رواية الشيطانة الحلقة الرابعة للكاتب حسن الجامعي | القلم الناجح
روايات ليبيه كاملة

رواية الشيطانة الحلقة الرابعة للكاتب حسن الجامعي

رواية الشيطانة الحلقة الرابعة للكاتب حسن الجامعي

#الشيطانه 4

عند الكل في المستشفى :-

الدكتورة : انا اسفه يا مدام بس منقدرش نكدب علييهم هذه قوانين المستشفى…!
ريم : فنصت فييها بمعنى صكري فمك متتكلميش!
الكل : يتفرج ويبي يعرف شن القصه اللي داستها ريم عليييهم كلهم؟
الدكتورة : المدام ريم بعد ما قالتلي عن حالتها ولما شفت التحاليل طلعت النتيجه ان هي حامل!
ريم : حطت ايدها على راسها بقلة صبر وبصوت متنرفز…ياررربي مش قتلك متقولييش توا…وجت بتشدها من شعرها!
ملاك : وقفت في نص بيناتهم…ميصحش هكي حبيبتي غلط عيييب تتعاملي مع دكاترة هكي يا ريم!
ريم : تعصبت وفشت غلها كله في ملاك…نحي من قدامي يا وجه الشر انتي…تدخلي في كل شي…تدخلي في حجات انتي مدخلكش فيها مع ان محد معبرك ولا شايفك من ارضك حلي عليينا خلاص اطلعي من حياتنا بني آدمه مش متربية ولا تعرف حتى الأصول!
ياسمين : انصدمت😨…اهدي حبيبتي عيييب تتكلمي مع دكتورة ملاك هكي!
حاتم : خش وهو متحشم من اللي دارته ريم قدامهم…يا جماعه بالله سامحوني امسحوها في وجهي!
ملاك : من برا وجها طبيعي وعادي جدا لكن عيونها في عيون ريم بزبط…ومن داخل تحرق وخاطرها تخنقها وتقتلها…وطلعت وهي زعلانه!
ياسمين : لحقت ملاك وهي مرتبكة…اءءءءءء ملاك تعالي ريم متقصدش شي!
رواد : دكتورة تقدري تطلعي خلاص!
الدكتورة : حاضر دكتور رواد…وطلعت وهي خايفه من ريم وتصرفاتها…ربي يشفي!
ريم : بصووت عالي وهمجي…ربي يشفييك انتي يا قو🔞…قداش يخلصوا فييك باش متتكلميش يا واطييه!
حاتم : صكر فم ريم لأن بدت تقوول في كلام غير اخلاقي…وهذه دليل ان حالتها النفسيه مش طبيعية!
رواد : خوي حاتم انا رح نخليكم بروحكم…وحاول انك تشوف مشكلة مرتك وتحلها…تمام؟
حاتم : ابتسم ابتسامه متصنعه…اوووكي خوي رواد بالله سامحني!
رواد : طلع وصكر الباب وراه!

رواية الشيطانة الحلقة الرابعة للكاتب حسن الجامعي

ياسمين : انا رح نخش توليت نعدل ميك اب متعي ونجي!
رواد : بصووت هادي…انا رح نمشي للمكتب ونجي…تعالا اصيل بابا
اصيل : بابا نبي نمشي مع ماما🥺!
ياسمين : بنخش حمام نساء خليك مع بوك مش مطوولة…وخدت بعضها وطلعت!
ملاك : شافت لأصيل…شن رأيكم نخلييه عندي ما بين ما طلعتي حبيبتي ياسمين؟
رواد : ي بعضهه ومشي وباله مشغول!
ياسمين : اوك حبيبتي خليه عندك لابين جيييتك!
ملاك : تعالا حبيبي اصيلوا هييي…شدت ايد اصيل وطلعت بييه للمكتب متعها…!
رواد : خش للمكتب وصكر على روحه بالمفتاح ويكلم في راجل تبع الادوية المغشوشة باش يحل القصه بدون ما تصير مشاكل!
ياسمين : وهي ماشيه لتوليت دموعها نزلوا وبدت تبكي فتحت الباب دموعها على خدها…بدت تغسل في وجها ونشفت وجها وهي تفكر في طلاق لكن الحاجز اللي بينها وبين الطلاق هو ولدها اصيل وبدت حايرة وواقفه في نص!
ملاك : فتحت باب المكتب ومتعصبة…مستشفى زباله زبالة وبنت الكلب اللي اسمك ريم كان ما وريتك وربيتك ونعلمك كيف تتكلمي معاي ميكونش اسمي ملاك يا بنت الكلب!
اصيل : سمعها وبدي يشوفلها بخوف…🥺🥺🥺خالتي ملاك منو هي بنت الكلب؟؟؟؟
ملاك : بلعت ريقها بتوتر😨…اءءءءءءءءء لالا حبيبي قصدي كلب وبنته يعني مش في كلاب كبار وعندهم صغار كلاب هكي ههههه انا شفت كلب وبنته توا هههه!!!!
اصيل : وينهم منشوفش فييهم🥺؟؟؟
ملاك : تغيرت فجأه وتعصبت على اصيل وفشت غلها فيييه…خلاص خلاص اسسسكت خليني نركز مش فاضيه تشوف فيا نفكر اسسكت شن هذه مايسكت بكل تقول بالع راديوو!
اصيل : دموعه تجمعوا وخااف منها ويبي يبكي لكن شد بكيته💔!
ملاك : قعمزت على كرسي وفتحت كميرات الحوش متعها حدفت الجزء من مقطع وهي تقتل في محمود…شن درت فيروووحي انا شن درت في رووحي توا غير تورطت في هل المصيبه وخلاص!
اصيل : 🥺🥺🥺🥺💔!
ملاك : تغير اسلوبها وابتسمت…حبيبي اصيل انا اسسفه مكنتش نعيط عليك انت انا كنت نعيط على مكالمه متع تلفون!
اصيل : كدابه انتي…مكنتيش تتكلمي ع تلفون كنت تهزبي فيا انا مش غبي🥺😢💔!
ملاك : حبيبي نعطيك شكلاطه لكن متقولش لبابا وماما على اللي صار توا تمام؟؟؟؟
اصيل : 😍…حاضر مش رح نقوللها شي!
ملاك : عطاته الشكلاطه وابتسمتله ابتسامه متصنعه ومزيفه…حبيبي نعطيك شكلاطه تانيه لكن تقولي ماما و بابا خيرهم اليوووم؟
اصيل : 😍 عطيني الشكلاطه قبل هيييي!
ملاك : خوودها اهيا كملتها كلها انت…هيا حبيبي قولي ماما و بابا خيرهم اليوم زعلانين!
اصيل : وانتي علاش تسألي فيا؟؟؟
ملاك : قلبت عيوونها بملل…ربي يصبرني…عشان مرات نحل المشكلة بيناتهم!
اصيل : صح رح تحليها بيناتهم🥺…تفكر كييف امه تطلب من بوه الطلاق…اءءءءءء ماما قالت لبابا ان هي تبي تطلق!
ملاك : بلعت ريقها بصدمه😨…كييييف وعلاش؟؟؟؟؟

رواية الشيطانة الحلقة الرابعة للكاتب حسن الجامعي

عند حاتم و ريم في غرفة :-

حاتم : شدها من ايدها بعنف…خيييرك انتي خييرك هكي وليتي ملياش هلبا متزوجك لييش تغيرتي شن فييك مريييضه؟؟؟
ريم : نحي ايدك من عليا حاتم…مش مريضه اهيا الحقيرة اللي توا قالتلك شن فيا!
حاتم : عيوونه قلوب قلوب…حبيبتي هذه شي يفرح بجد انا فرحان انك حامل ليش مقلتيليش وليش طلبتي من الممرضه انها متحكيش لحد انك حامل فهميني!
ريم : منبييش حد يعرف لأن تبدا العيون كلها عليا ونا شخصيا نخاف من عيوون ناس راهو تصيرلي حاجه انا والبيبي حبيبي!
حاتم : باهي حبيبتي ليش مقلتيليش حتى انا نكون راجلك ونكون بوه!
ريم : قلبت عيونها…ماهو عرفاتك رح تقول لأمك وبوك وعيلتك وهده يوصل لخبر لهده والكل يعرف وبدات الحقيرة ملاك منبيهاش تعرف نقاقه هلبا معيانه لييين خلاص وواضح عليها انها حسسوده ومتحبش حد وواضح انها تتصنع بس محد يشووف فيها غيري انا و رواد بس حتى الغبيه ياسمين متبعتها وتكلم فيها وتهدرز عليها!
حاتم : الحمدلله ياربي رح يجيني ولد او بنت من لحكي ودمي الحمدلله على نعمه!
ريم : بلعت ريقها بخووف بعد ما قال الجملة اللي توا وبتمووت من الخوف!
حاتم : تلفتتلها…خيرك حبيبتي رجعتي تاني نفس الوجه رجعتي انتي مريضه ولا هادم اعراض الحمل!
ريم : اي اي اعراض الحمل خلاص حبيبي خليني نطلع الجو اهني مغمووم هلبا!
حاتم : هاتي ايدك هي خلينا نطلعوا انتي حامل توا ومعاش تمسي شي خليكي مقعمزة بسس ف الحوش وكل شي يجيني لعندك!
ريم : حاضر حبيبي…وابتسمت ابتسامه متصنعه…وخايفه!
حاتم : شفتي كيييف ربي رزقنا قالك الولد يجي وتجي معاه رزقته فهمتي قصدي!
ريم : مش مركزه معاااه بكل!
حاتم : حبيبتي نكلم فيييك…؟؟؟؟
ريم : تلفتت بفززع…مسمعتكش حبيبي عاود شن قلت؟؟
حاتم : قتلك ربي رزقنا و يقولوا ان الولد يجي وتجي معاه رزقته…الحمدلله اول ما حملتي وجاني شغل ورح نشد إدارة قسسم كاملة!
ريم : اي اي الحمدلله…خلاص حبيبي نبي نرووح طلعني مخنوووقه هلبا وبنمووت من الغمه!
حاتم : انا مفروض نبدا من اليوم خدمه توا نوصلك ونرجع للمستشفى وبعد ما نروح من الشغل نشوفلك خدامه باش تقيم عليك شغل الحوش!
ريم : توا تجيك امك وتقولك جبتلها هي خدامه وانا لأ ويبدا عاد السيناريوا ودووشه اللي تكسر الراس!
حاتم : خيرك حبيبتي هكي انتي عدوانييه…لا تحبي امي ولا اخواتي ولا صغارهم هده غير الجيران حتى ملاك متحبيهاش…حبي الناس باش يحبووك خيرك!؟؟؟
ريم : هذه اللي اسمها ملاك معاش تقووللها هذه شيطانه مش ملاك…الحمار اللي سماها ملاك اصلا!
حاتم : حط ايده على راسه بقلة صبر…اخرررط يا حاتم ليا ساعه نفهم فيك وانتي شي دماغك تقول مصكر بالأسمنت!!!!
حاتم :- 🙄 !

رواية الشيطانة الحلقة الرابعة

عند ياسمين في المستشفى :-

ياسمين : طالعه من التواليت وواضح من وجها انها باكية…ودخلت للمكتب متع ملاك باش تاخد اصيل!
ملاك : كيييف وعلاش احكيلي😨؟؟؟؟
اصيل : ماهو بابا يبيع في……وقطعت عليهم ياسمين وهي خاشه!
ملاك : من خلعه قعمزت وخايفه من اصيل يقوول حاجه لياسمين!
ياسمين : بصوت تاعب…سامحيني ملوكه تعبتك معاي اليوم…هيا حبيبي اصيل خلينا نروحوا!
ملاك : اءءءءءءء…لا يا حبيبتي معقوولة الكلام هذه مش بيناتنا بس بنقولك خليكي مقعمزة نشربوا قهوة وتحكيلي خيرك لأن حسسيتك تعبانه وتبي تحكي!
ياسمين : شافت لملاك بإستغراب…خيرك ملاك تبي تستجوبيني او بتاخدي مني معلومه متحلميش…ونا مش مريضه نفسيا باش تقوليلي الكلام هذه!
ملاك : 😨…اءءءءءءء والله كسرتي بخاطري كنت نبيك تحكيلي خيرك بالك نساعدك مش احني صحبات ورح للروح💔…خلاص بري لحوشك منك لله بس!
ياسمين : حسست نفسها غلطانه وسخفتها ملاك…اءءءءء متزعليش مني يا ملوكه والله حالتي نفسية تعبانه بكل…بس رح نحكيلك بس وعد متقوليش لحد!
ملاك : عيييب الكلام هذه مش بيناتنا بكل يا روووحي سرك في بير يا عمري…!
ياسمين : سافت لملاك بحب وصدقتها لكن من داخل شي يقوللها متقوليش وشي يقوللها قوولي…حبيبي اصيل برا لبابا خلييه يعطيك شكلاطه!
اصيل : خالتي ملاك عطتني طرفين شكلاطه تووا🥺…!
ياسمين : تعصبت وفشت غلها غيييه…خلاص برا مع بووك وخلاص اطلع من دماغي مش ناقصتك انا انت تاااااني!
اصيل : طلع وهو بيبكي من امه لما هزباته وملاك هزباته!
ملاك : اهدي حبيبتي مش مستاهله انك تهزبني اصيلووا قعمزي واحكيلي بالهدووء…!
ياسمين : قعمزت وشربت رشفه من الميه…اوووكي رح نحكيلك💔…!
ملاك : احكككي!
ياسمين :- متوترة وخايفه من حد يسمع الكلام وموسوسه تشوف يمين ويسار…اءءءءء انا خايفه حد يسمعنا لأن الحيطان ليهم ودان
ملاك : متخافيش مفيش حد يخش بدون اذني!
ياسمين : اووك…انا متزوجه واحد محتال يعني شوفي هو زمان كان ناجح وكويس ومحترم ولكن بعد ما حس بخطورة على المستشفى متعهه ولأن هو دكتور فاهم في الادوية بدي يغش باش تكتر الكميات ويبيع بالكميات الكبيرة باش يكسب اكتر ويربح اكتر وهكي يقدر يخلي المستشفى ترجع وتكسب وتربح اكتر من قبل…المشكلة خايفه ان ياخدووه ويحبسووه وانا نقعد بولدي في شارع والولد يتيتم يقعد بدووون اب💔…لو سمحتي ملاك متخليش حد يعرف انا قتلك لأن حابه نحكي ونشكي قريب نطربق من كتر ما دسيت داخلي…قلت نحكيلك بالك ترتاح نفسيتي وتعطيني حلول نديرها باش تنحل مشكلتي و سبب اللي خلاني نحكيلك انك انتي تشتغلي معانا في المستشفى ولو المستشفى صكرت انتي رح يتوقف حالك وشغلك هنايا…!
ملاك :- 😲😲😲😲

🔥روٌايَــــــــــــــــــــــاتٌ حَــــــــــــــسٌــــــن الجَــــــــــامّـــــعــــــيٌ 🔥

رواية الشيطانة الحلقة الرابعة

عند سعدية و نسمة في الحوش :-

سعدية : واخده السياقه وتسيق بيها في الحوش…اي ده البيت ده معفن اووي بقول ليها 4 سنين منضفتش البيت ده…هو انا اخدت اجازة يومين بس!
نسمة : مقعمزة وتحشي في العصبان وهي تغني…مقسومة نصين انا زي زي يا حجات كتير بتتقسم على اتنين!
سعدية: ياختي يا نسمة انتي تغني اي على فكرة صووتك وحش اوووي!
نسمة : بدوون اهتمام وكملت تغني…انا تلج ونار وشر وخير…انا بنسى الغدر و ضعفي وبرجع تاني بكره ضعفي وبضييع نفس الحاجه الانا ضيعت عشانها سنين مش واضحه ملامح صورتي ويسألوا فوق مقدرتي…قطعتها سعدية!
سعدية : كفايا بقى انتي شوهتي الاغنية كفايا🤣…!
نسمة : كنك يا حنا تشوفي فيا نغني صاح هيا عدي كملي شغلك قبل ما تجي الهانم ملاك!
سعدية : الله الله اي الريحه الحلووة دي…انتي عامله اي انا جعانه اووي…!
نسمة : هي اللي اسمها ملاك قالتلي منعرفش نطيب…درتلها عصبان و براك وكوسة وكسكسي متع الاعراس ومصير حااار نار…مزال بعدين في العشية بندير حلو باش نوريها ان انا طباخه معروفه بنظافتي وماكلتي!
سعدية : لا ده انتي فنانه اووي يعني حلووو الأكل جااامد!
نسمة : بنقولك انتي كم ليك تخدمي هنا…!
سعدية : اسبووعين بس تقريبا…انا كنت بشتغل عند ناس تانيه كانت عيلتهم كل يوم مشاكل وكل يوم اسرار ياختي مالي ومالهم طلعت منهم وكنت عايزة ارووح لمصر لكن معنديش مكان هناك عشان اعيش فيه اصلي اهلي طلعووني من البيت!
نسمة : وعليش طلعووك من الحوش كنهم…؟؟؟
سعدية : ياختي عشان انا طلقت من جووزي وعملتلهم مشاكل مع عيلة جوزي الزفت ده!
نسمة : حسبي الله ونعم الوكيل ما يتقووا الا على مراه الضعيفه وعندها عيال!
سعدية : ما يروحوا في داهيه انا عندي عزة نفس واعيش وبشتغل على اكل عيشي انا وبناتي هما يغوروا في داهيه!
نسمة : بنقولك اسمعي انا طلبت سالات بطاطا وبصل يعني حجات الحوش وين بنحطهم قوليلها تفتح المخزن مصكر بالمفتاح!
سعدية : مش عارفه اصلي قالت ممنوع تفتحوا المخزن مش عارفه ليييه!
نسمة : شكت وخافت…زعما شن حاطه في المخزن…استغفر الله ياربي تخطر عليا افكار شينه يا حنه!
سعدية : زي اي يعني مفهمتش🤔؟؟؟؟؟
نسمة : 😨!!!

رواية الشيطانة الحلقة الرابعة

عند ملاك و ياسمين في المستشفى :-

ملاك : بلعت ريقها بصدمه😲…وووانتي شنو بديري توا كان مكانك راهو طلبت الطلاق!
ياسمين : انا قبل نص ساعه طالبه الطلاق يا ملاك ومش عارفه شن ندير ونتصرف وخايفه على ولدي اصيل انا يتأثر بمشاكلنا!
ملاك : ان شاء الله خير وخلاص…بس انتي لازم ديري بالك وتتصرفي على ان مفيش شي عرفتيه!
ياسمين : انقوولك انا طلبت الطلاق وحكيتله وقتله ان انا عارفه كل شي…فهمتي عليا!
ملاك : انتي وحده غبيييه انتي هكي قاعده تتستري على راجلك وهو يعرف وكان شرطه تعرف رح تحبسك معاه…انتي لازم تاخدي ولدك وتسافري من اهني فاهمه!
ياسمين : وشغل وراجل وشن نقول لولدي مش فاهمه شي انا…وحايرة ومنيش عارفه رووحي شن ندير يا ملاك💔…!
ملاك : بالنسبة ليا انا خلاص رح نقدم استقالتي اليوم وماشيه شووفي الاستاذ حاتم بالك يساعدك!
ياسمين : بلعت ريقها بخووف😨…كيييف ولييش ماشيه من اهني هذه كله لأن حاتم استلم ادارة القسم؟؟؟؟
ملاك : اي تي هذه كله لأن استلمها هي المفرووض من حقي ومش من حقه كيييف هكي انا نخدم ليا سنين اهني وهو يجي بالحظة يخشش ياخد ادارة القسم بدون ما حتى يخدم موظف عادي في مستشفى…!
ياسمين : اءءءءءءءء…هو الحقيقه معاك حق ملوكه رح نكلمه ونتفاهم معاه انا ورح نخلييه يدخلك انتي للادارة تبع القسم متخافييش انتي بس ساعديني😫!
ملاك : خلاص اووكي بس عندك اقل من 5 ساعات لأن عندي موعد مع مستشفى تانيه لو رفض خلاص واعتبريني مش موجوده ومتخافيش مش رح نقول لأي مخلوق على سرك!
ياسمين : اووكي بس انتي متسيبينيش برووحي ف مشكلة هذه نعرفك اكبر واعقل مني وتقدري تساعديني هذه علاش انا حكيتلك!

رواية الشيطانة الحلقة الرابعة
ترن ترن ترن :-

ملاك : اكيييده حبيبتي رح نساعدك…عن اذنك بسس رح نرد على مكالمه…ايووا يا سعدية؟؟؟
سعدية : يا فندم انا مش لاقيه مفتاح المخزن عايزة افتحوا عشان نحط الخضار وحجات البيت!
ملاك : انخطف لوونها وخافت…تي تيييي لاااا قلتلكم متفتحووش المخززن انتي وياها الهيي في شغلك وبسسس يا غبييه😡!
سعدية : الووو انا مش سامعكي يا مدام ملاك!
ملاك : بنت الكلب رح توديني في ستين داهيه بنت الكلب رح ننحبس من وراها…عن اذنك ياسمين انا طالعه 5 ساعات وردي عليا خبر!!!
ياسمين :- ب بببسس لحظة!
ملاك : خدت شنطتها وطلعت تجري بفززع وخووف…سلام سلام!
ياسمين : لا حول ولا قوة الا بالله…ااااه حقا وين اصيل؟؟؟…شافت يمين ويسار وتفكرت ان هزبت اصيل وطلعاته برا الدار…وووينك يا ماما…اكيييده مشي لعند بوووه…طلعت من غرفة وبدت ادوور عليه وخشت لمكتب رواد لأن تحسابه قاعده داخل…وشافت ملقاتاش قاااعد…اءءءءءءءءء رووواد!
رواد : بصووت متعصب…شن تبي مني خيرك؟؟
ياسمين : اصيل وووين؟؟؟
رواد : كيف يعني اصيل وووين؟
ياسمين : انا كنت مع ملاك وقتله يمشيلك هو مجاكش ولا كيييف؟؟؟
رواد : مجانيشش بككل…تي شن درتي في الولد😡؟؟؟؟؟
ياسمين : بلعت ريقها بخووووف…ووولدي😨؟؟؟؟؟؟

🔥روٌايَــــــــــــــــــــــاتٌ حَــــــــــــــسٌــــــن الجَــــــــــامّـــــعــــــيٌ 🔥

رواية الشيطانة الحلقة الرابعة

عند ريهام في حووشها:-

ريهام : وانت شنو دخلك فيا هي اختك ولا اختي هي قضيتك ولا قضيتي ما تحل عني يا امجد راهو مش ناقصتك بكل ولا طايقه رووحي…كل ما نقولك تصرف معاها احبسها ديرلها حل تقوولي اصبري واهدي وعطيني شووية وقت…انا ملييت قلبي قاعد ينحررق من داخل ونار الكره معبية قلبي من داخل…انتبه على كلامك معاي امجد!
امجد : دار بإيده بمعنى اطلعي من راسي…اصلا انا ماشي علاش قاعد ونتعب في رووحي معاك نقاش معاك ولى ممل وبدووون فايده…وطلع!
ريهام : لوحت تلفون على ارض بعصبية…درب يسسد ما يرد تماممم!
(بديع) : بعد دقائق خش…. بري يا عنبوك مرة وحده يلعن ساعه اللي تزوجتك فيها قتلك انا متتصرفيش من دماغك كلكم هكي نساوين…وطلع!
ريهام : امجد تعالا اووووف…ياربي ياربي بنت الكلب هذه حتى وهي برا حوشي وحياتي اديرلنا في مشاكل امتى بتمووت بس ونرتاح منها…اكيييده هي مدايرة كارته جديدة…ازززززح وووينه هذه محمود…خدت التلفون وبدت تتصل بمحمود مردش علييها يعطي فيها رقم خارج الخدمه…اتصلت بالوتس اب مصكر برضوا…اتصلت من المسنجر مصكر…حطت ايدها على راسها بخوووف وبقلة صبر…انهااااار احرف اغبر اكيده قتلاته اكيده قتلاته المجرمه الواطيه وربي لما نفضحك اكيده قتلاته الراجل مختفي ليه كم يوووم…رح نتصل بالشرطه!

ترن ترن ترن :-

الشرطه : الو تفضل مركز الشرطه !
ريهام : شدت التلفون وهي ترعش وخايفه… الوووو تسمع فيا حضرت الشرطي!
الشرطه : تفضلي يا مدام نسمع فيييك…اي اي نسمع فيك معاك على خط!
ريهام : خدت نفسس عميق وقالت…نبي نبلغ على مجرم!
الشرطه : منوووو هوو وشنو جريمتة؟؟؟
ريهام :- 😤………………!

رواية الشيطانة الحلقة الرابعة

عند بديع في سيارة :-
في حووش ملاك…!

بديع : يتصل ب ملاك متردش علييه…تي رد عليا ردددي عليا النم يا ملاك رددددي!
ملاك : ركبت السيارة وطلعت بيييها تجري للحوش…انا اصلا الكلبه اللي سيبتكم في الحوش مع بعض انا الكلبه…شافت التلفون ولوووحاته…حل عني انت التاني!
بديع : ياااربي هذه لازم نمشيلها في الحووش قبل ما تقتل الراجل وديرله حاجه!
ملاك : كملت تجري وسرعه العداد فووق 140 شوووية تزيد تاني رح دير حادث…يلعن الساعه اللي فكرت ان نكون ادارة زفتت في المستشفى!
بديع : بدي يجري بالسيارة لييين وصصل لحوش ملاك…!

طق طق طق :-

سعدية : فتحت الباب…تفضل يا فندم عايز اي ؟؟؟؟
بديع :بصووت خشن… مدام ملاك موجودة ولالا…؟؟
سعدية : شافت لبديع وعضلاته وصووته وكلامه ذابت😂🤤…اها هي مش موجودة يا فندم بس حضرتك لو عايز تشرب فنجان قهوة تفضل يا عومري!
بديع : تعصبت …نقوولك نبي ملاك منبيش قهووة زفت متعك…!
سعدية : اءءءءءءءءء…اسفه يا فندم بس هي دلوقتي ف شغل!
بديع : قووولي هكي من البداية بدل المقدمه متعك هذه😡!
سعدية : رووح يلعن ابوا رجاله زي بعضكم تفوووه عليكو كلكم…في ستين داهييييه😂!
نسمة : فتحت الدرج لقت مفتاح المخزن…اهاا هضا اكيده مفتاح المخزن واخيرا نبي نعرف شن فيه جوا المخزن؟؟؟
ملاك : ووصلت وشافت بديع واقف ويستنى فيها الجثه دااخل في المخزن لوو شافتها رح ننفضخ ورح ننتهي االيووم…نزلت تجرري وانفاسها منقطعه نحي من قدامي انت التاني!!!
نسمة : حطت المفتاح في الباب…وفتحتتتتت الباب و………!
ملاك : خششت تجري ووووو😨…………#يتتتتتببببع؟؟؟؟؟

شنووو اللي بين بديع و ملاك شن السر…وزعما ريهام على منوو رح تبلغ وكيف رح تتصرف…يمكن رح تنقتل ريهام بسبب البلاغ او تنفد منه بسهوولة؟؟؟؟

تتواقعوا ريم رح تقدر تحكي لحاتم الحقيقه او السر اللي هي داسته عليييه…وتتواقعوا شن هو السر اصلا هل يخص الحمل؟؟؟؟

وياسمين رح تقدر تقنع رواد ان يسلم الإدارة لملاك اوو لا…وما سبب اختفاء ولدهم اصييل شنو السر😨؟؟؟؟

هذه الاسئلة كلها رح نعرفوها في الحلقات الجايهه❤…ورح تتغير هلبا حجات وتجي حجات جديدة واحداث جديدة…للمزيد من الحلقات ديروا للقروب دعوات على قد ما تقدروا+علقوا تعليقات هلبا باش المنشور يووووصل وتحت ال1000 مش رح تنزل حلقة5😘…!

🔥روٌايَــــــــــــــــــــــاتٌ حَــــــــــــــسٌــــــن الجَــــــــــامّـــــعــــــيٌ 🔥

 

لمشاهدة جميع اعمال الكاتب : روايات حسن الجامعي

اترك رد

زر الذهاب إلى الأعلى