رواية قضية شرف الحلقة الرابعه 4 للكاتبة زهور جمال الدين كاملة | القلم الناجح
روايات ليبيه كاملة

رواية قضية شرف الحلقة الرابعه 4 للكاتبة زهور جمال الدين كاملة

رواية قضية شرف الحلقة الرابعه 4 للكاتبة زهور جمال الدين كاملة

#قضية_شرف

.
.🌹بقلم زهور جمال الدين 🌷🌹
.
.
🍁الحلقه الرابعه 🍁

.
.

فى حوش مصطفى

-سالمه تشرب فى القهوة/ ايمن سلم اوليدى مدامك قاعد فى الحوش قيملى البساطات كلهم انت واكرم

-ايمن / يااام والله رجلى ناضت عليا ماقادر نحركها …تشوفى فيا قاعد فى الحوش حتى العمل مامشيتلاش

-ندى خدت فنجانها / وانا حايرة كيف قاعد فى الحوش غريبه
-اكرم / ماتقولش اصابه الكورة اللى قبل شهر

-ايمن / ايه والله هيا ..الباين مازال مابرتش كويس ..ومن الحركه والعرس ناضت عليا

-سالمه حطت فنجان القهوة عالطاوله / اللطف علينا واحنا شن درنا فيه العرس..حتى الحوش كل شى قاعد فى مكانه ..جونا خالاتك والجيران ليله ..والباقى كله درناه فى الصاله

-اكرم تلفت لامينه / امينه خيرك ساكته
-امينه واطت راسها / لاااا شى عادى

-اكرم / اسمعى انا وايمن خوتك ..وندى اختك ..واللى بينا بيك

-امينه ابتسمت / ربي يحفظكم ليا اوخيينى

ايمن تلفت الجهه الثانيه مش عاجبه الكلام

وقف اكرم / اهو طالع انا للجماعه توة…نديرو دورة ونجيبهم
معاى بعتالى نقيمولك البساطات وكل شى تبيه

-سالمه / باهى ..سلم اوليدى

____________________________________

.
.
فى المستشفى …

عبدالرحيم مقعمز فى الممر مع جيرانه

-جاره سالم / خبرت العيله فى الحوش
-عبدالرحيم/ والله ماقادر نخبرها امى ..امس فرحانه سقدت بنتها واليوم نقوللها بوى جاته دبحة

-منير جارهم / هدا حال الدنيا يا رحيم ..خبرهم اصلا هما اكيدة انشغلو لتوة ماروحش بوك للحوش

وشرين تليفون عبدالرحيم …شاف لقى امه المتصلة

رد عليها / اهلا ياام

-نوريه / ياوليدى العصر ادن وبوك مشى يصلى فى الضهر ولتوة ماروحش

-عبدالرحيم / والله شن بنقولك ياااام … بوى تعب شوى وجبته للمستشفى

-نوريه😳 / ياغبارتى ..حيه عليا خيره بوك

-وقف عبدالرحيم ومشى على جنب / نقصى صوتك تربحى الرجاله جيرانه جنبى يسمعو فيك

-وبدت نوريه تجولح / حيه عليا حتى الجيران لاحقينك
..باوليدى بوك خيرك مادسش عليا

-عبدالرحيم / ماخيره شى …رقاله السكر من التعب ..وانا قلت للدكتور خليه الليله بيش نطمن عليه

-نوريه بدت تبكى/ ياوليدى قول الحق

-عبدالرحيم / زى ماحكيتلك يااام خيرك مش مصدقتنى .. غير كلمى هيثم ايجينى للطبي نتصل بيه تليفونه خارج التغطية

-نوريه / هيثم فى المخزن ايردلى فى الماعين الكبار…اهو تو نقوله يلحقك

-عبدالرحيم / باهى كلميه هى

وسكرو الخط …

شرين تليفونه ..ندى تتصل ..ومن بكرى وهيا تتصل ومابطلتش..
بعتلها رساله ” حبيبتى انا مشغول هلبا معش تتصلى ..فى الليل نفضى تو نكلمك انا ”

حط تليفونه فى جيبه ومشى للرجاله

شرين التليفون مرة ثانيه شبح لقاها امه معاودة

-عبدالرحيم / نعم يااام

-نوريه / رد بالك اتقول لاختك وتخلعها …قاعدة عروس مش باهى ليها ياوليدى

-عبدالرحيم / باهى

رواية قضية شرف الحلقة الرابعه 4 للكاتبة زهور جمال الدين كاملة

.
.
فى حوش مصطفى …

قامو صفر الغدى ويغسلو فى الماعين ندى وامينه

-ندى / والله ماصارت اهو تو نغسلهم انا
-امينه / لا والله عادى حمل الجماعه ريش

انفتح باب الحوش وخش كمال / السلام عليكم

امينه سمعت صوته جتها رهبه وبدى قلبها يطق

-سالمه / اهلين وليدى خش تغدا
-كمال / هاتى
-سالمه / يا امينه ..هاتى لكمال غداه

امينه تسمع فيها لداخل انخلعت ..وصوتها هرب

-ندى /نعاونك ..ولا تسقيه بروحك
-امينه / لا عادى اهو تو نسقى انا

طلعت ندى للصاله / اووو عريس
-كمال يضحك / اوووو ندى بنتى

-ندى تضحك وقعمزت عالصالون / بالله توة بتدير عويله وصغار ….مممم تو مزال بتدكرنى ..اكيدة بتنسانى

-كمال يضحك / حد ينسى بنته

“كمال روحه فى اخته ندى ”

جابت امينه الغدى / السلام عليكم
-كمال منغير مايشبحلها / عليكم السلام

حطت امينه الصفرة / نستادنكم …

وتوجهت جهه باب المربوعه خشت لجناحها

-سالمه تلفتت لكمال / خيركم فى شى

-ندى / خيرك يااام البنيه جديدة ماتعرفناش زمان ..شنو تبيها تضحك وتلعب من اول يوم

كمال ياكل عجبه الاكل / ماشاااالله …يسلمو يدياتك يااام كسكسى مالاخير والله ماعمرى دوقته

-ندى غمزتله/ امينه طيبت الغدى

-كمال / والله …ماشالله

-سالمه / والله على قد ماحلفت عليها..قالت شى نطيب انا

-ندى تضحك / حتى ايمن زيك عيي مايشكر يحسابه طياب امى …تفاجأ قلناله امينه هيا المطيبه

-قام كمال الكاشيك/ يسلمو ايدياتها

كمل كمال غداه ..وغسل يده وخش لشقته الجانبيه

رواية قضية شرف الحلقة الرابعه 4 للكاتبة زهور جمال الدين كاملة

.
فى حوش مختار
.
.هيثم يلبس فى كندرته / ياودى قلتلك المستشفى معبى بالجيران كيف تبينى نرفعك معاى

-نورية / توة معقولة ارتفاع فى السكر ايخلى الجيران كلهم ينقلبو عليه فى المستشفى

-هيثم / تى ماهو تعرفيهم انتى جيرانه اسمع وافزع

-نوريه تسقد فيه / اعطيه ايكلمنى نطمن عليه اهو قلتلك

-هيثم / اهو احمد ولد خالتى كلمنى …قالى خالتى نعيمه قريب توصل …هيا بالسلامه

نوريه مشغولة ومش قادرة اترد

______________________________

.

خش كمال للصالة فى شقته …

حول دجاكته وقعمز عالصالون

بعد خمسه دقايق طلعت امينه من دار النوم …لابسه قفطان سماوى خفيف لكن محتشم شوى بالكمام

قعمزت عالصالون جنبه ..طاحت قصتها على جنب

هيا وجهها طويل وشعرها اشقر ناعم وطويل …

-امينه بهدوء وبابتسامه / وين مشيت

-كمال / درت دورة

-امينه/ انا عارفه ان نبو وقت بيش ناخدو على بعضنا ..
وحتى خوتك والعويله يبو وقت بيش ياخدو عليا

ساوى كمال المخدة واتكى/ اكيد… خوتى واهلى مايعرفوكش

..يبو وقت بيش ياخدو عليك

-امينه / وانت تعرفنى !!

-كمال يتهرب منها غمض عيونه / معليش ممكن انقيل شوى

-امينه 😔/ براحتك

خشت لغرفتها ..فتح عيونه يشبحلها وهيا تمشى

وفى خاطره /متاكد من بوها بيوافق .. يومين ايبيع الحوش

ونردهالهم ..ولدلك مفيش داعى للاختلاط بينا …ولا للتعارف …ولا للعتاب

ومشى فى النوم

فاق بيها اتنوض فيه / كمال… كمال نوض ..المغرب ادن

فتح عيونه …

ناض خش للحمام توضا وصلى …

وطلع للكوريدورى اللى قدام الشقه ..قام تليفونه واتصل برقم عمه

رد عليه عبدالرحيم / اهلين كمال

-كمال مستغرب / اهلا عبدالرحيم ..هدا رقم عمى ولا

-عبدالرحيم / ايه رقم بوى …احنا فى المستشفى ..بوى جاته دبحه صدريه

-كمال انخلع / ااه …كيف!!!… وامتى

-عبدالرحيم / رد بالك اتخبر امينه

-كمال / انتو وين

-عبدالرحيم / احنا فى الطبي

-كمال / اهو جاى

كمال استغرب فى نفسه ..ليش انشغل هالشغله هادى كلها على عمه …وطار بالسيارة مشى للمستشفى

قعد واقف مع صغار عمه …شوى واكرم هيثم مخبره هيثم

قاللهم الدكتور الليله صعب يطلع …وغدوة تقدرو تستلموه

قعد معاهم كمال للساعه 12 فى الليل

وامه تتصل بيه تبيه ايروح وهوا مايردش

-سالمه / حشمه حالى يحساب روحه قاعد عزرى يدور لتوة عقابات الليل

رواية قضية شرف الحلقة الرابعه 4 للكاتبة زهور جمال الدين كاملة

روح كمال خش لامه هيا الاولى طمنها انه روح

لكن ماباش ايقوللها على عمه لانها بتخبر امينه ..وخوتها وصوه انه مايقوللهاش

خش لشقته …

توقع امينه اتكون والعه زى مايحكوله صحابه لما يتأخرو لازم اتصير عركه 😁

طلعت امينه من دارها / خيرك تأخرت شغلتنى
-كمال / السلام عليكم
-امينه / وعليكم السلام …مافيك شى

-قام ايديه الزوز/ لا الحمدلله مافيا شى اهو واقف قدامك سليم مافيا شى

حطت ايدها على قلبها / اوووف الحمدلله ..بالرغم قلبي تاقزنى مش عارفه علاش

-كمال / لاااا مافى الا الخير انشالله

تلفتت امينه وخشت لدارها ….

كمال قعد واقف ويشبحلها وهيا خاشه للدار …حسها مش مهتمه زى اهتمامها فى الصبح …

لحقها وقف عالباب وربع ايديه ويشبحلها / وخيرك ماكلمتينيش مدام انشغلتى

قربت منه وقفت قدامه / الحق حسيتك صعب وماتبيش من يتبعك

هوا حس بالاغراء وان حاجه في قلبه تحركت/ اهاا صعب… قصدك انا صعب ولا طبعى صعب😊

-امينه مبتسمه / وبعدين انا نشوف فى امى كيف تخاف من بوى ماتقدرش اتكلمه …

ضحكت وحطت قصتهتا ورا ودنها / وانا نمارى فيها

-كمال / ونعما التربيه ….

يبيها تقوله خش للغرفه …لكن هيا ماقالتش

خش بروحه منغير عزومه 😁😁/ شنو عجباتك الموبيليا

-امينه / ايه حلوة

الولد خش فى عالم ثانى … معش حاس بنفسه …

مسكها من ايديها / تعالى

بدى قلبها يطق …خداها وقعمزها عالسرير …

هوا يشبحلها …وهيا تشبحله ….

-كمال/ عندك علم ان جميلة هلبا …

قرب منها …بدى يبوس فيها …وهيا ماعترضتش

ولما زاد انسجامهم حول سوريته …وفتحلها بطمه البيجامه

زاد الانسجام اكثر واكثر وقرب اكثر .. لاكنها دكراته بانها عندها عدر حاليا ..ويصبر عليها اربعه ايام ثانيه

ومع هدا قعد راقد عالسرير ومرقدها على صدره …

وبعتالى طلع من الغرفه وخش للحمام ومعش رجع ..رقد فى الصاله ..وخشت هيا بعده للحمام

” ياحليلى تو تقولو رمضان وتكتبلنا هكى ههههه..الله غالب منقدرش ..نوعى نحب نعطى كل لقطه حقها …مع انى ماعطيتهاش حقها كامل 😁😁

رواية قضية شرف الحلقة الرابعه 4 للكاتبة زهور جمال الدين كاملة

سالمه ومصطفى فى غرفتهم

-سالمه / الحمدلله البنيه زى الفرح والسعد جتنا على قيس النيه
-مصطفى / لكن انا لتوة مش قادر نستوعب ان كمال ناسب عمه …توة لو اكرم ممكن

-سالمه / الحمدلله ربي هداه …وانشالله ياااربي يحل المشكلة اللى بينا وبين حوش عمه

-مصطفى / المشكلة ماتنحلش كانش كانا مختار اعطانى حقى

-سالمه بخوف / يامطصفى غير زيد راجع روحك وادكر
..بالك حق بوك رد سلف مختار …والحوش ليه ومن حقه

وينوضلها ياكبدى / اااه …سلف مختار..وانتى من قالهولك الكلام هدا …بالك غير مخبرة ولادك بالموضوع هدا

-سالمه مخلوعه / لاااا والله ماعمرى قلتهالهم …لاقلتلهم جدكم مدين من عمكم ولا سلف مردود

-مصطفى / ايوووه اتصكرى فمك ..وهالموضوع ماليكش علاقه بيه

__________________________________

الصبح فاقت امينه فرحانه …تى قريب بطير من الفرح

طلعت للصاله لقت كمال قاعد راقد

-امينه / كمال …كمال

-كمال مبتسم / صباح الخير

-امينه مبتسمه / صباح النور …نوض الساعه 9

ناض كمال قعمز …ووقف خش للحمام

بالرغم هيا كانت تستنى انه يبوسها .. يحضنها …لكن هوا مادارش هكى

بعد خش للحمام ..يغسل فى وجهه ويشبح للمرايا

ويخمم / شن تخرط انت يا كمال…منها بطلقها …ومنها متشحتف عليها وتبتسملها على صبح ربي

خدى المعجون ويغسل فى سنونه / لكن هيا الله ايبارك
…هدء ورزانه ….وجمال …محلاها …ياريتنى تلاقيت معاها فى وقت ثانى

طلع من الحمام لقاها مهناش…..

خش دار النوم غير حوايجه ….وطلع لقاها جايبه الفطور

-كمال / يا امينه انا والله مانفطر ليش متعبه روحك

قعمزت امينه / هاداكه زمان …توة لازم تاخد حاجه وانت طالع

قعمز معاها سايرها وشرب عصير

-امينه / حتى اليوم بتطلع

-كمال / ممكن اليوم بندخلك على اهلك ..تو نطلع انقول لامى
شوى ونكلمك بالتليفون يانقولك وتى روحك يا نخلوه اليوم اللى بعده

-امينه / اللطف ..انا ليا يومين بس.. حتى يوم الاسبوع قاعد موصلش ..حتى عمتى سالمه مستحيل توافق

-كمال وقف/ انا نعرف شن اندير

وطلع من الباب المشترك …صبح على امه …وقاللها على مرض عمه …
وقاللها انه لو روح حيرفع امينه لحوش اهلها …ولو ماروحش حنرفعها اتزوره فى المستشفى

-سالمه / باهى دير رايك

-كمال / خبري بوى على عمى

-سالمه / ماعندى علاش نقوله ..مستحيل يمشيله

وطلع كمال مشى للمستشفى لقى الدكتور عاطيه خروج

روح لامينه حكالها …وعييت ماتبكى وقالتله قلتلك ان قلبى ناقزنى

ورفعها لحوش اماليها بيش اتشوف بوها …

ورفع معاها سقيطه وخضرة وكل اللوازم …

مشت معاها سالمه …وبردو مصطفى ماخلاش ندى تمشى

رواية قضية شرف الحلقة الرابعه 4 للكاتبة زهور جمال الدين كاملة

.
.
خشت امينه لحوش اهلها تبكى

-نوريه / غير علاش جايبينهالى ..فال مش كويس عليها اول مرة تخش حوش بوها ..تخشه تبكى

-سالمه / ولدى كمال قال ضرورى نرفعها تشوف بوها

دارتلهم نوريه الغدى كسكسى بالبصله …طيباته خالتها خديجه …

والعشيه لما فضت المربوعه خشت لبوها

لقت عبدالرحيم وهيثم امقعمزين ..ومعاهم كمال واكرم

-امينه تبكى / بوى خيرك شن جاك بس.. من شنو تغششت بيش جاتك الدبحه
كمال يشبحلها وعنده شعور بالدنب
-مختار / مافيا شى يا بنيتى ماتنخلعيش

-امينه / كل شى الا انت يابوى
-مختار غمض عيونه بحسرة / وكل شى الا انتى يابنيتى

وبيخشو رجاله …طلعت امينه مشت للصاله

والمغرب نادى كمال على امه بيروح بيها …

ونادى على امينه / تبى تباتى

-امينه / ايه نبى نبات هنايا

-كمال / باهى اقعدى

وعيونه كلهم اشواق ليها ……وهيا نفس الشى
مع انه كان يحاول يهرب بعيونه بيش مايفضحوشى ..

مشاعر تتحرك فى ثلاثه ايام …غريبه ..بس ديما الممنوع مرغوب ..ولانه موصى نفسه انه مايحبهاش حبها ..ولانه موصى نفسه انها ماتلفتش انتباهه بالعكس لفتت انتباهه وبشدة ”

وامها وخالاتها عيوو مايعاركو ..بري روحى ..وانتى عروسه .. وهيا شى اصرت عالبيات مع امها

-اكرم / كمال يبيك بوى شوى قبل ماتروح

خش كمال لمختار وعيونه فالوطا …

-مختار / اقرب منى شوى

قرب منه كمال اتكى جنبه

-مختار /كلمت الرال بكرى لما روحت … والحوش حطيته فى الدلاله ……
كمال ساكت ويشبحله
مختار / والبنت وصلت حوش بوها ومعش بتطلع

-كمال بنبرة قوة / البنت ترجعلك بعد ماتعطينى حقاتى
…الليله خليها تبات …وغدوة من الصبح بنجى انروح بيها …لما تسلمنى امانتى نسلمك امانتك

-مختار / هوا هداكه الكلام ..اعطينى اسبوع بس

-كمال / تمام

وروح كمال بامه …وخلى امينه فى حوش بوها

خش لى دار النوم اتكى ويخمم مستغرب كيف موضوعه تم بي هالسهولة / شفت ياكمال الحكايه قداش ساهلة …كل الناس تخاف من قضايا الشرف … اكبر حاجه فيها لوية دراع

وحس بي غبطه فى قلبه وفرح انه موضوعه تم بالساهل وكيف مايبي …

ويخمم/ ياريتنى درتها من زمان ورديت حقنا الضايع

تلفتت لجهه الثانيه/ لكن امينه ماتستاهلش انها تكون كبش فداء

ودمعو عيونه
___________________________________

ثانى يوم جى روح بيها …

خشو للحوش …

وكمال كان مقرر انه مايتواصلش معاها ولا يحكى ولا يقرب

خشت امينه دارها وكمال قعد فالصالة ….

حس انه يبي يتكلم معاها …نسى كل الاتفاقات مع نفسه ولحقها للدار … وقف عالباب كالعادة

-كمال / انشالله استريحتى فى النومه امبارح

-امينه متلفته للمرايه تمسح فى الكحل / تصدق والله
مارقدت ..ماتقولش الحوش عشت فيه طول عمرى

حس بريئة وغافلة … وتتكلم بكل براءة

جى وراها وحضنها / وليش ماسالتينيش نفس السؤال

-امينه متحشمه / وعلى شنو بنسالك

-كمال قرب من ودنها / على ليليتى امبارح كيف كانت

-امينه تضحك / وكيف ارقدت امبارح

-كمال / ليله حرفه …

وغمض عيونه / معش تغيبي عليا لانى بجديات ستاحشتك

-امينه فرحانه / حاضر

-كمال / انا فى الصاله غيري حوايجك والحقينى

-امينه / حاضر

وطلع كمال للصالة …وافكار ترفعه وافكار تجيبه … صارله تناقض فالافكار … العقل مع عمه والحوش … والقلب مع امينه … يبي البيعه اتم والحق يرجع … ويبي امينه تقعدلهة.. لكن هيهات……

سبحان الله فالصراعات ديما القلب يغلب …. وقرر انه يختار امينه ويتخلى عالحق اللى طالب بيه بيش تقعدله

ايخمم / زعما نمشى لعمى ونقوله فوت الموضوع …….
لكن حنطلع قدام بوى مش راجل لانى ضربت على صدرى ووعدته انى بنرد الحق

سكت شوى ورجع ايخمم / ولا نستمر … وناخد حقى …لكن
مش حنقدر انطلق امينه ….

فاق بي نفسه/ انطلقها!!!!!!!!…. مستحيل

ياودى الفلك تغير و حسها البنيه عجباته… وربي يجيبك ياوسعت البال

__________________________________

تمت ….ويتبع

لمشاهدة جميع اعمال الكاتبة : روايات زهور جمال الدين

اترك رد

زر الذهاب إلى الأعلى