رواية قضية شرف الحلقة الثانية 2 للكاتبة زهور جمال الدين كاملة | القلم الناجح
روايات ليبيه كاملة

رواية قضية شرف الحلقة الثانية 2 للكاتبة زهور جمال الدين كاملة

رواية قضية شرف الحلقة الثانية 2 للكاتبة زهور جمال الدين كاملة

#قضية_شرف

.
🌷🌹بقلم زهور جمال الدين 🌹🌷

.
🍁🍁الحلقة الثانيه 🍁🍁

.
.
.
نزيهه تلبس فى شبشبها وبتروح

تلفتت لنوريه سلمت عليها/ توة بالسلامه …وشوفى مختار

وامينه وردى عليا بيش نرد على سالمه واتحدد موعد

واتجيكم تخطب

-نوريه / حاضر ..نشاورهم وتقولك

نزيهه تلفتت بتطلع …وامينه كيف خاشه ..

-امينه / اهلين عمتى نزيهه خيرك مروحه

-نزيهه / انا من بكرى هنايا ..بالعكس عطلت ..هيا بالسلامه

واضبطتها وطاحت تبوس فيها / ياسعد اللى بتجى كنتها

وطلعت …

امينه شمت صنه خطبه فى الموضوع ….وحست ان جيت نزيهه ليهم مش بلاش

خشو امينه وامها للصاله

-امينه / طيبتى الغدى يااام ولا نخش نطيب

-نوريه / لا والله ماطيبت ..عمتك نزيهه جت من بكرى
وتعرفيها هدارزة ماتسكتش ماللى تخش معش تسكت

-امينه تحول فى حجابها وتضحك / صح هدرازة بكل ..خلى ندير قهوة قبل راسى دايخ وبعتالى نحط الغدى

-نوريه / ماسالتينيش علاش جتنا اليوم

-امينه خاشت للمطبخ حطت السزوا عالنار ومبتسمه /ماتقوليليش جايبتلى عريس

-نوريه فرحانه / ومش اى عريس ..هدا يثقل بالدهب وصعب اى بنت ترفض واحد زيه ايجيها

-امينه مبتسمه / كيف واحد زيه

-نوريه / انا نحكى عالقرابه ..يعنى البنت لما يجيها ولد عمها مستحيل ترفضه

-امينه مستغربه ومادة يدها تنزل فى فنجان القهوة من الدولاب / ومنو من صغار عم بوى جاى بخطب فيا

-نوريه فرحانه / تى مش صغار عم بوك …ولد عمك انتى هوا اللى جاى يخطب فيك

-طاح منها فنجان القهوة عالوطا تكصر/ منو ولد عمى يااام ..وهما مقاطعينا ليهم سنين

-نوريه / كمال ولد عمك جاى يخطب فيك

وقامت صبعها بحزم / اسمعى يا امينه زمان نساير فيك

ونقول براحتها صاحب النصيب مزال ماجاش لكن ولد عمك مستحيل نخليك ترفضيه

-امينه متعصبه / تى شن تحكى انتى يااام ..هادو القطيعه بينا وبينهم من لما احنا صغار ..كيف تبينى ناخد ولدهم ونعيش عندهم كنه

-نوريه / وبالك انتو الزوز اتحلو المشكلة اللى صايرة وصغاركم هما اللى بيقربو بين العيلتين

-امينه تعيط/ صغار شنو ..وهبال شنو اللى تقولى فيه يااام

..هادو الناس طول عمرهم يكرهونا ..من امتى بدو يبو

يتقربولنا …لاااا وثانى يبو يخطبونى لولدهم ..مستحيل

واحتد النقاش بين امينه وامها …

الام فرحانه بولد سلفها اللى عمرها ماكرهاته

والبنت رافضه وشامه صنه خونه فى الموضوع

-نوريه / يابنيتى كانك تبى رضاى وافقى على ولد عمك

-امينه متعصبه / وين تليفونى تو نكلم عبدالرحيم ايجى

-نوريه / ايه كلميه ايجى وكانا يحبك ايقولك وافقى
.

.
_________________________________
.
.
.
عمتك ندى من لما سمعت الخبر وهيا مش قادرة ادس فرحتها

مقعمز جنب امها فى الصاله …الاولاد ماهناك حد منهم كلهم

طالعين …وهيا شادة تليفونها وتشرين لعبدالرحيم وهوا مايردش تليفونه مش جنبه

-سالمه / وانتى منين تعرفيها بيش تشكرى فيها هالشكرانيه هادى كلها

-ندى / لما نمشو لاعراس اقاربنا يشكرولى فيها هلبا يااام

-سالمه / انا البنيه مانعرفهاش ..لكن امها نوريه مراءة ونص

..كنا متعاشرين انا وياها زمان هلبا

-ندى / يااااربي هالزواجه تنهى القطيعه اللى بينا وبين حوش عمى …

-سالمه / خلى تروح عمتك نزيهه وبعتالى ساهل

وبدى تليفونها ايضوى عبدالرحيم يتصل بيها..دايرته صامت

خدت تليفونها وخشت تجرى لدارها …

ردت عالمكالمه / الوووو

-عبدالرحيم 😍/ اهلين حبيبي ..شنو تشجعنا وبدينا نتصلو من الحوش

-ندى فرحانه / اولا الاولاد مهناش ..ثانيا الخبر اللى سمعته

مستحيل ايراجى لغدوة ومنقولاش لك

-عبدالرحيم / شكله موضوع ايفرح ..صوتك قريب بطيري بالفرح

– ندى / اليوم سمعت اكبر مفاجأة فحياتى ..خوى كمال يبي

يخطبك امينه اختك

عبدالرخيم حل فمه من الصدمه / ااه ..شن تقولى

-ندى / اللى سمعته …توة معش فى اى عائق فى زواجتنا انا وياك

صوت مكالمه انتضار خاشه على تليفون عبدالرحيم

-ندى 😠/ منو خاش عليك انتظار

-عبدالرحيم / سكرى سكرى …هادى اختى امينه خلى

نشوفها شن تبى ونعاودلك

-ندى / باهى

سكر عبدالرحيم مكالمه ندى ورد على امينه

-عبدالرحيم / الوو

-امينه / عبدالرحيم وينك …تعالى اسمع امك شن تقولى

-عبدالرحيم انشغل/ خيرها امك

-امينه / تبينى نوافق ناخد كمال ولد عمى

-عبدالرحيم / غير سكرى اهو قريب من الحوش انا ..شوى ونوصل

وسكرو الخط …

مع ان امينه قعدت حايرة …مستغربه ان عبدالرحيم ماتفاجئش بالخبر

____________________________________
.
.
وصل عبدالرحيم للحوش

لقى الدنيا خايضه مش قاعدة..وامينه تبكى

-عبدالرحيم / انتى ليش زعلانه وتبكى ..قولى لا وانتهى الموضوع

-نوريه / كيف تقول لا وتم الموضوع… هدا ولد عمها لحمها ودمها كيف ترفضه

-عبدالرحيم تلف لامه / خيرك يااام …حسستينى انك مش

عايشه معانا ..وماعندكش علم بالقطيعه اللى بينا وبين حوش عمى

-نوريه / لا عندى علم …ومدامهم مدو ايديهم بيسامحو علاش نرفضو احنا

-امينه / تى من امتى هما يحبونا ويبو يسامحونا ومدايرنا فى نضرهم احنا الضلام

-نوريه تلفتت لعبدالرحيم / مفروض انت خوها الكبير وعندك

حكمه وتقوللها تروى وديرب مقابله شرعيه …مش تمشى

على عماها وتقول يكرهونا زيها

-امينه / اقسم بالله انا مستغربه كيف تبى ترمينى ليهم هكى

-نوريه / بالك زواجتك انتى وكمال تكون هيا الحل ..والله يا

بنيتى كانك مخطوبه ولا تبى حد مانلزك عليهم …لكن

عارفاتك خاليه …خلاص معناها كمال خير من غيره

-عبدالرحيم بهدوء/ باهى بوى شن قال

-نوريه / عمتك نزيهه كيف طلعت قبل شوى .. بوك مزال ماروحش بيش نخبره

-عبدالرحيم / وعمتى نزيهه شن جايا تبى

-نوريه / باعتينها حوش عمك تنشدنا كان موافقين بيجو يخطبو

-عبدالرحيم / صار بعتولكم رسمى هما ..مش مجرد تفكير بس

وتلفت لامه / وخيرك ماقلتيليش

-نوريه / وهيا عطتنى فرصه نقولك ..تلاطى ماللى خشيت لتوة ماحصلناش معاها كلمه

-عبدالرحيم تلفت لامينه / اسمعى الراى الاول والاخير ليك

صلى استخارة ..ولو تحبي اديري مقابله شرعيه اناماعنديش
مانع …

وحط يده على شعرها / انا معاك فى اللى بتقرريه

_____________________________________
.
.

الساعه 10 فى الليل فى حوش مصطفى

نفتح باب الحوش وخش اكرم

– اكرم / السلام عليكم

-امه وايمن / وعليكم السلام

-سالمه /وين كنت ياوليدى مش قلتلك معش تعطل وراك قرايه

-اكرم / غدوة جمعه ياام مفيش قراية خيرك ناسيه ..

-ايمن / جاوب على امك وين كنت

-اكرم / كنت مع جماعتى مشينا للمدينه …وعارف شن

بتسأل ..ايه حتى هيثم معانا

-ايمن وقف متعصب/ شن قلنالك احنا ..مش قلنالك فوت

امه فرخ الحرام هدا

-اكرم قايم يده ويشالى / هيثم مش فرخ حرام وانت عارف

انى نعرفه قريب شهرين ومانندريش عليه ولد عمى …وتوة

لينا ثلاث سنين نعرفو بعض صعب نطلع مش راجل قدام جماعتى ونفوته

-سالمه / ياودى نقصو فى صواتكم بوكم يسمع ايديرنا ليله حرفه

-ايمن / انت عارف انهم اعدائنا ولا ..وعارف انهم سرقو حقنا

واننا لازم اردوه

-اكرم / اوووووه علينا عاد وانا شن دخلنى بالكلام الفاضى

هدا كله ..انا قلتلكم مالياش علاقه بى هالموضوع

-ايمن / تى صكر فمك انا اكبر منك واسمع الكلام وفرخ

الحرام هدا من اليوم اقطع علاقتك بيه

-اكرم / انت اكبر منى وانا نحترم فيك ..لكن موضوع هيثم

فوته ..ليك ثلاثه سنين تحاول وبلا فايدة

انفتح باب الحوش وخش كمال / السلام عليكم

-ايمن / كملت ..اهو العريس روح

-اكرم / عريس !!..منو العريس😁

____________________________________

.
.
وفى حوش مختار …

نوريه قالت لمختار على خطبه حوش خوه لبنته

مختار نوعه يخدم عالساكت 😁..صعب تعرفى شن فى داخله لين يخمم بروحه

بعد ماكملت نوريه كلامها

تلفتلها / وبنتك شن قالت

-نوريه تبى ادس عليه رفض امينه / بنتى قالت اندير مقابله شرعيه

-مختار/ وولدك شن قال

-نوريه / نفس الراى …قال ايجينا للحوش

-مختار بهدوء/ اممم باهى

-نوريه بضحكه خوف من تكشيخه / وانت شن رايك

-مختار/ ديريلى طاسه شاهى

-نوريه خافت / باهى

نوريه ناضت خشت للمطبخ….

ومختار يخمم بروحه / قال نعطيهم بنتى قال…تى اقسم

بالله نقتلها وندفنها ومانخلى واخد من ولاد مصطفى ياخدها
مزال والله

وتلفت عالجنب الثانى / لكن هادى فرصتى نكسر شوكه

مطصفى …نوصله لمربوعتى يخطب…وبعتالى نقوله البنت رفضت مافيش نصيب

ولمعو عيونه وضحك / ايوووه هدا هوا الراى…انوصله

لحوشى وانلزه …زى مالزنى هوا زمان .. ماحد خير من حد

مختار اينادى / يانوريه …يانوريه

جت نوريه بسرعه / نعم

-مختار / قولى لبنتك كانها بدير المقابله عادى خلى اديرها

فرحت نوريه ..شنو فرخت قولو قريب طارت من الفرح …

وتناقش فى بنتها / يابنيتى لاه ديما دايرتلى شق العقل… كل

مايجيك حد اترديه …انا رانى مش دايمتلك

-امينه / ربي يطول فى عمرك ويخليك ليا

-نوريه / حتى بوك نفس راى عبدالرحيم …. انتى ديريها المقابله ..وكانا ماعجبكش كلامه ارفضى

-امينه / انا مش عالولد يااام …انا عالفكرة نفسها

-نوريه / توة بوك وخوك اجتمعو على نفس الراى …انتى

خودى بخاطرهم وديرى المقابله

طق باب دارها …فتح هيثم الباب وخش

-هيثم / اوووو عروسه …قالو كمال جاى يخطب فيك

-نوريه / وانت من قالك

-هيثم / توة كلمنى اكرم ولد عمى وقالى

-نوريه / هااا شوفى هيثم كيف مصاحب اكرم وماشى الامر

عادى جدا وعمرهم ماتعاركو

-امينه / تى كيف الامر مااشى عادى جدا ..قداش كلى

طريحه من بوى على خاطر هالموضوع

-هيثم / لكن كمال شخصيه الحق …متلاقى معاه كم من مرة

-نوريه / توة خوتك كلهم وبوك نفس الراى وانتى شى راسك كاسح

-امينه / وقرايتى ..والماجستير اللى كيف سجلت فيه توة

-هيثم / اشرطى قرايتك ..هلبا بنات يشرطو هكى

-نوريه / هاا شن قلتى يابنيتى

-امينه حطت ايديها على ودانها /وااااك يااام قداش اتزنى

…باهى ديرو مقابله شرعيه …ووالله كانا ماعجبنيش كلامه مانى قاعدة فيها المربوعه

_________________________________

وبالفعل ردت نوريه على نزيهه …

وقالتلها مبدئيا ايجينا الولد ..ويدير مقابله مع امينه ..ويدير الله طريق

وخبرتهم نزيهه …وعطو موعد يوم الخميس ايجيهم كمال لمقابله شرعيه مع امينه

ومع ان مصطفى رافض الزواجه هادى …لكن سكت لان كمال وعده انه ايديرله حل فى حكايه الحوش والورثه

ووصل يوم الخميس..

عبدالرحيم ماباش يقعد للمقابله …وصى هيثم يقعد بيش يستقبل ولد عمه …

وبالفعل وصل كمال جايب معاه باقه ورد …وخش للمربوعه

قعمز وسلم على هيثم بكل هدوء

وجت نوريه خشت سلمت عليه

بحركه لا اراديه فرح لما شافها / عمتى نوريه …اهلين بيك

ونوريه عاد وين تلقوها …بطير من الفرحه

اما امينه ترعش مع بعضها …ولد عمها عمرها ماشافاته ولا تعرفه …طول هكى تبدا اسمها مرته

لبست جلابيه كحلا…ووشاح وردى

حطت بودرة وكحل ….وناداها هيثم بيش تخش للمربوعه وطلع

خشت امينه ترعش مع بعضها ومتحشمه

-امينه/ السلام عليكم

-كمال وقف / وعليكم السلاااام

خشت امينه مواطيه راسها وقعمزت عالصالون

-كمال / شن حالك يابنت عمى

امينه تفاجئت من الكلمه / الحمد لله

-كمال / مانبيش انلف واندور ..نبى نخش فى الموضوع طول

-قامت راسها / اهاا

-كمال / اللى طاير بين بوى وبوك احنا ماليناش علاقه بيه

-امينه/ لكن انتم طول عمركم تكرهونا

-كمال / باهى اعطونا فرصه نحبوكم …

قامت امينه راسها …الكلمه هزتها ….

اما هوا قعد يشبحلها ..حسها رزينه هلبا …ومثال للزوجه الهاديه …

-كمال / انا جاى نخطب فيك ..ونبو نلمو العيلتين …تبى

تعاونينى وتوافقى باهى ..ماتبيش تو ندور طريقه ثانيه انلم بيها العيلتين

-امينه / حلفتك بالله هدا مقصودك انت …

-كمال تلخبط / منغير ماتحلفينى ..انا حكيتلك باللى فى بالى كله

-امينه / تعرف …مدامه هدا مقصدك …حنوافق مدامك بتلم العيلتين وبتنهى الخلاف

-كمال / باهى كويس ..شن شروطك

-امينه / ماعنديش شروط غير قرايتى بس ..

-كمال / انتى قاعدة تقري!!

-امينه / انا متخرجه من هندسه اتصالات …وتوة نكمل فى الماجستير …

-كمال ضحك / تصدقى انه نفس تخصصى

-امينه ضحكت / لا لا بلحق

-كمال / والله

وسكتو لحظات …قعدو ساكتين ….

-كمال / امتى تبدا عطلت السيمستر

-امينه / انا كيف سجلت …ونمشى ليا اسبوع …لكن قسمونا زوز مجاميع ..انا مجموعتى تبدا بعد شهر

-كمال / خلاص نكونو متزوجين ..وتكملى قرايتك عندى

امينه تحشمت وسكتت

وبعدها سالاته / وانت شن شروطك

-كمال / ماعنديش شروط …عندى مشكله وحدة بس فى

السكن ..نسكنو مبدئيا فى دار معاهم فى حوش بوى
…واعطينى شهر بس نشري شقه ..الايجار منحباش

-امينه / لكن انتو ماشالله عويله ..كيف بنقعدو معاهم

-كمال / قلتلك اعطينى شهر بس ..مش هلبا شهر

-امينه / باهى

وتمت المقابله بموافقه الطرفين …..

هيثم بلغ كمال ان بوه موافق …وعطاه موعد بيش ايجيب بوه

طبعا مختار ناوى الغدر…وناوى ايلز مصطفى من حوشه

ووصاه مايجوش النساوين لين يجى بوه قبل …

رضخ كمال لشروط عمه …وبلغ بوه انه يمشى هوا الاول

طبعا مصطفى زابط خوه وتفكيره ..قال لولده مانا اطيرو ولا تنجحو مانمشى لمختار فى حوشه

وكمال يقنع فى بوه ..فى طولك فى عرضك ..وهوا شى

مشى كمال بروحه لحوش عمه فى الموعد اللى عاطيينه لمصطفى

-مختار/ وين بوك ماجاش معاك

-كمال/ تبى الحق ياعمى..بوى رافض ..وانا جيتك بروحى كان بتقبلنى راجل باهى ..وكنهدا خلى انوض انروح

-مختار/ صار مصطفى رافض ايخليك تاخد بنتى…امالا عناد فيه لما نعطيهالك …وخليه ينطح راسه فى الحيط

ومشت سالمه لحوش نوريه بروحها ..مصطفى ماخلاش بنته ندى تمشيى معاها ..

وعييت نوريه ماترحب بسالمه …الزوز ايسلمو على بعضهم ويبكو …يدكرو فى ايامات زمان لما كانو عيله وحدة..ووين كان يقعمز الشيبانى ووين كانو يديروله فى العالة

سالمه عجبتها امينه هلبا ..وهيا تاخد وتشكر فى ولدها وياسعد اللى بتاخده

وحددو العرس بعد اسبوعين …

امينه تجرى ماتدرى …بين الفيلو والصاله

وعبدالرحيم خانبه قلبه من هالزواجه ..لتوة ماتلاقاش مع كمال ولا سلم عليه

اما ندى وين تلقيه ..خلاص بدت تتخايل فى نفسها عروسه لعبدالرحيم مدام العقدة انحلت

______________________________

تمت ….ويتبع

لمشاهدة جميع اعمال الكاتبة : روايات زهور جمال الدين

اترك رد

زر الذهاب إلى الأعلى