رواية ولدك يا بلادي الحلقة الرابعة .. روايات صفاء روايات ليبيه | القلم الناجح
روايات ليبيه كاملة

رواية ولدك يا بلادي الحلقة الرابعة .. روايات صفاء روايات ليبيه

رواية ولدك يا بلادي الحلقة الرابعة .. روايات صفاء روايات ليبيه

#ولدك_يابلادي

الحلقــــــــــ(4)ـــــــة

صديق … كيف حتى تقولها ودفيته بكل قوتي لين طاح
عبدالمهيمن … شد رأسه اهااااا
صديق … شن صارلك😳مديتله يدي
عبد المهيمن … وقفت وانى شاد رأسي تمام مافيه شيء وسامحني لكن والله كنت نحاول نفكر معاك
صديق … مدورش وطلعت 💔

~~~~~~~~~~~~~~~~~~~~~~~

افنان …😰 لفيت بنرجع بسرعة سيارة كبيره ثانية رصاصية ومرشها مظلم صكرت علينا💔
أوس … اركبي بلا دوشة وصوت
افنان …😨💔 وين بنركب
أوس … 🙄 من كلمك انتِ وكان خاطرك بتركبي عادي مايردك شيء اركبي
افنان … 😡 ياحيوانات الله لا تسامحكم مستقوي على طفلة وشديتها كويسه وبديت ننادي بصوت عادلي حد يساعدناااااا ياناااااس بيخطفوها💔
أوس … صكري فمك نفرغ فيك راهو
افنان … بالك تحساب بنخاف منكم ، في خاطري انى مرعوبه بس مش خايفة بكل 😨
مارية ….. 😭😭 تبكي وترعش
افنان … نزلت حضنتها بقوة وقلتلهم مستحيل نخلها 💔 تعرفوا شن شفت شفت رجاله من منطاقتنا واقفين بعيد ومافيش حد فيهم قدم 🤷🏻‍♀️ النخوة ماتت في قلوبهم 💔 والا عندهم الحق كان جي وتدخل شن بيدير اصلا مجموعه بسلاحهم يضربوه رصاصه وخلاص لو كان راجل لراجل ممكن لكن هكي بيريح غر على روحه 💔 توا بس فهمت المثل يلي تقول فيه ماما ديما (( الله لا تدول على رجالنا رجال )) فعلا كسرت الراجل صعبه
اوس … لف وراء السيارة واتصل بحمزة
حمزة … شن صار لقيتوا البنت ؟؟؟؟؟
أوس … لقينها لكن معها وحده شادتها وتلعلع وماتبيش تخلينا نخدوها ، بالنسبة ليا كبيرها رصاصه على طولت لسانها لكن انت قلت ماتتصرفش في شيء لين تتصل بيا
حمزة … حتى رصاصة هلبا فيها مدام مرآة عطها كف رقدها وجيب البنت
أوس … بتردد🌚 يلي مع البنت الشيخة متع الجامع يلي يومها
حمزة …😳 وقفت 😡 هذا وين تقول اوس شن درتولها
اوس … ولا حاجه لتوا
حمزة … اقعد في مكانك 10 دقائق ونكون عندك
اوس … صكرت وانى نقول كيف مشوار نص ساعه بتوصله في عشرة دقائق 🤷🏻‍♂️
افنان … تلفوني في جيبي نحاول نتصل بدون مايحسوا بس من بنورط بابا والا صديق 💔 والا حتى ايوب 💔رن فتحت بدون مانطلعه من جيبي
أوس … يشوف لجماعة ويأشرلهم اصبروا
ايوب … الو الو. افنان ؟؟؟
افنان … حولو خلونا نمشوا
اوس … ماتجربيش حظك اكثر من هكي 😒 خليك ساكته
افنان … مصحكم شن لفين علينا وواقفين
اوس …… 😠

امحمد … مقعمز في المحل خش عليه وليد داهش ياعمي امحمد راهو بنتك افنان فيه وحدين بسلاحهم شادينها في فرقة شارع ال &&
امحمد … شن شن 😳😳 خدي حديده من تحت طاولته وطلع يجري 💔 برا للحوش قول لصديق
الولد ….. باهي ياعمي خدي طرف شكلاته في يده 😏 وطلع يجري

ايوب ….. كنت قريب 🤯 لما سمعت الصوت صكرت واتصلت بولد غادي وفعلا قالي فيه سيارات مسلحة في الشارع يلي بعد الجامع كملت طريقي باتجاهها بسرعة او ماقربت نزلت نجري اول ماقربت سحبوا عليا في نفس اللحظه نسمع في
امحمد … بنتي افنان بنتي
الرجاله … يشدوا فيه غر اصبر بس
امحمد … شن بنصبر حول ياراجل وقدم
ايوب ….. قدمت معاه
حمزة … وقفت السيارة من الجيهة الثانية ونزلت 🤦🏻‍♂️ الناس واقفه ولافه عليهم أوس ديما خدمته بالفضائح 😠 لموا سلاحكم واركبوا في سيارتكم
ايوب وامحمد … خشوا بينهم
أوس … عميد !!!
حمزة … 😒 بعدين نتفاهموا
افنان …💔😨 نشوفلهم ومش فاهمه شيء شويه وحولو السيارتين
امحمد … افنان افنان انتِ كويسة ؟؟؟
ايوب …… نشوفلها ومش قادر نقرب قدام بوها 💔
حمزة … 🤨 انتِ كويسة
امحمد … شن تبي انت والمفرخ يلي معاك من بنتي
حمزة … 🙄 في خاطري توا استقويت لما مشوا وكان مش على خاطر بنتك نوريك المفرخ ،، رجعت شفتلها هي 🥺 يلي صار سوء تفاهم ماحد يبى يضرك ، وكان نفهم عيونها شن فيهم مميز لين نظرتها قادره تربكني وتهز ثباتي للدرجة هذه

((والله وحق الذي له الناس
‏يسجدون …
‏ماهز ثباتي واربكني إلا سحر
‏تلك العيون ))

افنان …..😒 شديت البنت من يدها عارفه من تبوا تضروا انتم 💔 حرام عليكم بنت صغيره زيها شن تبوا منها امشوا لابوها والا يلي هو هي مدخلهاش
حمزة … تلفتت ومشيت ركبت في سيارتي 💔
ايوب … 😒 نشوفله بحقد ، ان شاء الله كويسات
افنان … هزيت برأسي
امحمد … صحيت ياولدي الله يبارك فيك وخدي افنان ومشي حطوا البنات وطول عالحوش

~~~~~~~~~~~~~~~~~~~~~~~~~~~~~~

حور…. درت كيكة وحطيتها في الثلاجة
اياد ….. خشيت ندير في قهوة
حور ….. نحطلك من الكيكة !!
اياد ….. امته بتطلعوا من الحوش 😒
حور ….. علاش ادير هكي 💔 علاش تبعد وتحاول ماتخلناش نقربوا منك ، انى وصديق لا نبوا منك ورث ولافلوس بس بوك يلي هو بونا ❤️ فضله علينا هلبا وانت الحاجه يلي قاعده من ريحته نتمنى مانخصركش نتمنى نشوف احفاد بابا يلي من صلبه زي ماكان يتمنى حتى لو قاعد لفترة بسيطة ياريت تسمح لينا نقربوا منك
اياد ….😒 طلعت وخليتها ، هالبنت طيبة لين تجلط 🤦🏻‍♂️ نقوللها كلمة مش كويسة ترد عليه بكل ود
صديق ….. خشيت للحوش وانى عقلي مش معاي والافكار تاخد وتجيب فيه
حور …. واخيرا روحت اعتدال مدرسة وافنان في الجامع ودانية مدايره دايت ملقيتش حد يشرب معاي القهوة وياكل معاي الكيكة
صديق …. مقدرتش نشوفلها حطيت رأسي لوطه ،، انى بنرقد شوية مصدع وخشيت 💔💔 اختي ياناس والله ماحاس اتجاهها الا انها اختي

~~~~~~~~~~~~~~~~~~~~~~~~~~~~

افنان … كيف نسيب الجامع 💔😢
امحمد …. ياسرني من الرعايش هذه ثاني مره
جميلة … ايه بوك عنده الحق قبل عادي لكن بعد اليوم سلم بنتي هنينا
افنان …. 😢 خشيت للدار لقيت تلفوني يرن ايوب يتصل رديت الو !
ايوب …. فضيتي توا ؟؟
افنان …. ايه كنت مع بابا وماما 😔
ايوب …. شن يلي درتيه اليوم نبي نفهم بس 😠 افنان كيف توقفي في وجههم شن قالك عقلك
افنان …. حتى انت ايوب حتى انت !! بابا وماما فهمت خوفهم لكن انت تبينى نخلي طفلة ونهرب 💔
ايوب …. شن معنى فهمت خوف بابا وماما لكن حتى انت ؟؟ يعنى انى يلي زايدا عليا انتِ ؟؟؟؟؟
افنان … مش هكي لكن !!
ايوب …. افنان انى خايف عليك زيهم واكثر 🥺
افنان …. اسفه بس متوتره لانه بابا قالي سيبي الجامع
ايوب …. علاش كنتي ناويه تمشي !!! فكري في روحك
افنان …. توا اجباري بنوقف فترة وبعدها يصير خير
ايوب …. باهي انى كنت نبي نتكلم معاك في موضوع عارف مش مرتحه في العلاقة هذه اذا قدرنا نسموها علاقة ، لهذا انى نبي نجيب العيلة بو انتِ موافقة !
افنان ….😳 م مش عارفه
ايوب ….. افنان انى نحبك
افنان …..😳 تحبنى !!! مش مستعجل كأنك
ايوب … افنان انى حبيتك من اول مره شفتك فيها بس بحكم العادات في الموضوع هذا هههه انه لزم من فترة تعارف بعدها نقول نحبك فا كنت مطر نصبر ونعتبر في روحي صبرت هلبا
افنان ….. قلبي يدق بسرعه قعدت ساكته ❤️
ايوب …. وانتِ ؟؟؟
افنان …. بصراحه مش عارفه مازال بكري رغم انه عمري ماكلمت ولد ولا حبيت فا من موفقتي انى نكلمك اكيد حسيت انى مرتحتلك بس مانعرفش شن نقول
ايوب ….. امممم صلي عالنبي توا وهاتي رقم امك
افنان ….. ( وحق ربي كان خاطري نقوله نحبك 💔) ☺️ عليه الصلاة والسلام ، شن بدير بالرقم
ايوب …. نعطيه لامي تكلمها وتتفق معها على يوم نجيبها ليكم
افنان …. تمام حاضر ، بس ايوب
ايوب … عيون ايوب
افنان …..☺️ امي وامك مافيش داعي يعرفوا انى كلمتك و….
ايوب ….. من غير ماتوصي
افنان …. تمام 😍😍 صكرت وانى طايره من الفرحة انه الراجل يلي عجبنى طلع اخلاقه كويسة وبيخش من الباب طول

⭐️روايــــــــــــات صفـــــــــــــــاء⭐️

~~~~~~~~~~~~~~~~~~~~~~~~~~~~

اعتدال …… في الليل غيرت حرايجي وحطيت شوية مكياج ومشيت لعيلة عمي جمال
اياد …. اووو المشفشفة جت
اعتدال …. تصدق 😒 انك واحد قليل ادب ، بعدين انى بحجابي كيف عرفت انى مشفشفة
اياد ….. هههههه من كثر ماشعرك احرش طابق الوشاح وطالع
اعتدال …..😒 حيوان وخشيت لحور
صديق ….. قعدت في داري لبعت صلاة العشاء بعدها جعت طلعت
اوووو اعتدال عندنا
اعتدال ….. 😍ايه واختك طلعت في الدوش دقيت علها قالت توا نطلع قلت ندير نسكافي مابين طلعت
صديق ….. قعمزت وحطيت يديه على رأسي احسبيني معاكم
اعتدال … بنموت من الفرحة ❤️ حاضر 😍
خيرك انت شكله جوك مش كويس
صديق ….. والله ماعارف شن نقولك والا لمن نقول موضوع حور شاغلني ومش علرف كيف نتصرف فيه
اعتدال …..🥺 قعمزت مقابلاته احكيلي بالك نعطيك فكرة والا نساعدك
صديق …… الكل يقولي لازم تباعد علها 💔 باهيشن ندير انى وين نلوحها
اعتدال ……😔 صح عندك الحق
صديق ….. حاولت مع عمامي مع …. سكتت وتنهدت معادش عرفت شن ندير
اياد …. كنت خاش سمعتهم يتكلموا وقفت
صديق …. اخر حل ويلي قالهولي ومانشوفش فيه غيره مع انى بروحي مش متقبله
اعتدال …… شبكت يديه في بعض وقعدت نضغط عليهم بقوى وتكلمت بصوت مخنوق 🥺 شن هو ؟
صديق …. رفعت عيوني فيها انى نقرا فاتحتها يعنى نتزوجها 💔
اعتدال ……😳عيوني توسعوا ودموعي نزلوا طول 💔
صديق ….. هه شوفي انتِ بروحك بكيتي وما تقبلتيش الفكرة كيف هي والله ماعارف شن ندير
اعتدال …..😰 ص صديق
اياد …… خشيت عليهم باش ننقد الموقف ، فيه قهوة ؟؟
اعتدال ….. وقفت طلعت طول
صديق …..💔 نشوفلها اوووف هذه هي هكي املاه حور شن بدير
اياد …. طلعت وخليته
اعتدال ……. مشيت خطوتين وقعمزت تحت السور من الخلف وحطيت يدي في فمي عضيتها وقعدت نبكي بقوى 😭😭😭
اياد ….. لحقتها 🙄 خيرك !!
اعتدال ….. ماكانش فيه حيل نرد والا نرتب كذبه قعدت ساكته ونبكي
اياد ….. شن تحبي فيه 😒
اعتدال …..😳 وقفت من هو يلي نحبه نبكي على حالنا شن دخلك انت
اياد …… سمعت كلامكم ولهذا خشيت عليكم قبل ماتعترفي بحبك الغبي لواحد مش حاسبك في الدنيا كلها
اعتدال …. هه هههه ومن قالك انه مش حاسبني كل مافي الموضوع انه يبي ينقد اخته ، والا لو عليه يحبني ومن زمان هلبا انت شن عرفك بينا 😒 ومشيت وخليته
اياد ….. واضح يحبك 🙄

حور…. طلعت من الدوش ندور فيها وين اعتدال !!!
صديق ….. مش عارف طلعت
حور ….. قتلها استنى ! خل ناخد عبايتي ونمشي نشوفها
صديق …. توا ليل غدوا امشي
حور ….. خديت تلفوني وخشيت اتصلت بيها ماردتش

~~~~~~~~~~~~~~~~~~~~~~~~~~~~~

افنان …… فيه بنت نقري فيها طلبت منى رقمك ☺️
جميلة ….. علاش ؟؟
افنان …… تبيك في موضوع يعني …
جميلة …..😍 ان شاءالله خير ربي يفرحنا بيك
اعتدال ….. دقيت على باب حوش عمي امحمد
افنان …… نضت فتحت 😳 خيرك
اعتدال ….. اوش تعالي للدار وخشيت قدامها
افنان ….. هذه اعتدال حنى في الدار وخشيت ورها
دانية ….. مقعمزه نتفرج في الدار خشت اعتدال وجهها احمر وتبكي 😳 خيرك
اعتدال ….. بصوت تعبان اطلعي نبي افنان بروحها
دانية…….😒 شن فيه
افنان ….. اطلعي توا بس
دانية ……. طلعت
اعتدال ……. نمس في وجهي لانه العبرة في كلامي مش مخليه صوتي يطلع
افنان ….. خفت قعمزت عالسرير اعتدال تكلمي ؟؟
اعتدال …… قعمزة لوطه 🥺 مقابلتها وشديت يدها يلي حاطتهم في حجرها ، افنان بالله عليك دوري فتوه اسألي الشيخة خلها تسأل رجلها
افنان ….. لشن !!
اعتدال ….. صديق قرار يتزوج حور باش تقدر تقعد معاه 😭
افنان …..😳🤭 بجديات
اعتدال …… بديت نتكلم بطريقة هسترية بالله عليك مش زمان تاخدي في دوره فيها هلبا شيخات اتصلي اسأليهم والا نعبوا رصيد ونتصلوا بشيخ كبير والا
افنان ….. حضنتها بقوة 🥺 خلاص بالله عليك خلاص ماتقطعي قلبي 💔
اعتدال ….. اكيد فيه حل فيه حاجه
افنان …… نزلت قعمزت جنبها اهدي بس
اعتدال ….. كيف كيف قوليلي كيف بس الراجل يلي ماحبيتش غيره عمري كله يجي يحكيلي بكل بساطه انه بيتزوج تخيلي يحكيلي انى يعنى كلام دانية صح مش حاس بشيء اتجاهي 💔😭😭
افنان ….. حور شن قالت
اعتدال ….. حور قاعده ماتعرف شيء ماقاللهاش ، ايه صح. صح حور مش ح توافق كيف تتزوج خوها مستحيل وله
افنان …… نضت عطيتها طاسة اميه اهدي شويه بس وقعدت نحاول نهدها ساعة بعدها ناضت روحت 💔 وانى نفكر لو حور وافقت كيف بيصير فيها

⭐️روايــــــــــــات صفـــــــــــــــاء⭐️

~~~~~~~~~~~~~~~~~~~~~~~~~~~~~

حمزة …. جبت معلوماتها
أوس ….. تفضل ياسي
حمزة ….. يشوف للورقة اسمها افنان عمرها 25 سنه متخرجة من الثانوية ليها سنتين تقري في الجامع عندها اخت وحده بوها وامها عايشين رقم تلفونها 0000000 مش مغيراته بكل معندهاش حسابات تواصل اجتماعي ، شفت لأوس معقوله ماعندهاش فيس ؟
اوس …. والله استغربت بس مافيش
حمزة …. تمام منور
أوس ….. كان نفهم شن في بالك بس ، كان مانعرفكش راهو قلت معجب بعا
حمزة …. 🤨 ماتلوح شيء حطيت الورقة في جيبي وطلعت

~~~~~~~~~~~~~~~~~~~~~~~~~~~~

#بعد_يومين

افنان …. اليوم بتجي ام ايوب واخته 😍 نجهزوا من الصبح على تنفيض على تطليع امعاين على طلبات من السوق جت مرت عمي واعتدال لا 💔 من يومين وهي مكتأبا 💔
حور ….اعتدال خيرها من يومين لا ترد ولا ريتها
دانية ….. علمي علمك من ليلتها جت تب …
افنان ……😳 ماخيرها شيء شكلها جايتها ال… وتعرفي مزاجها وين تجها تقلب عالكل
حور ….. ايه الا تعالي هنى شن الحركات هذه 😍😍 طالعه تهبلي كنت لابسه قفطان احمر طويل ورافعه شعري فوق ،، دانية حطتلي مكياج
حور …. طالعة حلوه ،، دق الباب
افنان ….. شكلهم جو 😨 شعور يخوف
حور ….. ههههه قعمزي هنى خل نستقبلوهم
افنان ….. اوكي

~~~~~~~~~~~~~~~~~~~~~~~~~~~~~

فرج …. 😡 خزيه ماتتحشم على وجهك رافع قضية علينا
اياد …. قلتلكم من الاول تحسابوني نبصر
فرج … 😒 طلع وسيبه

~~~~~~~~~~~~~~~~~~~

ام ايوب …. انى ولدي ماعنداش حوش بيسكن معانه الحوش فيه انى واخته وبنت اخته بس
جميلة ….. كيف بلا حوش
ام ايوب ….. حوشي كبير
جميلة ……😒
افنان …….☺️ السلام عليكم
اخت ….. ايوب 😍 ماشاءالله
افنان …… سلمت وقعمزت كانوا بسيطين وجوهم حلو هدرزو وروحوا ماما مش عاجبها انه ماعنداش حوش
جميلة …. يعنى انتٍ راضيه !!!!!
افنان ….. الفايدة فيه هو وفي اخلاقه
جميلة …. انتِ تبيه
افنان ….. يسأل عليه بابا كان اخلاقه كويسه تمام
جميلة….. دبري راسك بعدين ماتجيش تعيطي تقولي دارولي وقالولي

⭐️روايــــــــــــات صفـــــــــــــــاء⭐️

~~~~~~~~~~~~~~~~~~~~~~~~~~~~~

صديق ….. دقيت الباب
حور …. تفضل ؟
صديق …. شن الجو
حور … تمام تعاله
صديق ….. مشيت لافنان
حور …… ايه ماشاءالله شكله الناس يلي جينها
صديق ….. حور نبي نتكلم معاك في حاجه
حور ….. شن
صديق ….. انتِ عارفه وسمعتي قصة انه مفروض مانقعدوش مع بعض بروحنا 😔💔
حور ….. خفت 😨 باهي !!
صديق ….. انى حاولت بكل الطرق بس مالقيتش حل ، متحشم حتى نقولها بس مافيش الا انه نتزوجوا
حور ….. من ومن 😳؟
صديق … انى وانتِ💔
حور …. كيف كيف😳

~~~~~~~~~~~~~~~~~~~~~~

افنان ….. يرن تلفوني رقم غريب رديت الو ؟
هو // افنان ؟؟
افنان ….. ايوب ؟
هو // من ايوب هذا ؟؟
افنان …. من انت 😳
حمزة…. انى حمزة العميد ياافنان
افنان ….😳

#يتبع

لمشاهدة جميع اعمال الكاتبة : روايات صفاء

اترك رد

زر الذهاب إلى الأعلى