ﻣﺒﺮﺭ ﺧﻴﺎﻧﺔ الحلقة الثالثة عشر .. الكاتبة هامي | القلم الناجح
روايات ليبيه كاملة

ﻣﺒﺮﺭ ﺧﻴﺎﻧﺔ الحلقة الثالثة عشر .. الكاتبة هامي

ﻣﺒﺮﺭ ﺧﻴﺎﻧﺔ الحلقة الثالثة عشر .. الكاتبة هامي

مبروك عليك ياعروسه …

هووووب ضربني كف من قوته طحت على الأرض…

نزل على ركبه شد شعري ويهز فيه
انا تهربي مني ؟؟ شنو تسحابي روحك وحده رخيصه مفش حد يتجرأ يهرب من همام ……

لا مستحيل … هذا انت😳😳

عرفت وقتها اني هربت من جلاد لي منصة إعدام

فك ايده مني …..
ح تشوفي ايام سوده على جرأتك معي ..انتِ وكلب خوك …

– ومن قالك نبي نقعد معاك توا بنروح …لو نعرف انك انت نفسه مجايب خالد زفت مكنتش وافقت

رجع مسك في رقبتي …وانا مزال شاده روحي منبش نضعف

همام:: اصحك تفكري تعلي صوتك وتردي علي ، الكلمه لنقولها ملهش ثاني وتوا كيف شاطره ترضي ..وإلا ، تشوفي تصرف يندمك على عنادك وطول لسانك معي ….

هزيت رأسي وسكتت كنت ح نموت من خنقه لرقبتي …

طلع من الجناح ….وأنا في دوامه مزلت في صدمتي من لصار… كيف صار هكِ ونقلب علي كل شي انا بس كان كل قصدي ننتقم من يعقوب ونحرق قلبه …طلعتي يابراء ماتنتقمي الا من نفسك وينه يعقوب اليوم ؟ وانتِ في جحيم جديد بإيدك دخلتي ليه!!!

بعد شوي رجع وفي ايده شنطه ملابسي …. عزقها على الأرض… وانا في زاوية الدار

طلع سكين جرح إيده مسحها في منديل عزقه علي

كلميهم وقوليلهم تهنيتي…
وإياك تجيبيلهم سيرة عن لصار وقتها مش بس نأذيك انتِ لا ح تشوفي في عيلتك باالواحد كيف يتعذبوا…..

بعدها طلع اخره.

حسيت باالإهانه حتى دموع جمدوا في عيني ، منطقتش ولا كلمة معه… خذا من وشن يبي لدرجة هذي حاقد علي لأني هربت من العرس؟ ولا هو اصلاً مجرم ماهو لي جابه خالد شن بيطلع غير داعشي زيه 😓، يااااربي انا شن درت في روحي وكيف بنطلع من لي انا فيه !!!

رن موبايلي … صبيت نطلعه من شنطه وانا مزلت بِ الفيلو…. كانت هديل ؛؛ فتحت الخط،

هديل:: قاعده وحدك ولا جنبك العريس ..نبيك في موضوع مهند

-احكي قاعده بروحي..

هديل:: وينه راجلك يابنت شنو صار معاكم ؟؟

-تمام بخير وضعنا تمام ..قوليلي كلماتك سيلا “مرت مهند””

هديل:: اهاا كلمتني …وقت لي تأكد انه صار بينهم شي بعثت صور توا اكيد ح يكلمك…

ضحكت ههههه مش ح نرد توا خلي يبرد حرته في مسجات ..اوكي توا

هديل:: ديري بالك على روحك ..متخوفنش عليك

-اوكي تمام …

صكرت من هديل وكلمتني بعدها امي وفتحيه طمنتهم ….

وبعدها قعدت نحاول نسلح فيلو ..بصعوبه كيف فتح من لورا… بكيت وانا نفتح فيه ..يعني هذي ليلة عرسي وهذا الأبيض لتحلم بيه كل بنت ..ليش حظي مش زيهن ؟! حتى قبل عرسي مااخترت شي هديل اصرت ناخذ ملابس نوم واختارت فيلوا وانا محسيتش بطعمة اني عروس ولازم نختار ونتفنن في كل شي … على من انلوم ولا على من ندعي ماهو قراراتي كانت نتيجة تصرفاتهم معي هروبي كان من كلامكم انتوا ياااناس …ومنك انت يعقوب كله منك أنت!!!

خذيت دش نحاول نرتب افكاري وحياتي … ساعة نلوم روحي وساعة نلوم حياتي.. قدري.. ولادتي الغلط 💔

_________

لفيت روحي بِمنشف وطلعت نشوف فوني ليرن كان مهند شفت الأسم ضحكت وفتحت الخط…

-مبروك عليك عروسة عاهرة بنت ليل ياخويا هههه
شنو عجبنك صورها مع رجاله غيرك ؟؟

مهند :: تعرفي انك …@$$$##
ويييييييييييييينك تواااا يابت ال#$$ هكي ديري في خربتي حياااتي ياااحقيره

-لا لا عيب الغلط عاااد ..متجش منك هههههههه
ضحكت نستفز فيه “”
ياريتها غير وقفت على هك اممم تعرف انه عندها مرض وتوا انتقل فيك 💁 والعقد لوقعت عليه وقتلك ح ندفعه ههه في مؤخر بمبلغ لو اشتغلت عمرك كله مش ح تقدر تأمنه …يعني ح تكون مراتك الحلوه على ذمتك وتعرف نفكر نزيد عليك وننشر صورها لي عيلتك 🤔 شن بتقوللهم وقتها ؟؟؟ 😂😂

مهند:: شنوووو لدرتي هذا برااااااااااااء مش لعب عويل هو قوليلي انتِ وين توا متجننش انا شن دايرلك ديري في هكي

-شنو دايرلي؟؟ ههه لا وبعد كل شي تقولي شن درت ااااااانت ياااحقير ياعيييييل كرهتني في جسمي لمساتك القذره وكلماااااااتك في ذااااني من وانا طفله ياااااحيوان ياهمجي وانت تحرش بي وياااعالم بمن اخره يامريض تعرف شوي لدرتا فيك اقسم بربي لو نحرقك بإيدي مانشفي غلي وكرهي منك وتواااا خليك تحررررق ماعرف شن فيك وجك في وجها طول العمر كان فلست اعرضها لي اصحابك ههه تصرف عليك تششششششاااااااو علييييك

صكرت وانا نضحك ونبكي ….خش علي

في من تكلمي ؟؟؟

-شن دخلك انت اطلع برا كيف تخش من غير ماطق باب…قعدت نستر في نفسي بإيديا وانا خايفه منه

قرب مني وكان حركته تمايل ولسانه ثقيل
انتِ خاينه كيفها كلكن خينات ….قرب يبي يضربني دفيتا طاح على سرير وهو يهمس ودايخ

كلكن خااااينات كلكن زي بعض…

غمض عيونه… قربت منه ريحته شمتها من قبل هذي زي!!!! عبدالسلام لما كان يشرب💔💔💔

طحت على الأرض ايدي على فمي من صدمة…
هذي نهايتك لكتبتيها لروحك براء ؟؟ حافظتي على روحك طول هالسنين عشان واحد زي هذا !!!!!

طلعت بجامه مستوره من شنطه لبست وطلعت الغرفه لاخره في جناح فيها تلفزيون وكنبه ثلاجه صغيره …. فتحتها كان كلها خمره صكرتها وقعدت على كنبه كامشه في روحي من الخوف شن مزال بنعيش حاسه روحي في غربة في بلاد مش بلادي جسد مش جسدي افكار مش لي …. من بينقذك من هنا براء من يهمه امرك لدرجة يواجه الوحش لجوا ؟!!

انا ليش لازم نتعب ليش ماالنصيب عطاني حد يحبني و يخاف علي ويحترمني نعيش معه بكل بساطه يداوي جروحي وجع من طفولة مغلغل في ليش لازم انا لنحارب ونغير فيهم انا تعبت من الحروووب تعبت يااااربي من روحي ومن الناس لي في حياتي💔

الكَاتِبة هَامِي 

غفيت على كنبه وانا غارقه في التفكير من خوفي رقدت كامشه في روحي …سمعت باب يخبط نضت مفجوعه…..

فتحته كان في بنت جميلة مبتسمه

صباح الخير ألف مبرووك

-صباح النور…الله يبارك فيك ؛ معلش من انتِ؟

ابتسمتلي بلطافه ومدت ايدها لي تسلم …
انا يقين اخت همام …

سلمت عليها… تشرفت بيك امس لما جيت كان جو هادئ كأنه مافي حد..

يقين:: أاااه كنه في مزرعه …ماما مجهزه الفطور تفظلي …

-صحيتي ليش متعبه روحها

يقين:: تعبك راحه هذا واجبنا ….. سمعت صوت قاطعنا

همام:: شن جيبك هنا مش قتلكم متجوش؟؟

يقين مرتبكه… ااااه …ماااما ققققالت نجززلكم…

همام بعصبيه:: خللاااص انزلي

نزلت صفره على الأرض بإيدين يرجفوا وعدت تجري بدون ماترد…

كنه عند الباب نبي نخش مسكني من مرفقي ولفني تجاه

همام:: من قالك افتحي ؟؟

– ليش حتى هذي بإذن منك؟؟

ضغط على ايدي اكثر… متردش على بسؤال ومتعبنش معااااك كلمه زياده متنطقش وراي باب هذا لو يتكسر عليك ماتفتحش خلي ايام عقوبتك يعدن على خير احسن ماتكون نهايتك فيهن …

فكيت ايدي منه لي قبل طارت وانا نصارع فيه عيونه بس لجواهن غضب وردوود لكل الكلام 🔥

خذيت صفره وحطيتها على طاوله قعدت نبي نفطر

همام صبا قدامي
من سمحلك تاكلي؟؟

ضحكت.. لا بجد انت مش طبيعي هذا ماناقص تمنعني من الأكل .. قعدت ناكل وفته

قرب مني …
مفش حاجه تمشي الا بِ امري …حتى وكالك هذا فهمتي

-ولو صار العكس؟ لأني متعودتش نكون عبدا لي حد كلامك متمشش علي عقابك خلي للعاهات لي في حياتك انا مستحيل نستمر مع واحد سكير زيك

بكل برود ولع دخانه … حلووو ، العيون البريئه طلع وراهن لسان مؤذي …
بدون اي مقدمات لف ايدي الأثنين فوق بإيده والأيد الأخره فيها دخانه طفى على رقبتي

ماقلتش حتى أاااااه غمضت عيوني بألم وفتحتهن وعيونه تواجهوا
تعرف انك مريض ولي مش عارفه انت انه جسمي متخدر ياااما شايف عاهات زيك لدرجة برد معش يحس بشي يعني ح تتعب معي هههه

قلب طاولة الفطور …. توا نشوفوا متخدر ولا لأ كل كلمه تنطقيها تمددي في عقابك براء… ومن توا انا سجانك مفش اكل ولا طلوع ولا حياه برا القصر هذا فهمتي؟!!!

-متخلف راح خالد جيتني انا ياااعاهه شن تبي مني طلقني ورييييييييحني

ضحك علي بصوت مستفز… شن تقوللهم عروسه في صباحيتها جايه مطلقه؟ ديما متخلفين لي نفسي كاسبين ماتتحدنيش …

طلع ياخذ في دوش وانا نلم في لطيحا على الأرض …كملت تنظيفهم نبي نلهي روحي منبش نبكي منبش نفكرررررر خلي كل شي يسير زي مامكتوب ملييييت نحااارب ونواجهه ونخسر ونكسب مليييييت من كل شي…

فتحت شنطة نظم في حاجاتي مسكت في ايدي تيكت رحله عطتهالي شركه هديه زواج لشهر عسل ..ضحكت على حظي وغبائي …وهمام طالع من الدوش لاف منشف عليه ويشوف في وانا سرحانه فيهم… خذاهم مني

همام:: حلوه هذي عروسه بِ شهر العسل جايبته معها ههه شي رخيص بكل …

-صدقني مفش ارخص منك انت ..امشي البس حاجه متقولش معاك حد

مسكني من حنكي بإبتسامه … شنو عجبتك ؟

حولت ايده …حقير واطي

صكرلي فمي ولوالي ذراعي
اشششششش بتعبيني معاك انتِ بطول لسانك جبروت لي فيك ح نهدا براء …وصدقيني نوعك مايعجبنش مش مغري متخفش نعذبك بس منقربش منك.

وقعد يضحك ضحكته مستفزه بعد طلق ايدي ويشرط في بطاقات السفر ….قعد يلبس وانا طلعت لحمام نغسل في وجهي توترت وخفت منه وكسر خاطري كيف اهاني ……

___________________

طلعت من الحمام مكنش قاعد …. بعد شوي فتح باب كانوا خواتي وهديل هدرزوا شوي معي وطلعوا ….

ويمرن ايامي وانا وحيده يجي يسمعني كم كلمه واهانه ويطلع مرات يحرمني من الأكل ومرات يأمرني نأكل عادي جداا يوقفني من اول كشيك ومرات يخليني ناكل بلغصب حتى حاجات لمنحبهمش … على قد مانقدر قاومت منبيش نبين ضعفي وانتصاره علي ….مخلنش نتعرف على حد حابسني فوق وخلاص ….

دار مظلمه قاعده على سريري نتحسر على حياتي …الوحده بتقتلني خطر في بالي نفتح ايميل الوهمي نحكي مع عمر ولا حتى نقرا اشعاره رواياته اي شي….

فتحت شفت مسجات واااجد منه الأنبوكس كله مسجاته …. اول شي وينك وطولتي وياريت واخذ رقمك ووووووووووووووووووووووووووو

كميه اسئلة شبه يوميا يبعث اخر شي كاتبلي

تعرفي فاقدك بجد في فراغ وجو بايخ حاسس بيه من غيابك انا باين نحبك بالله متضحكش علي منعرفش كيف صار هكي 💔💔….

قريت مسجات اكثر من مره مش مصدقه وقعدت نرجف من الخوف صكرت مرديتش عليه ولا شي …

ليش استعجلتي براء ليش تضيعي في فرص عليك …جحيم لتوا فيه من عالم بيه غير ربي… ندمت كيف قررت نتجوز بشخص منعرفش عليه شي بس عشان ننتقم من حد ماااهتمش بجواازي اصلاً ولا حارب عشاني انا هربت من جلاد لي منصة إعدام !! ….معندش من يسندني ويطلعني من هناااااااا

خطر على بالي نكلم سلوى ونسأل على ياسين اكيد هو ميبيلش العيشه هذي وح ينقذني….

سلوى:: اهلا بلعروسه كيف خطرنا عليك

-حبيبتي انتِ ديما في البال كيف حالكم

سلوى:: بخير ماشيه امورنا…سراج في الحرب ياسين في الصحراء ويعقوب فسخ خطوبته وسافر.. وانا وامي ومرت سراج وصغاره نستنوا في اخبارهم💔

-ان شاء لله ربي يطمنكم عليهم ويجوا بألف خير

سلوى:: يارب ..قوليلي شن اخبارك انتِ وراجلك كيف امورك معه تمام

-تمام الحمدالله …سلوى سلميلي على امك وسندس

سلوى::يوصل ان شاء لله سلامات غلاي🌺

رديت بيأس وحزن:: سلام💔

_________________

وقاعده تكلمي وتسألي ياغبيه ليش من بيعيش على اطلالك وذكرياتك ويقعد يستنى في اشاره منك اكيد كل حد عنده هم وبيكمل حياته … وأنتِ ادفعي ثمن خيااارك غالي براء غااالي بكل

فتح الباب سلح جاكته عزقها استند على كنبه ورجليه على طاوله طلع دخانه ينفخ فيه بكل برود …
في حفله اليوم بتجيك وحده تجهزك عشان تتعرفي على العيلة

قفزت من سرير بفرحة … بجد واخيراً بنشوف الناس

همام:: طبعاً مش ح تحكي مع حد لقاعد يصير وكل كلمه تطلع منك بأذني ..اخترتلك شن ح تلبسي وعلى 7 تجهزي …..

مرديتش عليه نعرفه مريض ممكن يلغي كل شي لو عاندته …فضولي من الحفله مش بس عشان نطلع من السجن لي انا فيه كان عندي فظول نشوف أصول شخص مريض هذا ولي اي فصيلة من البشر ينتمي….

جتني ارتست معها فستان سكري عاري الاكمام اضطريت نلبس ونساير ونجهز على الوقت ….

قبل الوقت المحدد جهزت وطلعوا البنات لمعها وهو خش كان لابس طاقم رسمي أسود طالع جذاب بس حقيييييير ومريض

عطاني نظره من فوق لي تحت…
اممم ماشي مش بطاله

-استفزني وقهرني بكلمته زي مايبي …وانا منولدتش في ثقه في النفس وفي شكلي طول عمري معرضه للألقاب وتنمر …ف قعدت شاكه في روحي ….

صعب على البنت متسمعش كلمه حلوه وهي قعدت ساعات تتجهز نحنا كائن رقيق زجاجي قابل للكسر بأبسط شي….

مسك ايدي ونزلنا وسط زغاريت وتبريكات كانوا فعلاً طبقه راقيه ….كنت نخدم في الوسط هذا صح بس زي الناس والفخامه هذي مشفتش الا في مسلسلات

قعدت على كرسي مظاهر كلهم ….ماعرفت منهم حد غير يقين لجت سلمت علي معها وحده متوسطه في عمرها هك باين؟!

يقين:: براء هذي ماما فريده 😘

صبيت سلمت عليها
ما شاءالله عليك بجد مش باين عليك انك ام همام تباني اصغر

فريده:: ههه تسلمي على مجامله لعمر ليه حقاته يابنتي ربي يهنيك ان شاء لله

-يااارب

كان هو مع معازيمه رجاله وانا مع نسوان ليتهامزوا ويشوفولي بنظرات مفهمتهش؟؟

-يقين قوليلي انا طالعه مش حلوه؟

يقين :: شن تقولي انتِ طالعه تجنني تبارك الرحمن عليك

– بجديات..! مش عارفه حستهم كلهم يشوفوا في شكيت في روحي

يقين:: اهاا ،،هذي شغلتهن هذن ههه متخفش طالعه تهبلي

-طالعه لحمام نأكد على شكلي بنفسي😂💔

يقين:: ههه براحتك …خشي من هنا تلاقي قدامك

طلعت الحمام شفت مرايه زبطت روحي شوي وطلعت

نسمع فيهن يحكن …
مسكينه باين عليها ماعارفه في شن طايحه ولا غرتها الماده هههه
هك باين وحده صغيره زي هذي شن تبي في واحد كل شهر يتزوج ويطلق

شهقت 😳 رجعت الحمام بدون مايحسن …حي عليك يابراء شن درتي في روحك هذا من وشن يبي مني وشن اخرتها هااالحكاية….؟؟!!!

يقين طق في باب …براء كنك طولتي همام روح يسأل عليك

تمام يلا جيت…. فتحت الباب وطلعت لعندا

همام بعصبيه …وين كنتي؟؟

-في حمام شنو حتى هو ممنوع

همام:: اطلعي فوق خلصت الاستراحه

-اووووف علينا شن هي مدرسه ولا شنو

همام:: اطلعي يلا🙂

طلعنا فوق وانا خايفه شن بيديرلي …

خش دوش وطلع بدون مايحكي كلمه !!

دوشت ولبست …. الوقت يعدي و مليت من قعده جوا قلت نطلع لحديقتهم لوطا كبيره وجميله🌺

قعدت نتمشى فيها والقمره ليلتها كانت باينه اكثر  … زدت مسافه وبان علي مخازن وحاويات فيهم رجاااله ومن بينهم همام قربت نشوف شن سر الراااجل هذا هو زي خالد ولا شن شغله؟

وانا نقرب بين شجرر في حد لفني من لورا لصقني فيها وهو مصكر فمي ….كنت خايفه ونرجف شفت مع ظي القمر حد ملثم مش باين الا لمعة عيون بلون مميز …. دموعي نزلوا من الخوف انا وين وهذا من وشن بيصير في ؟؟

مجهول.. شنو انتِ مستغنيه عن عمرك وجايه برجليك هنا…

سمعنا صوت سلااااااح ……

اهرررررررررربي بسررررررررررعه

طلعت نجري بدون مانلتفت بدون مانتخيل شن وراي نجري بكل جهدي ليرجف من الخوف و رعب لعشته …. طحت وصبيت بسرعه نبكي ونجري لحد مابان على مدخل القصر طحت عندا وانا نتنفس بصعوبه من قوة جري والخوف….

شفت الحرس ملتهيين يلعبوا في كارطه …خشيت جوا ورقيت لجناح وعلى سرير طووول تغطيت وانا نسأل في روحي من هذا ؟ زعما ح يقول لي همام اني شفتا؟؟

خذاني نوم وماوعيتش على همام اذا جا ليلتها او لأ ….

الصبح نضت دورت ملقيتش كأنه راقد برا زعما رقد في مخازن ؟؟ ولا في مكان اخره!!

دوشت وطلعت لبسه جهزت روحي ننزل لي امه واخته نتعرف عليهم…

لما طلعت لفتلي نظري ريحه حلوه وصوت اغنيه نحبها …
انا العاشق لعينيكِ …. تبعت الصوت دخلني في غرفة ريحتها بخور حلووو مظلمه وإظأتها شموع فقط حبيت الأجواء والهدوء الكلاسيكي لحد مااااا

شفت حد من الخلف طالع من دوش ويحكي
صدقيني فظولك ح ينهيك لو عرف همام…

انصدمت كيف شافني وعرفني اني موجوده 😳تحشمت وطلعت نجري لاقتني يقين

وينك كنت نبيك تفطري معانه

-اااااه قققاعده هنا قلت نبرم نتعرف على قصر يلااا ننزلوا

نزلت سلمت على امه وصبحت عليها قد شني كانوا طيبين وراقيين 🌺
كيف هذي جابت واحد زي همام 😓

معرفتش كيف نخش فيهن ونسألهم عنه وهو كل ماتجي سيرته يرتبكوا ويخافوا ويغيرن الموظوع …

-ماشفتوا همام شكله ناض بدري ملحقتش عليه، نبي في موضوع

يقين :: ااها توا شفته في مكتبه تعالي نوريك مكانه

وصلتلي لي باب المكتب ومشيت …تنهدت وفتحت باب لقيتا يقلب في اوراق

همام بدون مايرفع عيونه من الاوراق؛: من قالك تخشي؟

-وانت كيف عرفت اني انا😳؟!

همام رفع راسه:: لأنه مفش حد تجرأ ودارها قبلك …

قدمت وقعمزت على كرسي مقابل لمكتبه
لو ناسي نحنا متجوزين من حقي نخش ومش موظوعنا هذا انا نبي منك شي

همام:: لا مفش نبي منك شي؟؟ في ممكن نطلب منك شي؟! عدليها 🙂

-اوووف وخلاص شن كمية العقد هذي

همام:: براااء!!

-هممم😑 …. ممكن لو سمحت نطلب منك طلب

همام:: لأ🙂

-شنو هذا ؟ مليت انا على فكره ….. قاطعنا صوت باب

همام وهو يشوفلي وانا عيني عليه بغضب مانتبهت حتى للي يبي يخش 🔥
تفظل من؟؟

فتح باب واحد قدم …كنت معصبه ونشوف لي همام لي قهرني كيف بارد هكِ

همام فجأه ابتسم …أوووو جيت في وقتك مزال نعرفك على المدام

براء شوفي هذا اغلى من الأخ ….

التفتت نشوفه وهنا 😳😳

لا يا دنيا لا متعاودش لعشتا من جديد 💔

#يتبع

لمشاهدة جميع اعمال الكاتبة: رواية الكاتبة هامي

لمتابعه اهم واخر الاخبار : القلم نيوز

اترك رد

زر الذهاب إلى الأعلى