رواية جنون عاشق الحلقة 23 .. الكاتبة صفاء | القلم الناجح
روايات ليبيه كاملة

رواية جنون عاشق الحلقة 23 .. الكاتبة صفاء

رواية جنون عاشق الحلقة 23

#جنون_عاشق

الحلقــــــــــ(23)ـــــــــة

معمر :::::::😡 العنود !!!
العنود ::::::😳💔 معمر معمر شن جابك خيرك روحت
معمر :::::: دف ادريس بيده ! انت ادريس مديرها ؟
العنود::::: قلبي وقفت 💔
معمر ::::::: شن فيهم بينك وبينه
العنود ادريس ::::::😳
العنود :::::: شديت في الحيط رجليا يرعشوا معادش قدرت نوقف صوتي معادش طلع
ادريس :::::: 🙄 بكل ثقة شن تقول ياراجل
معمر :::::: الشركة يلي نخدم فيها انتِ طلعت شريك فيها وله 😡
العنود ::::::😳
ادريس ::::::: واقف قدامها باهي وكان !!!
معمر ::::::: تفضل هيا وطلع تلفونه وراه الرسالة هذه وصلت البارح لتفوني
ادريس ::::::: خدي شافها (( ادريس هو يلي خدمك وهو يكون مدير مرتك وحاط عينه علها وبعدك باش يفضاله الجو )) 😳 من هذا الكلب
معمر :::::: مستحيل تكون صدفه خدمتي عندك
ادريس ::::::: خلي المراة تطلع ونتفاهموا شوفها كيف ترعش
معمر ::::::🤬 تي تكلم النم
ادريس ::::::: مرتك تعرف مرتي كانت تحنى فيها والا اشبح شن ومهدرزه على خدمتك قدامها ومرتي حبت تساعدها وطلبت منى 🤷🏻‍♂️ هذا كل الموضوع حتى خدمة مرتك هنى عن طريق مرتي
معمر ::::::: وشن قصة الرسالة الهاتف مقفل يلي بعتها
ادريس :::::: ولد حرام اكيد والا دوة نسوين غايره كيف خدمت انت ومرتك عندي الباقي شن بيكون
معمر :::::: شاف للعنود وانتِ خيرك 😤
العنود ::::::: هديت شوية ، ش شيء
ادريس ::::::: اعطها اميه والا شوفها عيب ياراجل هذه مرتك وهذه شركة محترم اطلع وأسال من تبي
معمر. ::::: في قلبه ماصدقش ميه في الميه بس ماعنداش دليل
ادريس :::::: تفضل هذا تلفوني اضرب رقم مرتك وتأكد مع انه عيب في حقها
العنود ::::: نرعش ونقول هدا خيره
معمر :::::: حط الرقم ماطلعوش رسائل ولا مكالمات ، ان شاءالله خير وطلع
العنود ::::::: طلعت وراه معمر !!
ادريس :::::::: تحول الهدوء متع لغضب مجنون اول ماطلعوا ، طلع تلفونه الثاني يحدف منه في المكالمات والرسائل وشاف للصالون لقي تلفون العنود عرف انها خلاته بالقصد فتحه وبدي يحدف منه في الرسائل بسرعة

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~~

سالمين ::::: انى نخلصة الدين انسيه ونعطيك حتى فلوس تعيشي بيه انتِ واختك كيف ماتبى واحسن وخلي هارون في حالة
هارون :::::😠 جي بيخش بس فيه شيء في داخله كان يبى يسمع جواب.غالية 💔
غالية :::::: وقفت قدامها علاش ماتبيش تقتنعي انى نحب ولدك وكان تعطيني 10 مليون مش مليون مش ح نسيبه المره هذه ❤️
سالمين :::::: لانك وحده كذابه 😡 وانى نطلعك منه الحوش هذا ويدك على رأسك
غالية ::::: ماتقصريش في يلي تقدري ادريه 😏
هارون ::::: انسحب
سالمين:::::: طلعت معصبة
غالية ::::::: كملت ندور في تلفوني لقيته وجيت
بنطلع
هارون :::::: فتح الباب غالية!
غالية :::::: وقفت قدامه وحطيت يدي على رأسه ، شن حالك توا
هارون ::::: قارن حواجبه كويس شن رقبتك انتِ
غالية :::::: جي من كسرهالي 🌚
هارون ::::::🤨 كيف !!
غالية :::::: قصدي كويسة تمام
هارون :::::: 😒 بنغير ونطلع استنى اطلعي معاي خل نحزها ونفتكه
غالية ::::::💔😳 شن هي
هارون :::::: نمشوا للمحكمة مش تبى تطلقي ؟
غالية ::::::😳
هارون ::::: هذيكة تتصل طلقني انتِ طلقني امي تقول طلقها 😠 نمشي توا نطلقكم الزوز ونستريح من نفخ هالرأس
غالية::::::🥺💔 تلفتت بنطلع
هارون :::::: جبدها من يدها ماتبى تقولي شيء
غالية ::::::: قعدت نشوف للارض ونفك في يدي منه ش شن بنقول 💔
هارون ::::: انك تحبينى مثلا
غالية ::::::: شفتله فوق وعيوني في عيونه ، وهزيت برأسي بمعنى ايه
هارون ::::: شد وجهه بين يديه توا تمشي تجهزي روحك نزل يديه مشاهم على ظهرها لين وصل خصرها جبدها قربها ليه ، ونطلعوا نفطروا في مكان هادي ونهدرزو
غالية :::::: نأشر بيديه على يديه بنتكلم نحرك في شفايفي والكلام ماباش يطلع 🤦🏻‍♀️
هارون ::::: شن ؟
غالية ::::::: قتله بصوت دوب طالع يديك
هارون ::::: هههه وخر تمام هه
غالية :::::: فتحت الباب ونزلت 😍
استبرق ::::::: صباح الخير 😒
غالية :::::: صباح النور 😊 ، تبي تقولي حاجه
استبرق ::::::: شن بنقول !!! مقعمزه بينا ودايره روحك صاحبتنا وفي الاخير خديتي راجلها
غالية ::::::: انتِ عارفة انه جنات ماكنتش تبي هارون وكانت تبي تسيبه مدريش الجو عليا توا 😏 وخشيت للدار خديت دوش ولميت باقي حاجات يلي فيها وجهزت روحي وطلعت
هارون :::::: كيف كنت نازل بنشوفك واتية والا لا
غالية ::::::: عندي شنطة نبي نرفعها لحوش العنود توصلني بعدين نحطها ؟
هارون ::::::: شد يدها ومشي بيها ساهل ساهل فوتي توا كل شيء هيا
غالية :::::😊 تمام

~~~~~~~~~~~~~~~~~~~~~~~~~~~~~

معمر ::::: اول ماخش معها لمكتبها جبدها وشد يدها بقوة ورفع يده الثانية 👋🏻 وضربها كف
العنود ::::::😳💔
معمر ::::::: اقسم بالله وكان نتأكد الا لما نقتلك
العنود ::::::: 😨 انى شن درت والله مادرت حاجه خيرك حتى الرسالة يلي جاتك مافيها شيء عليا
معمر :::::: وهذا يلي شادني عليك قاعد 😡 هاتي تلفونك
العنود :::::: مشيت على اساس ندور في الشنطة وانى نرعش
معمر ::::::: هياااااااااا😡
العنود :::::: ملقتاش شوره طاح منى غادي
معمر ::::::: اطلعي بسرعه ثانية وحده وتكوني هنى انتِ وهو
العنود :::::: طلعت نجري فتح مكتب ادريس 😢 حدفت حدفت يلي فيه 😰
ادريس :::::::😡 يشوف لوجهة مد يده عليك ؟؟؟؟ مد يده عليك ؟؟؟؟
العنود :::::: غر شن درت وين التلفون
ادريس ::::::: وهو 😤 مسحت ومدهولها
العنود :::::: خديته وطلعت نجري
معمر :::::::: خداه وطلع
العنود ::::::: ناخد في نفس بسرعة وشفت من الروشن لقيته ركب سيارته وطلع مشيت لادريس طول 😰💔 كان يلقا شيء كان يعرف
ادريس :::::: انى نوريه الكلب انى كيف يمد يده عليك
العنود ::::: وين شفته هكي بديت نهدي فيه 😳 خلاص ماصار شيء اهدي
ادريس :::::: حضنها كنت نموت ولا نخليه يمس شعره منك
العنود :::::: انى ماخفتش لانك معاي ❤️
ادريس :::::::: يحضن فيها بقوى انى مستحيل نسيبك
العنود ::::::: بعدت عليه ادريس ياسرنا رعشة اليوم 💔
ادريس ::::::: شن قصدك 😳
العنود ::::::: يلي فهمتا هذا تحدير بسيط وعرض على شن ممكن يصير
ادريس :::::: مافيش غير فيصل الكلب يديرها
العنود ::::::: من قال مرات هو مرات اي موظف ثاني حنى بدينا مش حدرين هلبا في الشركة مرات حد من جيران حوشك شافنا مرات حد من جيراني وصلتنى اكثر من مره ماتعرفش من
ادريس :::::::: نحاسبهم نفر نفر لو اطلب الامر
العنود::::::😏 خلي نحاسبوا روحنا قبل الناس 💔 ارجوك احدف الفيديو لاقدر الله يطيح في يد حد. شوف هذه رسالة شن دارت
ادريس ::::::: 😠 خيرك انتِ من يوم عرفتي بالفديو وانتِ حالتك حاله
العنود ::::::: 😡 بصوت عالي لانى نحس فيك بتهددني بيه في اي لحظه لانى معادش مرتاحة معادش قادره نقول لا زي قبل بديت مجبوره نرضيك مجبوره مانعصبكش مجبوره نسايرك
ادريس:::::: مش مجبورة على شيء
العنود :::::: معنها احدفه وطلعت وخليته 💔

~~~~~~~~~~~~~~~~~~~~~~~~~~~

غالية :::::: طول الطريق وهو شاد يدي 😍 الله يهبل كيف رايق وصلنا مطعم نزلنا وطلبنا فطور
هارون :::::: غالية انى نحبك ههههه عارفه الاعتراف رقم مليون بس حبيت نقولك انى حبك ونبي تكوني معاي طول العمر ، توا بنطلع من هنى بنمشي نطلق جنات وورقتها قبل الطلاق الشفوي المره هده ههههه
غالية::::: 😶
هارون ::::::: قولي حاجه ؟
غالية ::::::: مانقدرش نعطي رأيي في الموضوع هذا
هارون ::::: تمام اساس هي اتصلت الصبح وقالت طلقني لانه هي بوها مصر ترجع وانى قلتلها تمام يعنى انى وهيا متفقين
غالية :::::: باهي
هارون ::::::: مد يده شد يدها ايه وخل تتم هالقصة ونبدوا حياتنا
غالية :::::::😊
هارون :::::: نتزوجوا اليوم 🥺
غالية ::::::😳 ك كي كيف؟!!!!!!!! اليوم !
هارون :::::: ايه انى نحبك وانتِ تحبينى علاش نضيعوا في الوقت
غالية ::::::: هارون صح انى نحبك ونحبك هلباااااا زيادة لكن هذا المهم انه نتفاهموا ونكونوا مع بعض ، والزوج بالشوية يصير اساسا اهلك مش موفقين
هارون :::::: ناض قعمز في الكرسي يلي جنبها شن تفرق اهلي يحسابونا متزوجين توا يعنى مش ح يتغير عندهم شيء 🥺 شد يدها بين يديه وحطها على صدره غالية نبيك ليا ❤️ مليت من حسام وجنات وفارس وامك وامي ، معادش نبي مشاكل واحتمالات نبي نتأكد انك ليا ومعاي بعدها حتى فيه مشاكل مش مهم عندي لانى نعرف ان نهاية كل يوم ح ناخدك في حضني ونرقد وننسى كل شيء
غالية ::::::🥺 بصراحة مانعرفش نرد على الكلام الحلو هذا بس نعرف انى نحبك ونبي نكون معاك
هارون :::::معنها نوضي 😍 نحطك في المصور ونمشي نكمل موضوع جنات ونجي ناخدك ونهدرزو مع امك
غالية :::::: تمام
هارون :::::: ههههه على فكره تمام وحاضر والهدوء يلي في صوتك غريب عليا ههههه حاسس مش انتِ غالية
غالية :::::: ليا ساعة 🌚 وانى خايفة نقول كلمة تخرب الجو الرومانسي هذا هههه
هارون :::::: انى نحبك كيف ماانتِ

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~~

العنود ::::::: روحت للحوش لقيت معمر قبلي 💔
معمر ::::::: تعالي نبيك شوية
العنود :::::: عند اذنك يما وخشيت
معمر ::::::: مدلها تلفونها وباس رأسها حقك عليا
العنود :::::::😳💔
معمر :::::: انتِ ماجيتي في شيء هو يلي قالوا مش كويس لهذا سيبى الخدمة عنده انى مانبيش نقعد في الشك والمشاكل هذه
العنود ::::::: وو وانت
معمر ::::::: انى فات فيه ومشيت بنكمل هالاسبوعين وبنسيب لا نبوا منه عمل لا شيء هو والا يلي باعت الرسالة
العنود ::::::: تمام

غالية :::::: دقيت عالباب
رشيدة ::::: فتحت طيب فيك روحتي
غالية ::::::🌚 معاي هارون
هارون :::::: السلام عليكم
رشيدة ::::::: وعليكم السلام تفضل
هارون ::::::: خش ،،. نهدرزو شوية خالي ؟
رشيدة ::::::: تفضل
هارون :::::::: غالية ديريلنا قهوة 🌚
غالية :::::::🙄 والله
هارون ::::::: ههههه كلام كبار
رشيدة :::::: امشي غالية
غالية :::::::😒 مشيت وخليتهم
معمر ::::::: طلع من الدار هارون ؟ 🤨
هارون :::::: كيف حالك ياعديل
معمر :::::: عديل ؟؟؟
هارون ::::::: هههههه تعاله
معمر ::::::: قعمز معاهم

العنود ::::::: مشت لغالية في المطبخ شن صاير ؟
غالية :::::: 🤷🏻‍♀️ بنتزوجوا ثاني
العنود ::::: لعب هو
غالية :::::: والله ماعارفه مع امه واهله كيف بيصير لكن نحبه ❤️
العنود :::::: يلا طز فيهم شوفي. امل واخده موسى تقول مش ولدهم مش مجبره بيهم بعدين
غالية:::::: يستر الله درت قهوة وطلعت وبعد نقاش طويل عريض استخدم فيه هارون كل قدراته في الاقناع قدر يخلي معمر وامي يوافقوا على انه نقروا فاتحة غدوا لانى اساس بالقانون قاعده مرته 🤷🏻‍♀️

~~~~~~~~~~~~~~~~~~~~~~~~~~~~

غالية :::::: مشينا للمحكمة وبعد قصة طويلة عريضة كيف يتزوج مرته مره ثانية جابولنا شيخ قري الفاتحة ❤️ والمره هده معمر هو وكيلي كان
هارون ::::::: خالتي رشيدة تسمحيلنا توا
رشيدة :::::: ربي يسهللكم رد بالك المره هذه تصير حاجه نبعتها بيدي للمغرب وماعاد تشوفها
هارون :::::: غالية في عيوني
رشيدة ::::::: ربي يحفظكم
العنود :::::: سلمت على غالية وطلعت انى وامي مع معمر
معمر ::::::: كلمتيهم وقلتيلهم بنسيب ؟؟؟
العنود ::::::: لالا توا نقوللهم اليوم
معمر :::::: تمام بنحطكم في الحوش ونمشي توا
العنود :::::: نفكر في ادريس شن بيقول 💔

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~~~

غالية :::::: هارون شن نديروا هنى
هارون ::::::: تعالي بس
غالية :::::::: جينا للقرية السياحية ، وخدي نفس الشالي متع هذكة اليوم 💔
هارون ::::::: فتح الباب خشي
غالية ::::::: خشيت كان فيه طاولة دائرية علها غطاء ابيض شمعدان فضي غدي
شفت فوق السرير قفطان ابيض يشبه هلبا القفطان يلي لبستا يومها ❤️ شفت تحت 🤭😳 هارون
هارون :::::: ههه هي كندرتك ايه خليتها هنى يومها لما طلعتي قرب خدها في حضنه مانقدرش نرد الوقت للخلف لكن نبي نسيك يلي عشناه يومها نبي نعاود كل شيء من جديد كانه ماصارش
غالية ::::::😍 حبيبي
هارون :::::: 😍 شن شن قلتي ؟؟؟؟
غالية ::::::😊 خلاااااص نتحشم ماتركزش على كل شيء نقوله
هارون :::::: قرب وجهه من وجهها ، ماهو ماتعرفيش قداش ليا خاطري نسمعها
غالية :::::: شفت لعيونه يلي يدوبوا قلتله تاني بهمس حبيبي
هارون :::::::: باسها بهدوء ووخر خودي راحتك انى شوية ونجي
غالية ::::::: ياربي بنطير من الفرحة مش مصدقة يلي صاير معاي توا ❤️❤️ جهزت روحي وقعمزت للحظه خفت يخش عليا يدير زي المره يلي فاتت 💔
هارون :::::: شوية وفتح الباب 😍 ياعمري تهبلي
غالية :::::: 🤷🏻‍♀️ شن تغير فيه وانى ماحطيتش حتى نقطة مكياج 😔 لانك متحباش
هارون :::::: ايه هكي احلا انى نموت فيك هكي وتوا شوفي هذا وقوليلي يعجبك او لا
غالية :::::: شن ؟
هارون ::::::: ماجبتلكش كسوه وجو لكن هذه حاجه بسيطة
غالية ::::::: 😍 فتحت الباكوا كان فيه عقد ذهب ابيض يهبل ، يسلموا هارون بجد مفكر في كل شيء امته هذا هو امس بس قرارنا
هارون ::::::: 😍 قعمز عالسرير وقعمزها على رجله حطلها شعرها على جنب وفتح العقد يلبس فيها فيه ،،،، امس لليوم فيه 24 ساعة نقدر نبني فيهم دنيا ليك ❤️، غير انى مقدرتش نرقد من كثر ماني مش مصدق وصكر العقد وباسلها رقبتها
غالية :::::: وقفت ☺️ نتعشوا
هارون :::::: نتعشوا علاش لا لكن انى بنوكلك بيدي
غالية :::::::🙄🤦🏻‍♀️ هارون ورومانسية هارون ، ماخلنيش نتعشى على راحتي قعد يناشب فيه مره يوكلني مره يبوسني وبعدها اطور الموضوع و🚫

~~~~~~~~~~~~~~~~~~~~~~~~~~~~~

#ثاني_يوم

العنود ::::::: نلف في الحوش وامي قاعده راقده دق الباب خديت ملاية الصلاة لبستها وفتحت 😳 اد … ادريس !!! نهار ابيض شن ادير هنى
ادريس :::::::😡 لما مخلتيني زي الكلب مش معدله عليا شن تبى ندير
العنود :::::::😳اشششش امي في الحوش انزل انزل شويه وننزلك
ادريس :::::: نركب ثاني لو مانزلتيش
العنود ::::::: باهي دفيته وصكرت لبست عبايتي بسرعة ونزلت وراه ، ركبت معاه في السيارة
ادريس :::::: حرك وطلع

هارون ::::::: يبوس في غالية بالشوية
غالية :::::::فتحت عيوني 😳 شن ادير
هارون :::::: ههههه نبوس فيك 🤷🏻‍♂️
غالية :::::: عالصبح !!! وقعدت نتكسل
هارون ::::: ههههه امممم 🤨 نسيت الهانم سيبت اول حبيب فكرة اديره في حياتها لانه قاللها صبحي عليا
غالية ::::::😳 نضت قعمزت كيف عرفت
هارون :::::: نعرف كل شيء انى وناض وقف
غالية :::::: نضت وراه بالله عليك هارون هكي بنخاف
هارون :::::: 😉 وهذا المطلوب ، على فكرة منظرك مش عادي وانتِ لابسه التشرت والشورت متعي ههههه
غالية ::::::😒 اي نهبل رايحة زي عبدو ولد جيرانه لما يخنب حوايج خوه على اساس طارح 🤦🏻‍♀️ مفكر في كل شيء الا انك تجيب حوايجي
هارون ::::::: هههههه ماعندنا مانديروا بيهم غر انتِ ربي يهديك
غالية ::::::: ههههه نبي ندوش ونفطر جعت
هارون :::::: تمام هيا دوشي ونطلعوا

ادريس ::::::: وصل الحوش متع يومها درس وشافلها انزلي 😤
العنود :::::: نزلت خشيت وراه
ادريس :::::: وينك وييينك 😡 اختفيتي وتلفونك مصكر تعرفي قداش فكرت مره انه ممكن دارلك شيء شن صارلك فكرت نمشي ندق الباب ونطلع من حوشك ياقاتل يامقتول
العنود :::::: اهدي بس هو يوم وصكرت تلفوني لانى خفت تتصل ويكبر الموضوع
واصلا كانت فاتحة اختى ومافضيتش اليوم كنت بنتصل
ادريس ::::::: والله !!!!
العنود ::::: معمر قالي سيبي العمل
ادريس :::::: وبتسيبي ؟؟؟
العنود ::::::😳 نقولك راجلي قالي معادش فيه خدمه شن مفروض نقول او ندير
ادريس ::::::: شدها من فمها بقوى قريب يكسرهولها معادش تقولها 😡 معااااادش تقولي راجلي
العنود :::::: 😠 دفيته ، وهو راجلي شن كذب وطلعت وخبط الباب مش عارفه بشن متشجعه ؟؟

⭐️روايــــــــــــات صفــــــــــــــــــاء ⭐️

~~~~~~~~~~~~~~~~~~~~~~~~~~~~~

غالية :::::: كان اليوم من احلا ايام حياتي ❤️❤️ ادهورنا خديت شوية حوايج لروحي هارون يده مافارقتش يدي تقول خايف نريح منه وانى شاده لساني بالسيف ههههه مانبيش نخرب الرومانسية يلي حنى فيها
هارون :::::: ها حبي خيرك جوك تغير
غالية ::::::: اووووف ياريت مانمشوش للحوش اليوم
هارون ::::: هذا حوشي وهاذم اهلي ولو قالوا شيء ناخدك ونسكنوا بروحنا بس مانبهاش تجي منى
غالية :::::: امك كيف سامعة بطلاق جنات اول امس 💔 مرات ادير موضوع
هارون ::::: باس يدها انتِ اركبي للدار طول وانى نهدرز معها اصلا تلفوني من امس مصكر مانبيش تكبر القصة اكثر من هكي خل نشوفها
غالية ::::: تمام وفعلا نزلنا انى قلت السلام عليكم ماحد رد عليا ركبت فوق طول ،، لكن فضولي بيقتلني تسحبت عالدروج نتصنت شن بيهدرزو

~~~~~~~~~~~~~~~~~~~~~~~~~~~~

العنود :::::: فتحت تلفوني رسائل من ادريس وراء بعض انى قاعد في الحوش نستنى فيك تعالي انى نحبك تعالي يلي تبيه يصير ووووو صكرته ثاني وانى في قلبي خوف يتهور ويبعت الفيديو لمعمر

سالمين ::::: طلقتها 😤 طلقت بنت خالك
هارون ::::::: يما افهمي جنات لاهي تبينى ولا انى نبها انتٍ علاش مكبره الموضوع
سالمين ::::: بتخلي المشاكل بينى وبين خوي
هارون :::::: مشاكل شن ياودي!! الطلاق يصير عادي هذا نصيب
سالمين::::: برا ردها سلم ولدي
هارون ::::::😳 شن تقولي يما
سالمين :::::. ردها مع هذه المهم ردها
استبرق :::::: تسمع وساكته
هارون :::::: يما انى ماعنديش قدره انى ناخد زوز نسوين
سالمين :::::: علاش ماعندكش قدره ماشاءالله عليك صغير وصحيح
هارون :::::::: هههههههههه 😂😂 خيرك يما وين مشي دماغك خلاطينا قدام بنتك ، قصدي مانبيش بندير زوز واعدل وووو انى نبي مرتي ذيما انى وياها هي ماعندهاش غيري وانى ماعنديش غيرها ولف بيمشي وهو يضحك ههه
سالمين ::::::😡 جنازتي تحرم عليك والحوش تقعد هي فيه نطلع انى منه كان ماتردش جنات ونغضب عليك ليوم الدين
غالية ::::::😳🤭
هارون :::::::🤨 تتكلمي بجد هكي بديري في ولدك على خاطر بنت خوك ؟؟
سالمين::::::😒
هارون :::::: ركب وخلها
غالية ::::::: خشيت نجري للدار وانى مصدومة 😳 ونفكر شن بيصير توا
هارون :::::: فتح الباب وجي حضنها من الخلف اشتقتلك
غالية ::::::: لفيت بين يديه 🥺
هارون :::::: قرب بيبوسها
غالية :::::: هارون 💔 لو بترضي امك وماتبهاش تغضب عليك حقك طبعا تبى ترد جنات رد لكن انى مانقعدش مع شريكة ، يا ليا بروحي يا لا 💔 نعفس على قلبي ونسيبك
هارون ::::: باس خشمها وخدها تتصنتي علينا هههه
غالية :::::: تكلم فيك رد 🥺💔
هارون ::::: مدامك سمعتي شن تبينى نقول وقعد يقدم وهي توخر لين قعمزت عالسرير ،، بعدين سمعتي امي هههههه قالت صحيح وصغير عندك قدره
غالية :::::: هههههه حول يابارد
هارون :::::: وين بنحول و🚫

~~~~~~~~~~~~~~~~~~~~~~~~~~~~~

#ثاني_يوم

رشيدة ::::: انى بنطلع باهي
العنود ::::: وين ماشية
رشيدة :::::: عندي حوش بنظفه اليوم منعطلش ان شاءالله
العنود ::::: في حفظ الله
رشيدة ::::: طلعت
العنود :::::: قلبي مقبوض من اول مانضت مشيت قعمزت عالروشن شفت امي ركبت افيكو 💔 امته بنرتاحوا من البهدلة بس مشيت فتحت تلفوني ورجعت قعمزت

⭐️روايــــــــــــات صفــــــــــــــــــاء ⭐️

غالية:::::: نضت نسمع في صوت المية في الحمام شفت تلفوني يضوي ، جنات 🙄 الو
جنات :::::: غالية في الفيلا انتِ ؟
غالية :::::: ايه شن فيه
جنات ::::::: انى كنت عندكم هدرزت مع عمتي وطلعت توا نبيك تطلعي لرأس الشارع بسرعة
غالية ::::::😳 شن فيه
جنات :::::: غالية بنروح تعالي بسرعة
غالية :::::: تمام لحظه بس وقفت بسرعة لبست وطلعت وصلت رأس الشارع قعدت نشوف يمين ويسار
جنات ::::: بيبت من سيارة
غالية :::::: جنات
جنات ::::: لصاحبتها خلينا بروحنا شوية
غالية ::::: نزلت البنت يلي تسوق وركبت مكانها خوفتينى شن فيه ؟؟؟
جنات :::::: كنت عند عمتي وخليتها اطلع موضوع انها تردني من رأسها
غالية ::::::: كيف !!!
جنات ::::::: حسيت انه فيه شيء بينها وبين بابا ماحد يعرفه وبابا يهدد فيها بيه نزلت برنامج تسجيل في التلفون متع بابا وبديت نستنى فيه يهددها وبين هلبا مكالمات نطق السر يلي بينهم البارح
غالية ::::::😳 شن هو
جنات :::::: قبل مانبيش حد يعرف يعنى المهم حليت موضوعي وبنفوت بس بعدها مقدرتش السر هذا فيه برأت بوك غالية
غالية :::::::😳😳 ب بجد 😭 كنت عارفه كنت عارفه
جنات :::::: هذا الفلاش يلي فيه المكالمة
غالية :::::::: شكرا بجد شكر 😍😍
جنات ::::: بس لحظه السر هذا في نفس الوقت يلي بيعلن فيه برأت بوك بيدمر هارون
غالية ::::::😳

~~~~~~~~~~~~~~~~~~~~~~~~~~~~

العنود :::::: رن تلفوني رقم غريب 😤 اكيد ادريس الو
راجل ::::: السلام عليكم
العنود :::::: وعليكم السلام
راجل ::::::: اختى شن يكون ليك صاحب الرقم لقيناك اخر مكالمة في التلفون هذا
العنود :::::::💔😨 ع علاش شن فيه
راجل ::::::: الدنيا والدوام لله الباقية في حياتك
العنود ::::::😳

#يتبع

توقعاتكم ؟؟؟؟؟؟
تأخرت لانه كان عندي ضيوف اليوم ❤️

لمشاهدة جميع اعمال الكاتبة : روايات صفاء

لمتابعه اخر الاخبار : القلم نيوز

 

اترك رد

زر الذهاب إلى الأعلى