رواية جنون عاشق الحلقة 22 .. الكاتبة صفاء | القلم الناجح
روايات ليبيه كاملة

رواية جنون عاشق الحلقة 22 .. الكاتبة صفاء

رواية جنون عاشق الحلقة 22

#جنون_عاشق

الحلقــــــــــ(22)ـــــــــة

معمر :::::: لكن فيه حاجه بسيطة مرات تزعجك
العنود :::::: في شن
معمر :::::: في الخدمة الجديدة
العنود ::::::💔 يلي هي ؟؟
معمر ::::::: الخدمة مش هنى
العنود :::::: وين !!
معمر ::::::: في الصحراء مش حياش شركة تبي عمال كهرباء يعنى واحد يقعد غادي ويبدلوا على بعض طبعا اسبوعين باسبوع لكن المبلغ مستاهل
العنود ::::::💔 ادريس يحولي في السبلة يلي ندير فها بيبعد معمر عالحوش
معمر :::::: ان شاء الله من غدوا قالوا
العنود ::::::🥺 بتمشي ؟؟
معمر :::::: ايه
العنود :::::: بتولي حياتنا زي قبل 💔 مش قلت هيا نولوا ونخدموا مع بعض ونقعدوا مع بعض
معمر ::::::: قعمز جنبها شد يدها عارف لكن تشوفي في وضعنا وموضوع الصغار يلي يبى حتى هو لكن الحوش قاعد اقعدي فيه مش زي المره الاول حطيتك عند اهلك ونمشي ونجي وبينا تلفون هيا ماتعرضيش فيها عاد
العنود ::::::ربي يسهلك
معمر ::::::: خل نتعشوا وبعدها نوتي شنطي
العنود::::: باهي

~~~~~~~~~~~~~~~~~~~~~~~~~~~~~

غالية ::::: وقفت ومن ياخد في رأيك انى خديته قداش ليا وحتى انى خديته قبل بنت خوك
جنات :::::::😧
غالية :::::: كان مش مصدقين قولوله يوريكم عقد الزوج
الكل ::::::😨😨 يشوفوا لهارون
جمعة :::::: هارون شن صاير 😡 شن تقول هذه
سالمين :::::: تشوف لهارون تبيه يكدب
رشيدة :::::::😳غالية!!!!
هارون :::::::: بهدوء مصطنع كملتي والا مازال عندك حاجه بتقولها !
غالية :::::::😌 كملت
هارون :::::: معنها نوضي خشي لدارك
غالية ::::::::😌🤨 قلت بتسهويك داري يلي فوق والا 🤔 يلي لوطة
هارون :::::: بنفاذ صبر 😤 غااااااالية
رشيدة ::::::: شدتها مع يدها نوضي 😠
غالية ::::::: دفيت الكرسي بهدوء وطلعت بخطوات بطيئة جدا ، زادت حرقة دمهم اكثر ماهو محروق اول مافوتت الباب خديت نفس وخشيت للدار

~~~~~~~~~~~~~~~~~~~~~~~~~~~~~~

جنات ::::::: كلامها صح او لا ؟؟
استبرق :::::: اصبري جنات خل نفهموا
جنات :::::: هارون نكلم فيك 😢 رد عليا كلامها صح او لا بس هذه الاجابة يلي نبها ؟
هارون :::::: صح
جنات :::::::💔 ركبت لدارها طول
امل ::::::🤭
سالمين ::::::: شن هو الصح ماتقتلنيش شن هو 😡 تزوجت هذه !!!!
جمعة :::::: هارون تكلم
هارون ::::: ايه تزوجت غالية قبل عرسي باسبوع وصارت بينا مشكلة خلتها تسافر
جمعة :::::: كيف مرتك عام.كامل ماتندريش علها !!!!
موسى ::::: هارون احكي زي الخلق كيف مرتك وسنه هي في بلاد وانت في بلاد
هارون :::::: هذا يلي صار كانت بينا مشكلة
سالمين ::::::: مشكلة سنه ماحلتوهاش وانت ماطلقتهاش ! ماتندريش علها شن ادير غادي
استبرق ::::::😧 وكان ماصارتش المشكلة يعنى بتسيب جنات كنت والا بتتزوجها علها !!
هارون :::::::😡 بصوت عالي خلااااااااص يلي مفروض تعرفوه عرفتوه تزوجتها وهي مرتي ايه حياتي وانى حر فيها نتزوج 2 والا عشرة الوحيدة يلي مفروض نوضحلها هي جنات وركب

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~~~

رشيدة:::::😠 الراجل مش طلقك من عام علاش هكي يابنتي خيرك شن جاك تخربي عليه ؟؟؟ شن دارلك !!!
غالية :::::: ماطلقنيش ماطلقنننننننيش 😒 شن تبي نديرله نقعد مرته بالسر عمري كله
رشيدة ::::😳 كيف ماطلقكش !!!!! بعدين وكان هكي اديري ! تجيب المشاكل مع اهله كل شيء بالعقل
غالية :::::: وشن بنقعد معاه انى نجيب المشاكل مع اهله ينحرق ، توا يهزبوه اهله يجي يطلقني
رشيدة:::::: لاحول ولاقوة الا بالله ،، عيب هذه امه وحتى وكان مرأة كبيرة
غالية :::::: 🤨 ديما نقولك انى مش ح نسكت لحد يغلط فيا الكبر مش بالعمر بالعقل وهي مصغره عقلها ادير قدر لروحها يدرولها الناس
رشيدة::::: شن دارتلك !
غالية :::::: مش مهم المهم توا حتى انتِ ماتعطهاش وجه لانها مش هينا
رشيدة::::: 😒انى مادخلكش فيا شن بتربينى عقاب عمري نمشي بنيتى وبينهم وبين الله

~~~~~~~~~~~~~~~~~~~~~~~~~~~~~

جنات :::::: تجهز في شنطتها وتبكي 😢
هارون :::::: خش ، ماكنتش نبيك تعرفي بالطريقة هذه
جنات :::::: مانكذبش عليك كنت نعرف انك تحبها وانه بينكم شيء لكن لدرجة انك متزوجها وانى راقده على وذاني ماتوقعتش
هارون ::::::: تاكدي من حاجه وحده ماخنتكش لا كان بينا اتصال ولا لقائات خلال فترة زواجنا
جنات :::::: سكرت الشنطة توصلني انت لبوي والا نكلم موسى !!
هارون ::::::🤨 توا غدوا الصبح نرفعك
جنات ::::::: نزلت وخلاته ،، موسى وصلوني انت وامل لحوش بوي
سالمين::::::: مقعمزة تبكي واستبرق تهدي فيها 😳 لا بنتي لا خليك في حوشك توا نتفاهم معاه انى هذا هذا حوشك انتِ وهذا راجلك انتِ
هارون :::::: نازل منزل الشنطة من فوق 😒 خلها تمشي توا وبعدين ساهل
موسى :::::: هاتها خدي الشنطة امل هيا ، تبطب على كثف خوه ربي يعينك وطلع وطلعت جنات وامل وراه
جمعة ::::: توا شن ؟؟
هارون ::::: شيء زي ماسمعتوا غالية مرتي
جمعة::::: علاش انى مانعرفش علاش ماجيتش زي الناس وقلت نبي البنت بناخدها كيف في نفس الاسبوع تتزوج زوز
هارون :::::: هذا يلي صار توا
استبرق::::: نوضي ماما ارقدي غدوا يصير خير فكونا من الدوشة توا توا يجيك الضغط
سالمين :::::: غدوا نتفاهموا😠 ومشت مع بنتها
هارون ::::: 🤨 لف ومشي لغالية ، دق عالباب
رشيدة :::::: صكري فمك وماتتكلميش توا انى نشوفه وفتحت الباب
هارون :::::: خالتي رشيدة نبي نتكلم مع غالية شوية
رشيدة :::::: ياولدي انى مافهمت حاجه كيف زمان قالت طلقني وتوا قالت ماطلقنيش شن صاير والله دخت
هارون :::::: موضوع طويل غر ندها توا
رشيدة::::: فكنا من الدوشة في هالليل توا بعد هذي الحوش غدوا في النهار هدرزو توا انت متكنطي وهي احرف منك
هارون :::::::😤 تصبحي على خير ومشي
غالية :::::: تسمع وراء الباب ، مشت لسريرها غدوا ندور حوش واضح انه الحكاية لهنى خلاص

~~~~~~~~~~~~~~~~~~~~~~~~~~~~

#ثاني_يوم

العنود :::::: نضت وتيت لمعمر فطوره وشنطة وسقدته ، لفيت عالحوش وجهزت روحي وطلعت للعمل

غالية :::::: نضت لبست وطلعت قبل ماينوضوا صكرت الباب بالشوية وتلفتت
هارون ::::: وين هاربة !!!
غالية ::::::🙄 علاش بنهرب
هارون :::::: باهي تعالي بنتكلموا
غالية :::::: مش فاضية وجيت بنمشي
هارون :::::: شد يدها وجبدها معاه للملحق وفتح الباب خشي
غالية ::::::😳 حوش الناس
هارون :::::: خشي الراجل طالع وخذيت منه المفتاح
غالية ::::::: خشيت بتقتلني والا شن 🥺 جيبنى هنى باش ماحد يسمع
هارون ::::::😒 توا قعمزي زي الخلق وقوليلي علاش درتي هكي امس
غالية ::::::: 🤨 باش اطلقني هارون انى سألتك من وقت جيت قلتلك هارون ماتلومنيش على يلي بنديره وانت مااهتميتش
هارون :::::: شن صاير بينك وبين امي ؟؟؟؟ لو القصة طلاق بس راهو خديتي بوي وامي او حتى جنات وحكيتي معاهم باش يضغطوا عليا لكن استعراض البارح ماكانش ليا !!!!
غالية ::::::😌 قلت نستمتع شوية بالموقف
هارون ::::::😡 ماتهبلنيش احكي زي الخلق شن صااااااااير شن صار بينك وبين امي في البداية نحسبها صدفة كسرت الماعين لكن بعد يلي صار في الليل عرفت انه فيه حاجه
غالية :::::: 🤨 باهي فيه حاجه درتلي حاجه وانى انتقمت هكي !!!! شن بيتغير كان عرفت
هارون :::::: 😡 لامته بتقعدي بالعقلية هذه قوليلي بس هذه امي ياغالية اميييييييي مفروض تحترمها على خاطري حتى لو غلطت معاك تقوليلي وانى نتفاهم معها علاش تصعبي في عشتنا اكثر 💔
غالية :::::::😠 مافيش حاجه اسمها عشتنا تمام ، انتم جبتوني هنى بالسيف ، ولما روحت من السفر خلتوني نقعد عندكم مره ثانية غصب عنى ، لهذا تحملوا شن يجيكم طلقني وارتاح منى
هارون ::::::: شد وجهها بين يديه قولي منحبكش وانتِ تشوفي لعيوني هكي قولها توا
غالية :::::: بلعت ريقي ،💔 واطلقني بعدها ؟
هارون :::::: امس قلتي انك تحبينى وانك تزوجتينى لانك تحبينى وماتبيش تخسرينى ،، اليوم رجعنا لنفس النقطة هذيكة جنات رجعت لاهلها واهلي سمعوا وانى واقف نستنى منك في كلمة تحدد مصيرنا 🥺 بيدك انتِ توا تسيبينى او لا
غالية ::::: قعدت نشوف لعيونه هكي 🥺 وساكته
هارون :::::: هزلها رأسه بمعنى ايه ؟؟؟؟
غالية :::::: دفيت يديه بالله فكني من جو المسلسلات هذا 🙂 طلق والا اقعد وفتحت الباب وطلعت
هارون :::::: ههههه لحقها يمشي ورها تحبينى ياعنايدية
غالية :::::: ضحكت من غير مانتلفت وطلعت

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~~~

العنود ::::: طلعت لمكتب استاد فيصل لقيته مصكر مشيت لهناء ، وين استاذ فيصل امس قعد ملف عندي بنعطيه له
هناء :::::: 😐 سيب الشركة
العنود ::::::: 😧 كيف علاش الراجل امس يخدم لابيه لاعليه
هناء ::::::: مش عارفة انتقل لفرع ثاني والا شن مافهمتش
العنود :::::: واضح ادريس دارها 💔 هل نستغرب🤷🏻‍♀️ لا
ادريس ::::::: العنود 😍 مشي معمر
العنود ::::: ايه
ادريس ::::::😉 همسلها معنها توا نعيشوا حياتنا براحتنا
العنود :::::: كملت طريقي وانى ساكته ونفكر شن ندير

~~~~~~~~~~~~~~~~~~~~~~~~~~~

غالية:::::: طلعت للمصور قاعد مش معروف مافيشي شغل هلبا ، اتصلت بيا جنات
جنات ::::: غالية وينك ؟؟
غالية ::::: في المصور !
جنات :::::: نقدر نشوفك ؟؟؟
غالية ::::: ايه وين انتِ
جنات :::::: توا بنطلع نمشي ل &&
غالية :::::: تمام عرفته 🤔 شن تبى زعما وخديت شنطي وطلعت هو مش عام خدمة عارفاته انى 🤦🏻‍♀️

هارون ::::: ركب سيارته ومشي لبوه في الشركة
جمعة :::::: انى عندي زي بعضهم هذه حياتكم وانتم حرين لكن الغلط انك ادير هكي من وراي
هارون ::::: كان فيه بينا مشاكل وصارت فجاء وبعدها سافرت بدون عملي وانت عارفه
جمعة ::::: والله مافهمت ياولدي كيف مرتك تسافر وانت ماتحلقهاش عام كامل ، المهم توا نظم امورك مع خالك وبنت خالك ومعها هي وامك وراك هلبا
هارون :::::: ناض باس رأس بوه ربي يسهل وطلع

رشيدة::::: تحوس في المطبخ
سالمين ::::::😡 علاش قاعده تخدمي توا حطي رجل على رجل وارتاحي ، يلي تبوه وصلتوه
رشيدة::::: 😳 انى والله مانندري زينى زيكم سمعت البارح وحتى زمان عرفوا انه كذبنا عليهم لما قلنا غالية بتنخطب وتحملتها انى وماجبت سيرتك
سالمين::::: ماراح شيء اهو حتى بمرته ماطلقتوه هذه بنتك وتربيتك 😡 لكن غر تمنى انتِ وياهم ولدي ماكم واخدينه
استبرق::::: ماما خالتي رشيدة شن دخلها
سالمين :::::: بالك تحسابي هالسحارة هذه ماتندري على شيء ماتغركش المظاهر
رشيدة ::::::😢 الله يسامحكم ومشت للدار
سالمين :::::: لموا قشيشكم من توا 😏
رشيدة :::::: خدت تلفونها واتصلت بالعنود
العنود :::::: ايوه كيف حالك يما
رشيدة::::: الحمدلله
العنود::::: كيف بنتصل بيك نقولك معمر في الصحراء تعالي ونسينى
رشيدة ::::::😢 تعالي ارفعيني بنتى بنكلم غالية لكن تعرفها بدير العار تعالي قبل ماتجي
العنود :::::: شن صار 😳
رشيدة ::::: غر تعالي بعدين ساهل
العنود::::: باهي هي ، ومشيت لادريس انى بنطلع 🥺
ادريس ::::: خيرك
العنود :::::: امي مش عارفه خيرها 💔 بنمشي ناخدها ونرفعها لحوشي
ادريس :::::::😡 يحاول يسيطر على اعصابه قصدك مش متلاقين حتى اليوم ؟؟؟
العنود :::::: نقولك امي اتصلت بيا تبكي وبناخدها عندي !!
ادريس ::::؛ تمام حبيبتى عندك الحق طمنيني
العنود ::::::: طلعت بسرعه
ادريس :::::::😒 نخلص من راجلها تطلع امها

~~~~~~~~~~~~~~~~~~~~~~~~~~~~~~

غالية :::::: جنات !!!
جنات :::::: اهلا قعمزي
غالية:::::: صار شيء جديد
جنات ::::: علاش ماقلتيش انك مرته !
غالية ::::::🤨 وشن تفرق معاك ؟ قلتلك ممكن يكون شيء ثقيل قلتي عادي 🤷🏻‍♀️
جنات ::::::: ماتوقعتش هكي بكل
غالية ::::::: اممممم النتيجة
جنات :::::: بابا يضغط عليا وكلم عمتي قاللها تصرفي
غالية :::::: باهي ؟؟؟؟
جنات::::: تكلمي مع هارون خليه هو يلي يرفض يردني
غالية ::::::😡 عصبت يعنى كان هارون مارفضش انتِ بترجعي ؟؟ ماعندكش شخصية للدرجة هذه عطيتك بدل الحجه يلي كنت تطلبي فيها منه الف خانك كذب عليك طلع متزوج جايب مرته ساكنه معاك في نفس الحوش وقاعده مش قادره تقولي مانبيشي وتبيه هو يقولها !!!!
جنات :::::: ماتعرفيش بابا انتِ
غالية :::::: مافيش داعي نعرف حد انتِ اعرفي روحك وتصرفي هذه حياتك ، انى مستحيل نوقف قدام هارون ونخيره بينى وبينك او نطلب منه انه يطلقك
جنات :::::: بابا ينتقم منى لو انى نرفض 🥺 يسودلي عيشتي يعنى ترضي انتِ يردني هارون ونقعدوا ضرائر
غالية :::::: انى مانرضاش لكن مش باني نخير هارون او نطلب منه ، انى لما مايعجبنيش شيء في مكان نوقف في وجه الكل ونسيبه ونمشي ، اسفة جنات هذه حياتك انتِ تفاهمي معاه مش ح ندخل في موضوعكم وخديت شنطي وطلعت

~~~~~~~~~~~~~~~~~~~~~~~~~~~~~

العنود ::::::: وصلت في تاكسي لقيت امي برا هي وشناطها😳 شن صاير
رشيدة ::::: عطت الشناطي للراجل يركب فيهم ، توا نحكيلك في الطريق
العنود :::::: ركبت وانى نغلي 😤 وهي تحكيلي وانى خاطري نولي نجبد سالمين من شعرها بعتت رسالة لغالية تجي لحوشي لانه امي عندي

هارون ::::: روح للحوش
سالمين :::::: جيت ؟؟؟؟
هارون :::::: ايه جيت باش نحزها. معاك ونتفاهموا اصبري بس نغير ونازلك

غالية :::::: كيف كيف !!!
العنود :::::: صكري فمك تسمعك ، عيت تحلف فيا مانحكيلكش
غالية ::::::😡 والله !!!! تهين في امي ؟؟ وتبوني نسكت
العنود :::::: من قالك اسكتي علاش نحكيلك انى توا ؟ ورها
غالية :::::::: ساهل ساهل وخديت شنطي
العنود :::::: وين تنوض امي شن نقوللها
غالية ::::::😏 قوليلها مشت لراجلها
العنود ::::::: هههههه مانوصيكش الله الله بحرق الدم
غالية :::::: طلعت وانى نغلي على سالمين 😡

هارون ::::::: توا شن
سالمين ::::: انت يلي توا شن ، امشي رد بنت خالك بوها من الصبح اتصل يلوم ، وطلق هالفرخة ال 🤬
هارون :::::::😡 يما فكينا من الكلام هذه
سالمين :::::: هارون انى هالبنت ماتولي كنتى وكان بنموت
هارون ::::::: قلتها قبل ونقولها توا يما نبها شوفي هه عشت سنة نستنى فيها
سالمين :::::: عشت سنة مع بنت خالك ماشاءالله عليكم بلا مشاكل
هارون :::::: ومن قال !!! انى وجنت ماكانش بينا حياة أصلًا باش تكون بينا مشاكل نقعمزوا بالساعات مع بعض بدون ولا كلمة بالله عليك تفضلي تلفوني شوفي الرسائل يلي بينا خاطي بنمشي ارفعني جيب اطلعي انى وصلت !!!! تي اسمها عالفيس مانعرفاش !!! اي حياة تهدرزي علها
سالمين :::::: وتوا الحياة ولت فيس ورسائل!!!!
هارون ::::: ايه فيس ورسائل واتصال وهدرزه وضحك وطلوع وكل شيء
سالمين :::::😡 انى مانفهمش هكي انى يلي نعرفه انت لا ولدي ولا نعرفك كان مش مطلقها
غالية ::::: خاشة معصبة وين سمعتها هي معصبة فرحت وخشيت مبتسمة ،، عمتي 😊 من يلي تبيه يطلقها
هارون ::::::: غالية 😒
سالمين :::::: اهي جت بكل صحة وجه
غالية :::::::🤨 طبعا بنجي. وين ماراجلي وين ماانى 😌
هارون ::::::: غاااااالية ارقي فوق
غالية ::::::: ابتسمت ياوخيتي سلمه شفتيه مايحبش يخلينى نسمع المشاكل
هارون :::::: 🤨 يشوفلها متع هذه خيرها ، 😠غااااااالية
غالية ::::::: عيون غالية انت 😍 ورمشت عيوني
هارون :::::: شاد ضحكته بالسيف
غالية :::::: ركبت الدروج
هارون :::::: يمسح في وجهه بيديه يحاول يرجع زي ماكان باش يكمل ناقش امه
سالمين :::::: وين ركبت فوق هذه 😡 وين وين
هارون :::::: يما افهمي و تأقلمي مع الوضع انى كان ماتبوهاش بناخدها ونطلع ، وركب

غالية :::::: خشيت لداره الاولة مش داره مع جنات شن اديري هنى ياغالية ؟ عادي المهم حرقت دمها 😒 قعمزت عالسرير
هارون :::::: فتح الباب وخش غالية
غالية ::::::: طلع قرار المحكمة في حقي ؟
هارون ::::::: قعمز جنبها وشد يدها حطها على قلبه انتِ القاضي معاك علاش تفكري في الباقي
غالية :::::::: 🥺 سحبت يدي فكنا من الجو هذا انى مناعتي ضعيف اتجاه الكلام الحلو اليومين هضم
هارون:::::: ههههههه
غالية :::::: امك قالتلك معادش ولدي كان مااطلقهاش علاش ماقلتش انك اصلا مطلقني
هارون :::::: لنفس السبب يلي مخليك ماتقوليش
غالية:::::: تكيت رأسي على لوحة السرير تعبتنى ياهارون 💔 تعابت قلبي عقلي روحي تعابت كل شي فيا
هارون :::::: سلمتك من التعب يعنى انى يلي مرتاح !!!
غالية :::::: وقفت انى بننزل
هارون :::::: شد يدها خليك هنى الليلة فكينا من المشاكل
غالية :::::: والله ؟ صدقت انت راهو انى مش مرتك
هارون :::::: تفكيرك فاسد 😉 قصدي ارقدي هنى وانى توا نمشي للدار الثانية
غالية ::::::: تمام نوض
هارون ::::::: خلينى معاك شوية
غالية :::::: بنرقد نوووووووووض
هارون ::::::: هههههه باهي تمام باس على رأسها وبعدها يدها 😘
غالية ::::::: قلتله بصوت عزوز راضية عليك سلم ولدي طريقك بيضة
هارون :::::::😂😂 غالية غالية انتِ والرومانسية ماتتلاقوش
غالية ::::: مش قاري فيزياء ماقلولكش الاقطاب المتشابهة تتنافر 🤷🏻‍♀️
هارون :::::: حليلي انى هههه وحدفلها بوسة في الهواء وطلع
غالية ::::::🌚 قليل الادب

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~~~

#ثاني_يوم

غالية:::: نضت الصبح بكري طلعت قبل ماينوضوا ونشوف سالمين 🤦🏻‍♀️

رشيدة :::::: اشبح اختك شن دارت
العنود :::::: معها هارون شن بدرولها
رشيدة :::::: انتِ قتيلها ؟؟؟
العنود ::::::: لالا 🌚 رن تلفوني ادريس 💔 خديت شنطي يما انى بنجيب شوية حاجات ونجي
رشيدة ::::::: باهي
العنود :::::: اتصلت بيه
ادريس ::::::: ويننننننننك
العنود :::::: قتلك عندنا مشكلة وامي عندي
ادريس ::::::: مشكلة شن احكيلي انى نحلها
العنود :::::: مش مهمة
ادريس :::::: العنود قولي الحق انتِ تتهربي مني 🤔؟
العنود :::::::لالا شن نتهرب منك نزعل راهو ادريس علاش تفكر هكي كل مافي الموضوع انه لزم نهتم باهلي
ادريس :::::: تمام نعطيك اليوم وغدوا تكوني في الشركة
العنود :::::: ان شاءالله وصكرت 😔 اوف اوف كان غلط ومعاه حب توا غلط وخوف شن درت في روحي بس 💔

~~~~~~~~~~~~~~~~~~~~~~~~~~~~~

غالية :::::: مشيت لامي والعنود قعدت للعشية العشية قلتلهم بنمشي غادي لزم نحط حد للموضوع تشربك من كل جيهة وصلت ممكن الساعة 7 دقيت دقيت الحوش فاضي ماحد فتح سألت الراجل يلي يخدم في الجنان
الراجل ::::: مافيش الا هارون في المسبح يلي في الخلف
غالية :::::: لفيت ومشيت لقيته 🙄 هارون وقت مسبح هو
هارون :::::: شن فيه ؟؟؟
غالية :::::::: قصدي صقع ومع المغرب يزيد الجو
هارون :::::: ماتخافيش عليا بنية حديد
غالية ::::::::😏 اي حديد غر طمن روحك ، وين الكل الحوش فاضي
هارون ::::::::: امي واستبرق مشوا لخالي
غالية ::::::: 😏 بيردولك جنات !!!!
هارون ::::::: ههههههه ماتخافيش وطلع
غالية:::::: حدفتله الفوطة ، وانى شن دخلني
هارون ::::::: يمسح في شعره احلفي ؟
غالية ::::::😒 خديت المفاتيح من عالطاولة نشف شعرك كويس ومشيت للحوش
هارون :::::: لحقها نحس في حرقه في حلقي
غالية::::: هه قلت انى
هارون ::::::: 😉 ندوش ونجي باهي مش نلقك طالعة وانتِ اليوم كله تلودي
غالية :::::: نتلفت يمين ويسار ونساوي في وشاحي
هارون :::::: طلع
غالية::::::😪 الحيوان منظره يهبل 🥺

~~~~~~~~~~~~~~~~~~~~~~~~~~~~~

غالية :::::::: قعمزت في الدار نسمع في صوت جمعة روح ومشي لهارون وصوتهم يهدرزو قعدت في الدار يلي لوطة اووووف بعدها روحوا امه واستبرق جايبهم موسى دوشة وهدرزه هو معاهم زعما 🤔
اتكيت عالسرير رقدت بعدها بساعتين ممكن نضت معادش فيه الصوت في الحوش اتصلت بيه
هارون :::::: غاليتي
غالية :::::: وينك
هارون :::::: في الدار تعرفي حتى دوش ماقدرتش تلوحت عالسرير نرقد وننوض شكلي مرضت
غالية :::::: اااا جد
هارون :::::: والله جيبي بنادول وتعالي
غالية :::::::: فكني امك روحت
هارون :::::::: مرتي وكان هذا
غالية :::::::: هههههه صدقت انت ، تمام شوية بس. نضت خديت حبوب وركبت بالشوية وانى نقول تي مش جايه بنحرق دمها اصلا 🤦🏻‍♀️ شن ندير توا ،، فتحت الباب 🥺 وجهك احمر
هارون :::::: اي شكله حراره
غالية :::::: وعلاش متغطي هكي مدام حراره حولت عليه الغطاء وحول حتى تشرتك
هارون ::::::: بامر دكتورة قلبي انى
غالية:::::: راهو نضربك ومانقولش مريض ههه اسكت خيرلك
هارون :::::: خدي منها الدواء ورقد
غالية :::::: رن تلفوني رديت هالعنود
العنود :::::: وينك الساعة 12 ؟؟
غالية :::::: قعدت هنى الليلة
العنود :::::: علاش
غالية :::::: نايضة بكري اليوم ماحسيت بروحي الا رقدت وفات الوقت
العنود ::::::: ياحليلي من امي قداش بنرقع
غالية:::::: هههههه
العنود ::::::: تمام تصبحي على خير
غالية :::::::: خديت فوطه من دولابة وخشيت للحمام بليتها ودرتله كمادات وهو راقد لين حسيت بحرارته نزلت

~~~~~~~~~~~~~~~~~~~~~~~~~~~~~

هارون :::::: فتح عيونه الساعة 6 كانت غالية مقابلاته راقده عالسرير مقعمزة رجلها لوطة ومتكية رأسها على لوحة السرير ويدها فيها كماده ، ابتسم وحط يده على وجهه
غالية ::::::😳 فقت مخلوعة اهاااااا
هارون :::::: خيرك 😳
غالية ::::::: رقبتي شديت رقبتي معادش اهااا
هارون :::::: نضت قعمزت وشديتها خيرك راقده هكي تشنجت اكيد
غالية :::::: ههه انعقت معادش نقدر نلفها
هارون :::::::: يحطلها في مخده اتكي هكي شويه توا ترتخه ، اصبري نديرلك كمادة ساخنه حطها علها
غالية ::::::: رقدت ، كيف حالك انت توا
هارون :::::: ههههه اهو حاصل فيك ماشيء بلاش جي قعمز جنبها حولي الوشاح وحطلها الكمادة ، درتي مره حاجه كويسه تبي نردهالك طول
غالية :::::: ههههههه
هارون :::::: خلها لين رقدت ، وناض دوش ونزل دار قهوة لروحه مع الساعة 9

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~~

العنود :::::: حهزت روحي ومشيت للشركة خشيت لادريس صباح الخير ☺️
ادويس :::::: هلا هلا ياعمري ومشي. للباب بيسكره
معمر :::::::😡 العنود !!!
العنود ::::::😳💔 معمر معمر شن جابك خيرك روحت
معمر :::::: دف ادريس بيده ! انت ادريس مديرها ؟
العنود::::: قلبي وقفت 💔
معمر ::::::: شن فيهم بينك وبينه
العنود ادريس ::::::😳

~~~~~~~~~~~~~~~~~~~~~~~~~~~~~~

غالية :::::: فتحت عيوني مالقيتش هارون نضت فتحت الباب وبنطلع بعدين رجعت ندور في تلفوني في السرير
سالمين :::::: بايته هنى 😡يلي ماتتحشميش فندق هو معادش حوش معادش عرفنا من فيه ؟؟
غالية :::::: صبح وقعمزت عالسرير
سالمين ::::: غيرت نبرة صوتها عارفه هذا كله اديري فيه عناد فيه لانى قتلك بنت الخناب ويلي تخدم في الحياش
هارون ::::: جي راكب من الدروج سمعهم 😳
سالمين :::::: شن تبي نعتذر منك وتخلي ولدي في حاله نعتذر ومن امك واختك زيادة
غالية ::::::🤨 مانبي منك شيء
سالمين :::::: كان تبيه هو راك من حين روحتي قلتي لكن سكوتك معنها ماتبيشي شن تبي بس قوليلي ، شوفي الدين عندي
غالية ::::::🤔
سالمين ::::: انى نخلصة انسيه ونعطيك حتى فلوس تعيشي بيه انتِ واختك كيف ماتبى واحسن وخلي هارون في حالة
هارون :::::😠 جي بيخش بس فيه شيء في داخله كان يبى يسمع جواب.غالية 💔
غالية :::::: وقفت قدامها علاش ماتبيش تقتنعي انى نحب ولدك وكان تعطيني 10 مليون مش مليون مش ح نسيبه المره هذه ❤️

#يتبع

لمشاهدة جميع اعمال الكاتبة : روايات صفاء

لمتابعه اخر الاخبار : القلم نيوز

 

اترك رد

زر الذهاب إلى الأعلى