ﻣﺒﺮﺭ ﺧﻴﺎﻧﺔ الحلقة الثانية عشر .. الكاتبة هامي | القلم الناجح
روايات ليبيه كاملة

ﻣﺒﺮﺭ ﺧﻴﺎﻧﺔ الحلقة الثانية عشر .. الكاتبة هامي

ﻣﺒﺮﺭ ﺧﻴﺎﻧﺔ الحلقة الثانية عشر .. الكاتبة هامي

ياسين:: عرس شني براء؟؟

انا مع ابتسامه …عرسي ياسين كنك نسيت انه كبرنا ولازم نتجوزو ولا شنو هههه

يعقوب:: ألف مبروك 🙂

شفت في عيونه ماصدقتش برودة ردا علي😳
طلعت مني ابتسامه مصطنعه مع انه جواتي ناار انا قلبي ينزف :: الله يبارك فيك … عقبالك

ياسين متريحش في قعدته حسيت بيه 💔
براء ممكن نحكوا وحدنا شوي في حاجات نسألك عليهن

-اااه تمام ..تعال نشربوا قهوتنا في بلكوني

طلعنا نحكوا دقايق صمت نتفرجوا على ناس وسيارات …حاسه بيه وعارفه شن بيقول لكن شن تبي تجاوبي براء ؟؟!!!!

بعد وقت حكى وبحة صوته باين مجروح💔
تعرفي عمري ماحكيت مع بنت ولا عرفت غيرك فتحت على دنيا وانتِ جنبي حافظ ملامحك تصرفاتك ردت فعلك كل شي فيك حبيته …انا ماحبيتش من أول نظره ولا اعجبت بعدها حبيت ولا من لكانوا مجبورين يحبوا براء انتِ نولدتي في حبيتك أه!! كيف وامتا ليش منعرفش من وانا طفل واول اسم بنت نطقته اسمك حبيته بدون مانفهم معنه كنت نكره اي حد يقرب منك ولا حد يهتم بيك غيري مفكرتش ولا لحظه انك متفكرش في بحب زي أنا ؟!! هذي كانت غلطتي غرقت بدون مانعرف مشاعرك تجاهي شنو … كنت ناويك حتى بااالغصب عنك تكوني لي …..

لكن انتِ ويعقوب خربتوا كل شي …كل شي براء ،انااااا مش قادر نحب غيرك صوتك صورتك في كل بنت معرفتش نطلع من حاله هذي ساعديني نكرهك انا مع كل لصاااار مقدرتش….💔💔💔💔

طول ماهو يحكي دموعي ينزلوا كل كلمه نطقها قتلتني حاسه بيه مااانا عايشه نفس شعوره وحالته لكن مع غيره!!!

-خلااااص ياسين انت تعذب في ، شنو تسحابني فرحانه بلقاعد يصير !؟ انت اخر انسان نفكر نأذي لكن مش بإيدي كل لصار….

ياسين:: عااارف شن ح تقولي نفس كلام انا مش في ايدي شي قلبي لي اختار وانت نفس….. نفس خوي منحسش بشي اتجاهك … مفش داعي تزيدي علي وانااااا لتوا براء نشوف في حبك له في عيونك كيف ترتبكي بشوفته كيف ايدك ترعش لما تسلمي عليه شن مفكره لتوا هو يفكر فيك؟؟ تعرفي كم بنت عرفهاااا غيرك ؟؟

-خلااااااااااص حرام عليكم ارحموني معش نبي نسمع سادكم يااااناس شنو مفش حد تعذبوا غيري ..هو انتهى بنسبه لي وح نأخذ غيره انتهينا

ياسين ..عمرك ماتستني مني مبروك وانتِ بتنزفي لغيري وبحياتك مش ح تشوفيني …

طلع وخلاني في صراع فكري لو نغرس ايدي في قلبي ونطلعه من مكانه نبي نعيش بدونه ينفع؟!!!

_____________

فتحيه:: شنو لقلتي لهم عريس شن لجايك؟؟

رديت وانا نحول في عدسات …
زي ماسمعتي نصكر في كلام الناس لجننتوني بيه … عمرك25براء عنستي ومن بياخذك ولو نرفض لا انتِ في عقلك واحد اخر وتقاليد وقررررف وبلا بلا بلا ……

فتحيه:: لا انتِ مبدلينك مش براء هذي !! جواز شني وخوك مزال ترابه مانشف شن تحكي علينا العالم شنو تسحابيني مش ملاحظه لبسك جديد ومكياج واكسسوارات وريحه العطر لتجيبك من اخر شارع شن في عقلك انتِ ؟ حتى ميت مااحترمتيه…

-كملتي محاظره ؟؟ نحب نذكرك لو مهربتش كان توا عروس في شهر العسل حبيبتي يعني شنو يفرق لبسي ولا مكياجي بنردا خوي لي واجعك ؟؟ .. بالله ريحونا من النفاق زايد حتى في الموت كل حاجه لا مديرهش خوك مزال ترابه مانشف العالم شن تحكي علينا ..تِ العالم ماعندهم غير نحنا مثلاً ههه على فكره العالم تحكي ان شاء لله لو نقدسوا خوي لي مات ولو قاعده بي اسدالي ومنتحركش من جامع ح تحكي الناس هذي شغلتهم حياة غيرهم فا متجش تعطيني محاظره وشوفي حياتك ياروحي عايشه تحت رجلين راجلك وذرتك عيشة ذل والعالم لحكت علي تحكي عليك ….

فتحيه:: ِ تعايري في ؟؟ وانتِ اكثر واحده عارفه على شن متحمله الذل منبش عيالي يعيشوا لي عشناه

-مش عذر تقدري تطلقي وتعيشي على عيالك بدال ماهذي عيشتك حرب نفسيه …

فتحيه:: لو انتِ حاربتي وكملتي قرايتك وحصلتي شغل عشتي منه وشفتي روحك علينا بيه ..فااانا ماصارليش العيشه لعشتيها كل حياتي كتبوها هم سطرووووها لي مخذوش راي في شي ،، اخر حد توقعتا يتشمت في هو انتِ ..شوفي روحك براء انتقامك من يعقوب ح يحرقك انتِ قبله …..

طلعت من دار وانا طيحت بإيدي كل لي على زيانه قدرت تستفزني….

رن فوني كان مهند ….

شنو تبي

مهند:: انا تحت انزلي نبيك

-تعبانه ومعندش نيه نلاقي حد

مهند:: قتلك انزليييي مانشورش فيك ياقطوسه

صكر الخط ….تنهدت يااارب خوووذني وريحني….

لبست جاكه ونزلت تحت كان يرجى في سياره فتحت باب وخشيت …

نعم شن تبي؟؟

مهند قرصني في خدي
حلوه القطوسه وهي شرسه

شلت ايده بعصبية قوول بسرعه شن في عقلك

مهند:؛ قولي لي في عقلك انتِ ياحلوه مش لي في عقلي انا ؟؟

-احكي بدون الغاز شنوو في ؟؟

مهند :: اممم شنو لجد عليك وحنن قلبك علي بتجوزيني وعلى حسابك اخره 🤔

-ما هو عارفتك منحرف فاقلت بالحلال احسن ناخذ فيك اجر 🙂

مهند ضحك هههه ..والله وكبرتي ياقطوستي ، باهي عرفيني عليها حلوه زيك😍

-اكيد حلوه املا شن بنجوزك اي وحده وخلاص ..ونعرفك تبي وحده ماباس تمها غير امها ههه جبتلك وحده نظيفه معندهش في لخبطه تعارف عليها ونحددوا اقرب موعد

مهند:: اوكي ..موافق لي يجي منك كله حلو ياحلو😍

شفت عمي درس سيارته ونزل….

-اوكي توا مهند عمي جا حنبعتلك رقمها في مسج

نزلت من سياره ومشيت لي عمي لي واقف عند باب العماره….

شنو يبي منك؟

-امي كانت تبيني في حاجه ..شنو اخبارك عمي

عمي:: بخير، يلا ارقي نبيك في موضوع…

طلعنا للشقه سلم على بوي وبعدها قعدنا وحدنا انا وياه ….. فتحيه جابت القهوه حطتها وطلعت

عمي:: منبش تضيعي على روحك فرصه هذي ..انتِ مش صغيره ومادايملك حد تشوفي في وضع بروحك عبدالسلام الله يرحمه وخالد محبوس وبوك بين الحياه والموت خوتك شباب مصيرهم يشوفوا حياتهم … و راجل لجايك متريح ويبي يكمل نص دينه وانا سألت عليه نعم رِجال

-الي تشوفه عمي …وانا موافقه

عمي:: على بركة الله ان شاء لله ربي يهنيك ياما تعبتي في حياتك ربي يصلح الحال… توا نقوله يجي هنا وتتفقوا

-لاااا عمي منبش نشوفه خلاص طالما انت شفته وراضي مفش داعي لكثرة كلام وانا منبش عرس تعرف عبدالسلام مالي شي متوفي ماخاطرش في عرس وزحمه الناس

عمي:: براحتك انا ح نخبره ونتفقوا امتا ياخذك …. هي بسلامه توا

-الله يسلمك ان شاء لله سلملي على بنات…..

الكَاتِبة هَامِي 

خشيت دار مخنوقه كنت بحاجة حد يحس بوجعي والنار لي في قلبي نبي من يطبطب علي ويحضني ويفهم علي وبشنو نحس ونفكر ينصحني بدون مايجرحني ….. مُرهقة تعبانة خاطري مكسور ولكسره من لعبيت عليه يكون سندي وسلمته قلبي وروحي وشبابي سنين وانا نستنى فيه هذي جزاتي يبارك لي وانا بننزف لي راجل غيره ؟؟

عادي هكِ عندك تعلق بنت فيك تحبك تشوفك كل شي في حياتها تتعود عليك تبني أحلامها.. طموحها ..حياتها وهي معاك …. وفي الأخر انا نحبك لكن منقدرش نكمل معاك!!! حب شني هذا ؟؟ الحب يانكون معاك ولي يامتكونش لغيري ……تِ أنا من بين الرجاله كلهم اخترتك وبسببك كلهم كرهتهم نشوف فيهم زيك خوانين بسببك فقدت إيماني بِ الحب ياااأخي انا لو عدوتك ماكنتش درت في هكِ ؛ وقاعد تقولي نحبك!!! حب من أي نوع هذا لي مش قادر يواجه العالم ويطلع لنور ؟!

أنت الحب الممنوع المرغوب العذري البرئ …كان باالنسبه لي هك وأنت حطمته انتهينا خلاص مبروك عليك قدرت تغيرني لي مقدروش عليه عيلتي وظروفي أنت قدرت عليه حرقت البراءه في ….

______________

جتني رغبة نفتح نت نحكي مع عمر منعرفش ليش بس يمكن وقتها حسيت انه كاتب وحساس توا يفهم علي … لقيتا اون لاين

أنا اسفه على الإزعاج بس منعرفش ليش محتاجه ليك…

رد على طول

ولو نور نفضي روحي ليك … شنو في ان شاء لله خير ؟

-شكراً على ردك السريع ، لو تأخرت كنت صكرت

عمر:: تعرفيني منحبش نتأخر في رد ، يبرد المشاعر ويخلي في جفى في اي علاقه اذا حب او صداقه ..اما بالنسبه لي كا كاتب فا لو تأخرت ح يقولوا مغرور مايردش هههه

ضحكت:: ربي يعينك

عمر :: ان شاء لله..يعين الجميع؛ ماتهربش وقولي لي شنو شاغلك تعرفيني فضوولي بذات تجاهك انتِ😇

-شنو معنى تجاهي انا بذات؟!!!

عمر:: لأنك غامضه تعرفي ماشفتكش صح،،و واجد ناس مروا بحياتي ونتواصل معاهم ..بس فيك شي غريب يشد الواحد أسلوبك يخلي الواحد يكون عندا فضول يتعمق فيك اكثر … اوووف هذا كله كان نشوفك شن يصير 🤷🏻‍

-تغير رايك اكيد هههه هو شعور هذا كله لانك متعرفنش لكن اول ماتعرف ح نكون عاديه جدا زيني زي غيري…

عمر:: نور!! محبيتهش منك .؛.نقولك عادي نحكي معاك صوت حاسس فيك شي ؟

-شن تفرق عمر انا ….

“عادي براء قوليله على واجعك توا يحس بيك تخففي الحمل على روحك هو منين بيعرفك يعني اليوم احكيله وبكره صكري الإيميل الوهمي… …

بلحظة ضعف مني حكيتله كل شي عن علاقتي بي يعقوب وياسين وعيلتي لكن مقتلش لا اسمي ولا مكان خدمتي… كنت نكتب ونبكي بس المره هذي دموعي غير كانوا بدون احساس معرفتش نبكي موجوعه ولا نبكي لاني تعودت!!

رن علي ماسنجر يمكن لأني نبكي ونطول في كتابه …فتحت سمعت صوت حنون عاطفي منعرفش ليش قارنت وقتها بي يعقوب و أذكرت اول مكالمه بينا وانا لي عمري ماقارنته بي راجل …

عمر:: وليش تبكي ، اذا انتِ مقتنعه انه ضعيف ومقدرش الحب لحبيتيه له بدون مقابل ؟ مش مستاهل على فكره !

-القصه مش انه يستاهل او لا بس أنا حبيت ،، اذا كان اختيارنا صح او غلط …هذا مايعنيش انه محبينش و انه قلوبنا لهفت ،القلب لي اختار ملش علاقه اذا انسان لي اختاره وبينزف مشاعر تجاهه يستاهل او لا هو يحب هك بدون ولا شي يصرف حب بدون مقابل ….

عمر:: انتِ إمرأة خطيرة ..ماخبش ظني لما لفتي نظري وشغلتي بالي، مميزه حتى في حبك ترا قوليلي من تستنى حد 7سنين هو حتى ماقلهش نحبك كافحت مشاعرها واخلصت ليه بدون ولا شي…

-مش شايفته شي مميز انا شايفته انه غبي ماننصح حد يوقف على باب الماضي ، شن نفعني التميز برأيك انا موجوعه ماتتخيلش قد شني غيرني حطمني من جوا ولد جوي حقد وكره مشاعر عمري ماحسيت بيهن….

عمر:: عمرك ماتندمي على اخلاصك لحد … انتِ توا موجوعه منه مش من نفسك الغلط فيه مش فيك انتِ تقدري تحطي وجهك في مرايه وتقولي حافظت على كرامتي وعزة نفسي رغم كل مشاعر لي فيك هو اعترف بحبه ليك اما انتي مسمعهش منك وهذا اكبر عقاب ممكن يحصله لو حبك صح

-بدا عندي شك من ناحية حبه لي ههه ..

عمر:: يمكن معاك حق اتشكي فيه ، الحب ياتحارب عشانه وتكون قده ياماتعترفش بيه ،، من رأي مفروض ملخبطش شعورك اذا عارف انه مش قد المواجهه مفروض مااعترفش من الأساس..

-نفس لحاسه بيه والله ….

عمر:: على العموم انا سعيدا بجد اليوم عشان سمعت صوتك🤗

-ههه اهااا بتبدا فيها جو مراهقين حلو صوتك نعلي من ضحكتك ودير روحك مركز معي …ويبدا فيها حوار نهايته ح تكون مش حلوه…

ضحك عمر كانت ضحكته مميزه مش عارفه ليش ركزت فيها…

ياريت نطولو ونردوا مراهقة من جديد بربك مش أحسن فتره وكل شعور فيها صادق !

-انا عن نفسي مستحيل نتمنى ترد …. خليني نستنى الرجل الاربعيني حابه نرتبط بلعمر هذا 😅

عمر:: أووو ..وأنا بنستنى المرأه ثلاثينيه بتكون انوثتها وتفكيرها مكتمل نفضل نوع هذا …

-فااجأتني،، قصدي ليش من الأول مااأرتبطت وانت في ثلاثين وكانت قريب من عمرك ؟

عمر:: تعرفي لتوا منعرفش ليش ارتبطت تعرفنا حوالي شهرين كانت صغيره وتعلقت بي بسرعه …خفت على مشاعرها وقررت نرتبطوا هي مايعيبها شي بس العيب في انا…

– عمر بلعكس لدرتا رجوله وتضحيه منك ، ليش تقول العيب فيك

عمر:: لأني ظلمتها معي واجد هي ياما تحملت شغلي وسفري على طول … طبعي كا كاتب منتكلمش واجد نحب نعتزل مع نفسي … منحبش لقيدني ويطلب مني اهتمام اجباري ..مشاعر لما ينطلبوا طعمتهن تريح … من اول شهر متفهمنش بس مع الأسف كانت حامل وبنتي نور دفعت ثمن انفصالنا ….

-اسمها نور؟

عمر:: أيوا ياست نور نفس اسمك 😅

-ممكن لي لفت نظرك لي الأسم ؟ مش لأني غامضه زي ماقلت!

عمر:: وبشنو يفرق عندك؟

-ااه… لا متفرقش ، عاشت الاسامي ربي يخليها لك ان شاء لله

عمر:: ضميري يوجعني كل مانشوفها تعرفي كانت ضحية

-نصيب الاحسن انكم مااستمريتوا في زواج فاشل وجبتوا غيرها صدقني كانت ح تكون كارثه…

عمر :: اوكي عارف يعني بكل الأحوال حتى لو كنه متفقين منحبش نكثر صغار هههه

-قصدك متحبش تكثر ضحايا هههه…

تقريباً حكينا طول الليل ماحسيتش لا بِالوقت ولا بشنو نحكوا هن الحكايات يجن لوحدهن اكتشفت كميه التشابه لبينا كيف كبيره هك من كل نواحي…كانت اول مره نحكي مع شاب بطريقه هذي حتى يعقوب حب عمري ماتعمقنش هك منعرفش كيف حبيته وسببلي كل هاالوجع رغم انه قليل حديثنا !!
محسيتش بشي وانا نحكي مع عمر إلا باالراحه ..يمكن لانه مايعرف الا لحكيتا له او لأني حسيت بإهتمامه من ناحيتي وقدرت ناخذ جزء كبير من وقته طول الفتره لفاتت كان كل بث يفتحه يسمعني الأغاني لنحبهم يفتح المواضيع لنبيها انا؛ يكتب عني وعن غموض شخصيتي رغم انه عنده ألاف المعجبين مع ذلك ماتهورت في مشاعري تجاه كان كل مافي ميت مانقولش ماحبيتش الإهتمام ! لا انا بنت وخاطري نحب وننحب لكن لعشته مش شوي علمني واجد واهم شي تعلمته ما نثق في حد والكلام بذات مفش اسهل منه …. عمر كاتب يعني شغلته في كلام الجميل ليجذب اي انثى ساهل باالنسبه ليه 💔

اكتشفت الفرق الكبير بين الحب في عمر 18 والحب في عمر 25 …

حب المراهقة برئ مشاعر ينصبوا بدون ماينتبهوا لطرف ثاني شن تجاهك؟! حب عذري فيه شغف ولهفة متهوره حب صادق اخرتا يتكسر وينصدم بِ حقيقة مشاعر لقدامه … وهذا لصار معي باالضبط💔

في25 تكون متحكم اكثر عارف شن تبي ومن لي ح تختاره بشروطك و كل شي حاسب ليه حساب مأمن مداخل قلبك … ولما تكون مجروح من قبل بذات ح تاخذ وقت كبير عشان تصدق مشاعر وصدق لقدامك ،، لي ممكن يكون ضحيتك انت كنت من قبل ضحية غيرا وتوا هو ضحيتك !!…يريح الشغف واللهفه ودقات القلب والرجفه …. وتضيع وقتها المشاعر مابين يحبني صح ولا يكذب علي زي فلان…..

خاطري في زهايمر لو ينباع كنت شريتا ياايعقوب وتخلصت منك انت مرض في جسمي ولازم نشفى منه…..

_______________________

من بعد مكالمتي مع عمر لكملتها على الفجر … رقدت بدون حتى مانصلي من الكسل …

هو لي انا فيه كسل عن عباده ولا بدايه طرد من رحمة ربي؟؟؟

كنت نصلي في وقتها وزدت عليها نوافل نقرا في قران مانكذبش نستغفر مانظلم حد عايشه مسالمه في حالي مانبي إلا الستره ونجاح في حياتي نبي بساطه من كل شي… شن صارلي وشن غيرني ؟؟

الصلاه لي في وقتها اصبحت تقطيع …ونوافل التغين بسبب اني معندش وقت …قران من جمعه لي جمعه …اما ظلم ماااعتقد ظلمت حد انتقامي هو تعجيل بِجزائهم لا اكثر !! … الستره خلاص بنتجوز ونقهر يعقوب ونخلص ياسين مني خلي يفقد الامل من حبه لي…

هكِ كنت نفكر …وكنت نشوف في تفكيري صح نبرر في كل شي زيكم 🤷🏻‍

رن فوني وانا غارقة في نوم …. قفلته ورجعت رقدت …. سمعت صوت هرجه برا جتني فتحيه

الحقي شرطه هنا وقاعدين يفتشوا في الحوش ويحققوا معانه نوضي البسي حاجه واطلعي شوفي قضيه خوك شني

غسلت ولبست وطلعتلهم كانوا في مربوعه معاهم علاء …. مخلنش نخش بس في ضابط اصر اني نحكي معاهم ….

-شنو في مش جيتوا فتشتوا مره لفاتت وخذيتوا سلاح وخالد شن صار؟؟

ضابط:: الوضع خطير .. كان في الأول مشتبه بيه .بس انتوا عارفين وضع البلاد توا والاغتيلات لقاعدا تصير

-يعني شنووو ؟؟

ضابط:: مع الأسف ، خالد مجرم إرهابي تابع لمنظمة داعش اغتال اكثر من شرطي ومستشارين اي نظام في دوله يبوا يهدوا … والورقه لي فيها اسماء للقيتيها كانوا اسماء ح يتصفوا شهر هذا …. بعد تحقيقات مع مجرمين قبله كانوا يذكروا في اسم شهره متاع خالد لهوا زعيم وقت لقبضنا عليه عرفوا عليه انه مشترك معاهم واعترف بكل شي

دنيا برمت بي قعدت في اقرب كرسي…
انا خوي داعشي يذبح في ناس عادي هكِ!! دم لي فينا واحد نفس الأب والأم وخوتنا و حوشنا واحد …خاااالد لااا مستحيل تكون وصلت بيه يكون قاتل أرواح ناس بريئه

ضابط:: في غيره شباب واجد للأسف مغرر بيهم ، انظموا لطريق هذي مفش متابعه من اهلهم ولا رقابه عليهم انجروا لرفاق السوء وصلتهم وحفرت في روسهم معتقدات وهميه عن الدين حاشا الإسلام منهم،، مش عارف كيف الأهل يفكروا اذا شاب يعني مش عيب تسأل ولدك عن اصحابه ومع من يطلع وشن ميوله …ليش الخوف محتكر بس على البنت!!

“يعني جريمة امي وبوي ماكفاهش انها تكون تأزم نفسيتنا تعبنا في حياتنا نعيشوا غير سويين !!! تزيد اخره تزيد تأثر على المجتمع على هلنا على ناسنا انا خوي طلع قاتل لأنه متربش الا على العنف انا خوي طلع قاتل لانه ملقيش من يحسسه بِ الحنان انا خوي طلع قاتل ملقيش من يرشدنا ويفهمنا دينا شنو وشن يبي منه ؟؟ هلنا مربونش على انه هذي حرام ماديروهش تغضب ربي !!
لا لا هلنا علمونا شى واحد بس هذي عيب تحشم قدام الناس كلامهم ميرحمنش…

خلونا نتمردوا عليهم وعلى الناس …ونسينا انه تمردنا على دينا واخلاقنا ….

على من الحق في ضياعك ياااخالد وياغير خالد على من ؟؟؟؟!!!!!!

_____________

فتشوا الحوش من جديد ملقوش شي طلعوا وكلنا في حالة صدمه من لصار بوي معندش العلم وامي عرفت كلعاده ولدي يتبلوا عليه ولدي ولاد الحرام ضيعوه… ذنبها تبي تعلقه في اي شماعه وخلاص المهم ماتفكرش انه ليها ذنب في شي 🤷🏻‍

…..

الأيام تعدي وحياتنا استمرت ونحنا برضوا الناس تحكي علينا قعدوا يخافوا منه ماهو نحنا قعد لقبنا من طلاق امي هذو لي امهم خلتهم … بعد وفاة عبدالسلام هذو لولدهم مات يصكر ويحشش”مدمن” وبعد لصار مع خالد قعدنا هذوا لولدهم داعشي قاتل يذبح في ناس …… قديش بتحكوا ماتملوش؟!!!

معش سمعنا شي على خالد ولا عاد عندنا وج نسألوا … الحوش منصرفش عليه مزلت على إنتقامي منهم … ناكل برا وكان نبي شي لروحي نخلي معي… عرسي تحدد وانا وعمر مزال نحكوا لكن قررت خلاص نصكر الإيميل …

في يوم رجعت من شغلي شفت خوتي من بوي كانوا تعبانين من جوع والعازه وفي ايدهم كل واحد كيس لبسه قديمه صدقات من الناس .. تفكرت كيف كنه نفرحوا بملابس ليجونا من برا ومنعرفوش انها ملبوسه من قبل ….

خذيتهم منهم وعزقتهن ….

سالمه تبكي
ارحمينا حرام عليك عطيني حتى حق حاجه نوكلها للعويله

دموعي الغبيات نزلوا
وانتِ ليش مرحمتنش لما كنتي تعاقبي في وتجوعي في بِ الأيام ؟؟ ليش مرحمتنش لما كنتِ تحبسي في ..في دار مظلمه نبكي نعيط نخبط على الباب نترجا فيك نقولك نخاف من ظلام مطلعنش ليييييبببيش مرحمتنش وانتِ تحرررررررررررقي في ليييييييييييش مرحمتنش وانا مريضه وقلتي ارقدي توا نشتغل بدالك في الحوش لييييييش ولا انا النبي لي لازم نسامح وانتوا تحرقونا تعاقبونا تضربونا كله عااااااادي

سالمه تبكي نزلت على رجلي
ساااااامحيني الله يربحك وينور طريقك يابنتي سامحيني عارفه روحي مدرتش فيك خير واني توا لقيتها في صحتي عشمتي في وزمان دااار علي خلك خير مني هذوم خوتك ….

-مقدرتش ياااناس نشمت فيها مقدرتش نقول اني انتصرت مقدرتش مانمدش ايدي لخوتي ونطلعهم مقدرتش نكون زيهم مقدرتش💔

خشيت غسلت وجهي … وجهزت خوتي صغار طلعتهم نعشيهم برا دهورتهم كنت واخذه سيارتي ومشيت بيهم للمول شريتلهم لناقصهم وطلعت بيهم لملاهي غيرت جوهم وهم فرحوا بكل شي..

روحوا الحوش فرحانين ويحكوا لي امهم …

سالمه:: ربي يبارك فيك ان شاء لله

مرديتش عليها خشيت دار عزقت روحي على سرير تنهدت بتعب فتحت فيس نحكي مع عمر؟؟ لا خلاص عرسي قريب خلني نهرب احسن شي مزلنا على البر…..

_________________

كنه في حوش امي نجهزو لعشاء زفتي انا ومهند واختي من امي لي تأجل عرسها لما توفى عبدالسلام ….

فتحيه:: عليك فضايح امتا طلقها

فريحه:: شنو منظرها قدام الناس وعيالها ينعلي عندها بنات العار هذي،،

امي:: مزالت قضيتهم مفتوحه خالك حلف مايردها لي مسكها مع واحد اخر خزي لعنة الله عليها عليك خبر اخر زمان متجوزه وتحكي مع راجل اخره

فريحه:: طيح سعدها وين تلقى كيف خالي عديمه ربايه هذي … ماتخاف شي على سمعة بناته

فتحيه:: كاثره بكل نوعيه هذي توا مش عارفه في شن يحسن … توا راجلك مش عاجبك اطلقي منه ليش تحكي مع غيره خزي

-ممكن تغيرن سيره وانتن نزلات في الوليه الله اعلم شن قصته وشن ظروفها … هذن اعراض ناس مش ناقصنا بلاء مغير خلنا نستروا عارنا قبل ….

امي:: الستر ياربي فكنا الله من العار،، الحمد لله ياربي بناتي جوزتن وعارفه روحي وين حطيتهن وحظك انتِ بذات من سماء راجل بفلوسه ماخصص علينا شي غير اعرفي قيمته وفكيني من لسانك

زرتني ضحكه ليسمع امي ومش عارفه يقول عليها ونعم الأم 🤷🏻‍👌

__________________

يوم العشاء طلعت من المزين انا واختي ومرت مهند كانت مش ليبيه من جنسيه اخره”منبش نذكرها”””

لكن عايشه في ليبيا مخلتش مهند يعرف طبعاً….

العشاء في حوش امي كان عائلي….

مهند مش معاطي فرحته لحد عرس وعروسه بلاش مش حاسب شن مخبيتلا وراهن …

جو عرب اختي وخذها راجلها ….

ومهند خذا مراته ….

وانا ما خذاني حد خش يحي وعلاء طلعوني لسياره سوده كل مافيها يدل على فخامه….

ماشفتش عريس الغفله من 🤷🏻‍

جيت بنركب لقدام…

انزلي اركبي لورا !!

سمعت صوت مشفتش من صاحبه … نزلت ركبت لورا من خوفي من المجهول ….

ياربي شن درت في روحي لو كنت في مجتمع اخر كنت اخترت نعيش عمري كله عزباء لكن هنا مرحمونش الناس وكلامهم هربت منهم لي اول حد فكر في زواج بي ….

كان يسوق وانا لورا نرجف من الخوف وندعي ربي في سري……

وقفت السياره فكرت انه وصلنا لكن نزل هو وحده … فتحت روشن شفت ظهره مقابل شط بحر

هو ليش جابنا هنا ؟؟ العرسان يجوا هنا ولا هو يستنى في حد ؟؟

سمعتا عييييييط ااااااااااااااااااااااااااااااااااااااااااااااه

نغزني قلبي وزدت خفت هذا منو وليش دار هكِ ؟؟ قعد فتره بسيطه على شط جيت ننزل نسأله لكن ركب سياره وكمل سواقه !!

بعد وقت وقفت سياره فتحلي الباب وانا بلكاب وطرحه مشفتش ….

طلع قدامي وانا ورا ماساعدنش حتى في رفعة الفيلوا هذا كنه هكِ تقول متجوزني بلغصب؟؟

حي عليا كان كارهني لكن انا مدرتلش شي … مش انا لجبرتا علي انا حتى منعرفش اسمه ولا شفت حد من عيلته؟؟!!! يعني زعما بنعيش زي روايات بطله تاخذ حد لا هي تحبه ولا هو يحبها بعدها يحبوا بعض؟؟

لعنت غبائي وطردت افكاري وقعدت نكركر في فيلوا شفت قدامي قصر انا ولا شي قدامه … اكيد نحلم انا بجد ح نعيش هنا ؟،!!!!

قعدت نلحق فيه ركب مع دروج وصل لي ممر في اخره جناح دخل جوا لحقته … وصلت ليه رفعلي طرحه …

مبروك عليك ياعروسه …

هووووب ضربني كف من قوته طحت على الأرض…

لا مستحيل … هذا انت😳😳

عرفت وقتها اني هربت من جلاد لي منصة إعدام

#يتبع

لمشاهدة جميع اعمال الكاتبة: رواية الكاتبة هامي

لمتابعه اهم واخر الاخبار : القلم نيوز

اترك رد

زر الذهاب إلى الأعلى