رواية الشيطانة الحلقة الثالثة للكاتب حسن الجامعي | القلم الناجح
روايات ليبيه كاملة

رواية الشيطانة الحلقة الثالثة للكاتب حسن الجامعي

رواية الشيطانة الحلقة الثالثة للكاتب حسن الجامعي

#الشيطانه 3

#حسن_الجامعي

تنبية :- الفكرة في دماغي من لما تفاعل ضعف…ان نزللكم كل اسبوع حلقه باش تتفاعلوا على حلقه وتوووصل للكل…غير هكي تفاعلوا معاي🔥💔

رواية الشيطانة الحلقة الثالثة

عند ملاك في الحوش:- 🔥

ملاك : الموس مزال في ايدها وتشوفله بنضرة معبية خبث وحقد و كرهه…انا مزووورتش شي وهيا اطلع من حوشي مشغووولة زي ما تشوف!
محمود : هههههههه لالا انتي زورتي والواضح ان في هلبا اسرار احني عرفناها عليك…انتي مدايرة جرائم غير هذه…في حجات انتي درتيها من زمان في طفولتك يعني تربيتي عليها وعايشه عليها لليوم…!
ملاك : بدت تعيط…قتلك اطلع برا خلاص!
محمود : مع الاسف انا رح نعتقلك توا…اولا على تزوير وتانيا على صووتك العالي توا…وتالتا على الاسرار تانيه اللي مزال محد يعرفها غيري!
ملاك : قربت منننه بطريقه تخوف وكان جسمها وايديها فيهم قووة ومش مرعوشه ابدا وبقووة عيين…!
محمود : خاف منها وبدي يمشي تالي بخطوات بطيئة من الخوف…خ خخيرك😨؟؟؟
ملاك : خدت الموس اللي في ايدها وزرعت الموس في ووسط قلبه…مالا برا قووول كل شي تعرفه تووا يا وسسخ😠…!
محمود : الموس كان مزروع في قلبه وواقف وفاتح فمه ويرعش وبدي شوية شوية يطيح ويشوف لملاك بعيوون معبيه حزن💔…!
ملاك : شافت ايدها كيف معبيه دممم وتجمعو دموعها وتفكرت مشهد قديييم في حياتها…يااربي انا شنووو درت توا كيييف هكي انا قتلته تواااا😨…ياربي شنو ندير…قعدت واقفه وحايرة مش عارفه شنو دير…!

_انا ولييت مجرمة مرة تانيه…انا قتلته بإيدي!

_منووو اللي بعت محمود ليا…اكيد ريهام الوسخه!

_شنوووو ندير في الجثة توووا…وين ندفنها حي عليا هذه كابوس ولا حقيقه😨…؟؟؟؟

رواية الشيطانة الحلقة الثالثة

عند ريهام في الحوش :-

ريهام : قاعده تبكي على كنبة وحاطه ايدها على وجها…انا مش مسمحتها والله العظيم رح ناخدي حقي منها يا امجد صدقني…!
امجد : يصبر فيها…غير وسعي بالك خيرك هكي انتي…الف مرة نقووولك خلاص خلينا نمسكوا عليها دليل واحد بسس وتوا تشوفي كيف رح ندخلها الحبس…!
ريهام : ناضت وعيونها معبيات دموع…لا لالا مش هكي وخلاص كيف تخلي انسانه هذه برا السجن كييف هذه دمرت حياتي ودمرت كل شي يخصني…!
امجد : استغرب…كييف يعني دمرت حياتك؟…هو انا لما نكون موجود معاك معناها حياتك مدمرة💔…!
ريهام : مسحت دموعها…لا بالعكس ماهو انت اللي مخليني نصبر وواقفه على رجليا…متزعلش مني احيانا احني نقولوا كلام يجرح لكن بدون قصد او بدون تفكير…متزعلش مني حبيبي…!
امجد : ابتسم ابتسامه متصنعه…اووكي خلاص قتلك خلي الموضوع عليا انا وتوا تشوفي شنو رح نديروا فيها…!
ريهام : بتوتر…اءءءءءءء انا درت حل يعني درت خطه تخليها تعترف وتدخل للحبس…!
امجد : بنضرات غريبه وبصوت عالي…انتي شنووو درتي احكي قصدي شن لبزتي من ورااي تكلمي؟؟؟
ريهام : اءءءءءءءءء…خييرك انا كلمت صاحبك المحقق محمود يمشيلها ويخليها تعترف وانا حكيتله كل شي عليها!
امجد : حط اييده على راسه بقلة صبر وتوتر…انتييي كييف ديري هكي من وراي قوولي…توا لو تعركت معاك رح طلعيني انا الغلطان…لكن انتي تخرفي وتخططي من راسك بدووون علمي…خيرك معندكش ثقة فيا؟؟؟
ريهام : وانت شنو دخلك فيا هي اختك ولا اختي هي قضيتك ولا قضيتي ما تحل عني يا امجد راهو مش ناقصتك بكل ولا طايقه رووحي…كل ما نقولك تصرف معاها احبسها ديرلها حل تقوولي اصبري واهدي وعطيني شووية وقت…انا ملييت قلبي قاعد ينحررق من داخل ونار الكره معبية قلبي من داخل…انتبه على كلامك معاي امجد!
امجد : دار بإيده بمعنى اطلعي من راسي…اصلا انا ماشي علاش قاعد ونتعب في رووحي معاك نقاش معاك ولى ممل وبدووون فايده…وطلع!
ريهام : لوحت تلفون على ارض بعصبية…درب يسسد ما يرد تماممم!

🔥روٌايَــــــــــــــــــــــاتٌ حَــــــــــــــسٌــــــن الجَــــــــــامّـــــعــــــيٌ 🔥

رواية الشيطانة الحلقة الثالثة

عند ريم و حاتم في المستشفى :-

الدكتورة : خدت منها الدم…وبدت ساعه على جهاز تشووف خيرها…حبيبتي ممكن تقوليلي شنو تحسي يعني مريضه ولا شنو؟
ريم : اءءءءءءءءء…انا تعبانه يعني كل شوية نستفرغ وشوفي وجهي امس هكي فجأه بدي💔حتى النووم معاش يجيني…!
الدكتورة : اووكي انا عرفت مشكلتك توا حبيبتي…الف مبروووك انتي حامل😍…!
ريم : قلبها طااااح وتوترت وجمدت مكانها…وقالت في سرها…كييف انا حامل وانا ليا اسبوعين بس متزوجه وحاتم ملمسنيش بككل وتفكرت ان اللي صار معاها هو اللي وصلها للحاله هذه؟؟
الدكتورة : اءءءءءء…انتي معايا ولا وين ؟
ريم : تلفتت وشافت لدكتورة بحزن…انا مش حامل شووفي تحاليل انتي متأكدة ان انا حامل ؟؟؟
الدكتورة : استغربت…خيرك حبيبتي شي طبيعي الاعراض اللي ذكرتيها حضرتك كلها اعراض حمل…ومشاء الله عليك مزلتي في بداية راهو وطبيعي يصير استفراغ ومغص وهكي يعني!
ريم : بدت تبكي قدامها وتعيط…حي عليا انا حي عليا شنوو ندير توا💔…!!!؟
الدكتورة : عفوا يا مدام؟؟
ريم : شدت اييد الدكتورة…نبووس ايدك ورجلك نعطيك شن تبي اي شي تبيه فلوس اي مقابل…بسس متقوليش لحد ان انا حامل قوليله ان انا عندي برد بالله علييك…!
الدكتورة : اءءءءءءءء…انا اسفه يا مدام منقدرش نقول اي تحاليل كادبه رح نخسر مهنتي و شغلي هكي؟؟
ريم : بالله عليك نترجا فييييك انا💔…!!!
الدكتورة : انا اسفه مدام منقدرش قتلك ونتيجه رح تطلع توا ورح نعطيها لزوج حضرتك وانتي تتصرفي معاه…!
ريم : شدت الدكتورة من شعرها وخدت الموس…قتلك متقوليييش ولا رح نقتلك بالمووس راهو انا مش ساهله مستغنية على روووحك انتي شكلك صح ولا…؟؟؟
الدكتورة : جمدت مكانها من الخوووف😨؟؟؟

رواية الشيطانة الحلقة الثالثة

عند ملاك في الحوش:-

ملاك : خششت للحمام تجري خدت مواد التنضيف والكلور وكل شي يخص النظافه…خدتتت جثة محمود حطتها ف المخزن قعدت ساعه وهي تجببد فييه للمخزن ولفاته بالبساط اللي قاعد في المخزن…وطلعت من المخزن وخدت الموس وغسلاته وغسلت ايدها وحطت الموس في شكارة ودساته في دولاب مؤقتا…وبدت تنضف بالكلور التنضيف وتعقيم في المطبخ كله…وطفت ع دحي لأن انحرق وعبى الحووش كله دخان…وكملت تنضيف وبدت حايره كييف بتتصرف وشعور الندم كييف استولى عليها وخلاها تحط ايديها في شعرها زي المجنونه…خششت للحمام نحت حوايجها اللي معبيات كلهم دم…وحطتهم في الغسالة طووول باش تبين ان مصارش شي وفتحت ميه الدوووش وهي ادووش وحاطه ايديها على راسها من صداع وتفكير وندم…!!!

_شن درت انا في رووحي ياربي شن درت في رووحي انا قتلته تووا💔…!

_كله بسببك يا بنت الكلب اللي اسمك ريهام مفيش غيرك رح يبعتلي المحقق هذه!

_مفيش غيييرك يعرف اسراري يا وسخه يا حقيرة…تبي تنتقمي مني انا رح نورييك كيف رح يكون الانتقام كيييف🔥…!

_انا عارفه انك درتييها قصد باش تخليني نعترف بكل شي صار…بس وحياة ربي رح نخلييك تندمي على ساعه اللي فكرتي فيها انك تنتقمي مني يا سافله…!

رواية الشيطانة الحلقة الثالثة

عند ياسمين و رواد في المستشفى :-

رواد : تعصب وبدي يعيط…توا يا حيووان لو السعر هذه اللي طلبته بندفعه راهو مضطريتش نشري بضاعه مغشوشة يا حمار يا غبي…!
مجهول : اووكي معناها خليها تنتهي الحكاية هذه بيينا لا نعرفك ولا تعرفني…!
رواد : خلاص ميه ميه…توا رح نمشي للمركز الشرطه ونقوللهم كل شي صار وكل شي تبيعوا فيه…!
مجهول : اوكي تمام برا المركز قدامك بس رح تندم…لأنك متعرفش اسمائنا وهذه رقم وهمي مش رح تعرف صاحبه وحتى ولو عرفوا رح نورطك معاي…ولا نسسيت انك شريت مني بضاعه مغشوشة😈…؟؟؟
ياسمين : ورا الباب وتسسمع في كل المكالمة اللي صارت بين رواد و مجهول😲…!
رواد : خلاص صكر المكالمه بعدين رح نتفاهم معاك تمام…توا صكر خليني نكلمك بعدين وانا برا المستشفى…!
مجهول : عندك تلات ساعات لو مخديتش البضاعه وتم اتفاق رح نبيعها لواحد غيرك انت ونصيبك!
رواد : صكر الخط في وجهه…ولاد الكلب يا عنبوا الساعه اللي بديت شغل فيها معاكم…!
ياسمين : حاولت تهرررب منه قبل ما يشوفها وبدت متوترة ومصدووومه من اللي كانت تسمع فييه…!
رواد : شافها كييف مشت وهي خايفه…😨ي ي ياسسسمين ياسمين وووين ماشيه اءءءء قصدي سمعتي الكلام اللي قلته انا توا😨…؟؟؟؟
ياسمين : بتوتر وخووف…اءءءءءء لالا مسمعتش شي قصدي شن هو الشي اللي مفروض نكون سمعته يعني😅…!
رواد : خدي ياسمين من ايدها ودخلها للمكتب…نعررفك سمعتيني شن قلت عارف انك كنتي ورا الباب وتسمعتي عليا…مش رح تقولي لحد ولاه…؟؟؟
ياسمين : اءءءءءءءء…كييف يعني؟
رواد : قرن حاجبه…وبصووت حاد ياسمييين…بلاش منه الجو هذه متع انا مسمعتش شي…كاشفك!
ياسمين : انت كييف قدرت ادير فيينا هكي قووول💔…معقوولة احني عايشين في الحرام ماكلتنا حرام شرب حرام لبس حرام💔…كييف قدرت دير فيينا هكي!
اصيل : ماما خيرك تقولي حرام…شن معناها🥺
رواد : واقف ومش قادر يجاوب على اسئلة ياسمين المحرجه💔!
ياسمين : احكككي خيرك ساكت حرام عليييك مفكرتش فيا ولا في ولدك الصغير هذه!
رواد : اءءءءءءء…ي ي ياسمين بس انتي!
ياسمين : بغصه…بسسس شنووو شنوشن مزال تبي تبرر معقوولة هكي…هذه امانه ربي قصدي كيف قدرت في ناس هكي ترضى حدد يبيع لأمك المريضه ادوويه مغشوشة توديها للموت وف ستين داهيه…لا وتدفع فلوسسس الدنيا عشان الدوا هذه ترضاها ولالا؟؟؟؟
رواد : نزل راسسه لوطا بندم…💔!
ياسمين : رواد طلقني !
رواد : ……… ؟؟؟؟؟؟

🔥روٌايَــــــــــــــــــــــاتٌ حَــــــــــــــسٌــــــن الجَــــــــــامّـــــعــــــيٌ 🔥

رواية الشيطانة الحلقة الثالثة

عند ملاك في الحوش:-

ملاك : طلعت من الدوش ولبست حوايجها وخايفه من الجثة اللي قاعدهفي المخزن ومعاش عرفت كيف تتصرف ووين تحطها…!

طق طق طق :-

ملاك : لبست البلوزة متعها ونزلت تبي تشوف من اللي جاها…مني الزفت اللي جايني في الوقت هذه…فتحت الباب!
سعدية : اهلا اهلا يا فندم ازيييك…ده انا مشتاقة للبيت واهل البيت يا فندم ازييك ياختي…!
ملاك : حطت ايدها على راسها بقلة صبر…اوووف سعدية خيرك جايه اليوم ومنو اللي معاك هذه ؟؟؟
سعدية : شوفي ياختي انتي مش قولتيلي عايزة طباخه شاطرة صح؟؟
ملاك : تعصبت من داخل…لا اله الا الله…اي صح قلت نبي طباخه شاطره هذه منووو؟؟؟
نسمة : كنك يا حنه مش طايقه روحك انتي؟؟؟
ملاك : استغربت…انتي من وين حبيبتي؟؟؟
نسمة : انا اسمي الطباخه المشهورة نسمه الجامعي…نكون اشهر طباخه فيك يا ليبيا !
ملاك : قلبت عيوونها بملل…اوووف توا نذوق توا يطلع زي وجهك…خششي انتي وياها!
نسمة : هي هي كنك يا حنه انا ندير في وكال انتي متقدريش ديريه يا بايرة!
ملاك : 😨…سعدييه من وين جايبتيها المراه هذه؟؟؟
سعدية : لا يا فندم معليش انتي اللي قللتي ادب معاها لأن انتي بتكلمي اكبر واشهر طباخه فيك يا ليبيا…مع ان انا مصريه بس اكلها تححفه والله العظيم…!
ملاك : بخبث…اووكي رح نخليه تكون طباخه متعي لكن نشوفوا اليوم شنو رح دير غدي…؟؟؟
نسمة : خلاص ياحنه…اليوم الغدا خليه مفجأه اهم حاجه المواد والخضرة واللحم كله قاعد ايووا ويكون واجد مش شوية فهمتي عليا…!
ملاك : شحاته وبتتشرط…خشي حبيبتي!
سعدية ، نسمة : خشووو للحوش وهما كيف يتفرجوا عليه كيف كبير ومليح!
ملاك : سعديه خشي للمطبخ نضفي كله بالوركينه كوويس بكل متخلي شي!!
سعدية : شافت المطبخ…يا فندم هو المطبخ نضيف اهوا عايزة انضفوا تاني ليييه؟؟؟
ملاك : عيطت عليها بعصبيه…قتلك نضفي يعني تنضفي علاش جايبتك انا باش تتفرجي عليا وممنوع وحده فيكم تخش للمخزن وحده بس لو خشت رح نشوف شغلي معاها مع شرطه!
سعدية : اءءءءءءءء…بس
ملاك : منغير بس انا عندي شغل فوق نكمله ونجي…وحسك عينك نشوف وحده فيكم خاشه للمخزن…وركبت تجري تجهز في نفسها باش تطلع للمستشفى وتشوف شغلها!
نسمة : كنها هذه مرة تضحك ومرة تعيط علينا…تحساب روحها بنت السلطان ولا شنو؟؟
سعدية : اكسري الشر ياختي دي وحده مريضه نفسيا قولتلها انا عايزة فلوس اروح لمصر قالتلي مفيش الا ما تكوني مشتغله عندي 3 شهور!
نسمة : مستغربه…شنو هضا عليك مراه مطرشقه!!
سعدية : هههههههه عفوا يا مدام هي كلمة مطرشقه معناها اي ؟
نسمة : معناها هبلة مهبولة بالغرب🤣…!
سعدية : 😂

رواية الشيطانة الحلقة الثالثة

عند الكل في المستشفى :-

ملاك : نزلت من السيارة وهي متعصبه منهم وكانت ناوية تقدم استقلتها وتطلع من المستشفى…!
الحارس : صباح الخير يا مدام ملاك نورتينا
ملاك : صباح الزفت…وخششت بعصبيه!
الحارس : بإستهزاء…ليس على المريض حرج!
ملاك : نورا وين الدكتور رواد ؟؟؟
نورا : اءءءءءءءء…مش عارفه شوفي وحده من الغرف دكتورة ملاك…!
ملاك : شكرا حبيبتي…وركبت ادوور عليه…بنت الكلب حطينها على استقبال ومش فاهمه ولا حاجه…جاهله…قدمت خطواتها وسمعت الحوار كله متع رواد و ياسمين…وبدت تتنصت!
ياسمين : رواد طلقني !
رواد : شدها من ايدها تبيني نطلقك بسهولة هذه!
ياسمين : بعد ايدك من عليا متخافش رح ناخد اصيل معاي ونمشوا انت كمل في بيع المغشوش!
ملاك : بدت تسمع في كل شي يقولوا فييه…وبدت تسجل فييه بتلفون!
رواد : خلاص مش رح نبيع ادوية مغشوشه تانيه…اطلعي من دماغي خلاص بدون لا طلاق لا شي ورح نصكر الموضوع هذه على الاخر بدون ما تعرف الشرطه تمام هكي؟
ياسمين : اءءءءء…خلاص معاش تعيط رواد المهم تبعد على رزق الحرام!
ملاك : مستمرة في تسجيل ومبتسمه!
الدكتورة : تجري في الممرات وتعيط عليهم…في محاولة اعتداء على دكتورة يا ناس بسسسرعه الحقونا يا جماعه…بسسرعه!
ملاك : تعصبت…يا بنت الكلب ملقيتي الا ما تجي في الوقت هذه يا وسخه انتي وهي…ونحت من قدام الباب…شنووو في دكتورة منال؟؟؟
رواد ، ياسمين : طالعين من الغرفه بفزع…شنووو في يا دكتورة منال!!!
الدكتورة : في وحده اسمها ريم واخد المقص وتهدد في الدكتورة بالقتل…انزلوا تحت قسم الولادة!
ملاك : شنووو😨…نزززلت بفزع تبي تشوف شن صاير وبالمرة تقصقص عليها!
ياسمين و رواد : نزلوا بفززع وخايفين تصير حاجه في المستشفى!

ريم : شدت الدكتورة من شعرها وخدت الموس…قتلك متقوليييش ولا رح نقتلك بالمووس راهو انا مش ساهله مستغنية على روووحك انتي شكلك صح ولا…؟؟؟
الدكتورة : جمدت مكانها من الخوووف😨…بالله عليك يا مدام انا عندي صغار متقتلينيش بالله عليييك!
ريم : معناها خلاص متقوليش لحد…وتصكري فمك فاهمه ولالا!
رواد : كسر الباب بالقوة وخش بفززع…شنووو ديري يا ريم خيرك معاها😨…!
حاتم : مصدوووم من مرته…خيرك هبلتي ريم نزلي المقص وريحينا سيبي البنت في حالها!
ملاك : خيرك يا حبيبتي شكلك تعبانه نفسيا…نزلي المقص وتعالي انحل الامور بالهداوة!
ريم : وشوشت في ودن دكتورة…نسمعك مقايلة حرف واحد بسسس…ضي شمس غدوا مش رح تشوفييه فاهمه!
الدكتورة : هزت براسها بمعنى حاضر…اءءءءء تمام سيبيني بالله عليييك!
ريم : نزلت المقص ودفت الدكتورة…خيرركم واقفين كلكم اهني مدرتلهاش شي!
حاتم : اءءءءءءءء…سامحونا بالله عليكم هي تعبانه نفسيتها يامات هذه!
ملاك : امبارح نفسيتك كانت كويسه هو صح كنت تستفرغي بس عادي…واضح ان اعراض حمل!
ريم : تعصبت من كلام ملاك…صكري فمك انتي انا مش حامل خلاص مش حااامل…!
حاتم : مستغرب من تصرفاتها الغريبه…خيرك ريم في حاجه داستيها علينا ومتبيش تقوليها ولا شنو؟؟
الدكتورة : انا اسفه يا مدام بس منقدرش نكدب علييهم هذه قوانين المستشفى…!
ريم : فنصت فييها بمعنى صكري فمك متتكلميش!
الكل : يتفرج ويبي يعرف شن القصه اللي داستها ريم عليييهم كلهم؟
الدكتورة : المدام ريم بعد ما قالتلي عن حالتها ولما شفت التحاليل طلعت النتيجه ان😨…#يتتتبببببع!

معمل نسمة الجامعي نسمة الجامعي ( بنغازي ) اللي عندها مناسبة تحجز عندها ماكلتها مشاء الله ونظافه على تجربة نحكيلكمممم🤤😋

_تتواقعوا الدكتورة رح تحكي ولا رح تتستر عليها…احتمالاتكم رح تكون غلط كلها…فكروا شنو رح تقوللهم الدكتورة…؟

_نسمه و سعدية رح يشوفوا الجثة متع محمود او لا…والشرطه رح تدخل في القصه هذه ام لا؟؟؟

_وشن رأيكم بالمفجأه متع اليووم…رجعتلكم سعديه مرضتش تروح لمصر بدون ما تضحكم شوويه😂…!

_رح نشوف تعليقاتكم كلها…ورأيكم بالروآية والحلقة اليوم❤…!

🔥روٌايَــــــــــــــــــــــاتٌ حَــــــــــــــسٌــــــن الجَــــــــــامّـــــعــــــيٌ 🔥

 

لمشاهدة جميع اعمال الكاتب : روايات حسن الجامعي

اترك رد

زر الذهاب إلى الأعلى