رواية حكايه فاطمه الحلقة 12 .. الكاتبة زهور جمال الدين | القلم الناجح
روايات ليبيه كاملة

رواية حكايه فاطمه الحلقة 12 .. الكاتبة زهور جمال الدين

رواية حكايه فاطمه الحلقة 12 .. الكاتبة زهور جمال الدين

فاطمه ومراد فى سريرهم

متلفتين لبعض

وكل واحد يشبح للثانى

حط مراد يده اليمين على خدها

-مراد : تحبينى

فاطمه ابتسمت

-مراد : جاوبينى.. تحبينى

-فاطمه : نحبك ايه

-مراد : احلفى انك ماتخلى حد يخش مابيناتنا

-فاطمه : مستحيل انخلى حد يفرق بينى وبينك

-مراد : احلفى انك ماتسيبينى

-فاطمه خدت يده وباست كفه : مستحيل نسيبك انا روحى معلقه فيك

-مراد : كبرتى فى عينى اليوم كيف قلتيلى ومادسيتيش عليا

-فاطمه : وانت كبرت فى عينى كيف امتصيت غضبى وسايرتنى وكلمتنى بالشوى

-مراد : فى علم النفس يقولك لازم واحد من الاثنين يتنازل ويهدا فى وقت الخصام ..

بيش الثانى يطلع كل اللى فى قلبه ويهدا ويرتاح

” شفتو وسمعتو بودانكم شن قال ولا? ?? ”

-فاطمة : نحبك

-مراد رقدها على يده وضمها : ربي يخليك ليا ومايحرمنى منك يااارب

-فاطمه : بس منكدبش عليك انا عندى شروط

-مراد : انتى تؤمرى وتشرطى زى ماتبى ..وانا عليا نقول لبيك

-فاطمه : اول شى تبطل الشرب والسكير

-مراد : باهى بس وحدة وحدة عليا نبطله

-فاطمه : لا تقدر تبطله فى مرة وحدة شنو هوا مخدرات بيش متقدرش تسيبها

-مراد يضحك : هههه صار تعرفى حتى المخدرات انتى.. مالاك مجرمه

-فاطمه : نعرفهم وشن تحسابنى جاهلة

-مراد : لا نحسابك حبيبتى

فاطمه تضحك

-مراد : حاضر حبيبتى بالشوى حنسيبه

-فاطمه : ولازم نعرف شن تخدم ..قرشك حلال والا لا …

منشوفش فيك تطلع

-مراد : حاضر من عيونى اصلا خلاص انتى توة فى عيونى مرتى حلالى ..

لازم نقولك على شغلى وكل امورى ونتناقشو بالهدوء واللى مايرضيكش انا نبدله

-دخلت راسها فى صدره: خواتك ماكدبوش لما قالو عليك حنين

-مراد : اسمعى حبيبتى .. انا رومنسى هلبا ..وهادى .. وكان حبيت تاخدى عيونى

لكن لو كرهت مستحيل مزال نكلمك او تلقينى

-فاطمه : وامتى تكره

-مراد : لما نحس بالخونه

سكتت فاطمه .. فكرت شوى

-فاطمه : احييه تصدق حسيتها.. وتخايلتها ..ووك عليا ماحرها الخونه

-مراد حضنها : اللى ينخان ..مايلتامش فى اللى يديره

-فاطمه : وااااك على هالسيرة عالصبح

-مراد : باهى خلى نغيرو السيرة .. بعتالى فالليل عرس صاحبى

ونبى نمشى انا وياك ..شن رايك

-فاطمه : هما مسلمين

-مراد : ايه مسلمين

-فاطمه : راهو بنمشى بحجابى

-مراد : طبعا بحجابك العرس مختلط

-فاطمه: حيه عليك والله مانقدر نقعمز وسط رجالة ونساوين مخلطين

-مراد : انا معاك ياعمرى ومش حنسيب يدك بكل

-فاطمه : مفيش سكير والامور هادى

-مراد : لا مفيش ..ولو فى نروحو قبل ما يبدو

فاطمه : باهى مدام بحجابى نمشى عادى

-مراد : نحبك يا عمرى

-فاطمه : نممموت فيك

وقعدو فى حضن بعض ورقدو للصبح

_________________________

الصبح فاطمه فاقت متاخر قريب صلاة الضحى فاتت عليها

ضمت حوستها فالحوش هوا ماهناك حوسه نشفت الصاله وسيقت الحمام وخشت للمطبخ

طيب حاجه جديدة كيف طالعه وقتها اسمها مقلوبة بالرز …

قلت الخضرة اللى بديرها معاها وطبخت الدجاج وتكمت الامور وحطتها عالنار

وقالت ان المقلوبة لازم تتكل سخونه خلى نمشى انوض مراد

نوضاته الساعه 3 وقعدت شادة فيه ينوض …

-مراد : مش جيعان وراس فطومه خلينى نرقد

-فاطمه : باهى انا بنمشى للجامع كيف توة

-مراد فتح عيونه : الساعه قداش بتمشى

-فاطمه : توة الساعه 4

-مراد : باهى اهو بنوض

ناض مراد وروق نفسه ولقى الغدى واتى قدامه

قعمز يتغدا هوا وياها

-مراد : تعرفى زمان انوض من النوم نبدا تعبان وكايدنى نطلع …

تصدقى نقعد جيعان ومانلقى حتى شن ناكل

-تنحنحت فاطمه : سامحنى هوا مفيش داعى لدكر الماضى .. لكن مش كانت نادية ساكنه معاك

-مراد : تى من نادية كانها مراءة رانى تزوجتها ..حتى سندوتش دحى متعرفش اديره

-فاطمة: باهى كيف كنت دايرر

-مراد : زمان قبل مانتعرف على نادية كانت ابله حياة مرت عمى زهير مرة مرة تنزلى فى حاجه

-فاطمه قامت راسها باستغراب: زهير !!

-مراد : متستغربيش .. زهير كنت زى ولده اول ماجيت لامريكا

-فاطمه: وبعتالى شن صار ليش تبدل هكى

-مراد : من تحت راس نادية .. ايكشخ علينا كيف ساكنين مع بعضنا هكى من غير زواج

نادية تكنطت من عراكه .. ضراته فى شغله

ومن يومها تقاطعنا

-فاطمه : صار هدا علاش واخد موقف منك هوا

-مراد : دارتله عملة واتهموه بالسرقه… وقريب مشى فيها كان مش من معارف اهل مرته

-فاطمه : وانت كنت متفق معاها

-مراد : نشهد بالله مانندرى عليها فاللى بديرة كله..ولا عندى علم بيه

-فاطمه : يلا تندكر وماتنعاد

-مراد : جى دورى انا فالسؤال اللى قلتلك امس بنسالهولك

-فاطمه : اسأل

-مراد : انتى قلتيلى انت تعرف انك هكى ..وبوك يعرف انك هكى

انتى من قالك ان بوى يعرف ..كيف عرفتى

-فاطمه : من نفس الشخص اللى تحكى عليه انت

-مراد : من تقصدى

-فاطمه : زهير جارك

-مراد : كيف

-فاطمه : خايفه نقولك وتصير مشكلة

-مراد تعصب: مش حيصير شى غير احكيلى

-فاطمه : زهير قالى انه صورك وابعت صورك لبوك ..وقاله تعال انقد ولدك

-مراد مستغرب : معقولة

-فاطمه تهدى فالموقف : بس نشهد بالله ان للقطه هادى تنحسبله ..مش تنحسب عليه

-مراد سكت وواطى راسه : مش عارف شن نقولك

-فاطمه: انت مش حاس ان حياتك تبدلت للافضل

-مراد : بصراحه هيا تبدلت للافضل ..

-فاطمه : معناها تحسبله مش تنحسب عليه

مراد ساكت

-فاطمه : قالى انهم دورو حتى رقم بوى بيش يكلموه ويقولوله متبعتش بنتك لكن محصلوشى

-مراد : الحمدلله انهم محصلوشى

فاطمه تضحك…

-مراد : يلا ربي يسامحه زهير.. القصه جت معاى كنهدا راهو وريته ???

-فاطمه : نبيك تحكيلى عن شغلك

-مراد : حاضر من عيونى ..انتى توة معش وقت عليك.. انوض انوصلك للجامع …

وبعد نروحو نحكو

-فاطمه : وانت وين بتمشى

-مراد : بناخد هدية للعريس ولا نسيتى يا قطوسة

-فاطمه : انت متاكد مفيش شرب ورقص

-مراد : لا فى ..بس احنا بادن الله انروحو قبل ما يبدو فالاحتفال والشرب زى ماقلتلك

-فاطمه : تمام نحاول انروح قبل المغرب ..بيش تلقانى جاهزة

-مراد : توة عرفت انا ليش العائلات يحبو الغدى ..الهدرزة الطايبة كلها فيه

فاطمه ضحكت : صحيحتين

-مراد : نحبك

-فاطمه: وانا نحبك

وناضت رفعت السفرة للمطبخ

-خش مراد للمطبخ : بري وتى روحك تو نغسلهم انا

-فاطمه : لا والله ماصارت

-مراد : الحياة هنايا فى امريكا تعاون ..بري البسى

خشت فاطمه لدارها غيرت جلابيتها

وشطف مراد الماعين

وطلعو مشو للجامع

رواية حكايه فاطمه الحلقة 12 .. الكاتبة زهور جمال الدين

مشت فاطمة للجامع

خشت لفصلها لقت الصغار مقعمزين يراجو فيها

جاها الشيخ قحطان وجابلها زوز ولا

-قحطان: هاديلا اثنين شباب تؤام عمرهم 7 سنين قلنا نضيفهم عندك لان فصلك الحين بادى

-فاطمه : مرحبتين بيهم ..

وشبحتلهم بحنان .. تعالو

خشو الصغيويرة قعمزو مع الصغار

جت اختهم بتكلم فاطمه

-روعه : اهلين اختى انا روعه اخت محمد ومحمود

-فاطمه : بالجودة بيك اختى

-روعة: اعطينى الاحكام اللى فاتتهم فى ورقه تو نقريهالهم انا فالحوش

-فاطمة: حاضر بس نكمل الحصه ونفضى ونكتبهملك بادن الله

طبعا لا فاطمه عرفت روعه ..ولا روعه تعرف ان فاطمة جارتهم

طلعت روعه ومتلفته لخوتها تقوللهم باى

مش شايفه قدامها

وتخبط فى واحد واقف ماشافتاش

قريب طاحت .. شدها من يدها مخلاهاش اطيح

وهوا فى قولت استغفر الله العظيم

-عبدالعليم :افتحى عيونك مرة كويس مرة ثانية يا بنتى

-روعه : انت ليبي

عبدالعليم ماردش عليها

ومشى فى حاله

رجعت روعه للفاطمه: يا شيخه ممكن تاخدينى معاكن مدامكم كيف باديين ..

نبى نقرا هنايا فالجامع

-فاطمه : انا عندى الاطفال بس ..بري للشيخ قحطان السعودى ..

او الشيخ عبدالعليم الليبي.. واشرت فاطمه على نفس الشخص اللى خبطت فيه روعه

-روعه : هوا اسمه عبدالعليم

ومشت روعه للشيخ عبدالعليم

-روعه : السلام عليكم يا شيخ

-عبدالعليم مواطى راسه : اهلا بنتى

-روعة: انا اللى خبطت فيك توة يا شيخ

-الشيخ عبدالعليم ضحك منغير مايقيم راسه: وشن تبى يلى خبطى فيا توة

-روعة : نبى نقرا فالجامع ..وبالتحديد عندك

-عبدالعليم منغير ما يشبحلها : انا نقري فى ولاد بس ..
بري للشيخه نورية البحرينيه تقري فى بنات فى عمرم

-روعه : حاضر

وفى خاطرها المهم نقعد معاك فى نفس المكان

روعة بنوته حلوة هلبا وعيونها ملونات ازرق .. تقرا فى ثالث ثانوى ..

??????

وكملت فاطمه حصتها ..

وطلعت روحت للحوش بروحها مقعدتش تراجى فى مراد لانها عارفته مشغول

وصلت للشقه خشت لدار النوم

طلعت ملابسها …لقت لبسه محتشمه عالوردى

والحطه متاعها نازلة على كتافها ومستورة هلبا

قررت انها تلبسها

وبالفعل لبستها وتكمت حجابها

وروح مراد عجباته هلبا لبستها

-فاطمه : شنو حلوة

-مراد : القالب غالب يا عمرى

وادن المغرب

صلو مراد وفاطمه جماعه وطلعو مشو للعرس

_______________________

الحلقه الجايه نحكو عالعرس…

ومع من بيتلاقو فيه

ومراد شن يشتغل زعما وهوا 24 ساعه راقد فالحوش

غدوة نكملو

نحبكم

رواية حكايه فاطمه الحلقة 12 .. الكاتبة زهور جمال الدين

لمتابعه جميع اعمال الكاتبة: روايات زهور جمال الدين

لمتابعه اهم واخر الاخبار : القلم نيوز

اترك رد

زر الذهاب إلى الأعلى