رواية قضية شرف الحلقة السادسه 6 للكاتبة زهور جمال الدين كاملة | القلم الناجح
روايات ليبيه كاملة

رواية قضية شرف الحلقة السادسه 6 للكاتبة زهور جمال الدين كاملة

رواية قضية شرف الحلقة السادسه 6 للكاتبة زهور جمال الدين كاملة

#قضية_شرف

🌹🌷بقلم زهور جمال الدين 🌷🌹

.
🍁الحلقة السادسة 🍁
.
.
.

فى حوش مصطفى…

سالمه صكرت التليفون وطاحت اتخبط / ياغبارتى ..ياعارى
قدام الناس …ياحليلى

جت ندى من دارها تجرى / خيرك ياااام شن فى
-ايمن / خيرك يااام من كان ايكلم فيك ….

وخدى تليفونها شاف الاسم لقاه كمال ولدى

-ايمن / خيره كمال …خيره شن قالك
-سالمه / قالى طلقت مرتى..كمال طلق عياله …طلقها اليوم

-ايمن مصدوم وفاتح عيونه / اااه …شن قلتى ..كمال طلق امينه

وتجى ندى طايحة مغمى عليها

-سالمه / حيه عليا بنتى …وووك عليا يانهارى المغبرر

-ايمن يقيم فى ندى / تى قيمى معاى يااام بدل ماتعيطى

وصارت فيهم حوسه

جت سالمه تجرى تقيم فى ندى مع ايمن .. رزنت عليهم
دخلوها لدارها وجاب ايمن اميه من المطبخ وجى يجرى بخها بيها …

فاقت ندى

-سالمه / يابنيتى خيرك شن جاك

-ندى دموعها زى المطر/ شن قلتى يااام …كمال طلق امينه
وبدت اتخبط فى وجهها / ياغبارتى ..ياغبارتى نى

-ايمن/ وانتى شن دخلك فى طلاقهم تغبرى فيها عليك
ندى فاقت بنفسها ان ايمن جنبها ..
قعمزت وبدت اتمتم/ لاااا وانا شششششن دخلى …لكن سخفتنى امينه

-ايمن تلفت لسالمه / تى والله ولدك ماهو راجل

رواية قضية شرف الحلقة السادسه

فى العيادة ….

فى الممر واقفين عبدالرحيم وهيثم وبوهم وامهم

-عبدالرحيم / وحق لا اله الا الله ماهو بارد بيها ..وماعنده قاتل غيري
-نوريه تخبط / يا غبارتى ..لانى من بنتى ولانى من ولدى

-هيثم / امالا تبيهم ايقولو علينا مش تريس .. ايطلق اختنا ونسكتوله
نورية/ صكر فمك واتت اتزيد فالنار

مختار وقف / اسمع يارحيم مدامه هدا كلامك.. وحق الله اللى حلفتو بيه انت وخوك …لو واحد منكم يتعرض لى ولد عمه ..راهى امكم على دمة روحها

-نوريه / وووه عليا وين كانو مدسوسات هالايام

-عبدالرحيم قريب ايطير / شن الكلام اللى تقول فيه يابوى
-مختار /اللى سمعته كان يتعرضله واحد منكم بعلمى ولا منغير علمى امكم طالق وبالثلاثه

-عبدالرحيم حط ايديه الزوز على على سوريته مزقها البطم كلهم طاروه/ تى علاش هكى …علااااااش ادافع عليه انت بتهبلنا

وطلع من الممر ماعارف وين يمشى

-هيثم يطقطق فى سنونه / علاش ادير هكى يابوى ..مش تريس احنا ولا شنو
-مختار / صكر فمك …انا اللى قلتله ايطلقها

-نوريه / ياوليدى الحق خوك ايدير فى روحه حاجه

طلع هيثم بسرعه لحق عبدالرحيم لقاه ماشى لسيارته

-هيثم / بوك هوا اللى قاله ايطلقها

-عبدالرحيم / كييييييف …بوى هوا اللى طلب طلاقها …ليش

رواية قضية شرف الحلقة السادسه

.
.
فى حوش مصطفى

كمال خاف على امه لانها شهقت لما حكالها على موضوع الطلاق …
فقررايروح للحوش لانه خاف عليها …

فى الصالة سالمه وندى يبكو …وايمن ايعارك …

انفتح باب الحوش وخش كمال فى يده شنطه كبيرة

-ايمن وقف يعيط / انت راجل انت …اقسم بالله حركتك اللى درتها ماهى حركه تريس

حط كمال الشنطه / هادى ورثتنا من حوش جدى

ايمن وسالمه مصدومين / ورثه شنو!!؟

انفتح الباب وخش مصطفى / خيركم عياطكم واصل للدروج شن فى
-سالمه / ومنين بنشبحوه الخير…ولدك طلق مرته

-مصطفى انصدم/ كيف اطلق بنت عمك ياحمار ..من شاورت ولا ماعندكش كبيرانت ….خيركم شن جاكم ماكم كنتو متفاهمين

-كمال / خديت ورثتنا فى حوش جدى من الفاسد خوك
-مصطفى / خوى مش فاسد يلى ماتتحشمش على وجهك

انصدمت العيله كلها كيف ايدافع عليه

-كمال / مش ماللى احنا صغار وانت تقوللنا انه خنبك ..
وتقولنا انه كلى عليك حقك ..وقاعد تكره فينا فيه

-مصطفى / خنبنى انا …وزلبحنى انا …انت شن دخلك اطلق مرتك
-كمال / طلقتها على خاطركم انتو…بيش انردو حقنا .. طلاقها كان ثمنه ورثة الحوش

-ايمن نقز على كمال خنقه من رقبته / وبنت الناس شن دخلها يا واطى .. امينه فيش جت اطلقها فى اسبوعين ..شن بتقول عليها الناس توة….اقسم بالله كان ماتمشى تردها مانبدا الا ماشيلها انا وواخدها على سنه الله ورسوله

-كمال يتعارك معاه باليدين / شكلك حاط عينك عليها ياوسخ

-ايمن يتعارك / امالا تحسابنى حقير زيك

-وبدت سالمه تعيط / وووك عليا ياناس تعالولى ولادى بيدابحو ..
-ندى جت اتحز فيهم / ليش مطلقها يا كمال حرام عليك البنت شن دنبها

حز كمال روحه منهم / توة انا طلعت غالط …مش هدا كله درته على خاطركم

فتح الشنطه وانحدفو الفلوس / 350 الف …حقنا فى نص الحوش

-مصطفى فاتح عيونه / منين جبتهم هادو

-كمال / جبتهم من خوك …حقنا اللى خداه مننا سنين
..ردهولى توة لانى هددته بي شرف بنته

-مصطفى / انا ربيتك هكى ..انا علمتك تلعب بشرف الناس
..ياخسارة التربايه اللى ربيتهالك

-سالمه / توة جاى تعيط على تربايتك فيه .. منو رباهاله الربايه هادى ماهو انت…منو كرهم فى عمهم وصغار عمهم ماهو انت ..منو كادب عليهم ماهو انت

-مصطفى / صكرى فمك يا مصخة ..انا كادب عليهم
-سالمه / ايه انت كادب ومزلبحهم سنين

-ايمن شد امه / بالشوية عليك يااام بدوخى

-سالمه / حول من عليا …اسمعو يا وليداااتى راهو بوكم مزلبحكم ..راهو جدكم كتب الحوش باسم عمكم لانه مدين منه 30 الف ..ووقتها حوش جدكم يسوا المبلغ هدا …
مصطفى يشبحلها وانصمت
-سالمه / بوكم لما حكالكم قاللكم ان عمكم خدى الحوش
…لكن ماقاللكمش ان جدكم خلى وصيه كاتب فيها انه رد ديونه لى عمكم

-كمال متفاجأ / انتى شن تقولى يااام …
وتلفت لبوه / حق الكلام هدا يابوى .. حق جدى كاتب ان هدا دين ورده
-ايمن / قصدكم جدى رد ديونه لعمى مختار بحق الحوش…. فقولنا يابوى الكلان هدا حق ولا كدب
-سالمه / مايقدرش ايكدبنى …اسالو شيابين العيلة كلهم …
برو للشيخ اللى عاطيه جدكم وصيته …تو يوريلكم الكلام اللى كاتبه جدكم كله ..ان يرد فى دين مختار عليه

-كمال / وانتى كيف ادسى كلام خطير زى هدا ..انتى ماتعرفيش ان الساكت عن الحق شيطان اخرس

-سالمه / هوا حالف عليا مانحكيلكمش ..لكن انا ما كنتش نحساب بتوصل الحكايه هكى

-كمال / ليش يابوى درت هكى ..ليش تخلينا نخشو فى الدوامه هادى كلها

-ايمن / لومك على روحك ..احنا ماقلنالكش طلق بنت عمك ولا ساوم عليها ..ولا بوى طلب منك ادير هكى

انفتح باب الحوش وخش اكرم / حاق طلقت امينه يا كمال
-سالمه / حق ياوليدى..وانت من قالك

-اكرم / توة جماعتى قالولى ان هيثم مع اخته فى العيادة
-ندى / فى العيادة ؟؟؟

-اكرم تلفت لكمال / امينه عندها انهيار عصبي حاد

كمال فاتح عيونه مصدوم …

ضرب الطاولة قدامه حدفها وطلع ….وصكر الباب بالقوة

-ايمن / عيشه كلبه …

وخدى مفاتيحه وطلع من الحوش

رواية قضية شرف الحلقة السادسه

قدام غرفه امينه …

الدكتور سمح لامها وبوها ايخشو ايشوفوها

خشو الزوز لقوها راقدة
وخش الدكتور وراهم

-نوريه تبكى / خيرها يا دكتور ..راقدة ولا قاعدة مغمى عليها

-خداهم الدكتور على جنب / اطمنى يا حاجه احنا عاطيينها مهدئ …وهدا هوا اللى مرقدها

-مختار صوته مخنوق / هيا شن صارلها يا دكتور رانا دارت بينا الدنيا

-الدكتور/ عندها انهيار عصبي …اكيدة فى حاجه صارت خلت اعصابها تنهار

-نوريه / راجلها بعتلها ورقة طلاقها اليوم بلا سبب

مختار شبحلها

-نوريه / لازم نحطو الدكتور فى الصورة

-الدكتور/ تمام ..انا توة فهمت ..

وشبحلهم / شوفو انا حنعطيها مهدئات …بس ردو بالكم اتخلوها تزعل …عالاقل لمدة شهر .. لان اعصابها تالفات

وتلفت لنوريه / والاكل ثم الاكل يا حاجه ..ضرورى اتخليها تاكل عشان الدوا …توة خلوكم جنبها ولما تفيق تقدرو اتروحو بيها

وبالفعل قعدو مختار ونوريه جنب بنتهم ايراجو فيها تفيق
بيش بيروحو بيها
رواية قضية شرف الحلقة السادسه

فى حوش مصطفى

-مصطفى / تو هدا عمل مسلمين …هدا عمل كفار …ايطلق
مراءة من لحمه ودمه فى عشرة ايام ..وين صارت هادى

-ندى / يا نارى على امينه ..غير شن صاير فيها توة

-مصطفى / انا ماواجعتنى غير البنيه …فاش جت ..يرضاها هوا لاخته

-اكرم يشبح للفلوس / شنهما الفلوس هادو
-سالمه تبى تغير الموضوع / بالله عليك يامصطفى خلينى نمشيلها

-ندى / حتى انا يابوى خلينى نمشى

وهوا ساكت …

-سالمه تبكى / بالله عليك يا مطصفى خلينى نمشى مع اكرم
نشوفها بس ونروح
-مصطفى / انتى بري ..لكن ندى لا

“خايف يشبحها واحد من ولاد عمها وتعجبه😁..
مايحسابهاش غارقه لودانها مع واحد منهم ”

-ندى تبكى / علاش يابوى خلينى نمشى نشوفها

-اكرم / بري مرة ثانيه فكينا من المشاكل …
وتلفت لامه / هيا يااام نوضى

وناضت سالمه تجرى تلبس فى جلابيتها …وخشت ندى وراها

-ندى / علاش مايبيش يخلينى نمشى نشوفها ..ليش بس

-سالمه / يابنيتى فكينا …خير مايقولى حتى انا اقعدى

وطلعت سالمه / هيا وليدى نمشو هى ..

طلع اكرم وامه وراه

-مطصفى وجعاته امينه / استنو
-اكرم / خيرك يابوى

– غمض عيونه وقعد ساكت شوى / بنمشى معاكم

-سالمه فرحت / خير ما ادير ما مصطفى ..والله البنيه ماتستاهل اللى صارلها

-ندى فرحانه / بلحقه يابوى بتمشى معاهم
-مصطفى / هيا

وطلعو وسكرو الباب وخلو الفلوس امبزعه وراهم …

ولقتها ندى فرصه انها تكلم عبدالرحيم مدامها قعدت فى الحوش بروحها

_________________________________

لما طلع عبدالرحيم لحقه هيثم …

ركب معاه فى السيارة ….

عبدالرحيم يجرى بالسيارة قريب يحرقها

ويعارك / مش تريس احنا …ياخد اختنا ويلوحهالنا …شن دارت بيش طلقها ايفهمنا…
-هيثم متعصب / وحلف على امك بالطلاق بيش يتاكد اننا مانديرو شى من وراه

-عبدالرحيم / هدا ظلم ..ظلم

-هيثم / يارحيم دور السيارة وارجع للعيادة..امك خليناها مشغولة ..وحتى بوك
-عبدالرحيم / مش مولى …خليه بروحه مدامه حالف علينا

-هيثم / ياراجل عالاقل على خاطر اختك …مانعرفوش الدكتور شن طالب …بالك يبي دوا ولا يبارى

لف رحيم الدومان بعصبية ورجع للعيادة

رواية قضية شرف الحلقة السادسه

فى العيادة

نوريه ومختار طلعو من غرفه امينه للممر

مقعمزين ايراجو فيها تفيق …بوها يبي ايروح بيها

امينه فاقت …تشبح للغرفه وحايرة هيا وين ….

شبحت للتغدية لقت الشكارة تامه

حولت طوبو التغديه من يدها وسكرت الكنيوله …

وتسمع فى دوشه …نزلت من السرير بالشوى ..تبى تمشى للباب تفتحه

فى الممر …

مختار مقعمز عالكراسى هوا ونوريه ….

ويقيم راسه يلقى خوه مصطفى ومرته سالمه واكرم جايين

-مختار بدى يعيط/ شن جاى تبى …شن تبى منى ثانى ….

مصطفى انهار بالبكى …..

موقف عظيم ….سنووووووووات ماشافش خوه حتى من بعيد …مايمشيش لمناسبات اقاربه بيش مايتلاقوش
ولما يتلاقو …يكون السبب امينه …اللى بلطافتها وبساطتها خلت عمها ومرت عمها وصغار عمها يحبوها

امينه زادت قربت من الباب تسمع فى صوت عراك
مصطفى يبكى / يا ولد امى والله مانندرى عليه بيدير هكى
-مختار / كدااااب ..انت متفاهم معاه مالاول

وتلفت لنوريه بغضب / اطلعو خلونا بروحنا

امينه قربت من الباب اكثر

ونوريه وسالمه واكرم طلعو من الممر

-مصطفى / انا توة اللى يهمنى امينه ..والله كان تبى نعفس على رقبته ايردها الليله
-مختار/ طلاق بنتى انا اللى طلبته ..شكل زى هدا معش نخليله بنتى
-امينه/ 😳

-مصطفى / احنا توة انردوهم لبعض وبعدين ماتكون الا راضى يامختار

-مختار/ نص حق الحوش بعتهولك

-مصطفى / مانبيشى

-مختار/ توة ماتبيشى بعد مابعتلى ولدك يساومنى على بنتى انه ايديرلها قضيه شرف .. يتهمها فى شرفها ..
-مصطفى / انا والله العظيم ثلاثة ماندرى عليه
-مختار/ تو ماتفاهمتش معاه يهددنى كان انا ماوافقتش نبيع الحوش انه بيشكى فالمحكمه ويقول انه لقاها مش بنيه

وتجى امينه طايحه …

مختار ومصطفى سمعو الطيحه فتحو الباب وخشو يجرو

-مختار / رص عالجرس يا مصطفى

مشى مصطفى يجرى للجرس ضربه …وجو الممرضات يجرو

-الممرضه / لو سمحتو اطلعو ..اطلعو انتو الزوز

وخش الدكتور

وطلعوهم وسكرو عليهم الباب

مصطفى منغير مايحس ..مشى يجرى لخوه اضبطه …

انهارو الزوز بالبكى …

جت نوريه وسالمه واكرم انصدمو من اللى يشبحو فيه

-نوريه / شن فى …امينه خيرها

وخشو عبدالرحيم وهيثم وانصدمو حتى هما فالمنظر

-عبدالرحيم / ومضبطه وتبكى معاه يا بوى

-اكرم / صلى عالنبى يارحيم

-هيثم /اسمع يا مسخين انت وخوتك …نتو معش عندكم اى علاقه بينا

-اكرم انصدم / الكلام هدا ليا انا يا هيثم ..انا اكرم …انا خوك

-هيثم / قلنالكم من اليوم معش ليكم بينا اى علاقه …اللى درتوه ساد….اختى بين الحياة والموت…وانت لا خوى لا نعرفك

شرين تليفون عبدالرحيم شبح لقاها ندى

مشى للممر الثانى وفتح الخط

-ندى / الووو
-عبدالرحيم يعيط / اسمعى رقمى تمسحيه …وانا تمسحينى من حياتك بكل

-ندى تعيط وتنقز/ لااااا يا عبدالرحيم …لاااا تربح انا شن دخلى

-عبدالرحيم / لو استمريت معاك معناها انا مش راجل …انا تنسينى من حياتك نهائي …واللى جانا منكم ومن خلطتكم ساد

-ندى تعيط / لاااا راجل وسيد الرجاله …عبدالرحيم انت تعرفنى من صغري ..انت مربينى على يدك …بالله عليك ماتسيبنى

-عبدالرحيم / انا سيبتك خلاص من بكرى …ورقمى بنغيره
..والاسبوع الجاى بنخطبك وبنتزوج

-ندى / لاااااا لاااااا متقولش بنتزوج

-عبدالرحيم / خلونا فى حالنا ….خلاص معش نبوكم

وصكر عليها الخط !!!
_________________________________

امينه قاعدة فى العيادة …

وبدل ماكانت بتطلع فى نفس اليوم …انتكست حالتها
…وقعدت عشرة ايام فى العيادة …
وكل ماتدكر ان كمال باعها اتجيها نوبه …وكل ماتدكر انه ليله اللى طلقها راقد معاها تجيها نوبه

فى عشرة ايام راحت زى الخلال .. لا ماكله لا شراب ..تغديه وخلاص تحت عيونها كله اسود والوجه امطبق

الكل تعبان ..

كمال من يومها معش روح للحوش ..وعلى قد ماتتصل بيه امه يرد ويطمن فيها لكن معش روح

يتألم …عالعمله اللى دارها …زعلان من بوه وامه انهم دسو عليهم الحقيقه …لانه مشى وسال الشيابين وتاكد ان الحوش بالفعل من حق عمه

كل يوم يمشى للعيادة …يسأل فى ممرضه معينه على حالة امينه ..قاللها انه راجلها وانه السبب فى الحال اللى وصلتله
…وتحكيله عليها …ويعطى فيها فى تليفونه تصورله فيها وهيا راقدة ومصدوم كيف ضعفت …ويدعى فى ربي انها تطلع حامل ..بيش الطلاق يبطل

اما ندى …يانارى على ندى …لا اكل ولاشرب هيا الثانيه …
وتكلم فى رحيم على رقمه تلقى فيه مقفل ..مغير شفرته
قريب تكلب …قريب تهبل ..وامها حايرة فيها شن صايرلها
…هدا كله زعلانه على مرت خوها … ندى مقهورة وحاسة ان الظلم اللى نظلماته امينه ..انظلمت هيا اضعافه

وعبدالرحيم حتى هوا ماصاير فيه ..شادها طول الليل بكى كل مايفتح على صورها وعلى رسايلها فى تليفونه

اما مصطفى نشد واستقصى الحوش لمن باعه مختار…عرف الشخص..خدى هادوكه الفلوس فى شنطه …وركب هوا واكرم مشى ردهم للراجل …ومشى لحوش مختار طق عالباب

-فتح هيثم مصدوم/ انتو

-مصطفى / نادى على بوك

خش هيثم / بوى ..يابوى ..يبيك خوك

طلع مختار وقف فم الباب / نعم

-مصطفى / الفلوس رديتهم للراجل …برة ردله باقى الفلوس واستلم حوشك

-هيثم مستغرب / انت بعت الحوش يابوى

-مصطفى / لا باعه لاسو …الحوش قاعد حوشكم

وتلفت مصطفى لى مختار بأسف / ياريت ياولد امى من اول يوم قلتلى خوده الحوش ومانبيشى ..رانى هديت وهدا كله ماصارش …لكن انت فرحت برزق الدنيا ..وانا جحدت ..وهدا اللى ولع النار بينا

وتلفت بيمشى

-مختار/ تفضل خش للحوش يامصطفى خيرك ماشى

-مصطفى😔 / نجيك فى نهار مبروك انشالله.. وسلملى على امينه ونورية

رواية قضية شرف الحلقة السادسه

طلعت امينه من العيادة ….

قاعدة بالمهدئات …..

امورها كويسه لانها تاخد فى الحبوب …ولما حكو للدكتور قصتها ..وصاهم انهم مايزعجوهاش ..ومايجيبوش سيرت راجلها فى الحوش لانها تعصبها

مقعمزين نوريه وامينه وهيثم فى الصاله

طق باب الحوش

-نوريه / زعما شكون

-هيثم / خلى نشبح

فتح الباب يلقى سالمه وايمن فم الباب

-سالمه / امينه روحت

-هيثم / بالله سامحينا مرت عمى الدكتور قال ماديروش اى حاجه تعصبها
-ايمن / وخشت امى ليها بتعصبها

-هيثم يشبحله بعصبيه/ ايه بتعصبها
-نوريه / شكون يا هيثم

-سالمه / انا سالمه يانوريه …ودخلت راسها من الباب

-نوريه / خشى ياسالمه خيرك واقفة غادى

وبحركه لا ايراديه وقفت امينه وتلفتت خشت لدارها بسرعه

خشو ايمن وسالمه للصاله
هيثم / نستادنكم انا

وطلع ….

قعدو سالمه وايمن قريب نص ساعه …ومع هدا مابتش امينه تطلع

-ايمن / انا اول مرة نخش حوشكم ياعمتى نوريه
…وماجايب امى وجاى الا على خاطرها وبيش نستسمحوها

-سالمه/ والله حتى عمها صاير فيه فى الحوش..وندى لاتاكل ولا تشرب على خاطر هالموضوع

-ايمن / صراحة كلنا تأثرنا بالموضوع .. واحنا مش اصحاب سو ولا نرضو السية لبنات الناس

وثانى رفضت امينه انها تطلعلهم ….او تقابلهم

_____________________________________

.
.
جماعه هيثم واكرم مقعمزين ومعاهم اكرم

-مراد / ياولاد …احنا لازم انصالحو بين اكرم وهيثم

وشبحو لاكرم

-اكرم / ياريت …

-نعيم / اهو كلمته وقريب يوصل ..انحاولو انوفقو بيناتكم

وطق الباب وفتح محمد وخش هيثم

يلقى اكرم مقعمز لف وبيطلع …

اينقزو الشباب كلها شدوه / والله ماك طالعها

-هيثم / الشكل هدا مانقعدش معاه فى مكان واحد

والشباب كل واحد يقنع فيه من جهه واكرم ساكت

بعتالى وقف

-اكرم / حتى لما كانو اهلنا متعاركين انا وانت كنا صحاب
…وكونه خوى كمال غلط فهدا مايعنيش اننا نتفارقو

هيثم ساكت

-اكرم / انا بنجيك و بنضبطك ..وكانك تبى ادفنى دف

ومشى بخطوات سريعه واضبط هيثم …

هيثم منغير مايحس لف ايديه على ضهر اكرم واضبطه وقعدو يبكو الزوز …

والشباب كلها تبكى

__________________________________

.
.
.
.
.
.
.
.
.
.
.

بعد شهر …

صارتلهم حالة وفاة فى بلادهم

نوريه ومختار مشو من الصبح

وسالمه ومصطفى مشو الضهر

ندى قاعدة مع خوتها بروحها …

طيبتلهم الغدى وهيا يا دوبك تتحرك

لا تاكل ولا تشرب وحالتها النفسيه زى الزفت

-ندى/ قالتلى امى باتى فى حوش خالك

-ايمن / امتى بتمشى

-ندى / بعتالى شوى غير نكمل قضيه الحوش والكوجينه وبنمشى

-ايمن / باهى

حوش خالها فى نفس العمارة

ولكن ندى عندها راى ثانى …قررت انها تهرب من حوشهم وتمشى لعبد الرحيم
لبست نقاب …وطلعت من العمارة لما تاكدت ان اكرم وايمن بعاد …مشت مسافه …وقفت تاكسى …ومشت لحوش عمها
شرينت عالباب …ردت امينه من الانترفون الداخلى / شكون

-ندى / انا ندى افتحى يا امينه

امينه حايرة ندى شن جابها ليهم

فتحت الباب …واضبطت ندى وقعدو يبكو

-ندى / ناديلى عبدالرحيم
-امينه / وانتى منين تعرفيه عبدالرحيم

-ندى / غير ناديهولى تربحى
-امينه / هوا مهناش خلى نكلمه ايجى

-ندى / ماتقوليلاش ان انا هنايا

وبالفعل كلمت امينه عبدالرحيم وقالتله تعالى نبيك ضروى

جى عبدالرحيم يتفاجأ بى ندى

-مسكها من كتافها الزوز / انتى شن جابك هنايا
-ندى تبكى / انا هربت من حوشنا ..ومعش موليا..منقعد معاك

-امينه انخلعت / كيف تهربي …كيف
-ندى / عبدالرحيم انا نحبك ومنقدرش نعيش منغيرك

-عبدالرحيم يعيط / وانا غيرت رائييا اختى ومعش نبيك .. بتسيفى عليا ولا كيف
-ندى تبكى/ عبدالرحيم عيب عليك متقولش اختى

وامينه مصدومه فى الحوار اللى صاير قدامها

-عبدالرحيم عطاها بالضهر/ اهلك غلطو فينا … ومستحيل مزال نرضى نحط يدى فى يد واحد منهم
-ندى/ هما غلطو ليش انا نتحمل نتيجة الغلط هدا
-عبدالرحيم / لانك بنتهم .. ومايشرفنيش اناسبهم
-ندى /و ليش خليتنى نحبك مدامك بتتخلى عليا بالسهولة هادى
-عبدالرحيم / بري لومى على اهلك لانهم هما السبب فى اللى صايرلنا كله
-ندى تبكى / انت مربينى وانا صغيرة …معش نعرف نتعود على غيرك .. معش نعرف نحب غيرك .. تربح ياعبدالرحيم ماتتخلاش عليا

-جى قامها من كتفها / اطلعى …اطلعى توة نوصلك حوش بوك

-ندى / معش نقدر انولى يقتلونى
-امينه / انتى كيف طلعتى من الخوش

-ندى / قلتلهم بنبات مع بنات خالى
-امينه / خلاص نوضى انوصلوك لحوش خالك

-ندى / لاااا لااا مش حنسيب عبدالرحيم الا للقبر
-امينه / ندى حبيبتى هروبك بى ازم المشكله مش بيحلها
…خلينى توة نوصلك لحوش خالك ..ونوعدك انى نوقف معاك

-ندى / توعدينى
-امينه / نوعدك

وبالفعل ركبوها فى السيارة عبدالرحيم وامينه …وحطوها قدام العمارة على اساس انها كيف طالعه من حوشهم وماشيه لحوش خالها

وبالفعل طقت عليهم وخشت عادى…واتصلت بامينه قالتها انها خشت والامور تمام ومفيش حد سال عليها

_______________________________________

تمت ….ويتبع

 

لمشاهدة جميع اعمال الكاتبة : روايات زهور جمال الدين

اترك رد

زر الذهاب إلى الأعلى