ﻣﺒﺮﺭ ﺧﻴﺎﻧﺔ الحلقة الثامنه .. الكاتبة هامي | القلم الناجح
روايات ليبيه كاملة

ﻣﺒﺮﺭ ﺧﻴﺎﻧﺔ الحلقة الثامنه .. الكاتبة هامي

ﻣﺒﺮﺭ ﺧﻴﺎﻧﺔ الحلقة الثامنه .. الكاتبة هامي

البارت في الفاظ من سياج الحوار مجبوره يكونن فيه اسفه عزيزي القارئ

______________إبتعاد 💔

هند:: قصدك تبي تطلعيله؟؟

-جيت بنطلع لقتني أبله
انتِ وين طالعه ؟

-اااه..نسيت أدواتي دقيقه بس

طلعت لقيت الممر فاضي حطيت إيدي على قلبي برمت ندور فيه مالقيت حد كلهم في القاعات والجو هادئ ….

وينا ليش مارجنش شوي ؟ يعني لدرجة هذي واثق اني ما نطلع !؟ ليييش ياايعقوب دير في هكِ …

دموعي نزلوا..حرام عليك حرمتني من شوفتك…من صوتك..من انك تحكيلي شنو صار بتوقف معي ولا تخلى عني …من أني نقولك انا راضية بيك ونحبك..

خشيت القاعة ومنعرفش كيف قعدت بكيت،وبكيت، وبكيت…
كلهم لاحظوا ومفكرين انه من الإمتحان …

طلع الأستاذ الإشراف جابلي ميه …أهدي يابنتي واذكري الله وحده وحده توا تذكري ان شاء لله….. لكن متضيعش عليك الوقت انتِ في امتحان نهائي وهذي فرصتك الأخيرة ،،

شربت الميه بِإيدين يرجفوا …يااااارب ياارب ساعدني…
بعد نصف ساعه بديت نحل، ونرجع في تركيزي ونبعد في تشويش عن عقلي بكل مافي من جهد قاومت…

يمكن لو مفش أستاذ صاحب مهنة إنسانية وعنده بصمة إحسان في عمله، كان ضاع على الإمتحان .. ذكرني بكلامه قد شني بحاجه لنجاح والتخرج والإعتماد على نفسي …

“ما تبخلوش على حد بِكلمة طيبة ودعم يمكن في لحظتها تتغير كل حياته وتكون كسبت إنسانيتك..

طلعت من الإمتحان وبنات يراجعن جيتهن ناداني…..

ياسين:: تعالي معي ساحه لورا نبيك

شوفت ياسين حطمتني ذكرتني انه طرف ثالث في علاقة شبه محرمه…

نزلت عيوني…

ياسين:: خنتوني ! من امتا وانتوا مع بعض؟

هزيت رأسي ..واالله ماكنت نعرف اانه يععععقوووب

ضحك ياسين وبدا صوته يعلى…
يعني هو ولا غيره شننننننننو تفررررق إلا عندي أناااا قتلتيني براء موتيني بلللعرق ..كيف هنت عليك وانا لنموت في تراب لتمشي عليها كيف قدرتي تخونيني وتحطي عينك في عيني وااااالحيووووان هذك كاااااااان عاااارف اني نحبببك كييييييييف قوووووليلي كلهم عااارفين كلكم عرفتوا مخبيتش على حد زفت كنت شااااريك

“طحت على ركابي جسمي معش قدر يشيلني …اااااانا خااائنه صح للللكن وربي مااااااا كنت نعررف”””

-اسسسسسسسس …خلاص حرررام عليك ساااد لصار في ااارحمني يااااسين انت لكنت تفهم علي…..

ياسين:: اااااااااها انا العبيط لديما مصدقك وانتِ مهما حكولي عليك منعمي ومصدقك …نجري وراك زي الكلب مانبي إلا رضاااك ..وفي نهاية دايره علاقة مععععع خوي …خونا يابراااء خوووونا مش قلتي انتم خوتي شن معنى هوووووو ليش ؟؟! ماهو متربي معاك حتى هو ليييش هو بذااات برااااء

زدت بكاء….
ماكككنتش نعررف انه هو كل لصاار صدفة والله صدفه…

ياسين :: اكذبي انتِ وهو لكن أقسم بديني ماهو واخذك ولا تفرحي بيه ..وقتها بيخش فيها الحرام يابراااء ونحرقه دين…..

نبكي …..

ياسين::زيدي أبكي عشااانه وزيدي احرقينا اخررررره ماهو خربتي كل شيء

– أرحمني ياسين اااارجوك حتى انت طلعت زيهم …قتلك ماكنتش نعررررررررررررف انه هو

نزل لعندي ورفع وجهي وعيني في عينه
ولو كنتي تعرفي براء كنتِ كملتي معه؟!

دموعي على خدي وبشفايف يرجفوا…
حبيته يااا ياسين …. حبيته مش مني لحسيتا معه محسيتش مع اي حد مقدرتش نقاوم ….

ضربني كف وعييييييييييط بِ

أااااااااااااااااااااااااااه … عيطته كسرتني انا قبله عرفت اني وقتها خسرت خوي وصديق طفولتي 💔

جن بنات حضنتني هند طلقت أاااااااه في حضنها ….طلع معش شفتا…

كيف قدرت نشوف عيونه ونقوله انا نحب خوك كيف كنت قاسيه وقتها هك……

___________

جا يحي وطلعت للحوش شفت يعقوب على رأس شارع مع شباب جيران…
قلبي ياااناس رجفتي شلل فمي ربكتي كل مشاعري يتلخبطن بشوفته …بس ماحطش عينه في عيني انا منزلتش عيني لكن هو مارفعش وجهه في 💔

خشيت الحوش وانا تعبانه جسدياً ..نفسياً ..فكرياً

الكَاتِبة هَامِي 

ويمشن الأيام بثقلهن وجع الكبير لجواتي حتى بديت نتأقلم معه صار جزء مني … طول فترة الأمتحانات في مرات تصدف نشوفه من بعيد وهو مزال كل مايشوفني ينزل عيونه مفهمتش ليش يعني هو تخلى على ولا هو أصلا كان يمشي في وقته معي ومشاعر لحسيتهم كلهن كذب …..
غرقت في تفكير والأسئلة ليوصلن في لي متاهة … من البداية رقمه كان يرن على هند ماردتش عليه عطاته لي يعني هو كان يبي هند؟؟؟ عجباته زي الشباب الأخرين؟؟ زعما يحبها ! باهي ليش استمر معي صح مقلش نحبك بس اهتم بي وانا كنت عطشانة اهتمام 💔

كيف تقدرو ديرو هكِ كيييييف تطيييير بنت لي سابع سماء وتنزلها لساااابع أرض ؟؟؟ كيف عيونكم يكذبوا كيف الأمان لمعاكم كان كذب كيف اهتمامكم كان ووووهم ليش لي نحبوه محبنش ليش القلب والأختيار مش بإيدنا ……

أنتوا أكيد تقولوا تستاهل خلت ياسين ليحبها ومشت ورا وهم حباته من أول ماسمعت كلمة ألو منه …لكن وربي مابإيدي مش شي أنا مسيطرة عليه قلبي الحقير خذلني ذلني كسرني 💔

_______

كملن إمتحاناتي ويعلم ربي كيف كملتهن بتعب وذل ورياف وعتب ….

سمعت انه جا خالد جريت للدار من خوفي منه

خش على فتح باب بقوه كأنه في نظره قاعده نفس القعده وفي ايدي فون ويبي يقتلني اخره…

جسمي انتفض انفاسي نحبسن راسي لوطه تذكرت اليوم المشئوم تسارعت نبضات قلبي خوفاً من الذكره تنعاد…..

خالد:: يعني مفش فايده كسرتي كلامي ورجعتي امتحنتي

-……. مرديتش

خالد قرب رفعلي راسي من شعري شدا لي بقوه
لما نحكي يااااعااااهرة ردي علي

-س س س ااااماااااحني وووواللله مممممممااااكان للللي

عزقني على الارض
وديني وإيماني ح تشوفي معامله زفته من يوم ورايح والتيس لكنتي تحكي معه ودايره خوي واقسم بربي لو تمشطي شعرك شيبه شيبه ماتاااخذي

بلعت ريقي بألم ….

خالد:: توا تشوفي كيف تعيشي خدامه هنا لنا لكيفك مش متاع احترام شنواااا كان ناقصك يااااوسخه شن نقصنا عليك تنحرفي كيف سقطات…

ضحكت لا ارادي والله منعرفش كيف طلعت مني يمكن من كلمه شن منقصين عليك؟ صح براء شن ناقصك !

ضربني كف وجا بيبدا في طلعه بوي …

تعودت جسمي برد خلاص لدرجه فكرت اني مذنبه في شي وقاعده ندفع في ثمنه بس شنو هو؟!!

_____

بعد اقل من شهر طلعت نتيجة ونجحت بتفوق كانت اول مره ننجح وعيله عمي صافي مايحتفلوش بي انا أهلي بحياتهم مع حسسوني بطعم نجاحي عمرهم ماشجعوني وفرحوا لتفوقي عيلة جيرانه حسستني بكل لكان ناقصني وتوا خسرتهم💔

_____________________

جا رمضان لنفس كل رمضان عندنا الناس تقرب من ربي ونحنا نزيدوا ضلال ….

عصبيه وسب وضرب….

في يوم كنت نطيب في الفطور ونقلي في نوع موالح نقلب على ايدي زيت حامي …. صرخت ألللللم الحرقه صحى ذكريات طفوله توجع في بس الحرقه هذي كانت اقوى زيت دوبا كيف سخن وانا كنت نقلي برا المطبخ والهواء مخلتش يسخن كويس بس مع ذلك تألمت منها وقعدت نطير وننزل …. جتني مرت بوي بثلج … وبوي يعارك على عياطي وطلع وخوتي صغار طلعوا يجارو ….

جو كان سخون لأنه صيف وهذا زاد الألم مع حراره الحرق … مفطرتش يومها كملت نظم في المطبخ ونغسل في المواعين بِ أيد وحده ….

في ليل جتني سلوى وامها وصبايا جارات يطمنن علي

سلوى:: سامحيني لي فتره عليك تعرفي لصار

كنت نطيب في قهوه ….

سلوى::خليها عنك توا نكمل عليك عدي انتِ داوي بااالمرهم هذا ودوشي توا تريحي

-من وين جبتي بدري سالمه دزت ملقتش عند حد من جيران ودهنتها بعسل قالوا كويس…. من ياسين صح؟

سلوى :: نقولك بس متقولش لحد …

هزيت راسي باهي

سلوى:: يعقوب اول ماعرف طلع جابه وقالي يبي يطمن عليك بس ميبكش تعرفي

وانا زي الهبله فرحت نسيت كل شي وفرحت ليش ياقلبي الغبي نسيت كم عنيت وبرساله من غريب رجعت تفرح !

-بجد يعني مش كارهني

سلوى:: وليش يكرهك براء لصار كله نصيب وربي يحسن الوضع والله من يوم لصار ماعاد ردت حياتنا طبيعيه

-قاطعتها بنغير موضوع …توا تضيفيهن انا بندوش وندهن ايدي…

طلعت ندوش ..ونسمع فيهم ينادوا في صوت سراج ولا يعقوب صح هو ولا انا لنتخيل !

طلعت بسرعه لبست … من لجا سمعت حد ينادي في قريب

سلوى:: اهاا سراج يبي يطمن عليك يسحابك كملتي دوش خش جوا …

– مامعش حد؟ سمعت صوت…

سلوى:: لا براء تهايلك بس …
تعالي ندهنلك ايدك ونقعدو مع بنات جيران جن يطمنن عليك…

دهنتلي وقالت منلفهش صيدلي قال ليعقوب لازم تنشف…

كانت لما تجي عيني في عين امه نتهرب منها …حاسه بخجل منها ومن ردت فعلها …
تصرفت معي عادي حسيت في شي متغير ومن حقها اولادها بسببي مقاطعين بعض 💔

روحن جارات وقعدت حايسه بين اني نظم سهريه واني نجهز لي سحور …

سحرنا واذن الفجر صلوا ورقدوا وانا مزلت في مطبخ نشتغل بِ ايد وحده …

سمعت صوت خربشه لتفتت كان … عبدالسلام مش قادر يسلب طوله عيونه حمر ينظر لي بنظره غريبه خفت قرب مني يحاول يعتدي علي ….صررررررررررخت وضربته بِ الكبايه لكنت نغسل فيها طاح كان دايخ اصلاً…

ناظوا على صوتي …شافوا حالتي ليلتها خالد راقد برا … بوي طاح علينا من صدمته وانا في حالة خوف وصدمه بِ أبشع شي ممكن نتخيله يصير !

جريت لحوش عمي صافي فتحلي يعقوب
ااااالحق بوي طاااح علينا مبش يينوض

جا ولحق سراج وناض بوه …. فهمناهم انه شاف عبدالسلام سكران مقدرش يتحمل طاح مجبنش سيره انه حاول يتعدى علي ….

سعفوا ومشت معاهم مرته وكلموا خالد يلحقهم وانا قاعده مع المجرم لي هو خوي ومش قادره نتكلم ونقول ياااااناااس متخلونش مع خوي 💔

كان طايح راقد ريحته مقززه لعنت امي ياااناس لعنت بوي تمنيتا يفطس ويموت لعنت دنيا المعفنه لوصلتنا لي هكِ ….

من أمتا ينولد فينا الخير والشر الحلال والحرام !؟
هو ماينولدو فينا بطبيعتنا نولدت فينا البراءة لكن دنيا مرمدتنا وجردتنا من كل شي نظيف كل واحد فينا أختار طريق يلجئ ليه وللأسف ماكنش طريق الصح لأنه مفش من قاللنا وخروا هذا غلط نحنا انولدنا بس ماتربينش!!

عبدالسلام كان برئ يلعب في شارع يتشيطن يضحك يبكي كبر في عيلة كلها عقد لقي قدامه أصحاب سوء تبعهم وانحرف معاهم ومن سنين مدمن لا حسيب ولا رقيب….

___________

يومها رقد مانضش ولا هو خاف ينوض ويحط عينه في عيني ويتفكر شن هبب معي … كلمتنا ام ياسين نفطرو عندهم … اعتذرت منها وانا خاطري نمشي لكن تحشمت …

وصلوا بِ الليل قالتلي مرت بوي عندا جلطه وتوا في العنايه خذتله ملابس وكانت بتمشي

-قصدكم بتخلوني معه انا معش بنقعد هنا

سالمه:: وين تبيني ناخذك خالد مع بوك … وهنا خوتك وحدهم عينك منهم

– ماليش دخل بحد انا بتخلوني معه وحدي وكان اعتدى على اخره شن بتكون حالتي …

سالمه:: صكري فمك ومتقولش لحد توا بناتي يخللن عندي بسببك والله هذا خوك تحملي مش انا لجايبته

-اسمعي وكان مادبريلي في طلعه من هنا والله الا نفضح بيكم نبي نمشي لي عمي حتى امي منبهش

سالمه:: لا والله وطلعلك لسان ماعندي كيف ناخذك واهمدي هنا ولا نرن على خالد

– وانا منش قاعده هنا وطز فيك وفيه خلاااااااص معش نقدر نتحمل قرفكم تواااا نبي نمشي بيك ولا بلاكي

سالمه:: يافااانص تبي تهربي
وجت بتضربني ولي اول مره مسكت ايدها منعتها دفيتها
قتلك معش نبي نقعد هنا نبي تاخذيني معاك يلا متبش والله نهرب وانتوا دايريني عار وانا مش دايره شي فااا خلي عار رسمي

سالمه مصدومه من ردت فعلي😲
يلا جهزي روحك ماشيه مع صافي والعويل نوصي عليهم نواره نخليهم عندها خير ماخوك يتعدى على بناتي

زمطت علتي وسكتت طلعت نجهز في حاجاتي مكثرتش نبي اي شي نهرب بيه وحلفت ماعاد راجعه لمذله هنا ….

_______________

طلعت نحط في شنطتي في سياره وسالمه خذت عيالها لي عمتي نوريه …

فتحت باب جا يعقوب

يعقوب:: وين ماشيه؟؟

الغضب لجواتي سيطر شوي على رجفتي وريافي قدامه..
يعني تقدر تحكي معي ليش توا كيف حكي…

يعقوب يتلفت كأنه خايف يشوفنه حد …
براء سألتك وين ماشيه مستشفى ماعندك ماتبي فيها

-ومن قالك ماشيه لعندا ..انا خلاص بعد العيد جامعتي تبدا يعني مافرقش توا ولا بعد العيد

يعقوب:: ووووتخليني

– انت شنو حرام عليك …من لخلى لأخر … والنبي خلني ساكته

يعقوب:: سامحيني براء على كل شي بس ياسين و… منقدرش نكمل

مقدرتش نحكي ركبت سياره وسكرت باب انفجرت بكا … اذا ماتقدرش تكمل من الأول ليش حكيت معي ليش علقتني فيك انا قبلك لانعرف حب ولا اهتمام ولا اني نتعلق بحد ويحرق قلبي هكِ الله يسامحك

مقدرتش ندعي عليه 💔

طلعت من المنطقه من الألم من جرح شلته من الطفولة….

وصلوني لحوش عمي …وكان عمي عند بوي لقيت مرت عمي وبنات…

رغم اني جيت فجأه الا انهم كانوا مهذبين في استقبالهم…

قعدنا نهدرزوا في أحولنا واوضاع خوتي لعند مارن جرص باب وفتح ولد عمي…

سمعت صوت عارفته ندعي مايكونش لي في بالي…

خش ولد عمي..
براء خوك مهند برا قال امك باعثته ياخذك مشغوله عليك

بلعت غصتي والأمان لي قبل حسيتا تلاشى ….
طلعت لعندا

كنك شنو جيبك هنا؟

مهند:: يلا معي امك تبيك

-مش ماشيه معاك شن عرفني شنو دير في

مهند بعصبيه ضاغط على سنونه خايف يعلي صوته…
والله نربيك عليه الأسلوب هذا امشي قدامي متخلنش نفصل هنا

-تنحرق ميهمنش مستحيل نمشي معاك المكان… امي تبيني توا نمشيلها مع ولد عمي اما انت نموت ومانركب جنبك …

طلع وقربع الباب طلعت على ياسر
ممكن توديني لي امي

ياسر باين عليه استغرب لأنه مهند كان بيأخذني …بس سكت وقالي يلا …. ناداه خواته البنات وطلعوا معانه قال يدهورهم بالمره كانت لقطة رجوله منه انه منطلعوش برواحنا ….يعني يابراء مش كل رجاله ذكور زي ماكنتي مفكره !!

طقيت الباب فتحتلي امي بعصبيه

هذا ماناقص يافاجره تردي خوك وبعدين انتِ شن جيبك كيف مخليه خوتك وحدهم ماساد خوك مريض

-من خوي بالضبط كثرتيهم انتِ حدديلي من ولا نسيتي اساميهم …

ضربتني كف
ياقليلة تربيه تردي علي

-معلش ملقيتش من يربيني امي خلتنا وعمري 5سنين وبوي ماعندا غير عياط وتكسير … اطلقوا وخلتنا اطفال واتجوزت … تمرمدنا في دنيا البنت ستين كلب لي منعرفش ليش جبتونا على دنيا هذي اذا بتعيشونا المر هذا

امي:: لا انتِ زودتيها ولسانك طاول تواااا ياخذك مهند ويرد بيك المنطقه عينك من خوتك عبدالسلام مسكين مريض حسبي الله في لي ساحره ولدي انظر شن موكلينه

ضحكت بصوت عااالي
اااااه ياربي توا كيف شغلوك عويلك ؟ خلاص هذوم قعدوا رجاله زي ماقلتي …. ومن قالك عبدالسلام مسحور ولدك ياااااامي مدمن سكير حاول يتعدى على اخته

صكرتلي فمي …
اسسسسس الله يفضحك تفوووو عليك لعنه الله عليك تبلى على خوك وانتِ من كم شهر ماسكينك مع واحد مفروض يكون خوك سودتي وجهنا قدام ناااس

-خووووووي شني لتقولي عليه وانتِ ماخليتي حد ومادرتي خوي ترضعي وتخاوي لنا ولد راجلك ليتعرضلي ويضايق في كذبتيني وخاويتي لنا شن خليتي بس اااااارحميني وخليني في حالي سااااد لعشتا من اول مانولدت

امي:: ينعلي الله لا تربحك رفعتيلي ضغطي امشي من قدام وجهي ….امشششششي

طلعت قعدت في دار بنات وانا ندعي في ربي مهند ميجش مافرقتنش عشان مايختلش بي…

مرن يومين استغربت كيف خالد مجش خذاني … بوي طلع للقسم وجلطه مأثره فيه … عبدالسلام وضعه زاد عن قبل… من مكلمات امي لعمتي نوريه

ماتغير شي عشت مشتته بين حوش امي وبين حوش عمي لتغير هو انا جواتي شر وغضب غريب ولما نختلى بنفسي حن وضعف ورياف له💔

بدت جامعتي قدمت بمساعدة عمي كان رزق من ربي مخلنش وعدته نثبتله انه كل لنقال علي كذب…

بديت نقرا ومعي مرام بنت عمي في جامعه … جيتهم مامعي شي لا لبس ولا فلوس … بديت جامعتي بملابس قديمه منظري يبان على اني مش زي الطالبات الأخرات تعرفوا ماكنش همني لا نظرتهم ولا تنمرهم لأنه اغلب الوقت وحدي كل همي اني ننجح وماحد يشمت في. … قدملي عمي على منحه وكملت اجراءتي وحدي كانت اول مره نعتمد فيها على نفسي … مكنتش نطلب من حد لو ساعدني حد باهي لو لأ نحاول نبني نفسي بنفسي … مرات نضايق من الخوف لي في مزال مقيدني …

نساعد في بنات عمي في شغل الحوش منبش نحس اني ظيفه ثقيله اقل شي نخدمهم كأني ندفع في حق قعدتي عندهم ومساعدتهم لي… وعند امي نفس شي …

كان حوش عمي 3بنات و3شباب مع ذلك الحوش هادئ كيف يقعدو على سفره وحده ويضحكوا مع بعضهم وهم يحكوا في تفاصيل يومهم وخوتهن يجيبولهن في هدايا يحكوا لخوتهم اسرارهم يسهرو مع بعض ….

حاجات اول مره في حياتي نشوفهم باهي ليش نحنا مش هكِ… مش حسد لا بس انا كنت مفكره انه كثرتنا هي سبب مشاكلنا لكن هذوما مش شوي حتى هم لكن عكسنا شنو سبب ؟!

طلعت منحتي وقعدت نصرف بيها على روحي …حاولوا يوقفولي قرايتي ويرجعوني للمنطقه عمي وقفلهم ومنع يصير هكِ… من مازال يطلع على في اشاعات حتى وانا في جامعه؟

انا حتى شبه اني منحكش مع حد !

بعد كم شهر جتنا عطله نهايه سيمستر وقتها درت فون من منحتي عشان نطمن على خوتي رغم كل شي رايفتلهم💔

كان فرح سراج اسبوع هذا ماصدقتش لما قالتلي سلوى انه خطب بنت عمه ويبي يطلع فرحه …

جا خالد يبي يا خذني معاملته متحسنه شوي …

طلب مني
خالد:: معندش حتى حق بنزين وسراج والفرح نبي مصاريف عطيني من فلوسك توا نردهملك

-كنت نبي نجيب لي سراج هديه توا نعطيك وتخطم على محل تاخذلي لنقولك عليها

خالد:: تمام

طلعت على شقاقتي كسرتها وكان مجمعه مبلغ محترم بحكم اني منصرفش في شي غير مذكرات والموصلات من عمي يودينا وفطور منقعدش في جامعه اصلا ناخذ محاظرتي ونطلع … واخذه بس جاكه شتويه ولوازم بسيطه…

عطيتهم له وطلعنا …طول طريق وانا نفكر شنو صار في غيابي وكيف بيكون استقباله …لحد ماوصلنا لقتنا خيمه العرس وجو الزحمه في شارع

خشيت حوشنا
سلمت على خوتي … وبوي بعد زيارتي ليه مره في مستشفى ماعاد شفته

شافني نزل راسه وسلمت عليه حسيت باالمرض مأثر فيه …

ملقيتش سالمه قالوا عند عمي صافي… بدلت ملابسي وطلعت عندهم….

كانوا في بنات عيلتهم والكل ينظرلي بإستغراب عند ماشفت سلوى جتني تجري حضنتني

سلوى:: وأخيرا براء رجعتي

-مرايفه عليكم وين امك

سلوى :: قاعده جوا خشي

لفيت بنخش جسمي رعش وانا نتلمس في حيطان الحوش نعض في شفتي منبش دموعي ينزلن ويحسوا بي قلبي رجع نبضه يقوى ريحته غلغلت في قاعده في كل مكان ….

طلعت سلمت عليهن …..وقعدنا نهدرزوا ونساعد فيهن نغلفوا للعشاء سياق …

جابن سيرته سمعت اسمه هربت بعيوني نحس في روحي مكشوفه مهما هربت ….

ام ياسين:: ان شاء لله ياربي يجي طيب ونفرح بيه كيف سراج

زاد فضولي طمعانه نعرف من وين يجي طيب وين مشى شنو اخباره ؟!!

عمتهم:: مش عارفه كيف خليتوا يتغرب بروحه وهو شاب صغير

توترت يعني يعقوب هرب حتى للغربه ؟!

ام ياسين:: الله غالب صكر راسه لكن توا الحمدالله وضعه مستقر ومتعرف على وحده ان شاء لله فيها نصيب

دنيا برمت بي معش قدرت نقعد راسي دااااخ ثقل ياااااربي انا مش مكتوبلي راحه
شن تقول هذي يعقوب يحب غيري ؟؟
لا لا مستحيل من تكون؟

#يتبع

لمشاهدة جميع اعمال الكاتبة: رواية الكاتبة هامي

لمتابعه اهم واخر الاخبار : القلم نيوز

اترك رد

زر الذهاب إلى الأعلى