رواية ولدك يا بلادي الحلقة الحادية عشر .. روايات صفاء روايات ليبيه | القلم الناجح
روايات ليبيه كاملة

رواية ولدك يا بلادي الحلقة الحادية عشر .. روايات صفاء روايات ليبيه

رواية ولدك يا بلادي الحلقة الحادية عشر .. روايات صفاء روايات ليبيه

#ولدك_يابلادي

الحلقــــــــــ(11)ـــــــة

فرج …… مش تزوير خيرك شن تقول انت
امحمد ….. مش تزوير لكن بوي مات قبل جمال الله يرحمهم صح خدعنا الدكتور لكن الحق حق
اعتدال ……😨 حطيت السفرا ورجعت طلعت بنمشي لحوشنا
اياد ….. شفتها ماشية كانها دايخة ناديتها اعتدال !!
اعتدال ….. قعدت نشوفله مصدومة ، معرفتش شن نقوله كلامه صح هو طلع على حق
اياد ….. اعتدال خوفتيني خيرك ؟؟
اعتدال ….. 🥺 خيرك ؟
اياد …… انتِ خيرك شن صاير معاك ؟
اعتدال ….. مافيه شيء خيرني
اياد …… طبعا عرس صديق وانى من جدي نسأل خيرك
اعتدال ….. ايه ايه بالزبط ومشيت وخليته
اياد …… 😏
اعتدال …… خشيت للحوش واني مصدومة في بابا وعمي معقولة يطلعوا هكي مش مصدقة انهم زوروا علاش 💔

~~~~~~~~~~~~~~~~~~~~~~~~~~~~

افنان ……. 💔 خلاص الاسبوع هذا العرس مش عارفة كيف بندير معقولة خلاص معادش فيه امل ليا انى وايوب ، الاهم من هذا كله ايوب شن بيصير فيه هل حق حمزة بيطلعه والا لا ، حمزة معادش اتصل غريبة مش عارفه كيف نتصرف هل نوثق فيه انه يطلع ايوب والا لا
حور ….. مقعمزة سرحانه ونفكر في حياتي كيف بتتغير شن بيصير فيها
جميلة….. توا هذا يصير منه طلعتوا للسوق مره وقلتوا تمينا العرائس يبهدلوا في اهلهم نبي ونبي وانتم نتجدوا فيكم تطلعوا وتخدوا
افنان ……. 😪 مش تقلولنا بتتوا من سنين عندنا ساد
نعيمة ….. ارواب وحاجات للحوش لكن لبس الطلعة ماعندكمش خيركم انتِ صديق عطاك المهر قداش ليك وانت خطيبك بعت 10 الف دولار قالت تاخد شن تبي
افنان …..😒 معرق عليهم ماهو
جميلة…… نوضوا يهديكم الله ، افنان ماحد قالك وافقي على خاطر الناس وخايفة يقولوا خاطيبها هرب وخلها ولد الناس مادنبه شيء جايك من الباب وطالب الحلال ، توا حور كلنا عادرينها لكن انتِ
افنان ….. 💔 توا ايوب طلع يلي مش كويس وحمزة هو الكويس
جميلة….. علاش 😠 شن تقولي انتِ
دانية….. خلاص توا نمشوا اليوم لبروفت الفيلو تمام بنات
افنان …… نضت خشيت
دانية …… توا نكلم وحده من البنات تطلعنا

⭐️روايــــــــــــات صفـــــــــــــــاء⭐️

~~~~~~~~~~~~~~~~~~~~~~~~~~

أوس ….. اوووو عريسنا
حمزة…… جيت !
أوس ……. شن شعورك
حمزة…… مش عارف
أوس …… توا مش عارف !!! قريب هبلت باش خديتها
حمزة……. مش مدوره وماتبيش ووافقت على خاطر واحد ثاني شن يلي يفرح !!!
أوس ….. توا عرفت هذا كله
حمزة. …… عارف من الاول لكن شن بندير ، المهم توا نفكر في الايام الجايه وكيف بنتعامل معها
أوس ….. تمشي تمشي الامور الصاعب فات ، النسوين تاخدهم بكلمتين ، وطلع
حمزة….. ان شاء الله خير ، طلعت تلفوني فتحته وانى نفكر نتصل بيها والا لا

افنان ….. خديت تلفوني وجربت نتصل بيه رن
حمزة….. فتحت الخط القلوب عند بعضها
افنان …. انى قلبي نعرفه عند من شوف روحك 😒
حمزة…..💔 صدمتنى كلمتها ماكنتش تجرح هكي قبل ،، علاش اتصلتي ناقصك شيء تبي شيء
افنان …… 💔 شن ممكن نكون نبي منك ؟؟؟
حمزة……. شن ؟
افنان …… امته بيطلع
حمزة…. مش عارف
افنان ….. بعد يومين الفاتحة ؟ هكي قال بابا يطلع بعد ماتكملوا ؟
حمزة…… لا يطلع يوم الجمعة
افنان …… علاش شن متوقع منى ندير مثلا نقول مانبيش نروح معاك ، لو تعرفني حتى شوية تعرف مستحيل نفضح عيلتي هكي والا ندير فضيحة زي هذه
حمزة…… هو يوم هو اثنين الجمعة يطلع
افنان….. وانى كيف بنوثق في كلامك ؟؟؟
حمزة…… ماعندكش خيار ثاني ومش ح نقدم اي ضمان على كلامي تعلمي توثقي فيه 😉
افنان ……..😒 بنصكر
حمزة…… سلام
افنان ……. نكلم في. روحي صكري السماعة في وجهه شن بنصكر هذه تشتوري فيه يعنى 🤦🏻‍♀️

~~~~~~~~~~~~~~~~~~~~~~~~~~~~

حور …… اعتدال ماجتش
دانية…… فوتها اكيد بدير زي في الفاتحة الاولى زعميتها مريضة
حور ….. لكن توا حتى على خاطر افنان
صابرين….. السلام عليكم
حور ….. اهلا وسلمت علها
صابرين….. ربي يكمللكم على خير تفضلي
افنان …… طلعت من الدار صابرين اهلين
صابرين ….. وهذه هديتك تفضلي
دانية…… ترا افتحوهم
حور …… شن هذا وبديت نفتح في الباكوا
صابرين …… روب 5 قطع اعتبريه روب الدخول خديتلكم لون سكري
حور ….. حدفته على طول يدي ، تبي نلبس هكي قدام صديق باش يقتلني
دانية …… هههههه يابنتى خلاص مش خوك توا بطلي خوف منه
افنان ….. نشوف لحور كيف متحشمه ههه
صابرين….. هيا حتى انتِ عيطي زيها
افنان …… لالا انى اموري ميه ميه البيجامة الطويلة تناسبنى
صابرين ….. هههههه شكلي بنلقط دعي العرسان من اول ليلة
دانية….. هيا نوضوا اتفقت مع داليا ترفعنا للبروفا متع الفيلو قريب توصل
افنان وحور ….. فكينا 😩
دانية…… كان قادرين تتحملوا لسان امي فوتوا
افنان …… نوضي حور نوضي مشينا ووجهي ووجه حور احرف من بعض لبست الفيلو ووقفت نشوف لروحي كنت متخيله انى يوم بنلبسه بنكون فرحانه وسعيدة ماتخيلتش انى بنلبسه ليواب لانه ملناش هلبا مع بعض بس طول عمري نحس انى بنكون فرحانه وراضيا يوم نتزوج مش هكي 💔 طلعنا ورفعتنا دانية للصالون الاثنين رفضنا نغيروا لون شعرنا روحنا وهي تغلي بعد مع رفعتنا بالغصب شرتلنا ميك اب وحاجات
اعتدال ……. غسلت وجهي ومشيت للبنات مالقتهمش شوية وخشوا
صابرين …… ترا وروني شن خديتوا
دانية ……. اقسم بالله وانى نتفرج على الفلوس وقدامك المحل تاخدي شن تبي قريب نطير بالفرحة ، وهم وجوههم مقلوبة تقول في عزي صدق من قال الفقري فقري
افنان ….. ريحينا خديتي شن تبي وله ، اعتدال خيرك
اعتدال ….. شيء
حور …… انى بنخش ندوش ونصلي 😔

⭐️روايــــــــــــات صفـــــــــــــــاء⭐️

~~~~~~~~~~~~~~~~~~~~~~~~~~~~~

#ثاني_يوم

اعتدال …… نحس في روحي معادش نبي نقابل بابا وعمي 😢 طاحوا من عينى بصراحة ومش عارفه شن نقول نوجههم والا ندير روحي مانعرف شيء والا شن ندير بالزبط 💔 قرارت ناخد رأي افنان مشيتلهم
افنان …… اعتدال خشي
اعتدال …. مدام مافيه حد تعالي نبيك في حاجه
افنان ……. خشيت معها للدار شن ؟
اعتدال ….. كان عرفتي حاجه على شخص قريب منك وتحبيه ،تعرفي انه داير حاجه مش كويسه لحد تحكي للشخص هذا والا تواجهي الاول
افنان ……🤕 من ربي راسي يوجع فيه تكلمي زي الخلق خل نفهم
اعتدال ….. مثلا مثلا هه مجرد مثال ، تكتشفي انه بابا وعمي صح مزورين اورق الورث باش ياخدوا فلوس اياد تحكي لاياد والا تواجهيهم والا تسكتي قتلك مجرد مثال بس
افنان …… عارفه مجرد مثال معقولة اساسا بابا وعمي يديروا حاجه زي هكي هههه
اعتدال ……💔 شفت كيف كلنا واثقين فيهم علاش بس علاش هكي يديروا
افنان …. من رأيي كان شخص غالي عليك هلبا هكي تواجهيه هو وتسمعي منه
اعتدال ….. مش عارفه
افنان …… رن تلفوني رقم غريب 🙁 زعما من هذا الو
/////…. الو افنان
افنان …… تفضلي من ؟
//////…… انى ملاك حماتك
افنان ….. حماتي؟؟؟؟؟
ملاك …… ههههه ايه خيرك اخت حمزة يلي جيتكم
افنان …… اها راح مني الاسم
ملاك …… شن اخبارك شن امورك اكيد حايسين ؟؟
افنان …… 😒 ايه
ملاك ……. قتلك عالكسوه ال….
افنان …… كسوة شن مافيش كسوة
ملاك …… علاش اللطف
افنان …… رقم واحد عمي وجدي مالهمش هلبا متوفين والاهم متزوجة معاي بنت عمي وهي مش جابيلها كسوة لهذا ماتجيش وحده يجبولها ووحده لا
ملاك …… ماما تبي تفرح بولدها مش ح ترضا
افنان …….😒 امك بدات عارفه يلي فيها بلاش جو زايد مانبيش كسوة
ملاك …… جو زايد ؟؟؟ ماشي هيا سلام
افنان ….. 😒 كرهتهم كلهم الزفت عيلة زي بعضهم زي الولد زي الاخت والام
اعتدال …… خيرك هكي اسلوبك كيف بتعاشريهم
افنان ….. فكيني منهم امهم نترجا فيها وهي تقولي بالك تهدي ولدي على اساس انى ملائكة وتوا يبوني نتعامل انه زواج عادي وعاجبني
اعتدال …… افنان انتِ وافقتي بكامل قواك العقلية مدريش جو المسلسلات والافلام بناخده فتره🤨 مش مخلياته يقربني 🤨 بعدين نطلق وناخد يلي نحبه راهو هذا مايمشي معانه المطلق مايخدهاش عزابي 🤷🏻‍♀️ هذا مجتمعنا يلي تطلق وهي بنت يديروا العيب فيها 🤷🏻‍♀️ فكي روحك سيبيه توا كان هذا يلي في رأسك وايوب ليه رب كريم وحمزة ليه رب اقوى منه
افنان …… ونعم بالله ، بس ماتخافيش لا متزوجة بنية الطلاق ولا نفكر انه في يوم بنرجع نتزوج ايوب 💔 راضيا بالنصيب يلي كتبة ليا ربي وانى يلي وافقت بس هذا مش معناه انى بنمثل انى عايشة بسعادة
اعتدال ….. ربي يكتبلك الخير
افنان ……. انتِ شن شعورك
اعتدال …… شيء رأسي ملخبط لدرجة نسيت قصة صديق والعرس 💔

~~~~~~~~~~~~~~~~~~~~~~~~~~~~~~

ملاك ….. إتصلت بحمزة
حمزة…… نعم
ملاك …… تعرف خطيبتك هذه وحده وقحة وقليلة ادب قالت على ماما ادير في الجو وقالت ماتبيش كسوة بعد الجو يلي شرناه كله
حمزة……. باهي ؟
ملاك ….. شن باهي !!
حمزة….. ملاك فكونا ماتبدوش من توا خل توصل قبل بعدها ابدوا في قالت ودارت فوتي الكسوة خلاص
ملاك …… من توا هكي تقول لما توصل فيك كيف
حمزة……😡 احمدي ربك انى مش في الحوش والا كسرت رقبتك على اسلوبك هذا وصكرت في وجهه

~~~~~~~~~~~~~~~~~~~~~~~~~~

#يوم_الفاتحة

حمزة…. لبسة زبون عنابي وطلعت لقيت الشباب جايبين فرقة وجو مشينا زحما سلاح نوبه ❤️ كنت فرحان عكس صديق يلي كان واضح عليه التوتر
صديق …… لا خو لا بو لا ام هذه حياة اليتيم زيني زيها 💔 لبست وطلعت صحابي كانوا موجودين كنت نشوف لحمزة الفرحة باينه في عيونه هضاكه الراجل القوي الجدي مختفي جاي مكانه طفل بفرحة العيد بفرحة اللبسة الجديدة واللعبة الجديدة عيونه تبين قداش هو سعيد خشينا للجامع قروا فاتحتي انى الاول 💔 وخلاص حاليا حور مرتي شرعا وقانونا 💔
حمزة…… نشوف يمين ويسار متوتر خايف تصير حاجه ومايصيرش من الفاتحه واخيرا كملوا 😑 فاتحة صديق
أوس …… اطلع ياراجل دير روحك متحشم من بوك
حمزة….. هههههه يحمد ربي عطيته هو وكاله مامشيتش قريتها بروحي مع بوها
أوس …….. ههههه لا اديرها صراحةً
حمزة….. نشوف فيهم يقولوا مبروك اوووووف 😍 واخيرنا افنان مرتي مرررررررتي ليا انى ❤️

صابرين….. مبروك يابنات عادل قالوا قروا الفاتحة
حور افنان اعتدال …..😭😭😭😭😭😭
دانية…… ياعليك نكد
اعتدال ….. صديق توا خلاص يعنى وله شخص متزوج 💔
افنان ….. خلاص توا وليت مرت المجرم هذا 💔
حور ….. من اللحظه هذه انى مرت الشخص يلي اعتبرته خوي طول عمري 💔

صديق…… في لحظه زي هذه مفروض نتصل بيها نبارك ونقوللها انه خلاص تمت الفاتحة عالخير بس طعبا هذا لو كانت فاتحتك على وحده تحبها بس حور مستحيل ندير معها هكي

حمزة …. مااتصلتش بيها رغم فرحتى وانى نبي نعيط باعلى صوت خلاص ولت مرتي بس مااتصلتش لانى عارف انها بتكسر فرحتي وبتقول كلام يضايقنى

⭐️روايــــــــــــات صفـــــــــــــــاء⭐️

~~~~~~~~~~~~~~~~~~~~~~~~~~~

#يوم_الحنة

حور …. 😒 مانبيش
جميلة…… بنريش شعري والله شن يلي ماتبوشي اطلعوا زي الخلق حنو الناس تستنى فيكم ماعندناش عروس تطلع بلا حنه
افنان ….. ماما قتلك قال مانحبهاش 🤥
جميلة ….. يتشرط لما توصليه حني توا بعدها بطلي لكن عروس بلا حنه لا
حور ….. ياعن جد ماده رجليا محنيات قدام صديق 🤦🏻‍♀️ مرت عمي فوتوني انى
جميلة …… صديق وله راجلك توا
افنان …… طلعنا غطوا وجوهنا وبدوا يحنوا فينا يبونا نبكوا عاد وانى وحور ماخاطرناش بكل 🤦🏻‍♀️ طحنا فيها بكاء
اعتدال …….😭😭
جدة افنان ( ام امها) ….. توا بنياتي وليتوا نسواين سايروا رجالتكم خلوا الكلمة الطيبة بينكم ردي بالك من راجلك لبسه ماكلته يلي يقوله قولي حاضر ، كان تبيه يصلح حاجه قوليله صلح حالك كان فتح حاجه قوليله بفتح عليك كان ضوء حاجه قوليله اضوي عليك
افنان ….. حولت الغطاء من على وجهي 😒 وكان نبيه يرفعنى لمكان نقوله ارفعني ان شاءالله ربي يرفعك ؟؟؟؟
اعتدال ……😭😂😂😂 افنان
جدها ……. ياجميلة هذه بتروحلك من غدوا اهو قتلك
حور …… ههههه افنان الناس تسمع فيك
افنان …. رجعت غطيت وجهي

~~~~~~~~~~~~~~~~~~~~~~~~~~~~~~

#يوم_العرس

افنان….. نضنا الصبح لبسنا ومشينا للصالون مادرنا شيء من قبل لهذا خدينا يوم كامل وحنى من حاجه لحاجه كانت معانه عروسة ثانيه حسستنى كيف مفروض تكون العروس اما انى وحور كنا منكدين رن تلفوني حمزة يتصل فتحت الو
حمزة…. مساء الورد وين توا
افنان …… في الصالون ؟ علاش شن تبي
حمزة…… شيء نطمن على مرتي والا مننوع ؟
افنان …… بنصكر انى مش فاضية
حمزة……. تمام
افنان…….. حمزة غدوا وله خليك عند كلمتك
حمزة…… باهي بااااهي سلام وصكرت علاش متصل ومنكد على روحي مش عارف

~~~~~~~~~~~~~~~~~~~~~~~~~~~~

اعتدال ….. جهزنا صالة عمي جمال لانها كبيرة اصلا الحفلة بسيطة ، مخنوقة طول الوقت مش مصدقة انى نجهز لعرس صديق شوية وخش علينا بالبدلة 💔 شكله يهبل علاش مش انى يلي معاه علاش مش انى يلي مرته 😢
دانية…… مبروك صديق
صديق ….. هزتلها برأسي ماتبوا شيء ؟ مش ناقص شيء
صابرين….. انت عريس مدورش حتى اليوم حاصل
صديق ….. هههه مش مشكلة شوفي البنات كانهم جاهزات نمشي نجيبهم
اعتدال ….. بابا قال توا نجيبهم انى 💔 ومنها بعدين بيوصل افنان
صديق ….. علاش ! حمزة قال بنجي
اعتدال ……😢 وين نندري عليهم انى 😠
صديق …… اعتدال خيرك ومشيت جيهتها ، سالم رجع ضايقك رجع قالك حاجه
اعتدال ……😪 لالا بس هكي مش عارفه
صديق …… فيه حاجه قوليلي
اعتدال …… 🥺 ان شاءالله ومشيت
اياد ….. انى طالع
صديق ….. خليك احضر العرس
اياد …… لالا خودو رحتكم عندي ماندير
صديق ….. اياد ، ومشيت وقفت جنبه انت الوحيد يلي من ريحة بوي اقعد معانه احضر كون مكانه اليوم
اياد ……. قعدت نشوفله وساكت ،، تمام باهي ورجعت خشيت للدار غيرت وطلعت معاه

~~~~~~~~~~~~~~~~~~~~~~~~~~~

افنان ….. الساعة 8 كنا جاهزين كان الفيلو متعي كم ظهره مفتوح شوية ومن تحت مش منفوخ فيه لقطة بس شعري مفتوح وماحطيتش طرحه
حور ….. الفيلو متعي كان كم كامل شيفون بسيط مش منفوخ شعري خليته مفتوح على جنب وماحطيتش طرحة
صابرين ….. جت بتروح بيهم 😍 ماشاءالله مشالله
حور وافنان ……😒
صابرين ….. تعالوا اضربوني يالطيف في حياتي ماشفت عرائس زيكم ،، وين الطرحة هيا وقت
افنان ….. هم هكي
صابرين ….. امك تقتلكم اليوم نهاركم كيف بلا طرحات تقول الزواجة العاشرة ليكم
حور …… فوتي صابرين من جايبك ؟
صابرين ….. بابا
افنان ……. لبسونا عبايات الفيلو وطلعنا طول الطريق ساكتين ومتاكده حور تفكر زيني شن بيفوت هالليلة ، خشينا طبعا كانت حفلة بسيطة جدا في الحوش الجيران واقرب الاقربين بس انى وحور قالبين وجوهنا واعتدال احرف منه
اعتدال …… لبست قفطان اسود طويل وماحطيتش مكياج بكل شديت شعري للخلف وخلاص اساسا لبست وجيت بس باش نكون جنب افنان كنت متمنية الوقت يتمدد وماتجيش اللحظه يلي بيروح بيها لحوشه ويقعدوا مع بعض بس الوقت فات بسرعة وقالوا لبسوهم لانه اهل حمزة جو
افنان …… دانية الرقم عندك غدوا من الفجر تتصلي بيه وماتبطليش لين تتاكدي انه طلع
دانية…. وكان ماطلعش شن بديري ؟؟؟ بتطلقي مثلا؟؟؟
افنان …… انى نتصرف معاه بس ماتمشيش تضحيتي عالفاضي تمام ؟؟
دانية….. خلاص حاضر
افنان …… وخلي عمي يوصلني توا مانبيش نشوف وجهه 😒
دانية….. ياشينك ليلة حرفه عليك يا حمزة شكلها
حور …… لبستنى صابرين لا اهل عريس ياخدواك ولا اهل يسقدوك 💔😢 حياة اليتيم مؤلمة بشكل طلعتنى مرت عمي وصابرين
صديق ……. كنت واقف في الباب متوتر مش عارف كيف بنتصرف
صابرين …… ربي يهنيكم ساعدتها ركبت في السيارة
نعيمة …… توكل وليدي توا
صديق …… ركبت ولعت السيارة وولاد الشارع دايرين العاب نارية وعار وانى متحشم 🤦🏻‍♂️
حور ….. كنت بنموت صوتي مش طالع
صديق ….. حور ؟
حور …… بصوت ذوب طالع نعم
صديق ….. هههه حور والا غلطوا في افنان
حور …… حور. حور
صديق …… وصلنا اصلا الحوش بعده 5 دقائق بس ، نزلت وانى مش عارف نمشي نساعده والا لا شن ندير ياربي 💔
حور …… فتحت الباب ونزلت قعدت نمشي وراه فتح الباب خشيت ، ماحولتش الخمار متع العباية من على وجهي ، البنات جابوا شنطة امبكري ؟
صديق ….. ايه حطوها في الدار هذيكة
حور ….. تمام … مشيت خطوتين وجمعت قوتي وقتله .. تصبح على خير
صديق …… فهمت علها قلتلها وانت من اهل الخير
حور …..اوووف خشيت للدار وصكرتها

⭐️روايــــــــــــات صفـــــــــــــــاء⭐️

~~~~~~~~~~~~~~~~~~~~~~~~~~~~

افنان ….. انى مازال مشواري طويل 💔 طلعوني وفعلا كان حمزة جاي يبي يروح بيا وانى من الزحمة والتوتر صوتي مش طالع ركبت وسكتت
حمزة…… كان خاطري نشوفها 😍 ، مبروك
افنان …..😶
حمزة…… قولي اي حاجه خل نعرف انه مابدلوكش ؟
افنان ……😶 صوت الضرب والرصاص حاله تقول في جبهة
حمزة ….. ندرلهم في الضي وسبقتهم ، مش عارف بعد هالجو كيف بنرجع نلمهم ويخافوا مني زي قبل 🤦🏻‍♂️😂
افنان …… 😒 اتصلت حتى بالنيتو جي ضرب ضربتين ؟؟؟
حمزة…… هههه توا تأكدات انك افنان
افنان ……😒 وصلنا الصالة وجت اعتدال ساعدتني خشيت للدار واضح انه امه واخته معجبتهمش لانه الفيلو بسيط جدا وهم مديرين في صالة فخمة وكل شيء فخم اصلا قفطان اخته كان اكبر من الفيلو متعي
حمزة….. دقيت عالباب وخشيت 😍 او مره نشوفها بلا حجاب تهبببببل شعرها طوله لونه مع لون عيونها والميك اب الخفيف طالعه ملاك قعدت نشوفلها وساكت
افنان …… نشوف لوطه ونهز في رجلي بغضب
ملاك ….. هيا خيركم تقول هذا وين شفتوا بعض خشوا
افنان …… شفتله نخش بروحي 😒؟
ملاك …… كيف كيف ؟؟
حمزة…… ملاك خلينا بروحنا 😠
ملاك ….. طلعت ومش عاجبها
حمزة….. شفتلها وهزيت برأسي متع مافهمتش
افنان …… مش لازم نخشوا الزوز نخش بروحي ؟؟؟
حمزة….. مع انه امي وملاك بنكدوا اسبوع بعدها بس كيف ماتبي
افنان …..😏 كانه كيف مانبي راهو انى مش هنى
حمزة……. 💔 تمام ياافنان وفتحت الباب وطلعت ، شن هذا نجها من الشرق تجي من الغرب
افنان …… خشيت بروحي عالم عمري ماشفته دهب الماس قفطاين من مصممين مشهورين صالة فخمة بشكل كل شيء مبالغ فيه ، فاتت حوالي ساعة وقالولي هيا وكلهم مستغربين انه حمزة ماخشش حتى طلعني حتى نعيمة مرت عمي تغلي عليا طلعت سلمت على اعتدال ونبكي 😭 وهي تبكي مش زي دانية مبهورة بالصالة وتصور وخلاص ،، ركبت معاه وطلعنا كنا طول الطريق الزوز ساكتين

~~~~~~~~~~~~~~~~~~~~~~~~~~~~

حور ….. غسلت وجهي وبدلت الفيلو بالسيف باش فتحته قدا ماغسلت وجهي مرجعش زي قبل شن هذا اوووف والله العروس فيها شيء يتغير حتى في ملامحة ، حتى كنت جعانه مابيتش نطلع تحشمت نطلع بالحنة قدام صديق 💔

~~~~~~~~~~~~~~~~~~~~~~~~~~~~~

صديق ….. اصلا من لما جهزت الشقة جهزت فيها دارين وحوايجي حطيتهم في الدار الثاني غيرت بيجامة وطلعت خديت شوية من العشي حطيته وقعمزت قدام التلفزيون

~~~~~~~~~~~~~~~~~~~~~~~~~~~~~

افنان ….. وصلنا للفيلة نفسها يلي جيتهم فيها يومها
حمزه…… فتحت الباب ونزلت فتحت بابها مديت يدي لها
افنان ….. شديت الباب ونزلت بروحي
حمزة …… تعالي من هنى خشينا للفيلة وفتحتلها الاسانسير
افنان …..🤔 اسانسير في فيلا شن مازال ثاني فتحتوا فيها مول مره وحده مافيكم ماتعب ومشي
حمزة….. كان تبي انتِ حاضر توا نفتحلك وطلعنا للدور الثاني فتحت الباب
افنان …… خشيت وراه وانى نقول لهنى وخلاص ياافنان توا انتم بروحكم 💔
حمزة …… حطيت المفاتيح عالطاولة وجيتها تبي تشوفي الحوش ؟
افنان ….. حولت العباية من على رأسي نبي نهدرز معاك قعمز
حمزة…..🙄

~~~~~~~~~~~~~~~~~~~~~~~~~~~

اعتدال …… روحت وانى طول الطريق وانى نبكي وماما تحسابني على خاطر فراق بنات عمامي وصحباتي وتهدي فيه نزلت طول مشيت دار روحه بنظم الصالة مع صابرين ودانية خشيت معاهم قعدت نبكي بعدها شفت باب دار صديق مفتوح 💔 مشتلها خشيت قعمزت على سريره مش قادره نتحمل نصبر في روحي بالسيف مش قادره نستنى للصبح ونسألها شن صار مش قادره نتخيل انه معها طلعت تلفوني واتصلت بيها يرن ماتردش 💔🔥 قلبي ولعت فيه نااااار نتخيل انهم مع بعض شن يصبر بينهم توا حطيت على رقمه واتصلت بيه هو
صديق….. اعتدال ؟ شن فيه صار شيء ؟؟؟
اعتدال …. بصوت مخنوق حور وين نتصل بيها ماتردش
صديق ….. خشت بترقد من حين روحنا شن فيه خيركم شن صاير عمي فيه شيء ،؟
اعتدال ……🥺💔 صديق شن صار بينكم قدرت تشوفها زي زوجتك نسيت انها اختك ؟
صديق ….. اعتدال ؟؟؟؟ خيرك شن الكلام هذا ؟؟ انت كيف …
اعتدال ….. 😠 انى نحبك نحبك وبنموت لانك توا مع وحده ثانيه غيري
صديق …..😨

#يتبع

لمشاهدة جميع اعمال الكاتبة : روايات صفاء

اترك رد

زر الذهاب إلى الأعلى