رواية الشيطانة الحلقة الثانية للكاتب حسن الجامعي | القلم الناجح
روايات ليبيه كاملة

رواية الشيطانة الحلقة الثانية للكاتب حسن الجامعي

رواية الشيطانة الحلقة الثانية للكاتب حسن الجامعي

#الشيطانه 2

#حسن_الجامعي

_ _ _ _ _ _ _ _ _ _ _

( 2020 _ شهر 2 )
البداية مع يوم جديد:- ⛅
حفلة في حوش ملاك…!

الكل :- فرحانين ومتجمعين على طاولة كبيرة بين العاب وبالونات والصغار المعازيم والاقارب والاغاني والضحك والهدرزة والاضوية كل وحده تهدرز مع تانيه وكل واحد يهدرز مع تاني وكلهم على طاولة فيها تورته العيد ميلاد🎂…وواقفين يولعوا في شماعي وصاحب العيد ميلاد الصغيرون قاعد بيناتهم وفرحان بعيد ميلاده وبدووو يغنووله🤤…!

🎂😍 Happy Birthday to You

🎂😍Happy birthday to you

🎂😍 Happy birthday to you

🎂😍Happy birthday to my friend1

🎂😍 Happy birthday to you

رواية الشيطانة الحلقة الثانية للكاتب حسن الجامعي

🎂😍 Happy birthday to you

😍❤Happy birthday to you

❤😍Happy birthday to my friend

😍❤Happy birthday to you

❤😍Happy birthday to you

😍❤Happy birthday to you

ملاك : ابتسمت بحب…هيا يا حبيبي انفخ الشمووع يا عمري❤😍…!
اصيل : نفخخ الشمووع بفرح وببرئه…هيييييييييييي😍
ياسمين : تتفرج على اصيل كيف فرحان وهي فرحانه بييه…كل سنه وانت طيب ولدي حبيبي🥺…!
ملاك : خوود هذه الهدية حبيبي كل سنه وانت طيب وعقبال ال 100 سنه يارب❤…!
اصيل : شكرا خالتي ملاك🥺…!
ريم : وهذه هديه مني لييك يا اموور يا كيووت انت😂❤…!
اصيل : شكرا خالتي ريم 🥺…!
ياسمين : بخجل… شكرا حبيباتي مكانش لازم تعبوا رووحكم وتجيبوا هدايا وجودكم برووحه هديه بنسبة ليا بدات انتي ملاك❤…!
ملاك : مافيش حاجه من واجبنا حبيبت قلبي ربي يحفظهولك وتشووفيه عريس…!
ياسمين : بجد حبيبتي ملاك شكرا بجد انك قبلتي ديري العيد ميلاد في حووشك محلاك❤…!
ملاك : انا منتحملش الكلام الحلوو هذه راهو😂❤…!
ريم : اي حقا شنو صار معاك قبلوا يخلوك مديرة القسم في المستشفى تبع الامراض النفسيه والعقلية او لا…؟؟
ملاك : تلفتت وشافت لياسمين…والله هذه مهمه راجل ياسمين ابصر يقبلني ولالا هههههه…!
ياسمين : بلعت ريقها بتوتر…اءءءءءءء ههههه مش عارفه الحق انا منندريش قصدي مندخلش في امور الشغل بس رح نكلمه مرة تانيه…!
ريم : حطت ايييدها على بطنها بووجع…اخخخخخخ بطني رح نخش الحمام ونجي اسسفه…!
ملاك : تلفتتلها وشافتله بطريقه استغراب…؟؟؟
ياسمين : زعما خييرها ريم…شفتي كييف خششت تجري للحمام طوول هكي غريبه بصراحه…!
ملاك : اءءءءءءء…اي اي شفتها زعما حامل معتقدش تكوون حامل…!
ياسمين : مش عارفه لكن واضح انها حامل مع انها كيف تزوجت مليهاش اسبوعين صح ولاه…؟
ملاك : بخبث…ايوالله كلامك رسسمي بسرعه هذه حملت والله بديت نشك فيها انا…!
ياسمين : بلعت ريقها بخووف…انهار احررف زعما يلي في بالك في بالي توووا…!
ملاك : الله واعلم منندريش عليييها…خلاص فكينا منها خلي الخلق للخالق…!
ياسمين : شربت رشفه من العصير وبدت الافكار ادوور في راسها وشكوك في ريم…!!!

رواية الشيطانة الحلقة الثانية للكاتب حسن الجامعي

طق طق طق:-

ملاك : ناضت بفززع…تي منوو يلي يطقطق بالقووة هذه خززي…خلعني الحق!
اصيل : توا نفتح انا الباب خالتي ملاك🥺…فتح الباب وشاف رواد…!
رواد : ووولدي اصيل كل سنه وانت طيب حبيبي تعالا شووف شن جبتلك…!
ياسمين : تغيرت ملامحها…اءءءءءءءءءء ر رواد كييف عرفت ان احني هنايا😨…!
رواد : عطى اللعبة لأصيل وخدي ياسمين من ايدها بعنف…اتعالي جاي بسرعه قدامي للمطبخ…!
ياسمين : بلعت ريقها بصدمه…تي خييييرك رافعني للمطبخ شنو في خيرك…؟
رواد : قرن حاجبه وتعصب…انا مش قتلك مديريش العيد ميلاد في حوش المراه هذه خيرك متفهميش انتي خييرك…!!!؟؟
ياسمين : نحي ايدك من عليا اول شي…تانيا هذه ملاك صاحبتي وهي اللي قالتلي ديروا العيد ميلاد اهني وشوف حوشها حلو وكبير ووسع وسد كل المعازيم شن قصتك معاها انت…؟
رواد : شدها من رقبتها بعنف…وربي العزة مرة تانيه نلقاك مكلمتيها اعتبري رووحك طالق فاهمه ولالا…ونحي ايده ودفها ومشي!
ياسمين : استغربت…خيييره هذه شنو في مفهمتش خيره معاها…!

_
_
_
_

عند ريم في الحمام:-

ريم : تستفرغ في الحمام وحاطه ايدها على بطنها بقووة من الوجع…اخخخخ ياربي شنو في شن صايرلي💔…!
ملاك : اطق طق عليها…ريييم حبيبتي خيرك في حاجه صايرتلك في حاجه صايرة معاك…؟
ريم : تلفتت بتعب وعيطت…مافياش شي ملاك خليني في حالي بس تعبانه شويه نغسل وجهي ونجيك…!
ملاك : بدت مستغربة من صووتها وجاها فضول تعرف خييرها وشن صاير معاها…خلاص تمام خودي راحتك بس لو تبي اي شي قوليلي تمام…!
ريم : رفعت شعرها بقلة صبر…اخخخخ خيرها لصقت فيا هذه😤…!
ملاك : مششت وفاتتها وهي في اسئلة وشكوك في راسها…؟؟؟

رواية الشيطانة الحلقة الثانية للكاتب حسن الجامعي

بعد مرور ساعات :-

طق طق طق :-

ملاك :- فتحت الباب وتفاجئت…اهلا وسهلا اهلا تفضل…!
حاتم : اءءءءء…اهلين ملاك ريم وينها منشوفش فيها…؟
ملاك : واللهي يا حبيبي هي توا شوفتها خاشه الحمام وشكلها مريضه…كل دقيقتين تخش الحمام…!
حاتم : استغرب…اهاااا غريبه مش عارف بالك مريضه كلميها تطلع خليني نشوفها…!
ملاك : اوووكي تمام…وبدت تشمي بخطوات خفيفه تبي تسمع ريم شنو صاير معاها…!
ريم : تغسل في وجها ونشفت بالفوطه…وفتحت الشنطه المكياج وبدت تحط على وجها باش يغطي على تعب والحزن…!
ملاك : بتوتر…اءءءءءءء ملاك حبيبتي انتي كويسه ولالا؟؟؟
ريم : بصووت واطي…الصبر الصبرر من عندك…شن تبي هذه…اءءءءءء شوويه ونطلع نعدل في ميك اب حبيبتي…!
ملاك : تمام حبيبتي على فكرة حاتم ووصل وهو يستنى فيك توا…!
ريم : اءءءءءء…خلاص قوليله طالعه لحظة بس!
ملاك : بصوت واطي…نموووت ونعرف خيرك…اي اي تمام رح نقوولة بس انتي استعجلي شوية!
ريم : بدت تعيط عليها بصوت عالي…قلنالك خلاص درقي وجهك توا نطلع متفهميش انتي!
ملاك : خدت بعضها بتوتر من تصرف ريم ودارت روحها مسمعتش شي…اءءءءء هي قالتلي تعدل في مكياجها شويه وتطلع!
حاتم : تمام تمام…!
ريم : طلعت من الحمام وشافت لحاتم بخيبة…انا واتيه هيا خلينا نروحوا…!
ياسمين : اهلين حاتم اسفه مكنتش شايفتك كنت لاهية مع اصيل كيف حالك…!
حاتم : انا الحمدلله ياسمين وين رواد منشوفش فيييه مش باين؟
ياسمين : هوو في المطبخ بيشرب ميه وبيمشي اليوم عطلنا هلبا في حوش ملاك اسفه بجد🥺…!
ملاك : ضحكت بحب…هههههه لالا حبيبتي الحوش حوشكم وبعدين انا فرحانه بجد كنت ديما بروحي واليوم شغاله عطيتها اجازة يعني غيرنا جو وهكي…!
رواد : طلع من المطبخ وهو يكشخ على ملاك…هيا ياسمين وشكرا دكتورة ملاك عبد الكريم على هذه اللفته الجميلة…!
ملاك : لا شكر على واجب انت دكتورنا كلنا ومديرنا ونتمنى لولدكم التوفيق ونجاح❤…!
ياسمين : خدت شنطتها وساوت وشاحها…هيا اصيل هيا حبيبي البس سبيدروا متعك…!
رواد : اووو حاتم يا غالي وين الغيبه كيف الحال شن مداير…!
حاتم : ماشيه والله حال الخدمه والحوش وهكي…امورك هانيه انت؟
رواد : اي الحمدلله…شن رايكم تجوا عندنا في الحوش نشربوا قهوة ومنها نهدرز معاكم شويه في موضوع…!
ملاك : اءءءءءءء…وانا رح نجي…قطعها رواد!!!
رواد : نحنا اسفين على الازعاج بجد تعبناك معانا توا تأخر الوقت اصلا…هي خلونا نتوكلوا احني…!
ملاك : وجها ولى اشكال الوان…اءءءءء اوكي يا حبايبي تصبحو على خير واقعدوا زوروني نحنا جيران عاد ههههه…!
ياسمين : باست ملاك بالخد…سامحيني تعبتك…بسلامه عاد… تصبحي على خير وليلتك سعيدة❤…!
ملاك : وليلتك حبيبتي!
ريم : باستها بالخد…سامحيني مكانش قصدي نتعصب عليك…بسلامه حبيبتي!
ملاك : كييف معصبتيش عليا خيرك خريطه رايحه عندك😂…؟
ريم : بصوت واطي…اهاااا مسمعتي شي معناها
ملاك : كيييف؟
ريم : هههههههه…لالا شي حبيبتي مع السلامه تأخرنا هلبا هيا حاتم…!
الكل :- طلعوا وقالوا ل ملاك تصبحي على خير وسلميلي على هذه و هذه ومن الكلام هذه❤…وصكرت الباب عليهم بإبتسامه خفيفة!
ملاك : بعد ما صكرت الباب تغيروا ملامح وجها…ناسس زباله وناكرين للجميل بعد هذه كله الكلب ميبيش يخليني ناخد منصب المديرة في القسم واحد حقيير وكلب!

_اسئلة ادوور في راسي…شنو هو الموضوع اللي بيتكلم فيه معاهم؟

_وعلاش متكلموش اهني قدامي في الموضوع هذه؟

_اكييييده موضوع يخصني باش مشوا بيتكلموا برا الحوش متعي؟

_لازم نعرف شنو في وشنو اللي قاعد يصير من وراي لازم نعرف شن الموضوع!؟

🔥روٌايَــــــــــــــــــــــاتٌ حَــــــــــــــسٌــــــن الجَــــــــــامّـــــعــــــيٌ 🔥

رواية الشيطانة الحلقة الثانية للكاتب حسن الجامعي

كلهم عند رواد في الحوش :-
الساعه 1 ونص في ليل…!

ريم : خشت وقعمزت على الكنبه…انا مش عارفه شن نقوللكم بس الوقت تأخر…!
ملاك : لبست عبايتها بفزززع…وطلعت من حوشها بخطوات خفيفه ومشت لحوش رواد وتشوف فيهم كيف مقعمزين على كنبة كلهم ويتكلموا…قربت من جهة الباب وبدت تسمع فيهم شن يقولوا…!
رواد : عندي موضوع كويس ليكم يعني حسيتك حاتم مضايق شوية من الخدمه اللي تخدم فيها…!
حاتم : هو فعلا متعب هلبا الشغل هذه…مستشفى خامرة يعني جلسات اللي نعطي فيها لناس متخلفه هلبا يبوا مستشفى مش جلسات والراتب شوية بكل لأن اصلا مش موفرين امكانيات كويسه…!
رواد : اي خلاص شن رأيك نعطيك تاخد منصب مدير قسم في المستشفى متعي…قسم الامراض العصبية والنفسيه…؟
حاتم : تحمس وتوتر…اءءءءءءء بجديات تتكلم انت…قصدي بجديات منور خوي رواد…!
ريم : هههههه بجد شكرا رواد بس المفروض الدكتورة ملاك عبد الكريم تاخده منصب المديرة في القسم هذه صح…!
رواد : بالله عليكم معاش تجيبولي سيرتها المراه هذه مخلوقة مش طبيعية بكل…!
حاتم : معاكم حق قصدي هذه وحده مش طبيعية ومريضه تحسوها حتى في طريقة كلامها…!
ريم : وولصقة هلبا تلصق في الواحد معاش تسيبه…تقعد واقفه على راسك بجد وحده دماغها غريب وفاضي…!
ياسمين : اي هلبا وتحب تحطك تحت الامر الواقع يعني شوفوا كيف خلتني نتعارك انا و رواد بسبب قصة العيد ميلاد هذه…!
اصيل : ماما نبي نرقد انا نعسان هيا🥺💔…!
ياسمين : خلاص حبيبي اصبر شوية ومروحوا تشوف فينا نتكلموا توا ولاه…وقتلك مليون مرة لما الكبار يتكلموا الصغار يسكتوا…!
ريم : انا رح ندير قهوة بجد راسي بيتفجر…وحاسه روحي تعبانه!
ياسمين : استني لاحقتك حبيبتي…لحظة!
حاتم : فرحان بالشغل اللي جاهه واخيرا بياخد منصب ومفكرش كيف رح تكون ردت فعل ملاك…!
رواد : مقعمز ويفكر كيف بيتصرف مع ملاك…وبيشوف شن بيدير لأن في اسرار يعرفها عليها هو ساكت عليها لتوا؟؟
ملاك : ملامحها تغيرت هلبا بكل ووجها تغير كأن مخلووقة تانيه بكل…اخخخخخ يا فرووخ الكلب دواكم عندي انا👿…!

رواية الشيطانة الحلقة الثانية للكاتب حسن الجامعي

يوووم جديد :- 🆕️🌤
عند ريم و حاتم في الحوش…!

ريم : ناضت من نوم اوول ما فتحت عيوونها بفززع…ناضت تجري للحمام وبدت تستفرغ مرة تانيه وقعدت قريب ساعتين وهي تستفرغ في حمام وصووت المياه عالي…ملامحها صفرا شافت لروحها في المراه كيف مولي وجها شاحب واصفر وتاعب هلبا…زعما رح نمووت بمرض هذه ولا شنووو💔…!
حاتم : ناض على صووتها كيف تجري للحمام وشك فييها وللمرة التانيه يشك فيها…زعما خييرها هذه…اكيد مريضه زعما شن فييها؟؟
ريم : طلعت من الحمام وهي تنشف في وجها…صباح الخير!
حاتم : بدي مركز عليها…خيرك تستفرغي كل شووية انتي مريضه ولا كيييف؟
ريم : كيف يعني مفهمتش…؟
حاتم : انا قصدي انتي مريضه نرفعك للمستشفى احكيلي شن تحسي؟؟
ريم : بتعب…حاسه رووحي تعبانه ومنبيش نمشي للمستشفى!
حاتم : هيا وتي رووحك البسي عبايتك واطلعي قدامي للمستشفى اكييد فيك حاجه…!
ريم : توترت هلبا وخايفه…منبيش قتلك حاتم منبيش برا لشغلك خليني في حالي…!
حاتم : عطاها عبايتها…هاكي البسي توا منيش ماشي ل ولا مكان تووا ليين تلبسي عبايتك ونشوفوا خيرك في المستشفى…!
ريم : اعصابها تلفتت وبدت تعيط…قتلك منبيش خلاص حل عني حل عنننني برا لشغلك خيرك معاش عندك الا انا…خيرك انت جايتك عليا اليوووم…!
حاتم : ضربها كف خلاها تسكت…ضمي فمك ومعاش ترفعي صووتك عليا والبسي نستنى فييك في سيارة…وطلع وهو ضميره يأنب فيه على الكف!
ريم : حطت ايدها على مكان الضربه…وبدت تبكي وخايفه وحاسه ان دنيا تلعب بيها وبتنتهي…حي عليا انا شن درت في رووحي توا…؟

_انا خايفه يصير يلي في بالي وهكي تكوون اكبر كارته مرات توصل للقتل لو طلع صح💔…!

_بعد ما طلعت من حوش عيلتي بدت الدنيا تلعب بيا هلبا حجات تغيروا💔…!

_يارب اووقف معاي ف هل اليووم يارب ميصيريش يلي في بالي💔…!

ريم : لبست عبايتها ومسحت دموعها وخدت شنطتها وصكرت الباب وطلعت ركبت في سيارة وهي متعصبه من حاتم…!
حاتم : بدوون اهتمام بدي يسووق وخايف ان يكون عندها مرض او حاجه زي هكي🔥…ووصلوا للمستشفى وكان كل ما قريب يووصل يزيد الخووف…!
ريم : نفس الشي كل ما قريب تووصل يزيد شعور الخووف عندها…نزلت من السيارة بخوف!
حاتم & ريم :- خششو للمستشفى هما الزوز وكانوا مش طايقين بعض!
حاتم : السلام عليكم دكتورة بالله نبوا نديروا تحاليل…!
الاستعلامات : اءءءءءءء…اوكي عطيني اسمك كامل ورقمك وعمرك ومتزوجه او لا…تفضلوا الكشف ب 150 دينار…!
ريم : لقت فرصة باش تتسبل…اءءءءءءء هلبا 150 خلاص خلينا نجوو يوم تاني حاتم…!
حاتم : قرصها من ايدها وشافلها بطريقة تخوف…تفضلي اهما 150 خشي للدكتورة خلينا نشوفوا خيرك ريم!
الدكتورة : تعالي حبيبتي تفضلي ناخد دم منك…استاذ خليك برا لو سمحت!
حاتم : واقف وحط ايده على راسه بقلة صبر ومتوتر…!
الدكتورة : خدت منها الدم…وبدت ساعه على جهاز تشووف خيرها…حبيبتي ممكن تقوليلي شنو تحسي يعني مريضه ولا شنو؟
ريم : اءءءءءءءءء…انا تعبانه يعني كل شوية نستفرغ وشوفي وجهي امس هكي فجأه بدي💔حتى النووم معاش يجيني…!
الدكتورة : اووكي انا عرفت مشكلتك توا حبيبتي…الف مبروووك انتي حامل😍…!
ريم : قلبها طااااح وتوترت وجمدت مكانها…وقالت في سرها…كييف انا حامل وانا ليا اسبوعين بس متزوجه وحاتم ملمسنيش بككل وتفكرت ان😨…….؟؟؟؟؟؟

رواية الشيطانة الحلقة الثانية للكاتب حسن الجامعي

عند ياسمين و رواد في المستشفى :- 🏥
الساعه 10 الصبح…!

ياسمين : خاشة للمستشفى…انا رح نشووف الدكاترة شوويه ونجيك حبيبي…!
رواد : تمام معناها خلي اصيل يقعد معاك…!
ياسمين : لالا خليك معاك شويه بنتكلم انا ودكتورات في امور تجميل وهكي فهمت…!
رواد : وااكككك…تمام تعالي معاي اصيل تعالا نركبوا للمكتب فووق…!
اصيل : بابا نبي حلووة🥺…!
رواد : يا راجل تمام توا نجيبلك خليني بس عندي حاجه مهمه توا بنديرها…!
ياسمين : ركبت ادووور على ملاك…وووينها زعما ملاك؟؟؟
رواد : خشش للمكتب وبدي يدير في اتصالات…الوووو رد عليا الوووو!!
مجهول : بصوت خشن وغريب… الو اهلين استاذ مروان!
رواد : باهي اللي رديت…لا اهلين ولا سهلين وين لبضاعه نستنى في خبر مرديتوش عليا لتوا…!
مجهول : اهدى اهدى…انت لازم توا تدفع السعر اللي طلبناه منك…!
رواد : تعصب وبدي يعيط…توا يا حيووان لو السعر هذه اللي طلبته بندفعه راهو مضطريتش نشري بضاعه مغشوشة يا حمار يا غبي…!
مجهول : اووكي معناها خليها تنتهي الحكاية هذه بيينا لا نعرفك ولا تعرفني…!
رواد : خلاص ميه ميه…توا رح نمشي للمركز الشرطه ونقوللهم كل شي صار وكل شي تبيعوا فيه…!
مجهول : اوكي تمام برا المركز قدامك بس رح تندم…لأنك متعرفش اسمائنا وهذه رقم وهمي مش رح تعرف صاحبه وحتى ولو عرفوا رح نورطك معاي…ولا نسسيت انك شريت مني بضاعه مغشوشة😈…؟؟؟
ياسمين : ورا الباب وتسسمع في كل المكالمة اللي صارت بين روادو مجهول😲…….؟؟؟؟؟

🔥روٌايَــــــــــــــــــــــاتٌ حَــــــــــــــسٌــــــن الجَــــــــــامّـــــعــــــيٌ 🔥

رواية الشيطانة الحلقة الثانية للكاتب حسن الجامعي

عند ملاك في الحوش :-
الساعه 10 الصبح…!

ملاك : ناضت وراسها مصدعع قريب يتفجر…سعدييييه يا سعدية وووين القهوة؟؟…سعدية شني حتى اليوم واخده اجازة…اووووف ياربي…ناضت ومشت للمطبخ شربت طاسة ميهه وبدت تجهز في الحجات متع الفطور…خليني نحطوا الطماطم ونقرضوا الفلفل ايييه ونغسلوهم كويس وبعدين نقرضووهم…!

طق طق طق :-

ملاك : سعديية افتحي الباب…ووووه سعديه مش قاعده…طلعت من المطبخ ولبست وشاحها ع سريع…وفتحت الباب!
محمود : اءءءءءءء…صباح الخير مدام ملاك!
ملاك : تفضل استاذ…في حاجه؟؟؟
محمود : بتوتر…انا نكون شرطي في المركز ومحقق واليوم تلقينا بلاغ من واحد مش رح نقولولك اسسمه بس ياريت تفضى شوية عشان نتكلم…وهذه البطاقة متعي!
ملاك : اسئله هلبا ادووور في راسها…شوف ايديا زيت ف يعني تفضل قعمز في المطبخ بسرعه عشان الماكلة بتنحرق مني هههه😄…تلفتت وهي شاكه وملامحها ملامح شكوك لكن من برا ولا كأن فيها حاجه…!
محمود : خش للمطبخ وشاف الدنيا كيف حايسه…انا شكلي جيت في وقت مش مناسب…اسف بس انا مضطر…!
ملاك : لالالا عادي الحوش حوشك تفضل قعمز على كرسي واحكيلي كل شي بتفصيل استاذ!
محمود : جانا بلاغ بأنك مدايرة جريمة بس مش جريمة قتل…جريمة تزووير…!
ملاك : الموس في ايدها وتقرض في الفلفل…اهاااا تزوير شني مفهمتش عليك استاذ!
محمود : قوليلي استاذ محمود اسمي محمود…يعني نشوف فيك هكي مراه كويسه وطيبه مضنيتش انك ديري شي زي هذه…!
ملاك : انا قريت ونجحت بجهدي في الجامعه وخديت الشهادة بدون تزوير…ودليل ان انت معندكش دليل استاذ محمود صح…ابتسمت بخبث😈…!
محمود : مع الاسف انا عندي دليل…شووفي هذه الشهادة متعك خدينها من المكتب متعك اليوم…!
ملاك : ملامحها وحركاتها تغيروا…لحظة لحظة…كييف قدرتوا تاخدوا شهادة متعي ومن مكتبي…وبدت تعيييط…انتم مني قاللكم تخشوا لمكتبي مني سمحلكم اصلا🤬…!!!
محمود : بدي يستفز فيها…وواو بصراحه كنتي قبل شوية فرحانه وطيبه ورقيقه والحوش حوشك…شنو صار توا…الواضح ان كلامي صح!
ملاك : الموس مزال في ايدها وتشوفله بنضرة معبية خبث وحقد و كرهه…انا مزووورتش شي وهيا اطلع من حوشي مشغووولة زي ما تشوف!
محمود : هههههههه لالا انتي زورتي والواضح ان في هلبا اسرار احني عرفناها عليك…انتي مدايرة جرائم غير هذه…في حجات انتي درتيها من زمان في طفولتك يعني تربيتي عليها وعايشه عليها لليوم…!
ملاك : بدت تعيط…قتلك اطلع برا خلاص!
محمود : مع الاسف انا رح نعتقلك توا…اولا على تزوير وتانيا على صووتك العالي توا…وتالتا على الاسرار تانيه اللي مزال محد يعرفها غيري!
ملاك : قربت منننه بطريقه تخوف وكان جسمها وايديها فيهم قووة ومش مرعوشه ابدا وبقووة عيين…!
محمود : خاف منها وبدي يمشي تالي بخطوات بطيئة من الخوف…خ خخيرك😨؟؟؟
ملاك : خدت الموس اللي في ايدها وزرعت الموس في ووسط قلبه…مالا برا قووول كل شي تعرفه تووا يا وسسخ😠….#يتتتتتببببع!

_من المجهول اللي يهدد في رواد…؟

_شنو هي اسرار ملاك اللي صارت معاها في الماضي…؟

_لو انتي مكان ياسمين تمشي تبلغي الشرطة على زوجك او تتستري عليييهه…؟

_شن وراه سر وغمووض ريم…والقصه شن تخص مني…؟؟؟؟

رواية الشيطانة الحلقة الثانية للكاتب حسن الجامعي

🔥روٌايَــــــــــــــــــــــاتٌ حَــــــــــــــسٌــــــن الجَــــــــــامّـــــعــــــيٌ 🔥

 

لمشاهدة جميع اعمال الكاتب : روايات حسن الجامعي

 

اترك رد

زر الذهاب إلى الأعلى