رواية جنون عاشق الحلقة الرابعة | القلم الناجح
روايات ليبيه كاملة

رواية جنون عاشق الحلقة الرابعة

جميع حقوق الطبع والنشر محفوظة

#جنون_عاشق

الحلقــــــــــ(4)ــــــــــة

هارون ::::: نازل من فوق وين فارس ؟
استبرق::::: خش للمطبخ بيشرب
هارون ::::: عرفه خش ع شان غالية 😒 مشي للمطبخ واول ماخش كان المنظر يلي قدامه غالية وفارس واقفين مقابلين بعض وشدين في يدين بعض 😳😳
يلي صار 👇🏻

فارس :::::: خش للمطبخ
غالية:::::: تلفتت 😒
فارس ::::::😍 نقدر ناخد طاسة اميه
غالية ::::::: حطيت يلي في يدي بدون مانرد ، وعبيت اميه ومديتها له
فارس ::::::: شد يدها مع الطاسة
غالية :::::::🤨 تحساب مش فاهمة يلي ادير فيه !!! شديت رصغ يده بيدي الثانية وخديت الطاسة حطيتها عالرخامة وشديت يديه الزوز بيديه
وهنى خش هارون
هارون :::::::😳 قبل مايتكلم ….
غالية :::::: هي اهو شديت يديه ؟ شن صار توا !!!!
فارس ::.:::: متعقد ووجها احمر 😳
غالية ::::::: توا مفروض انى نتأتر وجسمي يرعش وحرارتي ترتفع ويجري الكهرباء في جسمي 😏 سيبت يديه وحطيت يديه عالحيط يلي جنبي راهو احساسي توا نفس لما شديت يديك 😒 اكبر وبلا حركات مرهقين
فارس ::::: ولا كلمة تلفت بيطلع شاف هارون واقف
غالية ::::: تلفتت شفت هارون 😒 رجعت كملت نحط في الماعين في الغسالة
هارون :::::::: طلع وراء فارس طول
فارس :::::::: 🤨 تكلم !!
هارون ::::::: 😠 شن بنقول قبل بنهزبك لكن لقيتها ماقصرتش
فارس ::::::: هالبنت عمري ماشفت زيها 🤤 قبل عاجبنى شكلها توا خشت رأسي هي وعنادها
هارون ::::::: 🙄 قيسها معادش بتحز هالقصة

~~~~~~~~~~~~~~~~~~~~~~~~~~~~~

العنود :::::: بعد دقيقة ممكن من يلي صار حطيت يديه على صدره ودفيته للخلف
ادريس :::::: يشوفلها ومبتسم
العنود ::::::💔😢 انى متزوجة
ادريس :::::: اختفت الابتسامة 😳وقف وعطها بالظهر
العنود :::::: قعدت نساوي في وشاحي ، علاش هو متزوج وخيانته عادي بس خيانتى انى لا ولزم نبررها 💔 وقفت وطلعت بهدوء
ادريس ::::::: خدي نفس وتلفت لقها طالعة 💔💔 ماكانش عنده حيل من الصدمة انه ينادي علها
العنود :::::: خشيت للحمام طول 😢 جسمي يرعش نبكي اللحظه هذه ندمت فيها هلباااااا كأنه هذا وين ضميري فاق خديت صابون حطيته على فمي وبديت نغسل فيه بيدي بقوة لين خشلي الصابون وشرقت بيه 😭😭 قعمزت عالارض وقعدت نبكي وشاحي اميه حوائجي صابون
موظفة ::::::: 😳 خشت خيرك شن فيك
العنود ::::::: شيء
موظفة ::::::: تشوف لوجهها بصدمة تبي نساعدك ومدت يدها
العنود ::::::: شديت يدها وقفت وخديت مناديل قعدت نمسح بيهم وطلعت خديت شنطي وطلعت طول نسمع في صوت هناء تنادي بس مااهتميتش

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~

هارون :::::::: 😤 فوتها ياراجل
فارس ::::::: يتكلم وهو يلعب بلحيته وعيونه يلمعوا والحركات هذه كانت معصبة هارون
ياراجل قداش قوية وواقفة لروحها
هارون :::::: يحاول يشوهها في عيون فارس ، تي جو على خاطر صاحبها موصلها البارح الساعة 11 في الليل وكاذبه على امها على اساس في الخدمة
فارس ::::::: ومن هو ولد امه يلي مخليها هكي حتى في غيبته
هارون :::::: فارس فوت امها 😒
فارس :::::: خيرك انى عششت في رأسي بجد راهو وانى ماعندي سالمين باش تبيلي بنت خالي والا بنت عمي ( امه متوفيه )
هارون :::::::😠 وقف قلبتها زواج مره وحده قلنالك البنت عندها واحد وخش
غالية ::::::: كملت وجيت بنطلع
هارون ::::::😒قتلك
غالية :::::: نعم !
هارون ::::::: كان ضايقك والا كلمك فارس مره ثانيه قوليلي
غالية ::::::: علاش شن انت شرطة الاداب 😒 باش نبلغك نحل اموري بروحي
هارون ::::::::😒 حلي غر ردي بالك يسمع البرنس متعك وتصيرلك قصة
غالية ::::::: تلفتت ، البرنس متعي 😒؟؟؟ شن تقول انت
هارون ::::::: مديريش الطروح توا شفتكم امس نازلة من سيارته
غالية ::::::: حسام !!!! مديري ووين تاخر الوقت وصلني 😒 كان بندير حاجه نديرها في النهار والناس كلها تشوف مش خايفة من حد ومشيت
هارون ::::::: 🤔 مديرها ؟

~~~~~~~~~~~~~~~~~~~~~~~~~~~~

العنود:::::: روحت طول خشيت خديت بيجامة لبستها وتوضيت وصليت ليا وقت قاطعة الصلاة اغلب وقتي هكي نصلي ونسيب صليت الظهر وبعده العصر وقعدت نبكي ونستغفر ، وين سمعت الباب نضت بسرعة خشيت في السرير مانبيش حد يسألني على شيء
غالية :::::: خشيت شفتها متغطية ورقده طلعت وسيبتها

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~~

#في_الليل

رشيدة :::::: غالية
غالية :::::: نعم
رشيدة :::::: بعد ثلاثة ايام يتم الشهر كم عندك 😪
غالية ::::::: الشهر هذا مع التحويل و التاكسيات تلخبطت الدنيا
رشيدة :::::: توا نشوف (دار=حوش) ثانية نخدم فيها
غالية ::::::: لالا اصلا عندي تصوير اليومين الجايات يطلع منه مبلغ كويس مدوريش واكيد العنود عندها
رشيدة :::::: لالا العنود خل تلقط على روحها قعدت هي في جيهه والراجل في جيهه
غالية :::::: خلاص مدوريش توا نحلها انى
رشيدة :::::: سلم بنتى ، وسامحينا 💔
غالية ::::::: توا بنصدق روحي ههههه خشي ارقدي وقت
رشيدة ::::::: ايه ووقفت اختك خيرها معادش ناضت
العنود ::::::: فتحت الباب ، انى نضت وخشيت للمطبخ بندير قهوة
رشيدة ::::::: انى تصبحوا على خير
غالية :::::::: العنود احسبينى معاك في القهوة وخديت تلفوني كلمة المحل
العنود ::::::: درت القهوة وجبتها
غالية ::::::: عادي ماتفرقش معاي اي وقت واي يوم ، تمام ، ليلتك سعيدة
العنود :::::: شن ؟
غالية :::::: خدية القهوة ياريتك درتي شاهي ، كلمت المحل الشهر بيتم 🤷🏻‍♀️
العنود ::::::: مسحت وجهي بيديه وبعدين شعري ، امته هاللعنة يلي اسمها دين تتم ؟؟
غالية :::::: عادي تمشي الامور خيرك
العنود :::::: كل شيء مش كويس يصير معانه بسبب الموضوع هذا
غالية ::::::: خيرك انتِ؟
العنود ::::::: تعرفي كلمت معمر امبكري وقلتله بنسيب العمل ومش مرتاحه تخيلي شن قال
غالية :::::: حطيت الفنجان وركزت معها

العنود 👇🏻

العنود ::::::: حاولت نرقد بعد غالية صكرت الباب مقدرتش قلت احسن شيء نسيب الخدمة وكل شيء اهم حاجه ما نتماداش في الغلط أكثر من هكي ، خديت تلفوني واتصلت بمعمر
معمر ::::: اهلا
العنود :::::: اهلين 💔 كيف حالك
معمر ::::::: ماشية اهو عازمنا صاحب الحوش عالعشي بنلبس ونمشي
العنود ::::::: كملت ؟؟
معمر ::::::: ايه شبه خلاص
العنود ::::::: بتردد ، امته مروح انى محتاجتلك
معمر ::::::: مانعطلش ان شاء الله
العنود :::::: في بالي أسأل خيرك ؟ علاش محتاجتنى ؟ بالك صاير معاك شيء 😔💔
،، معمر انى بنسيب العمل
معمر ::::::: شن شن !!!!! 😠 تي حنى ماصدقنا نتنفسوا شوية عارفه ورنا 100 قصة ونبوا فلوس
العنود ::::::😢 باهي لكن مش مرتاحة بنولي لعملي الاول
معمر ::::::: بعقلك انتِ والا تهزي في رأسك وخلاص توا واحد يسيب ال 1500 ويرجع لل 700
العنود ::::::: يضايقوا فيه خيرك انت 😠
معمر ::::::: العنود مش عيل انتِ مرأة بعقلك وتعرفي تتصرفي كلمي مديرك غر موظفة جديدة بيلبسوك فترة بعدين يلهوا في روحهم
العنود ::::::::💔💔 ان شاء الله خير
معمر ::::::: هيا انى بنطلع توا
العنود :::::: قتلك
معمر ::::::: ها شن ؟
العنود :::::: الفلوس بنعطيهم لامي الشهر هذا ؟
معمر :::::: 😠 لا
العنود :::::: علاش ؟؟؟
معمر :::::::: تي حنى مش قادرين نأجروا وانتِ بتبدخي
العنود :::::: بدخ شن بالله عليك كانك مش عارف البير وغطاه
معمر ::::::: انى بنطلع توا وقلت لا وصكر
العنود ::::😢 باهي علاش ماحسيتش قداش انى ضعيفة توا وقداش محتاجه نسمع منك حاجه حلوه 💔 غطيت رأسي وقعدت نبكي لين رقدت

غالية :::::: شفتي !!! هذا علاش لما تقولولي عيشي حياتك نقوللكم مش وقتها
العنود :::::: باهي بتعيشي عمرك كله هكي هذا دين اكثر من نص مليون 💔 يتم عمرك وهو مايتمش
غالية :::::: باهي ناخد واحد زي معمر يتشرط عليا وتقعد امي بروحها تجري وتخدم باش تخلص !!!
العنود :::::: في. بالي انتِ تتكلمي بحسن نية لكن ماتعرفيش انك تزيدي فيه ( الانسان يتكلم بيلي يجول في خاطره بس مايعرفش وقع الكلمات هذه ع الشخص يلي قدامه كيف 🤷🏻‍♀️)
غالية ::::::: وانى مش بنعيشي عمري هكي بنقدم على جمعيات خيرية وصندوق الزكاة كل سنة الا لما يجي يوم وتفرج
العنود ::::::: ان شاءالله
غالية :::::::😒 من يضايق فيك في العمل ؟ والا غر قلتي هكي لمعمر
العنود ::::: اها ….. غر بالعاني لمعمر اي
غالية :::::: خبطت يدي على صدري ايوه وراك رجاله ماتنسيش هههههه انى بنرقد غدوا يوم كثيف
العنود ::::::: تمام تصبحي على خير

~~~~~~~~~~~~~~~~~~~~~~~~~~~~~

#ثاني_يوم

هارون :::::: اول ماناض نزل للمطبخ طول
رشيدة :::::: طالعة من المطبخ بتحط الفطور على الطاولة ، صباح الخير
هارون :::::: صباح النور وتلامح غالية واقفة في المطبخ جي بيخش
رشيدة :::::: قولي شن فطورك اليوم قالوا يأكل بجدول خل نعرف كيف نديره
هارون :::::: توا تديره غالية بدت تعرف
رشيدة :::::: تلفتت لا هذه العنود اليوم ماعندهاش خدمة جت تعاون فيا ، غالية من الصبح مشت لخدمتها اليوم
هارون ::::::: اها 💔 وخشت للمطبخ
العنود :::::: تلفتت تبي حاجه ؟
هارون ::::::: بناخد قهوة توا نديرها بروحي
العنود :::::::: صكرت تلفوني وقررت مانمشيش للعمل قعدت نساعد في امي ونفوت في الوقت
سالمين :::::: هارون شن صار في عيلة خالك ؟
هارون ::::::: يشرب في قهوته وفاتح تلفونه خيرهم
سالمين ::.::: وكان نتموا موضوع انت وجنات
هارون ::::::: شافلها فوق خلي الامور زي ماهي مش وقته توا
سالمين ::::::: ولي امته ؟؟؟
هارون ::::::: 😒 تعرفينى منحبش الدوه عالصبح خدي مفاتيحة وطلع
استبرق :::::: علاش مستعجلة هي فرخة خل تعقل شوية عالاقل
سالمين ::::::: تشوف للعنود 😒 ياودي الوضع معادش زي قبل
استبرق:::::: من يوم بيجو قلتلكم هم بنتين قلتوا لا وحده الثانية متزوجة ؟
سالمين :::::: وين نندري علها اهو توا شهر لا رينالها راجل ولا روحت
استبرق::::::🤔 ايه

~~~~~~~~~~~~~~~~~~~~~~~~~~~

غالية ::….. مقعمزه في الصيدلية
حسام ::::::: صباح الخير 😍
غالية :::::::. صباح النور
حسام :::::::: طلع يده من وراه تفضلي
غالية :::::::: شن هذه
حسام ::::::: كاميرا ؟؟؟؟؟
غالية ::::::: هههههه عارفتها كاميرا علاش تعطي فيه فيها ؟
حسام :::::. هذه يلي قلتلك خديتها من بريطانيا وانى معادش نستعمل فيها حرام تقعد مدسوسه تشتغلي بيها انتِ افضل
غالية ::::::: لا اكيد سعرها غالي مانقدرش ناخدها
حسام :::::: مافيش. حاجه تغلا عليك ياغالية
غالية :::::::: ا….
حسام ::::::: خلاص عادي درتها قصة
غالية :::::: باهي شكرا ياسيدي
حسام :::::: عفوا ممكن تكون اول صورة تاخدها بيها تكون صورتي ❤️
غالية ::::::: هههههه تمام وقعدت نصور. فيه بعدها كملت وروحت للحوش يادوب تغديت وغيرت ومع ال 5 جيت طالعة
العنود ::::::: حاسه روحي قلبي مقبوض ومش مستريحه خاطري نفتح التلفون ونشوف ادريس شن بيقول شن ردت فعله بس خايفة 💔

رشيدة ::::::: واقفة مع سالمين تسقي في الورد في الجنان
هارون ::::::: طالع ياامي ماتبى شيء
سالمين ::::: معطل ؟؟؟
هارون :::::::: اي متعشي برا
سالمين ::::::: باهي
غالية ::::::: جيت طالعة
هارون ::::::😒وين ماشية
غالية ::::::::: علاش بنوقع عندك ؟
هارون ::::::: ردي مره بس على قد السؤال
غالية :::::::: عندي تصوير حفلة خطوبة
هارون :::::: اركبي نوصلك
غالية ::::::: شكرا مانبيش خدماتك 😒
هارون :::::::😒 بنهدرز معاك في حاجه
غالية ::::::: مابيناش هذرزه
هارون ::::::::🤨 خالتي رشيدة ! قولي لبنتك تركب انى طالع طالع نحطها. على طريقي
غالية ::::::😳
سالمين ::::::😒 مش عاجبها
رشيدة :::::::: بري معاه خير من التاكسي هارون زي خوك
غالية :::::::😤 فتحت الباب وركبت
هارون :::::: ركب وهو يضحك ومتشمة فيها
غالية :::::::ماتصدقش روحك لا خوي لا نعرفك
هارون :::::: 😏ومن قالك نبي نكون خوك اصلا
غالية :::::::: اتكت عالكرسي وغمضت عيونها
هارون :::::::: يسوق ويشوفلها بطرف عينه ، شكلك تعبانة
غالية :::::: ذكي ماشاءالله
هارون :::::🤨 ديما هكي تردي والا غر عليا انى ؟
غالية ::::::: فتحت عيوني وشفتله اي واحد مانهضماش هكي نرد عليه
هارون ::::::: وعلاش مش هاضمتين ياست غالية
غالية ::::::: المحبة من ربي يا C
هارون :::::: فوتها خدمة الليل هذه يوم مروحه الساعه 12 يوم الواحد
غالية :::::: سوية تقعميزتي رقم واحد انت مليكش علاقة وماتقولش ساكنه في حوشنا هذا انتم عرضتوه مش حنى
ثاني حاجه نخدم في الليل والصبح وناقصني نوم زي ماتشوف لانه عندنا دين لناس نصابين 😒 لزم نخلصوه
هارون :::::::😒 فوتي امه الدين توا نقول لبوي يغير طريقة الدفع ل 500 بس
غالية :::::::😒 شكرا ماطلبتش خدماتك
هارون :::::::: 😤 خيرك انتِ هكي تحبي تعاكسي وخلاص ، شن ديرلك انى لانكم مديونين لبوي ؟؟؟؟
اهو جوك مليح مع استبرق
غالية :::::: لا جوي مليح لا شيء اختك هي يلي لصقه فيا
هارون :::::: 😏 توا نقوللها معادش تكلمك وكمل سواقه وهو ساكت وصلها
غالية ::::::: فتحت عيوني وصلنا ؟
هارون :::::: هذا المكان يلي قلتي عليه
غالية ::::::: تنهدت شوف يا هارون اللقطة هذه تصير معاي كل 10 سنين مره
هارون :::::: لقطة شن ؟؟؟
غالية:::::: انى نعتذر لحد انى مرهقة وتعبانة وهذا مخلينى معصبة ماتخدش على كلامي
هارون ::.::::: ابتسم
غالية ::::::: صح انت دراه وبارد ودمك رزين لكنك راجل كويس
هارون :::::: هههههه بعد هذا كله راجل كويس !
غالية :::::::: 😍 قعدت نشوف لضحكته
هارون :::::: شن !!!
غالية ::::::: خديت شنطي وفتحت الباب اول مره نشوفك تضحك ان شاءالله بطول عمري 😌 ونزلت
هارون ::::::: ابتسم وقعد يشوفلها لين خشت

~~~~~~~~~~~~~~~~~~~~~~~~~~~~~~

حسام :::::: حطينى في الجدول غدوا عشية تمام منور وصكر التلفون
انس :::::: خيرك حسيتك شاد في الخدمة اليومين هاضم
حسام :::::: فيه وحده نعدل في جدولي على خاطرها
انس ::::::: ههههه طلع حق ربي ، حلوه ؟
حسام :::::: لي النم 🤤
انس ::::::: باهي شن وضعها ؟
حسام :::::: تي ياراجل بنت كوكتيل عناد لسان شكل ثقة دم خفيف شن ما تطلب موجود
انس ::::::: معنها هذه فتاة احلامك ههههههه وترضا بيها العيلة
حسام ::::::: ماهو هذه اقوى حاجه ، البنت من عيلة راقية وفلوس يعنى تخيل من نفس العائلات يلي امك تبى تخطب منهم وبنوتهم صامت 🥴وكله مظاهر ، والبنت مختلفة بكل يعنى كيف ماتبى انت وامك هههههههه
انس ::::::: والله شكلك طحت واقف وهذه كيف تخدم عندكم
حسام :::::. مافهمتش شكلها تبى تبدا من الصفر تخدم في خدمتين ، يلا احسن من يلي تجري في المعاهد الخاصة لانه عيلتها فلوس
انس :::::: من عيلة من هي
حسام :::::: مش عارف يسكنوا في شارع $$ الفيلا ال &&&&
انس :::::: متقولش عيلة الغزاوي
حسام ::::::: مانعرفش
انس ::::::: هم هم نعرف ولادهم هارون وموسى
حسام :::::: حلو يعنى فيه من وين نخشولهم
انس :::::: ادلل اطلب بس

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~

#بعد_ايام

العنود :::::: قرارت نمشي اليوم 💔 لو طردني نروح لو نسى الموضوع نكمل شغلي عادي 😣 لبست وطلعت وانى نفكر طول الوقت وقلبي يوجع فيه
وصلت للمكتب الغريبة انه هناء ماقالتش وينك ولا خيرك غايبة شكله هو قايللها واخده اذن منى قعمزت نشتغل عادي مابيتش نسأل حتى عليه موجود اول لا لين سمعت صوت خطواته جاي لمكتبنا 💔

~~~~~~~~~~~~~~~~~~~~~~~~~~~

غالية ::::::: نرتب في الصالة انى واستبرق
استبرق ::::: بيجو خواتي اليوم
غالية ::::::: ربي يونسكم بيهم
استبرق :::::: سلمك

هارون ::::: نزل شافهم وفات للمطبخ خالتي رشيدة !
رشيدة ::::: نعم
هارون :::::: هذا الظرف فيه معاشك وهذا معاش غالية
رشيدة ::::::😳 غالية !!!
هارون ::::::: ايه
رشيدة ::::::: غالية ماتخدمش هنى ياولدي هي تجي تساعد فيه في الحاجات يلي انى مفروض نديرها ضمه قبل لتجي وتولع فيك الله يربحك
هارون :::::: هههه علاش انى نشوف فها شبه كل يوم هنى هذا حقها
رشيدة :::.:: لا ياولدي هي بس حانه عليا
غالية :::::: خشيت للمطبخ شن. هذا ؟
رشيدة :::::: معاشي
هارون :::::: دس الظرف الثاني في جيبه
غالية :::::: يلي تحصليه منهم فايدة 😒
هارون :::::: بدى فاهم انها تحب تستفزه ابتسم وطلع وخلاهم

~~~~~~~~~~~~~~~~~~~~~~~~~~~

ادريس :::::: يشوفلها ومش مصدق
العنود ::::: رأسي في الطاولة مانبيش نشوفله
ادريس :::::: بصوت فيه حزم العنود تعالي معاي للمكتب
العنود ::::::💔 خل نكمل ال…..
ادريس :::::::😠 توااااا
العنود::::::😳 وقفت ومشيت وراه
ادريس :::::: خش للمكتب مشي فيه عدة خطوات
العنود :::::: خشيت ورديت الباب وراي
ادريس :::::: تلفت وقدم ليها بخطوات سريعة شد يدها الزوز رفعهم فوق رأسها وتبتهم بيد وحده وبدي يبوس فيها بطريقة جنونية ويصكر في الباب بالمفتاح بيده الثانية 💔
العنود :::::::: مش عارفه شن يلي صار حسيت روحي دخت وبيغمى عليا ارتخيت وجيت بنطيح
ادريس ::::: بعد وشدها تعالي قعمزي هنى ، قعمزها ومشي جاب اميه من عالطاولة ، جنيت نحساب معادش بنشوفك مره ثانيه معادش حصلتك عالتلفون ومانعرفش عنوانك
العنود ::::: شربت اميه وقعدت نساوي في وشاحي
ادريس ::::: احكيلي 🥺 كل. شيء
العنود :::::: عدلة تقعميزتي ، مش عارفة من وين بنبدا كنت طفلة حياتها حلوه اهلها عاطينها كل اهتمامهم لين صارت المصيبة 😢 وهي انه اتهموا بوي بخنبت مبلغ مليون دينار
انحبس بوي لمدة 6 شهور شفنا فيهم الويل 💔😢 مع انه عمري 5 سنوات لكن ندكر فيهم امي تخدم ليل نهار باش تدفع الايجار وادور في محامي وحنى انى واختى يعنى اغلب وقتنا عند الجيران وبعد مابوي اعترف 💔 دار اتفاقية مع صاحب الفلوس ، قعدت نمسح في دموعي انه يخلصه بعدها معادش ندكر انى عشت حياة طبيعية بكل 😢
ادريس :::::: مد يده شد يدها بين يديه
العنود :::::::: كل هدرزتنا عالدين بوي يخدم في خدمتين ومرات ثلاثه شبه مانشفوش فيه حتى الوقت يلي يروح فيه بيرتاح يعبي سيارته من الخلف بطيخ والا برتقال في الشتاء ويوفق يبيع ويرقد في سيارته 💔 امي نفس الشيء طول اليوم من حوش لحوش تخدم حياتنا عبارة عن هالدين نزعلوا لما منلموش المبلغ اخر الشهر نفرحوا لما نزيدوا اكثر منه شوية حتى احلامنا انى واختى في المدرسة كانت عبارة عن نخلصوا الفلوس
شن تبى تكوني ؟؟؟ اي حاجه تجيب هلبا فلوس
شن تحلمي في المستقبل ؟؟؟ نخلص الدين
انى عكس غالية اختى كنت عاطفية وعيلتنا انحرمت من المشاعر مقدرتش نتحمل الضغط يلي كان في الحوش قرارت نطلع نتزوج ونبنى حوشي الخاص يلي انى نملاه حب
ادريس ::::: رفع رأسه شافلها
العنود :::::: لما عمري 22 شافي معمر 💔 وانى مروحة من شغل ماندكرش فيه شن كان وقتها ، وشفتله معمر هو راجلي
ادريس :::::: حول يديه من يدها وولع دخان كملي
العنود ::::::: سأل عليا وجي خطبنى وطبعا زي احلام كل بنت انها بتعيش الحب والغرام وووو وافقت هو من منطقة ثانيه جاي خدمة لطرابلس شرطت نسكن هنى اجر وجهز شقة صغيرة وتزوجنا من 3 سنوات اول سنة امورنا تمام 💔 تاني سنة معاشه معادش ينزل بدي يخدم في عمل حر يخدم في الكهرباء للحياش الجدد ، نمسح في دموعي حولنا من الشقة اجرها هلبا سكنا في استديو مع الوقت طلعتلنا مشاكل ثانيه معادش قدرنا نخلصوا الايجار سلمنا الشقة قالي نمشوا لمنطقته نسكنوا مع اهلة بس مقدرتش حطنى عند اهلي توا تقريبا من 5 شهور انى عندهم وهو يشتغل وانى نشتغل على اساس بنجمعوا مبلغ في الوقت يلي بنجمعوا فيه مبلغ باش نرتبوا حياتنا حنى وسكتت… المشكلة مش هنى المشكلة الوضع يلي هربت منه من حوش اهلي عشته مع معمر 💔
ادريس ::::: طفى الدخان وشافلها ، يعنى توا مش منفصلين
العنود ::::: حطيت رأسي لوطة وهزيته بمعنى لا 💔 علاش خيانة المرأة مش زي خيانة الراجل مع انها عند ربي واحد علاش هو يلي يسأل ويحاسب ؟
شفتله وقلت حتى انت متزوج 😒
ادريس :::::: متزوج من خمسة سنوات وعندي بنت وولد ،،، سكت شوية ….. العنود 🥺 ماتسيبيش الخدمة
العنود ::::::💔
ادريس ::::::: اسمعي ……
العنود ::::::😳

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~

استبرق ::::: تحط في الحلويات في المترد
هارون ::::::: ديري قهوة استبرق
غالية ::::::: حطيت العجينة في العجانة وفتحت القلاية حطيت فيها السيخ ، ونرتب الماعين في الغسالة
هارون :::::: يستفز فيها مش عارفه علاش نعطوا فيكم في معاش هو كل شيء بالالات
غالية ::::::😏 ماهو رزقكم حرام ، امك واختك تقول معاقات مايبوا يديروا شيء
هارون ::::::: كيف ما يرد رن تلفونه ، ايوه فارس وطلع
فارس :::::: انس عازمنا عالعشي غدوا هو وجماعته
هارون :::::: انت بكيفك انى فوتنى
فارس :::::: تي شد فيه شده على خاطرك اصلا
هارون :::::: مستغرب علاش
فارس :::::: مش عارف بس تعاله كان ما عجبناش الجو نروحوا
هارون :::::: خلاص تم وهو راجع للمطبخ يسمع في استبرق تسأل في غالية
استبرق :::::: غالية مرتبطة انتِ ؟

#يتبع

باقي الحلقات

https://qalamnajih.com/?p=138

اترك رد

زر الذهاب إلى الأعلى