روايه لربما احتاجك الفصل العاشر | القلم الناجح
روايات ليبيه كاملة

روايه لربما احتاجك الفصل العاشر

جميع حقوق النشر والطبع محفوظه

روايـةه لربما احتاجك 💓
الحلقةه العاشرةه
بقلم Debth heven
اسمي حقيقي فاطمه سالم
……
….
..🌸🌸🌸🌸
انا_تي تحشم عيب عليك انا عرضك وشرفك واخت زوجتك

فوزي:مايشرفنيش هدا شي وبعدين جت عليا اني توا

انا:اوووف لو نخبر اختي فيك شن دير فيك بسسس

خشت اختي أنتصار:احمممم نعم يافوزي تبي شي خيرك

فوزي:اا احم هي اني بنتوكل مع سلامه
وطلع

انتصار:سهى اصحك عينك تفكري في راجلي فاهمه اني وقتها مش ح نسكت كيف مروه ح نقلبها فوووق راسك فهمتي وديري بالك هاا ديري بالكك

انا:حسبي الله ونعم الوكيل وخلاص آخر شخص نتوقعه تكوني انتي

انتصار:ههه والله عندها الحق مروه تعرفي تمثلي مليح اني مايهمنيش شن توقعتي ولا تتوقعي فخار يكسر بعضه المهم هم كلمتين خلي راجلي في حاله هم كم يوم وبننتلفو غر فكينا منكك بس

انا:يكون في علمك كوويس يالولاي اني لا عرفتيه فوزي ولا طق بابك ولا عبرك وهلكم يوم كان ماجبتلك عليه شي يخليك تموتي في مكانك كيف ماتذلي فيا والله عظيم ما نسمى سهى وانتي تعرفيني كوويس

انتصار : يااا عيني عاهره وتتمقعر اني قلتلك تجي شور راجلي ماتراجيش مني الخير بكل ولا حتى في حلم تمام

انا….
اني هنا خلااص مش ح نسكت كل شي تمااام الا كلمه هذي معاش عرفت كيف ندير …
خديت الموس لي كنت نقص بيه في الخبزه شاهي
..
وقدمت عليها وكانت بتطلع لفيتها عليا لين عيني جت في عينها
انا:قسما عظما كان ماتحترمي نفسك تكوني من لحظه هذي توتي جنازتك من توا فاهمه اختي مش اختي يهمنيش موضوع وبعدين انتي اختي قدري مش اختياري فااهمةه

انتصار خايفه: ا اس استهدي بالله خ خيرك

انا …
اها صح تصرفي مبالغ فيه لكن وجعتني كلمه طلقتها وقعدت نرعش مع بعضي اووووووف مش عارفهة كيف ندير ياعالم اي وقتها استحقرت نفسي لكن شن ندير ترا محد فاهمني محدش لا قبل فهموني ولا توا ولا واحد منهم ساندوني
….
طلعت البرا ..

جداي:ايح تي وين شاهي

انا:اا ها اي اي حاضر غر عمرته شويه بس

جداي:خيره وجهك اصفر بنيتي

انا …
حرجتني قدام الكل معاش عرفت كيف ندير …
انا:لالا شي
وخشيت ..
سخنت شاهي وطلعت بيه ..
وقعدت نمد في شاهي

 جداي:خيرك عطلتي

انا :كنت ندور في سكر

جداي:اها به ياانتصار تبي شاهي

انتصار :لالا
وقالت لي فوزيه عطيني طاستك نبيش ناخد منها ومشيت لي فوزيه عطيتها شاهي وقعدت نشوف لي انتصار كيف تتحافى فيا
….
وجعتتتني

انتصار:….. يتبع
…..
عند جلنار ..

..
عزوزتي :طلقها يا سليمان

سليمان :ها اا يما عاد قاعده عروس معقوله نطلقها وبعدين احتي ياشوق مانضربنا واهو شوفينا رجالة قعدنا شن فينا ولا شن صارلنا

اسميهان:واللهي شن نراجي لين صغاري يصيرلهم حاجه

بنت اسميهان (مسعوده):اجديدة ره ماما تكدب عمتي جلنار دارتش هك بكل قعدت تقوللنا العبو بعيد بس

اسميهان:هييي يامصيصه ماعرفت نربيك عدي انتلفي من قدامي

عزوزتي شافت لي اسميهان نظره تقتتل:يا اسمهان عارفاتك شومه ومسمومه لكن تكدبي عليا وديريلي قرون معقوله يا جبريل حتى انت يا ولد بطني انا مانلومش توا على اسميهان مدامك انت هك

جبريل: اا اسف اسف حقك عليا

عزوزتي :اسميهاااان كملي الغدي وديري معاهم حاجات تانيه فاهمه والماعين كلهم عليك وبتضمي الحوش لمده اسبوعين فاهمه ولا

اسميهان:حاضر حاضر
…..
كلنا خشينا واني ومسعوده خشينا لي صالون وقالت عزوزتي بترقد تاعبه من سفر
وقعدنا نهدرزو اني ومسعوده حبوبه وطيبه مش كيف امها مسمومه لين قالت مسعوده …

مسعوده:عمتي جلنار عمرك حبيتي

جلنار:هههه ياشيطانه عيب لا يابنتي حبيتش تزوجت هك وخلاص

مسعوده:يعني كان اني حبيت عيب

جلنار :ههه ليش انتي حبيتش

مسعوده: نقدرش نحكيلك

جلنار :احكي احكي ماتخافيش

مسعوده:اممم وعد

جلنار :اي وعد احكي

مسعوده:طبعآ انا عندي بنات عمتي واجد وكلنا جيل واحد لكن ولادها كبار وبناتهم من جيلي …
نذكر القصه بدت في رمضان بتاريخ 7/7 ..
طبعآ انا مشيت لي بنغازي مع اجديده قعدت فيها 3 شهور في وقتها بسبب عطلة
….
قرايه وعمتي في بنغازي مافيش حد في من عيت عمتي هنا يعني نبي نغير جو وجا رمضان وانا عندهم …
قعدت عند ولد عمتي الوسطي عنده بنتين وحده م 65والاخره م 69 وكانت معاي بنات عمتي الصغيرات وحده م 70 والاخرهم71 مهم كنا بعد نكملو مواعين الفطور عندنا واحد من ولاد عمتي حنون بكككل نتصلو بيه نقولوه تعال دهورنا وكان يجينا ياخد فينا ..

وطبعآ بعد يقول اني في طريق نقعدو نجااااارو نداعكو ع الدولاب وع المكياج ووحده تهزب في التانيه بشويه كترتي الحمريه( الروج) والاخره كنه شعرك مشفشف ووحده تقول نزلي سروالك عييييب ..

جلنار:محلاااكم😍كملي احكي

مسعوده:اي استاحشتهم💔 المهم وطبعآ
لعند يجي عمي ونسمعي صوت السياره نطلعو نجارو وننتقلو لمرحلة الكنادر نتعاركو لا هذي نبي نلبسها نا والاخره تقول لا هذي مقرره نا نلبسها تمشي مع لبستي وطبعآ انا كنت نقعد ع دروج نلبس كويشي ونطلع من دون مايتناقشن معايا ونقعد في الكرسي القدامي السبب ان انا رقم كراعي 37وهن يلبسن نفس بعضهن رقمهن 40 ويقعدن يشفطن عليا …

مهم في يوم كان يوم حزين علينا بكككل اتصلنا بي ولد عمتي عشان يجي يدهورنا وهنا كانت الصاعقه والخبر المحزن قال سيارتي خربت وتبي طرف غالي ونراجي في المصرف يفتح الاسبوع الجاي قالو ..

جلنار:تستاهلو ساد مش ديما طلوع 😂😂😂

مسعوده: ملل في حوش نطلعوش الا هو كان طلعنا المهم طبعآ سكرت الخط وانا حزينه وقتلهن حي علينا عفنن هنا عندكن في سجن قرناده لانه محد يطلع فينا الا هوا الاخرين مستحيل يحنو علينا

جلنار:سعدووودك محصله جووو

مسعوده:مش غير تعرفي عسللل😍😍😍 خلي نكملك …
مهم عدن ايام ونحنا محبوسين وعمي مصار شي من مصرف قررنا انلمو في حق الطرف من كثر الكساد ..

مهم قعدن الافكار ياخدن فينا ويجيبن كيف انمشو وقتنا لانه جو ملل مش طبيعي..
يعني نطلعو في السور ع الدرجيحه او حد عزانا نسرقو البوشكليطه بتاع لعيال الصغار ونهربو بيهن ونقعدو نجارو وشفاشفينا في الريح الحمدالله يلي مافيش جيران واجد..

طبعآ انا ماعمريش درت علاقه مش رفض للقصه هذي بس مزال ماجا غزالي..
وكانن بنات عمتي 4نفس وضعي واثنين هيمات في الحب ونحنا نبحتو فيهن وهن ع الفطور نسمعو فيهن على رواشن ( صحه حبيبتي فطورك) و ع الفجر يجارن قبل ما يئذن عشان يقولن نحبك
ونحنا كنا عيونه😍 هك عليهن يعني وضع يشق خاطر حتي الكافر وضعنا…

مهم كسدنا انا وبنات عمي ال4 يلي نفس حالتي النزيكه بعد الفطور ع الطاوله برا يلي في السور وقعدنا نتناقشو في حالتنا المتأزمه وانا كنت نقوللهن اصلآ عادي ووجهي كان هك 😶وبعد شوي يخطمن ال2 هذنك معاهن الراديو ويسمعن في اغاني فيروز ويبرمن في السور عايشات اللحظه جوهن فوق الريح وضاربات الدنيا بتاكو ..

شويا اقترحت بنت عمي نديرو شي يخلينا نغيرو جونا ..
مهم شني شني ؟!!
شوي قالن هي ناخدو تليفون ولد عمتي عشان هو كان يسافر لي تونس وتليفون بيله كان حاجه وااو ونحطو ارقام وهميه من راسنا و ع اقل نحكو براحتنا شوي …
لانه نحنا لما نحكو على فون الارضي مستحيل نحكو لوقت طويل عشان عندنا ابراج مراقبه من النوع الفاخر يزقبو علينا في الردود (في من تكلمي را نكسر راسك )
يلي هم عيال عمتنا الخايلين ..

والله كانت نيتنا نحكو براحتنا ونكذبو بس هذا حدها بالجو مش جو علاقه او شي

جلنار :هييي ياشيطانات

مسعوده:لو تبي نعطيك تليفون عندكش مشكله 😉

جلنار:احكيلي عليه جهاز هدا غريب

مسعوده:مش كيف الارضي خيط وقصه لالا امشي وين ما انتي واتصلي وجوك سالك المهم خلي نحكيلك

جلنار :احكي احكي

مسعوده:طبعآ اسحرنا وكيف العاده بنات عمي ال2 بتاع حب عدن يهدرزن ونحنا غسلنا مواعين السحور مع بعضنا كل وحده مسكت حاجه وكملنا وطلعنا فرشنا فرشه وتربعنا في السور ومن هن بدا الاجرام …
نبو نحكو مهم اذكرنا زمان في عزا ولد عمتي اخر الايام بتاع يقعدو العايله ملتمين عشان الرابط اتحول الرباط وهك بايتين مع بعضنا شوي بنت عمتي الكبيره تبي اتجرب خطيبها طلبت مني انا مهم خدينا منها شفره محصلتها من صاحبتها ودرنا رقمه متاع الارضي وقالتلي نبيهش نا نبي انجرب بيها بس وبعدها انسكرها قتلها لالا خليهلي الشفره وانتهت القصه..

مهم خدينا الرقم واتصلنا مره اثنين لين رد وعلى أساس اسمي هيام وم68 ومقيمه في غرب

جلنار :طلعتي واعرةه يامسعوده

مسعوده:مالا شني نعجبك ها نكملك ولا نقولك امشي شوفي امي كملت الغداء ولالا

جلنار :اي والله نسيت خلي نمشي
مشيتلها على سريع وجيت …

جلنار لقيتها لاهيه في الغداء مزال ابصر شن دير اطيب في حاجه اخرى هيا كملي

مسعوده:استني نصكر الباب وروشن لان مزال بتبدا القنبله

جلنار :به

مسعوده صكرت الباب بلمفتاح وروشن وجت تربعت وقعدت تحكي ..

(واكيد مستغربين كيف تحكي مسعوده براحه ماهو مسعوده وجلنار مافيش فرق بينهم كبير في السن وماتنسوش أن جلنار عاشتش طفولتها وايام زمان مافيش شك وخبث )
خلي نرجعو لي روايتنا

مسعوده:مهم وتمينا نتلمو عليه مع بعضنا ونكسدو وبس كان بأدب لكن كله كذب ولله الحمد ..
وبعدها تمت كل مره تاخد فيه وحده والبنات تمن زيطات لعند في ليل كانت عندي انا ونفتش في كل ارقام لقيت رقم متكرر هلبه من فتره مهم اتصلت وخلاص وكان قريب العيد …
وطبعآ بدت مكالمه بينا
عاشور:اهلين

انا:اهلين
انا:كل عام وانت بخير

عاشور :وانتي بخير يارب
عاشور:كل سنه وانتي طيبه

انا:وانت طيب

عاشور:تسلمي

عاشور: نتعرف بيك

طبعآ فكرت شوي وبعدها قلت خليني نخرط اي حاجه ورديت
انا:فريحه لنقي م68 من غرب ونقرا طب

عاشور:عاشت الاسامي والعمر كله

انا:سلمك

عاشور: انا عاشور م64 من بنغازي ونقرا كلية هندسه في داخلي البيضاء

انا : عاشت الاسامي العمر كله

عاشور :اسمك حلو
طبعآ فكرت شني نرررد شني نرررد!! وقلت خليني نخرط اخره بس المره هذي خرطه كبيره شوي
انا : من ذوقك مسميتني جدتي ام ماما مش ليبيه

عاشور: صح من وين ؟!

انا:خوالي اصلآ مش ليبين

عاشور:كيف شن جنسيتهم ؟!

انا: ماما روسيه

عاشور :والله جد

قعدنا كل يوم نهدرزو على تليفون والوقت كله مع بعضنا الا في وقت العشيه يمشي للمعمل و يتصل نحكو شويه حتي وهوا في العمل ويبعتلي بس يقعد مش فاضي واجد ومن اول مايروح يبعتلي يقولي روحت ونبدو نهدرزو …

مره ولد عمتي قعد يدور في تليفون ويبي ياخده معاه يعني وكان س 5 فجر طالع بدري ولد عمتي مهم معش عرفت شن ندويله لانه هوا عاشور يهدددرز

وانا كيف ندير كيف اندير؟!! لعند خطرت في بالي الفكره هذي
انا:عاشور بابا يبي يطلع للعمل شويا نسلم عليه توا انجيك

عاشور :اي عمل باتك شن يشغل

طبعآ استغرب عمل ساعه 5 فجر

انا : مو بابا طيار وعنده رحله

عاشور:ربي يحفظه لكم ويطول في عمره
انا : الله يسلمك ويحفظ باتك توا نستأذن منك شويا

عاشور: اذنك معاك

طبعآ حولت شفره وخديت تليفون حطيته في غساله وعلى أساس كنت ندور ولقيته خداه مني وعدا بعد يومين يجي ناخد فيه ساعه بس من 12 لل1 الليل ونلوحه في مكان اخر ..

جلنار :ياااكبدي عليك وعاره فيك

مسعوده:هك لازم تكوني المهم خلي نكمل
..
بعد نفتح يقعدن عرم رسائل منه وبنات عمتي يجني خودي ياحنه يبعتلك وهن كانن يبن التليفون وانا نبيه وقعد طول الوقت معاي عشان نبي نهدرز مهم تعاركنا انا وبنات عمتي لعند ما وصلنا الحل كل وحده تاخده يوم..

مهم ..

انا رديت على رسائل عاشور

انا:اهلين

عاشور:وينك

انا:تغطيه تفصل

عاشور :اها تمام

عاشور: بس قعدت نفكر فيك انتي خديتي فكري بصراحه يعني انسجمت معاك

انا: حرجتني (وغيرت الموضوع)

عاشور: والله جد مش عارف كيف يعني حتي في المحل نفكر فيك مع اني ما نعرفش شكلك

انا: تمام
مهم جا ولد عمتي يبي ياخد تليفون ساعه 1 قعدت نفكر شنى نقوله شوي قتله..

انا:اسمع انا بايته في حوش عمتي ونظامه يرقدو كلهم نبيش تكون الشبهة عليا

عاشور:يعني تبي اتسكري
انا:اها

طبعآ قالها زعلان شوي ومستغرب من نظام عمتي
طبعآ عمتي مش هكي بس يديرو هك لانه يشحن في الجهاز عشان نضمو الحوش 😑..

عاشور:قبل نيتي نهدرز معاك بنقولك شي بس تمام
#وسكر الخط

مسعوده:كان نقولك شن صار اخرى

جلنار:لالا بعدين خلي نمشو بالك طاب الغداء

وقعد يطقطق الباب

مسعوده:حيي زعما سمعونا

جلنار:افتحي باب وخلي روحك عاديه

فتحنا الباب.

اخت مسعوده(سهير):ليش مصكرين البباب

مسعوده:مش شورك عدي من قدامي

سهير:خزي اسمعي قالتلك امي تعالي جهزي معاي الصفر وحاجات خيرلك

مسعوده:وعدي انتي ياسمحه ولا فالحه غر عند ناس

جلنار:عدي عدي عاوني امك

مسعوده:به تعالي معاي جو شين بيقعد

جلنار : هي جايه
..
مشينا وقعدنا نسيقو في الفراندا ومسعوده تحكي …

مسعوده :تعالي هنا صوب الحاجر باش امي تسمعناش
اي المهم طبعآ فات شهر ونص حكيناش مشي مره اتصل بيا مره اولى رديتش مره تانيه لا تالته رديت..

عاشور : اهلين
انا:اهلين
عاشور:وينك مختفيه و كنك اطولي ماتردي
انا: كنت نهدرز مع الخدامه نشوف فيها شنى تبي

طبعآ كاذبه عليه قتله عندنا خدامه اثيوبيه
عشان كل ما يقعد عليا المطبخ نقوله كنت مع الخدامه ومايندريش ان هوا يهدرز مع الخدامه شخصيآ
مهم….

جلنار : خزززي معفنه على من تخطر

مسعوده:شن بندير هو سكنان بكل
المهم ياحنه قال لي …

عاشور : تمام قتلك صكري نتصل بيك اني
طبعآ فكرت وفكرت وبعدها وافقت
انا:تمام استني نتأكد و انسكر الباب
عاشور:تمام
ورن عليا وهدرزنا خدتنا الدوه وطولنا
عاشور:الو
انا :الو
عاشور:كيف حالك
انا :تمام
#ودوينا عرم دوه وقصص ومواضيع لعند قالي اوصفيلي روحك ..
انا: طولي 158 وزني 55 شعري طويل عيوني كبار بيضاء
(طبعآ وصفت روحي صح)
عاشور:جاني فضول نتعرف عليك شخصيآ

طبعآ انا قتله قاعده في طرابلس يمكن نسيت نقولها لكي وحوشنا فاضي في بنغازي

انا:حاضر انجي بنغازي وتشوفني قريب ونجي لعيت جدي

طبعآ انا قاعده في بنغازي اصلآ عند عمتي في اي لحظه نقدر نشوفه بذات عرفت محله

عاشور : تمام نستناك
بعدها دوينا عرم دوه وعاشور عرض عليا موضوع الخطبه وقالي انتي عاجبتيني طبعك وحسيت معاكي شعور ان انا نقدر نعيش معاك وخودي وقتك وقرري وانا مستحيل نفكر نخدعك عندي خوات

انا انصدمت وقتله كيف وبصراحه ماعرفتش نرد عليه لاني كنت نعتبر فيه شخص عادي ومش عارف عليا ولا حاجه ارتبكت وقتله وكيف هكي مااتجيش تعرفنيش انت قالي طبعك يمشي معايا وشكلك وصفتيه ليا وبعدين الاهم الطبع ان انا قعدت نفكر فيك ديما ومتريحلك ونحسب في حسابك في كل شي وانا اصلآ كنت ندور ونبي نخطب حتي امي ادورلي بس اهو تعرفت عليك ونشوف شكلك ووين المشكله بعدها ..

جلنار:حي عليك شن درتي هدا ناوي جديات

مسعوده:مزززال تو نكملك بس عطيتاش رد

انا سكتت ومتخربطه وماخدش مني ولا كلمه قتله مش عارفه خليها مع الوقت

قالي المهم انا شاريك سكتت اخره بعدها كنت تفكيري كان يوقف

وبعدها مرن ايام وكل يوم نهدرزو مزلنا
في مكالمه تانيه وبعد فتررره

قالي انا تريحت وقررت بنبدا معاك وخطبه وانا واتي وحتي فرح مانبيش يطول انا قتله لالا وكيف وقرايتي وبعدين مزلت انفكر نا في موضوعك
قالي عادي قرايتك خليها اخر همك نحنا عايله نحبو العلم واختي متخرجه من صيدله وهي متجوزه وخويا طب حتي هوا وانتي انحطلك احسن دكاترة طب يقروك ماتفكريش فيها بكككل

انا قتله تمام خلي الموضوع توا رد عليا تمام مهم فكري انا شاريك ولي تبيها حاضر وبعد سكرنا المكالمه فصل الخط قتله وانا يلي سكرت لانه عمتي جت ..
مهم دزلي قالي
عاشور:092-3 هدا رقم الارضي
وقالي ماتعلميش مرات ننسجمو اكثر وانتي تقتنعي
انا:هييي وكيف هذي
عاشور كيف ماقتلك

جلنار :باينته يبيك يا فرخه

مسعوده:اشبح والله ليا تلاته ايام كلمتاش خلي نكملك خير ما امي تكمل الغداء ويتغدو ونحصل في الماعين

جلنار :وعادي نعاونك

مسعوده:لالا فكك تو تحط عليك المهم

مهم انا قعدت انفكررر وخدت فكري كله لعند فطنتلي بنت عمتي اقرب وحده ليا في العايله قالتلي كنك شنى فيك لكي كم يوم مش عاجبتيني نحس بيك حايره ..

انا دويتلها القصه كلها ………

وبنت عمتي تسمع فيا ووجها مره يقعد هك ومره ومره ومره😍😭😑
مهم قتلها مانحسبش تقلب جديات وكدبت عليه مش عارف عليا شي وانا بصراحه قعد في شعور اتجاهه شنى نددددير نبش نكدب عليه
حاااايره وبعدين مش عارفه نعطيه فرصه ولالا ..
بنت عمي شجعتني نعطيه فرصه ونوافق عليه

مهم وتمت تدوي علي راسي وافقي وافقي وخدت مني الصوره كذا وريني صورته طبعآ قالتلي امممممم عيونه وانتي كبااااار عليك فرق وقالتلي انتي احلي بواااجد وزعلت منها وقتلها هاتي الصوره هنا وكذا خطي وجهي تمت تشفط عليا حي نبصر حتي هوا سمح انا به تمام مالكش علاقه بيه شين او سمح صكري فمك

طبعا بتقوليلي كيف جبت صورته ..
انا قتله عطينب صوره ليك قال لي تم واتفقنا وبعتله بنت عمتي صغير لمحل متاعه وخديتها …

جلنار:ياوخيتي يهبل غر شن تبي

مسعوده:اشبح بالك يتغير مع وقت المهم ياحنه

طبعآ مرن ايام عرم اخره وبنت عمي سكنتلي كل يوم تقولي وافقي ووتقنع فيا ..
لعند في يوم فتحت اتصلت دغري قتله نبيك في موضوع سر بس مش توا نتعشي ونهدرزو قالي لالا ظروري نعرف توااااا شنننني قوووولي ومعش عدا بكككل قتله مش شوري بعدين يعني بعدين سر سمح لكن قالي تمام قتله عينك من روحك انفجع قالي اووووووووو وين هذا انا ضحكت وقتله نجك ليا قالي وين الاعترفات هذين واخيرآ وحقربي نحبك طبعآ سكتت مارديتش ع كلمه هذي

عاشور :اسمعي فكرتي ولالا

انا:اها فكرت

عاشور : شن فكرتي

انا:موافقه بس بنقولك شي

عاشور:نعم قولي

انا:في اشياء كذبتهن عليك

عاشور:وعليش يابلعوطه

انا :بصدق ماكنتش نحكي معاك بجديه

عاشور نعم نعم يعني تبلعطي عليا ياغزال

انا:غر اسمعني

عاشور :لا نسمعك لا تسمعيني كل واحد في طريق
وصكر الخط
عاودت عليه مره اثنين لعند قطع خيط ارضي مره وحده
(طبعا بتقولوا كيف تليفونات ؟
مسعوده واخده تليفون هدا في لي يعرفوه بي اسم الويس وفي لي يقولوله بيله وان هدا اقدم تليفون كان بس مش متوفر كان في ليبيا من نادر هلبه في اماكن سياحيه على اغلب وقصه هذي حكهولي ناس )
نرجعو لي روايتنا

مسعوده:واني تعلقت بيه مش عارفه كيف ندير بس جبت تليفون على احتياط وخصوصي لما تعاركنا

جلنار:اوفف قصتك عويصه اني نفهمش في أمور هذي بس نقولك رايي خليه يهدأ كم يوم وابعتيله رساله بعد يكون قراها اتصلي يكون وقتها في مجال للنقاش

مسعوده:مش عارفه الحق أن شاء الله خير هيي اهيا حسها امي تنادي خلي نمشيلها
….
ومشت مسعوده …
….
مسعوده:نعم يما

اسميهان:شن حسكم توشوشو انتي والمنقوبه

مسعوده:،شي يما كنك شن في

اسميهان:مافيش شي عدي لي حوش عيسى هدرزي جت غاليه تسأل عليك

مسعوده:خايفين تقولولي والله مرايفه عليها لين خلاص هي سلامات
وعدت مسعوده تجري حتى بدون تقول لي جلنار لي استنى فيها في الصهد ….
…..
خلونا نرجعو للوراء قبل كم دقيقه ….
كانت سهير ماشيه بتجيب حكه طماطم لقت باب دار مصكر استغربت ….
وكل ماتقرب تسمع في صوت اختها مسعوده يعلى اكتر ووقتها سمعت كلمه مسعوده لما قالت : لو تبي نعطيك تليفون عندكش مشكله 😉

وطبعا سهير ماتصدق تحصل حرفين تعاودهن مشت طول عاودتها لي امها ….
…..
اسميهان:اخخخ جيتي لعندي اسمعي سهير سلم بنتي عدي دوري تليفون هدا خوديه وامشي لدور ثاني حطيه في ايي مكان

سهير:بس نقدرش وكان تشوفني مسعوده ولا عمي سليمان ولا مرته

اسميهان :مسعوده مش ح تخليها لما تطلع تخبر جلنار باش جلنار تراجيها وانتي تمشي وعمك راقد لوطا مش ح يشوفك

سهير :تمام
. . .
انتهى فلاش باك 🌸

مشت سهير قعدت تقلب في دار مسعوده لقت تليفون وهي ماشيه شافت جلنار جايتها خافت سهير قعدت تجري حطت تليفون على صالون وهي نازله لقت جلنار

جلنار:خيرك سهير تبي حاجه

سهير مرتبكه:ااا ها لالا شي غر اا عمي يعاني قال جيبي مفتاح سياره

جلنار:به تعالي نعطيهلك

سهير:تو نجي ماما تنادي عليا

….
عند جلنار ..
كنت نستنى في الحمو جو ساخن هلبه .. خشيت للدار
سطحت على سرير نحس في راسي يوجع فيا بكك..
قعدت نسمع في خطوات جايه …
….
عند سليمان ..
كنت متكي ونفكر..
اني عارف تصرفات جلنار من سحر ..
بس كيف نعالجها ..
يااربببي انت عالم بحالي نحبها بي دوشتها وهبالها برائتها وضحكتها ونكدها ..
بس نبي نعيش كيف ناس هناء وراحه وصغار ..
ليش ..
تيتمت ونجرحت وتشردت ونظلمت وتعبت ولي حبيتها نسحرت ..
والله تعبت مش عارف كيف ندير ولا شنو ندير ولا شنو بيصيرلي ولاااا كيف نحكي اصلا?!

حاس روحي تاعب نفسيا جسديا كل شي ..
مشيت لي دور تاني لقيت الفراره مفتوحه جيت تكيت على صالون دغري بدون تركيز حسيت بي شي تحت ظهري التفتت هك لقيت حاجه غريبه ?
من وين جي معقوله متاع جلنار ?
تي جلنار تلبس في فراشيه بدير جهاز اللاسلكي معقوله ..
قعدت نربش في البطم لين نفتح نفتحت قائمه لقيتها عرم ارقام وحاله اني ولعت فيا نار وقاعد مش عارف شت يكون جهاز هدا ..
قصدي معقوله براءه هذي كلها تمثيل قعدت نحوس فتحت دار نوم لقيت جلنار

سليمان:…..
..
يتبع
توقعاتكم

اترك رد

زر الذهاب إلى الأعلى