رواية جنون عاشق الحلقة الثامنة | القلم الناجح
روايات ليبيه كاملة

رواية جنون عاشق الحلقة الثامنة

جميع حقوق الطبع والنشر محفوظة

#جنون_عاشق

الحلقــــــــــ (8)ـــــــــة

العنود :::::: ركبت تاكسي وصلني لمكان اتفقت نتلاقه فيه انى وادريس نزلت ركبت مع ادريس وصلنا قدام عمارة قالي هيا انزلي 😳
العنود :::::: ادريس وين جاين حنى
ادريس:::::: خيرك !!! جهزت مفاجأة ليك نبيك تشوفها
العنود :::::: لالا مانقدرش ادريس مانقدرش نخش معاك لشقة
ادريس ::::: حسستينى انى بنغتصبك !! خيرك
العنود :::::: مش هكي 💔 خفت بس يشوفني حد والا حاجه
ادريس :::::: ماتخافيش هيا تعالي
العنود:::::: كنت نازلة وعارفه انه غلط بس رجليا يمشوا بروحهم 💔 وصلنا الدور الثاني وقف وطلع مفتاح وفتح الشقة ووخر وقالي خشي 😳

~~~~~~~~~~~~~~~~~~~~~~~~~~

عبير :::::: مقوى عينك راقده ساعتين والمدير مخليك في مكتبة مايبيش ينوضك وطلعنا حنى الغالطين
غالية ::::::😳 من المدير هارون !!!!
عبير ::::::🙄 مش نضتي لقتيه جنبك ؟؟؟؟
غالية :::::: سكتت وانى نفكر في يلي صار هارون قالي انه اجتماعه هو يلي تأخر معقولة هذه تتكلم بجديات 🤯 باهي علاش قال عكس يلي داره
عبير :::::: هيا خشوا يستنى فيكم
غالية :::::: خشينا السلام عليكم 😍 كان لابس بدلة رسمية مغيراته
هارون ::::::: انى نطلع شوية مابين جهزتوا روحكم
غالية ::::: جهزنا الاضاءة والجو هذا شوية وخش ثاني وبدينا

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~~

العنود :::::::😳 خشيت شن هذا كان منظر الشقة خيااااااااااال التجهزات واضحة مش حاجه بسيطة شفت لادريس 🥺 هذا ع شاني
ادريس :::::: وهو مبتسم ان شاء الله يعجبك
العنود ::::::: تي اي اعجاب يهبل يجنن امته لحقت اديره
ادريس ::::::: بصراحة مش انى انى بس اخترت الديكور وحجزت في شركة تنظيم هم يلي جهزوا
العنود :::::::: تعرفوا وحده زيني ماعمرها جتها هدية ينجاب شركة تنظيم باش تجهز عيد ميلادها !!! تعرفوا شن ممكن نكون حسيت وراهوا الفرحة هذه مش لانى مادية 💔 لالا فكرة انه حد يدير شيء ليك باش يفرحك ❤️
ادريس ::::::: تعالي وخر الكراسي
العنود:::::: قعمزت عالكراسي المفرش حرير الكأسات كرستال الورد طبيعي الاكل اصناف اول مره نشوفها 😍 حسيت روحي تقول طلعت لدنيا ثانية
ادريس :::::::: صب عصير وقعمز ، فيه نوع تاني اكل في المطبخ لو ماعجبكش هذا
العنود ::::::😍 يسلموا بجد فرحتنى
ادريس::::: انى فرحان لانى قدرت نشوف ابتسامتك
العنود ::::::💔 هذا حوشك ؟؟
ادريس::::: لالا هذه شقة خديتها لخوي نبيه يتزوج فيها من سنة بس الاستاذ ماعجباش قالي كيف انتِ ساكن في فيلة وانى تاخدلي شقة تقول تاعب معاي فيهم الفلوس المهم قتله بلاش بكل وخليتها
العنود :::::: سألت بتردد تجي هنى. ديما ؟؟؟
ادريس :::::: وهو ياكل لالا مرات 😳 بعدين قام عيونه وناض وقف ، العنود !!!!!!!!
العنود ::::::: مش عارفه علاش عيوني كانو بيدمعوا
ادريس ::::::: والله العظيم انتٍ اول مرأة تخشها ردي بالك تفكري فيه هكي
العنود :::::: ابتسمت
ادريس ::::::: قام الكرسي حطه جنبها ماعجبنيش البرستيج هذا بينا شارع هكي احلا 😉

~~~~~~~~~~~~~~~~~~~~~~~~~~~~~

غالية :::::::😒 ولا صورة عجباتك مش معقولة يعنى
البنت يلي معها ::::: غالية. 😳 اسكتي وشافتله قول شن في بالك يااستاذ باش نعرفوا
هارون :::::: طبعا كان مغير لبسة ثانية سروال بيج قميص ابيض سبته قهوية شال كروهات قهوي كندره قهوية لف رقبت قميصة اللداخل ،. الزاوية هذه احلا
غالية ::::::: وجهتله الكاميرا ، ساوي رقبت القميص
هارون :::::::دار روحه ساوها
غالية :::::: مازال
هارون :::::: خيرها هه
غالية :::::: حطيت الكاميرا ومشيتله 😤 اللهم طولك ياروح
هارون وقف
غالية :::::: طلعت الرقبة نسأوي فيها ونعارك عندي شن نخدم راهو وراء الف موضوع سكتت لقيته يشوفلي زي المسبوه 🤦🏻‍♀️ خيره هذا ماتقولش نهزب فيه ، حولت يديه وحطيت يدي في جنبي هارون شن تبى ؟؟؟؟
هارون ::::::: شاف للبنت يلي معها اسمحيلنا شوية
البنت :::::::☹️ اوكي وطلعت
غالية ::::::: شن
هارون ::::::: صدقي انى كنت نحسابك متقصده الكذبة لهذا كانت ردت فعلي قوية 🥺 والا التصوير اليوم مش ح يتم 🤨
غالية:::::: اوقح اعتذار سمعته في حياتي 😒 شوف انى معادش بنزيد حتى صوره تمام توا بناخد حاجاتي ونطلع اتصل بالمجلة قول الصور معجبونيش وهم يتصرفوا معاي
هارون :::::: 😤 اووووف عناد عناد عناد خلاص روحي وابعتي الصور يلي صورتيهم
غالية :::::: 😏 طلعت وخليته

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~~

العنود :::::: كملنا ووقفت بنقيم الصحن
أدريس::::: خلي كل شي في مكانه وشد يدها تعالي معاي
العنود ::::::: قلبي يدق وجهي احمر جسمي يعرق خشينى لصالة على جنب 😍 كان منظرها يهبل كيكة كبيره علها اسمي وصورتي 😳😳 شفتله كيف
ادريس ::::::: ههههههه مش طلبنا عليك صور في ملف القبول.
العنود :::::: 🥺 بجد شكرا على كل شيء
ادريس ::::::: نولع الشموع شوية بس
العنود ::::::: تمام نستأذنك نمشي للحمام شوية
ادريس ::::::: خودي راحتك
العنود ::::::: خشيت طلعت تلفوني 💔 نبي رسالة او مكالمة من معمر تخلينى نتراجع على يلي ندير فيه مالقيت شيء فكيت وشاحي رتبت شعري حطيت عطر عدلت مكياجي وطلعت مش عارفه ليش درت هكي ممكن بنرضي ادريس زي مارضاني ممكن نبيه يحبنى اكثر معرفتش
ادريس ::::::::😍😍 شعرك حلو
العنود :::::::: تسلم
ادريس:::::: هيا تعالي انفخي الشمع وقصي الكيك
العنود :::::::: قربت وقفت طبست بننفح حضني من الخلف 💔 نفخت عالسريع ونسحبت من بين يديه
ادريس ::::::: وهذه هديتك
العنود :::::::: لالا بجد هكي هلبا
ادريس ::.::: مافيه شيء هلبا عليك افتحها
العنود ::::::: فتحته كانت ساعه ماركة فيها ألماس حقها مش الف ولا اثنين ولا عشرة 😳😳 مقدرتش ندس انبهاري بيها
ادريس :::::: عجباتك ؟
العنود ::::::: عجبتنى بس تهبل تجنن
ادريس ::::::: باهي طمنتينى وقص التورته حط في صحن واحد وقعمز جنبها نبي انى نوكلهالك
العنود :::::: متحشمه 💔خايفة 💔قاعد فيه شوية ضمير يأنب فيا💔
ادريس :::::: عطها جزء من الكيكة
العنود :::::: تلبز فمي بالكريمة خديت المناديل بنمسح بس ادريس شد يدي و باسنى

~~~~~~~~~~~~~~~~~~~~~~~~~~~~~

غالية ::::::: روحت يما وين العنود اليوم عيد ميلادها راهو
رشيدة :::::: قالت عازمينها صاحباتها مرات تعطل
غالية ::::: خلاص انى عندي عرس بنطلع من توا
رشيدة :::::: ربي يعاونك
جنات واستيبرق يجهزوا في روحهم للعرس

~~~~~~~~~~~~~~~~~~~~~~~~~~~~~

العنود ::::::: فقت على روحي ممكن بعد ربع ساعة قتله لالا ادريس حول
ادريس :::::: عدل تقعميزته
العنود ::::::: شفت بطمتين من بلوزتي مفتوحات صكرتهم وقتله نبي نروح
ادريس :::::: خليك خلاص خيرك مش ح يصير شيء انتِ ماتبيشي
العنود ::::::: ياسر …
ادريس :::::::😡 فيه حد بيحتفل بيك ؟؟؟
العنود :::::: فهمت انه قصده معمر ، لالا اصلا هو يخدم في مدينة ثانية
ادريس :::::: وين وشن يخدم
العنود ::::::: حكيتله
إدريس:::::: تعالي
العنود ::::::💔
ادريس ::::::: تعالي ارقدي في حضني بس
العنود :::::: رقد هو عالصالون وحضني في وقتها نفكر في الشيء يلي يخلي في الناس كل ماتغلط ترتاح وهو (اخر مره) هذه الكلمة تخلي فينا نرتكبوا ابشع الاخطاء في وقتها كنت نقول خلاص بنطلع من الشقة هذه نحطه في الحضر ونسيب الخدمة ونتوب ونصلي ونستغفر توا خلي ندير يلي في خاطري لاخر مره ،،، وكان فيه سؤال في رأسي علاش ادريس ماقاليش اطلقي ونتزوجك 🤔 ماهو كان ربي يحاسبنا على يلي فات بس مانتمادوش في الحرام اكثر علاش ماعرضش عليا ماهو يحقله ياخد اثنين 💔 ومن كثر الافكار نعست ورقدت

~~~~~~~~~~~~~~~~~~~~~~~~~~~~~

هارون ::::::: اتصل بغالية
غالية::::: ايوه
هارون :::::: غالية انى هارون
غالية:::::: تى باهي سجلناك كل مابتتصل بتعرف بنفسك
هارون ::::::: ههههه باهي وينك
غالية :::::: اشتقتلي ؟؟ ياحليلي انى معادش قادر يبعد عليا حتى شوية
هارون ::::::: بكل تعرفي 😏 وينك ؟
غالية ::::::: علاش ؟
هارون :::::: مش قلتي عندي تصوير في نفس العرس اهو بنطلع نوصلهم
غالية :::::: اها انى وصلت من بكري
هارون :::::: اها 💔 باهي بعدين استنى روحي معانه
غالية::::: يصير خير هيا عندي خدمة سلام
هارون :::::: صكر ونزل لقي جنات واستبرق جهازات خداهم وطلع

~~~~~~~~~~~~~~~~~~~~~~~~~~~

العنود :::::::😳 فتحت عيوني وين انى حييي شفت ظلام من الروشن ادريسسسسسس
ادريس ::::::: جي خيرك !
العنود :::::::: وينك انت وعلاش خليتنى نرقد هكي ونضت ندور في وشاحي
ادريس ::::::: كلمتك لقيتك رقدتي قلت خل ترتاح قعدت جنبك وتوا نضت بندير قهوة ونوضك سمعتك ناديتي
العنود ::::::: لالا قهوة شن انى تأخرت بنطلع خديت حاجاتي ونلبس في وشاحي بسرعه
ادريس ::::::: وقف يلبس في كندرته ماتنسيش هديتك
العنود ::::::: شفتله شكلك مدوش
ادريس ::::::: خش جاب الهدية وجي
العنود ::::: طلعنا قتله والشقة تقعد مقلوبه هكي
ادريس :::::: مدوريش توا نتصرف
العنود ::::::: وصلت الحوش وكذبت على امي الف كذبة 💔 قداش يبدا ساهل الكذب خشيت دوشة ولبست بيجامة درت قهوة وقعدت نتفرج. رن تلفوني
شفت دار امي كانت مصكر رديت الو
ادريس ::::::: كان احلا يوم في عمري
العنود ::::::😊 حتى انى
ادريس ::::::: اشتقتلك من توا
العنود ::::::: وين انت
ادريس ::::::: رجعت للشقة مانبيش حد يزعجني اليوم
العنود :::::: وعادي تبات برا الحوش ؟؟
ادريس :::::: وشن فها
العنود ::::::: اممم في خاطري نقول مرته مقوى قلبها وكان انى مكانها مانفارقكش ساعة 💔 كانت مكالمة طويلة كلها كلام حلو وبديت نقول الكلام عادي بديت نصنف في الغلط درجات 🤷🏻‍♀️

~~~~~~~~~~~~~~~~~~~~~~~~~~~~~~

هارون ::::::: واقف قدام الصالة يستنى
استبرق:::::: فتحت الباب جنبه وركبت
جنات :::::: ركبت من الخلف
هارون ::::: تلفت وين غالية ؟
استبرق :::::: قاعده في الصالة
هارون :::::: طلع تلفونه واتصل
غالية :::::: ايوه
هارون :::::: ها وينك البنات طلعوا
غالية ::::::: روح هارون انى عندي شوية شغل مازال
هارون ::::::: شوية قداش
غالية ::::::: ربع ساعة نص ساعة
هارون::::: خلاص نستنى فيك. كملي واطلعي وصكر قبل ماترد
حرك سيارته وقف بعيد شوية خله الطريق للسيارت
استبرق::::: غالية بتروح معانه ؟؟؟
هارون :::::: امممهه
جنات :::::: 😒 بنقعدوا واقفين نستنوا فيها ؟؟؟؟
هارون ::::::: جنات نزلي الصور يلي صورتها سناب والا شوفي شن اديري
جنات :::::: خيرك تتكلم هكي 😒
هارون :::::: رن تلفونه ، رد اطلعي هي اهو جاي ولف بالسيارة ورجع قدام الصالة
غالية ::::::: فتحت السيارة وركبت
استبرق::::: محلاها الحفلة
غالية :::::: انى تعبانة بموووت
جنات :::::: ههههه شن دايره جو المتزوجات الجدد مروحه بالبكلاوة لرجلك
غالية :..::: عيد ميلاد العنود اليوم ومافضيتش ندير شيء ولا نشري
استبرق:::: الله علاش ماقلتيش راهو درنالها حاجه عشية
جنات :::::: راهو رجلها درلها
استبرق:::::: هو مسافر وله ؟
غالية :::::: ايه ، وقعدت نفكر اول عيد ميلاد لها وهي متزوجة اتصلت بيه ذكرته قالي حرام وفكينا
جنات ::::::: علاش طالع من الطريق هذه
استبرق :::::: ايه مش طريقنا
هارون ::::::: 😒تعالوا سوقوا مكاني
وبعد لف نص ساعه هارون وقف السيارة قدام محل صغير
تلفت شاف لبسة غالية تمام انزلي هي
غالية::::: وين 😳
هارون :::::: غر تعالي مش خاطفك ونزل
غالية::::: نزلت وراه
هارون :::::: فتح الباب خشي مافيش محلات حلو مفتوحات زي ماتشوفي قد مالفيت خوديلها حاجات من هنى وخلاص
غالية ::::::☹️ استغربت خشيت خديت انواع شكلاته تحبهم ومشيت بنخلص شفت هارون 😳

~~~~~~~~~~~~~~~~~~~~~~~~~~

جنات :::::: شفتي شن دار معقوله توا منزل بنت قدام خطيبة
استبرق::::: عادي خيرك غر احنى لبسنا مش مناسب
جنات :::::: انى خطيبة و…
استبرق ::::: جنات فوتي امها هالقصة مرض بوك ووصة عليك وقاله باهي خالي الحمدلله وله اصح مني هو ماقالكش نبيك
جنات ::::: وماقالش مانبيكش
استبرق :::::::😒 تستنى فيه يقولها ؟؟

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~~

غالية ::::: شن هذا !
هارون :::::: حولي توا نخلص
غالية :::::: لا هارون…
هارون ::::: فنص فيها قدام الراجل
غالية ::::: سكتت وعطيته خلص واول ماطلعنا قلتله مستحيل نقبل انك تخلصهم
هارون ::::: شدي هاك بنت خالتي رشيدة اختى
غالية ::::: خديت منه ومشيت للسيارة وهو وراء حطيت يدي على مقبض الباب
هارون :::::: حط يده عالباب من ورها وسكره ،،، بنت خالتي رشيدة العنود بس اختى مش انت ومد يده للمقبض فتح الباب ولف ركب
غالية ::::::😳 قعدت جامده ركبت بسرعة وصكرت الباب ، مانكذبش ونقول مافهمتش شن قصده 💔 بس غالية هذا ولد جمعة العزاوي غالية هذا ولد الراجل يلي مخنب بوك غالية هذا ولد المرأة يلي امك تخدم عندها غالية هذا خاطب وخطيبته جنبك الو غالية معاي غالية خارج التغطية توا 🤦🏻‍♀️ اول ماوصلنا قلت تصبحوا على خير ونزلت

العنود ::::: مقعمزه في الصالة
غالية:::::: كل عام وانتِ بالف خير 😘😘😘
العنود :::::: بعدي عليا غادي اليوم تم اصلا
غالية::::: عارفتيني اليوم مافضيتش
العنود :::::: هههههه نبصر عليك عارفه
غالية::::: اصلا من وقت طلعت شفت تلفوني قلت مدام مافيش رسائل اللوم والعتاب امورنا تمام هههه
العنود ::::: شن هذا ؟
غالية :::::: شكلايط وتشبس وحاجات
العنود ::::: تمام غيري وتعالي
غالية :::::: اوكي

العنود :::::: غالية نبي ناخد رايك في موضوع
غالية:::: شن
العنود ::::: فيه وحده تحب واحد
غالية :::::: طبيعي بتحب واحد املاه بتحب وحده مثلا
العنود :::: تي غر اصبري وهم متزوجين
غالية::::: باهي كويس
العنود :::::: مش متزوجين بعض
غالية ::::::😱 الحقيرة
العنود :::::😒 غالية افهمي قبل ماتحكمي هذه حاجه ماتقدرش تتحكم فيها
غالية::::: بلا طروح هذا غلط وحرام من هي هذه
العنود ::::: وحده معاي
غالية :::::: والله ماتتحشم مدام ماتبيش راجلها تطلق
العنود ::::: انتِ مش متزوجة ماتعرفيش شن تعني كلمة طلاق للمراة والناس كيف بتبدا في نظرهم
غالية::::: والله !!! خايفه من الناس مش خايف من ربي عالاقل تغلط وهي مطلقة حسابها مع ربي لكن هكي هذا رجلها كان ماكشفها في الدنيا بيحاسبها ومش ح يسمحها في الاخره
العنود :::::: 😠 وعلاش ماتكلمتيش عليه هو وإلا المرأة بس تتحاسب
غالية:::::: انتِ قلتي هي صاحبك هذا علاش حكيت علها هي حتى هو يتحاسب انى مش نفتي عارفتين مانعرف في الدين كان الصلاة ونقرا قرآن لكن هذا حرام واضح
العنود :::::: ربي يهدي انى بنرقد ، تضايقة مع انه كلام غالية طول عمري نقول فيه شن نبها تقولي صح 💔

~~~~~~~~~~~~~~~~~~~~~~~~~~~~

#ثاني_يوم

العنود ::::::: كيف وصلت العمل اتصل معمر الو
معمر ::::::: مش ح تصدقي ….
العنود ::::::😳 فهمت انه ادريس هو يلي دارها

~~~~~~~~~~~~~~~~~~~~~~~~~~~~~

هارون ::::::: نازل للمطبخ خش من الباب
سالمين :::::: تبيكم تحولوا عنده ؟
رشيدة ::::::: ايه والله قالت مديري
سالمين :::::: هذا بالك يبى بنتك هذا علاش يبها تسكن عنده
رشيدة :::::: زعما هي شاده في القصة
هارون :::::::

~~~~~~~~~~~~~~~~~~~~~~~~~~~~~

غالية :::::: نضم في الحوش شفت في دولاب العنود الساعة 😳 قعدت نقلب فيها لين رن تلفوني نهى صاحبتي وبنت جيرانه بعد السؤال عن الحال والاخبار قالتلي
نهى :::::: غالية راجل العنود روح ؟
غالية :::::: لا علاش
نهى :::::: غر امس شفتها بعد المغرب نازلة من شقة في && قلت ماشاءالله شكلها حصلت اجرت مره ثانيه بنلحق علها نسلم ماصارش
غالية :::::: شقة 😳!!!!

#يتبع

رواية جنون عاشق للكاتبة صفاء

اترك رد

زر الذهاب إلى الأعلى