجمه بقوه فتح الباب وقعدنا نسمعو في عياط نجمه وتبكي ”

امباركه ناضت تجري: وك وك ستر ياربي الستر شن هدا

“جي داير الليل وهو يكركر في غزاله شادها من شعرها وفي ايده تليفون ”

امباركه :اللطف غير خيركم شن في شن في

داير الليل :الهانم بنتك نسمع فيها بودنيي لي بتاكلها الدود تكلم في صاحبتها ..

امباركه قطعت عليه :وكان هادا صاحبتها هدي!

داير الليل فتح تليفون :اصبري شوي بس … عندك تسجيل مكالمات ولا نكلم فيك

غزاله تبكي:اي ايي

داير الليل فتح تسجيل …

غزاله :الكلبه تزوجها خوي اي زي ما نقولك تخيلييي كل لي درته على الابيض

:تي مش كلمتي المبروك وقتيلي خبرت على مكانهم في الجنوب ولا ابصر وين؟

غزاله :تي ايي وخديت رقمه وكل شي بس كيف تزوجها كيييف

….
انتهى تسجيل
….

امباركه :ربي يهديك يابنتي ربي يهديك وخلاص كيف هان عليك خوك وكيف طاوعك قلبك هكي اديري واني نحسابك قلبك على خوك تزربزي وتسألي عليه هكي اديري هكي ربي يهديك يابنتي استغفر الله العظيم استغفر الله وخلاص

داير الليل :امي فيسع لمي كل حاجه عندك لازم نطلعو من البلاد

امباركه :وين بنهجو اللطف يا ولدي

داير الليل :يما الوضع معاش امن بعد لي داراته بنتك وارد كل شي هيا بس يما الله يريحك

رواية السجينه الحلقة العشرون والاخيرة
ناضت امباركه ونضت معاها قعدنا نكثو في الحاجات ونرتبو وداير الليل كسر تليفون غزاله وخدي الشفره وطلع قال عنده شغل… قعدنا ناخدو في الحاجات

امباركه :بنتي نجمه بري جيبي السبيزه خلي نرفعوها

اني :لا يما ممنوعه السبيزه

امباركه :ليش!

اني :هكي يما يفتشو في طايرات وخايفين

امباركه تلقح :اي والله عندهم الحق عاد احني خوت وفي بعضنا وبنتقاتلو

اني سكتت و غزاله تشوف لي بي كره بدل ما تتأسف ولا مزال مصكره راسها… المهم كملنا ودرت شاهي وقعمزنا نهدرزو لين داير الليل وقال هي نطلعو…وطلعنا الشناطي وركبنا السياره و حمدالله كانت كبيره السياره… ومشينا على الدم لي تونس ومن تونس حجزنا في بلغاريا.. ومن غدويتها اسقدنا لي بلغاريا وسافرنا… واستقرينا غادي وكملت قرايتي ولما تخرجت…دارلي داير الليل حفله…وفي من الايام

اني :داير الليل

داير الليل :نعم 💙

اني :نحبك

داير الليل:واخيرا حنيييتي وقلتيها هدي تالت مره نسمعها

اني :ههه بطل عاد بلا جو

داير الليل :امم شن اديري به

اني :نكتتب في جزء الاخير لي فاطمه

داير الليل :من فاطمه هدي

اني:ياااه خليني عاد

داير الليل قعمز :حولي غادي قربجك بنشوف

اني :تي اوووف ضايقتني حول غادي

داير الليل :ملحييي

رواية السجينه الحلقة العشرون والاخيرة
فاطمه كاتبتي العزيزه نشكرك ان سمعتيني للاخر والحقيقة حبيت طريقه سردك جملتيها قصتي في حاجات وتفاصيل كتبتيها صدمتني بجد تعرفي تسردي الحكايه صح وينطبق عليك اسم كاتبه يا كاتبتي الجميله كلام بسيط نكتب فيه ليك وانتي تبدعي وابدعتي فعليا

داير الليل :ما توقعتش روحي قاسي هك لكن 😥

نجمه :قاسي وهلبا؛ عموما حبيبتي ياريت اضيفي كلامي هدا كله في حلقه اخيره طبعا لو سمحتي وليا تواصل معاك اكيد واسعدتني تعليقاتكم يامتابعين وادعولي ربي يرزقني بذريه الصالحه …
The end
….

#فاطمه_سالم_الورفلي

…….. نحبكم

لمشاهدة جميع اعمال الكاتبة : روايات فاطمه سالم الورفلي

اترك رد

زر الذهاب إلى الأعلى