رواية جرائم غامضة الحلقة الثانية 2 | القلم الناجح
روايات ليبيه كاملة

رواية جرائم غامضة الحلقة الثانية 2

رواية جرائم غامضة الحلقة الثانية

#جرائم_غامضة 2

وليان:عمرها 22سنة عيلتها متوفيه في حادث سير من لما كانت بيبي عندها اخت اسمها وديان كان خوهم لكبير متحمل مسؤوليتهم اسمه احمد صاحب صقر من الطفوله لكن احمد من لما تزوج عطا وديان لحوش عمه للحضه هادي تعيش معاهم ووليان تزوجت صقر

صقر:عمره 26 سنة زوج وليان ويحبها هلبا شبه علاقتهم كأنه بين اب وبنته مهتم بها وميحبش يزعلها واي شي في حياته كان علشانها هيا برغم اهله واعرين بس ميتصرفش لن وليان ترضا عليه

حور:عمرها 24 سنة طبعا تكون لعيلة راجلها منذر بنت جيرانهم منقدرش نقول انه تعشق راجلها بس تحبه لانه يحبها ومحترمها وتحملها هلبا وتحب ولدها وحتا عيلة منذر برغم صعبين بس قادره تتأقلم معاهم وعندها ماضي حلو مع منذر وصقر ايام الطفوله

منذر:انسان هادي مسالم يحب حور هلبا من لما كانت صغيره و ياخد في رايها في كل شي لدرجه حبهم واضح للكل

ف لحضات سريعه نصبو الخيمه في الشارع ونقلو منذر للمستشفى وتحول الوضع من فرح لي حزن وتعبت الخيمه بالناس وم فيش حد منهم مصدق الي قعد يصير مرت ع عيلة لحضات صعبة لان خوهم صغير وعنده ولد ومرته صغيره ومن غير هدا كله انه هادي وكويس مع الكل 💔

حور:مش قادره تصبر خشت لحالة هستيريا وبدت تخررف بدت تريش في شعرها وحوايجها زا المجنونه ويردو فها من الشارع اكتر من مره وحالها يسخف ومش قادره تستوعب انه خلاص منذر معاش بتشوفه تاني

بجد كانت لحضات انهيااااار و مأساويه ع العيله امه وخواته مش عارفين حتى كيف يصبرو رواحهم ويحاولو يقتنعو انه هدا حكم من ربي بعد مافاتت ساعات وهما ع النفس الحال استمرو يدعوله وخلاص لن جاهم الخبر من الطبيب الشرعي💔

طبعا انتشر الخبر بين الناس انه منذر مات بأزمه قلبيه وبس طبعا الموته طبيعيه ومن ربي ومافيش حد عنده يد ف قتله زا مكانو متوقعين💔

🔥مـــيُـــلــو حــــسسـٰـــن🔥
🔥مـــــيُــــلــــووو حــــسـٰــن🔥

مبروكه:نوضي من قدام الباب سادك مراقبات
حياة:خليني يما بالله مش وقتك
مبروكه:نوضي مع لبنات فرقو لحليب ولمياه احنا جيرانهم لو مدرتهاش هكي بيهزو علينا
حياه:عيونها ع الباب لن شافت وفاء خاشه تجري…هيا يما هاني نايضه
مبروكه:طالعه لعماتك لمن بتجبدي ؟؟
حياه:😏.وككك ضروري نسمعها يعني
مبروكه:ع من تقصقصي المره هادي
حياة:اسكتي ساكته يما الي قعد يصير ف الحوش هدا مش طبيعي بووكل
مبروكه:واطي صوتك ونوضي مش ناقصنا
حياه:حاضر….وناضت

________________

وليان:حبيبتي خلي ايمانك قوي بربي واهو ولدك جنبك وامانه خلاها منذر ضروري تردي بالك
حور:كان وجها ميتفسرش وصوتها رايح ….م م مش قادره نصبر ي وليان حاسه الدنيا ضايقة بيا
وليان:تمسح في دموع حور لا اعتراض ع حكم ربي م فيش حل غير انك اصبري وندعيله
حور:بصوت تاعب….يارب ارحمه واغفرله
وليان:توا اركبي معايه البسي عبايتك ووشاحك لانك خشيتي العده وحرام حد يشوفك هكي
حور:نهارت من لبكاء
وليان:مسكتها بيداها وحدي الله ي حور الله غالب
حور:حاطه يداها ع وجها وتندب…حليلي كسرتيلي ضهري ي منذر شن عيشتي بعدك ي غالي💔😭
وليان:لاحول ولا قوه الا بالله ربي يصبرك ي حور💔

________

وفاء:خاشه للحوش تجري وقلبها يددق من الخوف وخايفه حد يشوفها
هبة:خيرك اللطف
وفاء:تاخد ف نفس …لالا ما في شي
هبة:به خوفتيني نحسابه ترا شن صاير برل؟؟
وفاء:قعمزت ع الكرسي…..سبحان الله الواحد م يحسش بنعمه لن يفقدها
هبة:تستف في تواسي لمياه في سفره….ع من تقصدي؟
وفاء:حور كانت مشيبتله راسه مسكين وتوا لما مات قريب تلحقه
هبة:نزلو دموعها…بالله راجلها من بيحس بها غيره بالله قيمي السفره انا خلاص معاش قادره نصبر ع منذر
وفاء:ولا حتا انا والله ضحكته قدام عيوني حليلي ع خويا
هبة:الي يوجع انه مات صغير وانا مش قادره نصدق انه مات موته طبيعيه
وفاء:حسبي الله ونعما وكيل ف الي كان السبب
هبة:الحمدالله ع كل حال💔
وفاء:الحمدالله
هبة:خدت السفره وطلعت!

___________

وفاء:كيف طالعه من المطبخ جت عيونها ع حياة
حياة:ناضت وقربت من ووفاء سلمت علاها وعزاتها عضم الله اجرك
وفاء:شكر الله سعيك
حياة:تعالي قعمزي نبيك في موضوع
وفاء:شش شن في انشاءالله خير
حياة:امس خوك منذر كان عندنا احنا
وفاء:تنهدت بصدمه…كيف يعني؟؟
حياةةمعقوله مقالكش محمد
وفاء:بلعت ريقها…..اءءء لالا مجابليش سيرة اليوم عزاني وليه فتره ميحكيش معايه
حياة:المهم ردي بالك تجيبي سيرة قدام حد انه منذر كان عندنا امس
وفاء:علاش؟؟
حياة:منبوش حد يحط علينا الشبها وبعدين محمد طلعله شويه وخش
وفاء:وشن قال محمد علاش يبيه منذر؟؟
حياة:قالله عليك وقال امتا م تحبو تفضلو
وفاء:مستحيلا خويا منذر الي كان مسكر راسه فجاءه يوافق ع خوك محمد
حياة:بخبث…والله لدرجه شكيت فيكم انتم الاتنين وراء كل الضجه الي صايره
وفاء:شافت يمين ويسار….اششش مش ناقصينك خلي كل شي يتم ع خير توا منذر مات مش ح يرجع
حياة:نتفاهمو بعدين كنتنا😁

__________

رانيا:شن نفهم منك انه هما المجرمات؟
السجينه:هه مش عارفه طولي بالك عليا😁
رانيا:تماام كملي
السجينه:خدت نفس…. وكملت
_______

وديان:كيف خشت سلمت ع حور وعزتها ولبنات وقعمزت جنب وليان
وديان:ي ناري علاها حور تقطع القلب
وليان:الله غالب مسكينه هدا نصيبها
وديان:اي الله غالب هيا عندها ولد صح
وليان:اي عندها
وديان: به ربي يعوضها خير ف ولدها
وليان:انشاءالله وانتي شن تبيني امس لقيتك باعته مسج
وديان:لا بس انا وعمر وضعنا مش تمام الفتره هادي
وليان:كيف؟
وديان:حسيته متغير معايه مش زا الاول
وليان:غريبه عمر كان معاك متفاهم ويحببك
وديان:اي مش عارفه مرات مضايق من شي انا خليته براحته
وليان:اي المهم خبريني بالي يصير معاك
وديان:انشاءالله وانتي شن صار معاك في المراجعه
وليان:قعدين ع نفس الحال السبب من صقر وميبيش يزرع
وديان:مش عارفه ليش مسكر راسه معاك حاولي تقنعيه وخلاص
وليان:انشاءالله حبيبتي
وديان:اي قبل م ننسا امس ياسر رجع من السفر
وليان:تغيرت ملامح وجها…اءءء بجد؟؟
وديان:بخبث اي واسألني عليك
وليان:اها به كويس اكيد متزوج
وديان:ههههه لااا اطمني
وليان:مبردك متطلبيش حركاتك هادي
وديان:😅😅

حور:خدت حوايجها وولدها وروحت مع اهلها قبل أذان المغرب كان صعب علاها هلبا تفارق لمكان الي عاشت فيه وتأقلمت فيه الي ولا مره فكرت انه ح يجي يوم وتخليه 💔💔

#تسريع_الاحداث:-

بعد مرور 40يووم:-

صقر:مصدووم في وفاة خوه لانه اكتر واحد عارف انه منذر معنداش اعداء واجعه خوه هلبا لدرجه م فيش يوم رقد مرتاح وبدون تفكير وحااس بيزيد لانه ح يتربا يتيم …نزل بيشوف امه الي لاها ايام تقوله فضي روحك نبيك ف موضوع وخايف يطلع الموضوع شي يخص حياته💔

طبعا كانت فترة صعبه ع حور هلبا خشت ف حالة هيستريا من كثر الصدمه الي مكانتش تخطر ع البال ومصدومه هلبااا من حياتها الي تغيرت فجاءه.
وكانت مره ع مره يرفع فها خاها لحوش راجلها هيا وولدها ويروح بها قبل المغرب

وطبعا حوش اهل منذر متعلقين بي يزيد هلبا ويتمنوه ديما معاهم خاصة مفيده ع طول الفتره وهيا تبكي وتبي يزيد يعيش معاهم لانه من ريحة المرحوم بس حور مش قادره تسلم في ولدها وتجيهم كل اسبوع باش يشوفو ولدها💔

_________

صقر:نازل من فوق يحيل مهدود وقلبه موجوع …اهلين كيف الحال يما
مفيده:الحمدالله …وين مرتك منزلتش؟
صقر:حطيتها ف حوش اهلها
مفيده:به وقعد مقلتلهاش ع هداكه الموضوع
صقر:اي ومش ح نقولها
مفيده:باهي عندك خيارين ي تحكيلها ي تتزوج حور حتا ع الأوراق بس
صقر:شن تقولي يما من عقلك لكلام هدا من بيضا
مفيده:حور خلاها عليا انا ح نقنعها
صقر:وليان وحور صديقات مستحيل ترضا حور بالي تقولي فيه
مفيده:ترضا غصبا عنها وله يزيد متحلمش تشوفه
صقر:تي انا مش ح نوافق مش غير حور بس
مفيده:عادي تاخد حور خير م تجي وحده تانيه وتجيبوالصغار وتربي معاكم وقصه وتمت
صقر:انا نحبها وليان مستحيل نفكر يوم نتزوج علاها
مفيده:توا حور شويه وبتجي وح نفتح معاها الموضوع وانتا حاول تقنع مرتك
صقر:نااض وطلع وهوا يقول الصبر ياربي الصبر
وفاء:شن قلتيله صقر خيره طالع يعيط
مفيده:توا تجي حور وتسمعي القصه
وفاء:متقوليش الي نفكر فيه انا بيصير
مفيده:اي بيصير الاسبوع هدا بإذن الله
وفاء:قصدك عادي يصير عرس وله خطوبه توا
مفيده:لا يقرأ فها الفاتحه ويجيبها حتا ميبيش يرقد معاها عادي
وفاء:ووليان مستحيل توافق وصقر مستحيل يدير شي يزعلها
مفيده:لا المره هادي مش ع رأيهم المره هادي الي ينقض العيله هوا الي بيصير
وفاء:بخبث …..مالا خليني انا نشوف شغلي وخشت لدارها

_______________

ترن ترن :-
حور:ايوا عمتي
مفيده:اهلين حور كيف حالك توا؟
حور:الحمدالله وانتم كيف حالكم
مفيده:كويسين لكن الحوش مضلم بلاك
حور:الله غالب عمتي هدا نصيبنا
مفيده:لو قتلك النصيب نفتح قدامك تاني
حور:كيف عمتي فهميني؟
مفيده:بنتي انا قررت ناخدك لي صقر ولدي
حور:تنهدت بصدمه…شن تقولي؟
مفيده:عارفاتك مصدومه لكن انتي عارفه وليان عقيمه اصبر ضروري يتزوج فكرت فيك اقل شي تاني العيله وولدك يتربا بينا
حور:لالا ي عمتي ميجيش لكلام هدا ونا منقدرش نجي ع وليان سامحيني
مفيده:وليان ح تقتنع وصبر ح يقنعها
حور:قصدك صقر موافق
مفيده:لا لكن انا قتله يتقوللها ي نقنعها بزواجك من حور
حور:غلط الي اديري فيه ي عمتي ميجيش منه لكلام هدا
مفيده:مش غلط فكري ف مصلحة ولدك لانه في الحالتين صقر بيتزوج
حور:لا ي عمتي منقدرش
مفيده:لو وافقت وليان ح توافقي
حور:حتا لو وافقت انا مستحيل نوافق…تسكرت المكالمه وحور مسكره راسها لكن مفيده مفقدتش الامل؟؟

____________

وليان:تسرح ف شعرها قدام لمرايا…خيرك مش ع بعضك صقر صقر : ما في شي كملي بسرعه وحطيلي عشاء من الصبح مش واكل شي
وليان:تنهدت باش قلت توا نتغذاء مع اهلي خيرك مكليتش معاهم
صقر:اءء لا طلعت صار معاي موضوع
وليان:تلفتتله انا عارفه امك تزن عليك اكتر من مره وحاسه انه انا وراء كل شي بس للحضه هادي مش فاهمه علاش ؟؟ تقدر تصارحني صقر
صقر:لا م في شي مهم وليان متوجعيش راسك
وليان:لا صقر احكيلي وريحني من شن مضايق انتا؟ صقر:بصوت عالي خلاااص وليان قتلك م في شي وطلع وليان: رجعت تفك في سلسلتها وهيا تخمم بهدوء كيف ح تحل الموضوع لأنه ببساطه متحبش تشوف صقر مضايق💔

_____________

ع تلفون:-
وديان:ماسكة بوكي الورد ودخلت لدار وهيا فرحانه
مسرة(بنت عمها):شن شن الحلو فرحان اليوم
وديان:اي بعد العركه لكبيره اليوم رضاني بورد وطلع مضايق من الخدمه
مسرة:اهاااا اي ربي يهنيكم حبيبتي
وديان:بس ف خبر يزعل شويه مش هلبا
مسرة:احكي انشاءالله خير
وديان:عمر بيسافر لفترة شهر ويرجع
مسرة:😨….مستحيل
وديان:اي بس شهر بس ويرجع بنتزوجو ع طول
مسرة:اي اي باهي حبيبتي ربي يتمملكم ع خير
وديان:باهي خديتلي الي وصيتك عليه
مسرة:فتحت الشنطه…اي خودي شوفي وطمنيني😨
وديان: 😵…ادعيلي!
مسرة:ربي يسترك

_______________

وليان:ماسكة سفرة تفضلو طيبت بيتزا قلت نذوقكم
هبة:حبيبتي صحيتي اكيد حلوه
وليان:سلمك يارب…عمتي نبيك ف موضوع
وفاء:شافت لي هبه وضحكت وطلعو مع بعض
وليان:عمتي انا عارفه انك تبي حور لي صقر
مفيده:اءءء اي انتي عارفه انا متعلقه بي يزيد هلبا
وليان:فاهمه وانا منحبش نشوف صقر زعلان منك ومضايق فكرت ف الموضوع ونا موافقه يتزوجها
مفيده:تنهدت من الفرحه…ي بنتي ربي يرضا عليك ويفرح ما مفرحتني
وليان:ابتسمت…وحور ف نهايه من العيله اقل شي منخسروهاش وخلاص
مفيده:اي وهدا الي نبيه
وليان:خلاص انا ح نقنع صقر يوافق وانشاءالله يتم الموضوع خلال الأسبوع هدا
مفيده:نتمنا تتصلي بي حور وتقنعها لانه تسكرت راسها ومتبيش
وليان:توا نكلمها وانشاءالله توافق
مفيده:ربي يريحك ما مفرحتني
وليان:ركبت لدارها وهيا قريب بتهبل لكن متحمله علشان شي واحد بس وكانت مغصوصه بس متبيش حد يلاحضها💔

__________

وديان:طلعت من الحمام…مسرة😨
مسرة:حامل صح؟؟
وديان:هزت براسها….ايي وقعمزت ع سرير ترجف مع بعضها
مسرة:لازم تتكلمي كل شي توا المهم تكوني مرته فاهمه
وديان:شافت لمسرة…اءءءء انشاءالله م يصير الشي الي خايفه منه
مسرة:انشاءالله💔💔💔

______________

في الوقت الي كانو فيه اشخاص فرحانين ويكملو ف مصالحهم ويجهزو لباقي الخطط ف ناس لمياه تجري من تحتها ومش فاهمين شي
شن السبب هوا الثقه لكبيره الي نعطو فها لأشخاص الغلط وندمرو كليا💔

قدرت وليان تقنع صقر بعد قريب ساعتين وهيا تتراجا فيه باش يوافق وفعلا وافق وصار زا م تبي واتصلت بي حور وقنعتها توافق باش تسيطر ع الحزن الي صاير ومتحسش انها السبب ف كل شي 💔

رانيا:الله الله تطورات في القصه كأنه بينت الحقيقه وفاء وحور اكتر اشخاص عندهم مصلحه؟؟
السجينه:لا وراء التطورات هادي كلها ف قرار اتاخد
رانيا:من مني؟؟
السجينه:مسكينه وليان بتسلم كل شي لحور
رانيا:ههههه حلوو القصه كيف بدت كأنه
السجينه:قامت حاجبها ليمين…هدا الحب ؟؟…يتببع!

 

اترك رد

زر الذهاب إلى الأعلى