رواية قضية شرف الحلقة الثالثة 3 للكاتبة زهور جمال الدين كاملة | القلم الناجح
روايات ليبيه كاملة

رواية قضية شرف الحلقة الثالثة 3 للكاتبة زهور جمال الدين كاملة

رواية قضية شرف الحلقة الثالثة 3 للكاتبة زهور جمال الدين كاملة

#قضية_شرف
.

🌷🌹بقلم زهور جمال الدين 🌹🌷
.
.
🍁الحلقه الثالثه🍁

.
.قرب العرس ..والعروس تجرى والعريس ولا كأنه هنايا

امينه مقعمزة فى دارها و شادة قفطان امها الجديد تبى تنقصلها فى طوله …حاطه فيه اليبرة وتخيط

ورافعها التخميم / غريبه لا كلمنى ولا جى حتى على حالى من لما بعتلى رقمه يوم اللى جابو الشرط

وتخيط وتخمم / لو فى ظرف ثانى راهو قلت اهله غاصبينه عليا ..لكن هوا عاندهم وجى خدانى

ولسعتها اليبرة على صبعها فيقتها من التخميم

-امينه / ااه صبعى
قامت صبعها وجعها …
وعيونها عالتليفون / زعما نتصل ..زعما لا

وفالاخير نفسها غلبتها …واتصلت
التليفون ايشرين …..

رد كمال / الوو
-امينه بصوت يرعش وهارب / ال.. وو
-كمال / من معاى !!

-امينه / انا امينه بعتلك رقمى ..شكلك مادرتلاش حفظ ؟؟
-كمال استغرب / اه امينه .. اهلا بيك

-امينه تلخبطت وبدت اتمتم / سامحنى اتصلت بيك بلا موعد … غير نبى نشري يرغان للسرير وقلت نسألك دار النوم شن لونها

-كمال / انتى تتصلى امتى ماتبى منغير مواعيد ..وبالنسبه للدار لونها قهوى زى كل الديار

-امينه / اهاا باهى
-كمال / باهى مع السلامه
-امينه / مع السلامه 😳😳

وسكرو الخط …امينه وجعتها تسكيرته فى الهاتف.. لكن غصتها وسكتت

__________________________________

.
.
فى حوش مصطفى

-كمال / والله زايد الباب اللى خليتينى نديره يااام
-سالمه / ياوليدى ماسد رضت تسكن معانا فى شقه ..تبينا نحشوها فى دار وخلاص

-كمال تعصب / ومنو السبب فى سكنتنا فى شقه لحد توة …
بوها الانانى الخناب ولا
-سالمه / ياوليدى وطى صوتك يسمعنا بوك

-كمال / وشنو انا كدبت …كان سمعنى بوى بيقولى معاك حق
-سالمه / ومدامه هدا رايك شنو اللى لازك على نسبتهم

-كمال / اووووف يااام وانتى كل يوم تسالى فيا فى هالسؤال
-سالمه / ياوليدى مانبيكش تظلم روحك وتظلم البنت معاك

-كمال / خلى نمشى نشوف العامل خيرلى الدوة زايدة اللى نحكو فيها

ومشى كمال جهه مربوعتهم يشوف فى العامل

ياحنه سالمه شدت فى مصطفى يقسم المربوعه لكمال …مربوعوهم كبيرة 4 ×6.. دارو فيها زى الحيط فى

الوسط ..داروله دار 3×4..وخلو الباقى 3×4 زى الصاله
..وقصو منها حمام ميترو فى الميترو ونص لصقوه فى حمامهم الدخلانى وخدو منه الميه والمجارى

اماالمطبخ خلوه مشترك تاكل وتشرب معاهم …ودارو باب فى المربوعه يفتح لبرة ..يعنى الشقه بدى فيها بابين باب لمطصفى وباب لكمال

والباب الاصلى متع المربوعه خلوه يفتح لداخل للحوش

__________________________________

.
.
وصل العرس ….

ومصطفى مامشاش لحوش خوه بكل

ومنعهم يرفعو قفه …بعتلهم الفلوس وخلاص
وسالمه شرطت على ولدها ادير دخول فى الصاله اول ولد وفرحانه بيه

اما ندى وعبدالرحيم مانحكيلكمش على فرحتهم الزوز
معضله وانحلت على اهون سبب

مع ان عبدالرخيم ناقزه قلبه ومش مرتاح ويوصى فى امينه لاخر لحظه …

-عبدالرحيم / الفاتحه بيقروها بعتالى ..كانا حاسه نفسك مش مستريحه نلغوها …المهم انتى تكونى مرتاحه

” مع ان عارف لو بطلت اخته من الزواجه بتجى على راسه هوا بالسلبي ..لكن كان يهمه اخته اكثر من نفسه

-امينه / علاش تخوف فيا ياعبدالرحيم ..انا استخرت الله ووافقت ..بالك خيرتى فيها

حط ايديه على كتاف اخته / لو زعلك ولا ضايقك ماتنسيش ان عندك خو تهمه راحتك بالدرجه الاولى

حضناته وبدت تبكى / سلم وخى ..ياااربي مانفقدك

خش هيثم لقاهم حاضنين بعض / تى غير شنو هالدموع والبكى هدا ..مفروض اليوم تفرحى مش تبكى

-عبدالرحيم / وصيتها كانا اضايقت ماتنساش ان عندها خوت
-هيثم / ياودى كانا قلتولى ايمن انقوللكم ممكن تتعلب معاه عصبى ..لكن كمال كويس وباله واسع ورزين

-امينه / متاكد
-هيثم / عيب عاد …اكرم حاكيلى عليهم بالواحد …من كمال لعند ندى

شبحله عبدالرحيم ومنغير مايحس بنفسه / انت تعرف ندى
-هيثم ضحك / لا لا منغرفهاش .. انت تعرفها

-عبدالرحيم نكر / لا لا ومنين بنعرفها

-هيثم تلفت لامينه/ ميمي انا معاك ومتابعك ماتخافيش
..ومن وقت تمشيلهم اعطى لامان لاكرم كأنه انا …اما ايمن ردى بالك منه

-امينه تمسح فى دموعها / انشالله مانفقدكم اوخيينى

-عبدالرحيم / يعنى نتوكلو خلاص نقرو الفاتحه

هزت براسها ان ايه موافقه…

وجو الرجاله العشيه وقرو الفاتحه ..وبردو مصطفى مامشاش معاهم

وعلى قد ماشدو فيه صغار عمه رفض يمشى ..زابط خوه بيردهم وبيلزه …

وبالفعل كانت نيه مختار لاخر لحظه ايحشم مصطفى قدام التريس وايلزه ومايصيرش من الفاتحه

لكن شاءالقدر ورفض مصطفى يمشى ..بيش بدت امينه زوجه كمال رسمى

________________________________

.
.
ثانى يوم القفه ….

ولبست امينه البودرى….

وتخمم / معقولة يقرا عليا فاتحه ومايكلمنيش …ومايقوليش حتى مبروك عليك ….ليش هكى بس ياربي

خالاتها كلهم حاضرات …وصل الليل وحنوها

وثانى يوم من الصبح لبست جلابيه ووشاح بيش بتمشى للمزين

وهيا تبكى من جهه ونوريه من جيهه

-امينه / سامحينى ياام كانا مرة غلطت فيك ولا كشخت فى وجهك

-نوريه اضبطتها / مسامحه يابنيتى دنيا واخرة …انشاءالله ثباته نباته …

-عبدالرحيم ينادى/ تى وين امينه يا خالتى

-خالتهم نعيمه / هيا يا امينه سقدى خوك اينادى

طلعت امينه وهيا تبكى حالة ..لقت هيثم وعبدالرحيم واقفيين ايراجو فيها

زادت فى البكى / ردوبالكم من امى وبوى ياوخيينى

وتلفتت لهيثم / امى ماتقدش الحوش بروحها وراس اوخى عاونها

-هيثم يضحك / باهى من غدوة ناخد دورك فى الطياب والضمان ..يوم عليها ويوم عليا 😁🙈

عبدالرحيم قعد يضحك …

هيثم / تى اضحكى عاد فكينا من النكد

ضحكت ومشت ورا عبدالرحيم ركبت معاه فى السيارة وصلها للمزينه

وجى الليل ومشت امينه للصاله …

دارت حفلتها …رقصت ومدو العشى …

وامها تشبحلها وتبكى

ووصلو حوش العريس …

كمال فى السيارة واخته ندى فى جنبه …

لقو عبدالرحيم واقف قدام الصاله …

نزل كمال من السيارة …لابس بدله عرسان وقرواطه حمراء

مشى لعبدالرحيم ….

وقفو قدام بعض …وشبحو لبعض …

-كمال / اهلا عبدالرحيم

-عبدالرحيم ارتخى / اهلا يا عريس

كمال تلفت لندى / انزلى يا ندى

عبدالرحيم قلبه فى الستين مش قادر يشبحلها خايف خوه يزبطه …

وهيا فى السيارة لابسه نقاب …

-ندى / خلى توصل سيارة خالتى ونخشو مع بعض

-كمال / اهم وصلو …انزلى

ونزلت ندى وخشت للصالة …قاعدة برة وين المرايا تراجى فى خالتها

بعتت رساله لرحيم / “محلااااك تقول عريس”

بعتلها رساله / ” ياااريت ..وانتى عروستى .. اسمعى تعالى اركبى معاى حتى انا ماشى ”

قرتها ندى وفرحت وبعتتله / ” يااااريت ”

وخشت هيا وخالتها وثلاث نساوين معاهم …

طلعو العروسه ….

ركبت مع كمال …وندى ركبت مع خالتها

ركبت معاه وهيا مغطيه وجهها ….لا كلمها ..ولا قاللها قيمى شوى نشوفك …ولا نطق كلمه

رفعها للصاله اللى دايرين فيها الدخول …

خشت مع اخته وخالاته …وفرحت بيها سالمه هلبا

عبدالرحيم واقف برة ..معاه صغار عمامهم وكمال ..اما ايمن واقف بعيد وماباش ايجى ايسلم

وهيثم واكرم واقفين مع جماعتهم وهاتك يا تعليق وضحك

جابو للرجالة الروزاطه والعبمبر…. وواضح ان كمال مش مهتم بعبد الرحيم

وعلى فكرة اقاربهم كلهم حايرين فى الخطوة اللى خداها كمال …ومستغربين شنو اللى غير رايه

وكملو الحفله وركبت العروسه مع العريس وروحو لحوشهم

خشو شقتهم … البنت مخلوعه وترعش

من كل شى ..من عريس جديد عليها …من حوش عمها اللى كانو اعدائهم ..من كل شى …

جتها رهبه …من باب الشقه خشت طول للحمام …

وطلعت …

يسمعو فى دوشه فى الجهه الثانيه من الشقه

-كمال ايحول فى ادجاكته / شكلهم العويله وصلو

امينه ساكته…

-كمال / خيرك متحشمه

-امينه متلخبطه مواطيه راسها / قتلك

-كمال مستغرب / خيرك

-امينه / خشيت للحمام لقيت الدورة نزلت

-كمال / اهاا عادى براحتك مدورى شى …

وحول القرواطه …وخش للحمام

قعمزت امينه عالصالون مستغربه ..حركاته مش حركات عريس …حتى لو مايعرفش العروسه

قولى سكتت وسلمت احكامها لربي

طلع هوا من الحمام متوضى / معناها ماتقدريش اتصلى معاى

وهيا ساكته

-كمال / باهى نوضى خشى للدار وغيري ملابسك براحتك ..انا بنصلى وبنرقد فى الصاله

خش للدار خدى التوته متاعه وطلع

طبعا هيا ماتعرفاش ولا واخدة عليه بيش تعزم وتقوله لا خش معاى الدار

خشت دويرتها وسكتت …غيرت فيلوها …وقعمزت على سريرها ماجاهاش نوم

اما هوا صوت شخيره خاش لدار النوم

وجى الصبح ….

_________________________________

طقت ندى على باب المربوعه ….

تسمع امينه فى طقت الباب

طلعت من دارها …لابسه جلابيه اوف وايت عرايسيه

جت لكمال اتنوض فيه

-امينه / اسمع …اسمع نوض باب الدار ايطق

كمال مش مصحصح كويس / باهى افتحى الباب

-امينه / نفتخ ويلقوك راقد فى الصاله

تقاعد من مكانه وقعمز عالصالون وشبحلها / كان سألوك قولى تهنيت

-امينه / لكن انا متهنيتش

-كمال وقف وشبحلها بغضب / اللى نقوله انا هوا اللى بيمشى فى الحوش هدا باهى

وطق الباب ثانى..

كمال / افتحى

وخش هوا للحمام …

فتحت الباب لقت ندى …ابتسمو لبعض …

سلمت ندى على امينه / نورتى حوشك يا عروسه

وامينه فى خاطرها / بدل مايقولهالى هوا قالتهالى اخته

-امينه / تسلمى

-مدتلها صفرة مغطيه / هدا فطورك انتى وكمال

-امينه بطيبه / وليش متعبين ارواحكم ..

-ندى مبتسمه / تعبك راحه ….

واتمتم / قتلك ..قالتلك امى تهنيتى

-امينه 😔/ ايه تهنيت

-ندى / باهى مبروك عليك

-امينه / شوى ثانيه تو نجى

-ندى / على راحتك

ومشت ندى وسكرت امينه الباب ….

وطلع كمال من الحمام / شكون

-امينه / ندى جايبتلنا الفطور

-كمال / افطرى انتى انا مانفطرش

وخش دار النوم

لحقاته بعصبيه / خيرك انت غاصبينك عليا ولا شنو

تلفتلها / منو يقدر يغصبنى

-امينه / امالا خيرك

-كمال / ماخيرنى شى ..انا هكى صعب نتعود على حد بسرعه ..اصبري عليا شوى

-امينه / نادم انك خديتنى

-كمال / هدا اخر شى نندم عليه …ترا اطلعى شوى بنبدل وطالع

-امينه / فى عريس يطلع ثانى يوم من الصبح

-كمال / ايه فى …انا …وراسى بنت عمى اطلعى والله مانيتى فى عراك

طلعت امينه من الدار واتاكدت ان زواجتها فيها ملعوب …لكن شنهوا مازبطتش

خشت للحمام …وبكت ….بحرارة …

وسمعت تليفونها ايشرين

طلعت من الحمام وطلع هوا من الدار …وفتح الباب اللى يطلع على برة وطلع

ردت هيا عالتليفون لقت خالتها نعيمه هيا المتصل

-امينه / اهلين خالتى

-نعيمه / اهلين ياعروسه شن حالك

-امينه / الحمدلله ياخالتى

-نعيمه / خيره صوتك متغير

-امينه / لا والله غير شورة رقبتى امصكرة من مكيف السيارة

-نعيمه تبصر عليها / امالا ماتكثريس حمامات مدامك مستبردة

-امينه مافهمتهاش مازالت خاشه عالجو جديد / انشالله خير يا خالتى

-نعيمه / شنو تهنيتى ولا لا ..امك تراجى على نار

-امينه بزعل / ايه تهنيت يا خالتى

وسكرو الخط …..

وخشت امينه غسلت وجهها وتكمت نفسهاةحطت كحل بس

ولبست حجابها وفتحت الباب المشترك وتنادى / ندى ..ياندى

-ندى / ايوووة…تعالى يا امينه

-مشت امينه للصاله / احمم السلام عليكم

تلاقى العيله كلها مقعمزين يفطرو

-سالمه / تعالى بنيتى خشى سلمى على عمك

وهيا تمشى قريب اطيح ماتوقعتش عمها وسلافها قاعدين فى الحوش

مشت لعمها / اهلين عمى

مصطفى رعش وعيونه دمعو / اهلا بنت خوى شن حالك

وقف وسلم عليها بالوجه

ندى / هدا ايمن …وهدا اكرم

امينه متحشمه وصوتها هارب / اهلا بيكم

مدت ايديها سلمت عليهم

اكرم سلم بحرارة …وايمن سلم ببرود

وخشت ندى للمطبخ بتجيب القهوة بيش يشربو مع بعض

وسالمه توشوش لامينه / كمال قاعد راقد

-امينه / لا لا طلع بكرى شوى

-سالمه / طلع 😱.. وين مشى

______________________________________

تمت …ويتبع

لمشاهدة جميع اعمال الكاتبة : روايات زهور جمال الدين

اترك رد

زر الذهاب إلى الأعلى