ﻣﺒﺮﺭ ﺧﻴﺎﻧﺔ الحلقة الخامسه .. الكاتبة هامي | القلم الناجح
روايات ليبيه كاملة

ﻣﺒﺮﺭ ﺧﻴﺎﻧﺔ الحلقة الخامسه .. الكاتبة هامي

ﻣﺒﺮﺭ ﺧﻴﺎﻧﺔ الحلقة الخامسه .. الكاتبة هامي

ياسين:: شنو دير أنت!!!

يعقوب بعد علي،،
مافي شي كانت تبكي من خالد و…

انصدمت من ردا ليش كذب لشنو يبي يوصل ..؟؟!!!!

قرب ياسين بلهفة وخوف مسك ايدي
شنو دايرلك اخره على الصبح … “ركز في لبسي”
تِ شنو لي لابستي هذا زف….

حولت ايديه …
مديرلش قصه حتى انت على صبح تأخرت بنمشي

ياسين برمني شورا ويعقوب يتفرج
براء كنك شنو في وين نغمه جديده هذي ؟!

– ما في شي جديد غير اني تعبت خلاااااااااااااص معش نقدر ارحمووووني هو في دنيا كلها مفش الا براء تحكموا فيها كولي هذي البسي هذي اغسلي هذي اقري هذي اناااااااااا مليت خلاص ساد تحكم نبي نكون زي بنات ليش مفش حد فاهمني.

ياسين بعتب:: توا طلعت مش فاهمك

– لا انت ولا غيرك فاهمني ولا عمركم ح تفهموني ولا تحسوا بي ….

طلعت مشيت لمدرسه وحسيت بيه وراي رغم كل كلام لقلته … انا مغلطتش انا تعبت منهم تعبت من كل شي فيه ضعف وتحكم ….

__________

في المدرسه خذيت حصص وطلعنا استراحه

هند:: خوذي هذن وجيبيلنا نفطرو …

– شنو هذن واجد

هند:: تِ جيبي معندش صرف وتلقينا ورا مدرسه

مشيت جبتلها لتريدهم ….. ولقيتها مع بنات 😳

شن ديرن

تعالي براء نظفي وجك وديري حواجبك حتى انتِ خير ما ينزلن على عيونك 😄

عطيتها كيس فطور
لا لا منبش …

هند:: بلا جو عاد ديري عندها وانا نخلصها متخفش لبسه تهبل عليك اليوم بس مش كل حاجه لبس ديري جو لروحك

-قصدي نخاف يبان على شي والله يقتلوني في الحوش

هند:: ييييي وحتى انا ماما تعارك ونفوتها … وانتِ بلا شي يضربوا فيك اقل شي خلي ضربتك لها سبب 🙄

فكرت شوي وافقت شنو فيها كان درت كيف بنات وطلعت حلوه زي هند …لا لا زي هند شني تِ بنت جمال شنو جيبني لها … ياريتني زيها 💔

وقتها كنت مراهقة صغيره منفهمش في شي لذلك لينصحني دايرته صاحب مكنتش نفهم في نوايا الخبيثه والسم في العسل في انه ناس عادي دمرك اكثر مااانت مدمر وانت مافي بينك وبينهم شي بس هما هكِ مديرينك تسلية ليهم … لو بيئه لي انا فيها مزرعتش في حطام نفسي خوف وانعدام ثقه في مكنتش عشت لعشته💔“””

_____________

هند:: ما شاءالله ياروحي نورتي محلاكِ يابنت

– ماعمري حسيت اني حلوه محدش قالهالي هههه

هند:: لا والله تهبلي … بنطلب منك طلب

– من جدك تسألي اطلبي عيوني لكِ

هند سلحت دبلتها
خوذي هذا بيعي لي

– ليش !!… قصدي يعني هذي دبلتك كيف تسلحيها هكِ وتبيعيها تبي تغيريها قصدك؟

هند:: لا لا نبي الفلوس نصرف بيهم كروت وشفرات جو يعني

– وكان سألك خطيبك عليها😳

هند تضحك
ريتي هاالقضيه ديما ندير فيها نقوله راحت وهو الغبي يجيبلي غيرها😂💔

-غبي كيف انتِ متحبش مفهمتكش انا ياهند كيف مخطوبه وكيف تكلمي في غيره …سامحيني والله نحبك ونعزك زي اختي منبش تكوني هكِ

هند:: شن ندير يابراء هو يحبني وقال بعد نعقدو توا تحبيني هو لي اصر مش انا والحق يصرف علي مش مخليني في عازت حاجه لكن مزلت صغيره ونبي نعيش جو علاقات ونتعرف بلا جو زايد انتِ وقوليلي تقدري ولا لا؟؟

– كان خاطري نساعدك بس تعرفي اول مانطلع ياسين لاصق في مش مخليني نتنفس

هند:: ماعليكِ فيه توا نخلي واحد يلهي بمباره في مدرسه هو حتى لما سقط وحول ماخلاك تنفسي 🙄
وكان مشيتي وبعتي نعطيك نص حقه 😉

-قصدك نقسموا حقه بنص😲
باهي ليش انتِ متمشش وتبيعي بروحك وماحد يشاركك فيه

هند:: منقدرش بابا يروح بي طول للحوش معندش كيف نتكي وهنا نخاف يعرفني حد هي سمعتي حلوه من غادي

– باهي اوكي اذا ياسين مروحش معي نبيعه لكِ

_______

جينا بنروحوا لقاني ياسين

روحي طول للحوش توا عندي مباره هنا منقدرش نروحك معك

شفت لي هند وهي مبتسمه
اهاااا …باهي تمام

طلعت هند مع بوها وانا طلعت من جيبي دبلتها كانت فخمه جاني فضول نحطها في اصبعي بما اني مستحيل نلبس حاجه زي هكِ …. ابتسمت من شعور وضحكت على روحي وانا نشوف دبله في ايدي … نمشي ونتلفت لعند ماوصلت محل ذهب كان صغير والوحيد في منطقتنا كنت خايفه واول مره نخش محل ذهب … محل الوحيد لنخشلهم وانا صغيره كان سوبر ماركت…

سلحت الخاتم وعطيتهوله … معلش شوفلي كم حقه

صاحب محل كان شاب
هذا لكِ

ارتبكت ماحولتش نبين …اهاا لي شوفه لي بسرعه

ضحك شاب
باهي متخفش ..منبش ناكلك😄😉

زاد الخوف وتوتر ….

شاب:: 500دينار

“وقتها ذهب رخيص مدققوش 😂💔

طلعن عيوني من صدمه وهو يعطي في الفلوس
كان اول مره نمسك مبلغ بلعدد هذا …

جيت بنطلع

شاب:: معلش كان تبي عديهم

– لا مستعجله ..شكرا صحيت

كنت خايفه لذالك معديتش شي ومبلغ لي معي زاد خوفني…

روحت الحوش وانا نتلفت وندعي ربي ما يكون شافني حد يمشي ويقول لي خالد …

صكرت دار وانا قلبي يدق ونرجف..
طلعت الفلوس نعدهم ..طلعت منهم ورقه فيها رقم
هذا شنو ارقام متاع شني ؟! مفيهمش 500متاع رقم الفلوس######🤔 092 بالك ناسيها ولا بلغلط …عزقت الورقه وكملت عد وكانوا تامين مفش نقص … دسيتهم في دولاب بين ملابسي وطلعت من الدار صليت ولقيت مرت بوي تعبانه

-مشيتي درتي تحاليل

سالمه:: كل يوم بوك يقول بكره وانا مش قادره نتحمل كل شوي دايخه وحاسه روحي نبي نرقد وخلاص

في عقلي نقول ان شاء لله غير متطلعش حامل ساد 5لخلفتيهم وهمهم على راسي””

عدي ارتاحي انتِ توا ندير الغدا ماهو في العاده ديما انا….

طيبت الغدا وضميت الحوسه على خشت فتحيه وصغارها

سلمت عليها وانا نبكي لانها في مدينه بعيده وتجينا من لعيد لعيد ولا في عطله….كنت مرايفه عليها

فتحيه:: ما شاءالله متسمحه يابنت ومنوره…

لا ارادي ايدي جت على حواجبي فهمت قصدها غيرت موضوع
شنو خطرها زياره مفاجئه هذي

فتحيه:: خلني نتريح وتوا نحكيلكم…

الكَاتِبة هَامِي 

فتحية تبكي وجنبها عيالها
وهذا لصار يابتي والله ماقادره نتحمل

بوي:: وجايتني توا ليش نا ناقصني هم ومصاريف تشوفي في نجري ليل نهار بيش نلحق طلبات خوتك جيتني بعويل راجل تبيني نصرف عليكم اخره…. راجل مغلطش وشرع محلل اربعه ردي لحوشك ولمي عويلك معندش بنات يحرجن ولا يطلقن

فتحية زادت تبكي
يابوي كيف ترضها في ماخلا ماقال علي …وزاهد في اخره تبيني نمشيله

بوي:: صكري فمك لازاهد لا شي … توا يرد من نص طريق ويأخذك ولا ياخذ عويله تبي تردي هنا تعالي بطولك عيال اخره منربهمش ولا تردي معه فهمتي

قال كلامه وطلع عيالها كامشين فيها
ينعلي انا منبش نعيش عيالي لعشنه يابراء حي على بيحرموني منهم

حضنته وبكيت معها
لا اصحك ديريها الله غالب ارضي بنصيبك هذا حظنا من دنيا نحنا مش عارفه ليش بختنا ياخيتي هكِ حتى كتف ننسندو عليها مافي…

أصعب شعور حياتك يكتبها ويختارها غيرك وانا نطبطب على فتحية نبي من يطبطب علي من يحسسني اني في امان من يخلي قلبي يضحك … سألت روحي هو من فينا المظلوم اكثر … خواتي لخلتهن امي المسئوليه ولما وصل عمرهن 16بطلوهن وجوزوهن بغرض ستره وهذا واجب على البنت واخرتها حوش راجلها …باهي لو سندها طلع كتف مايل زي راجل فتحيه وباعها ؟! كيف تعيش وهي لا عندها هل يحتووها وياخذو حقها ولا شهاده بيش تخدم بيها وتربي صغارها…

كم من بنت عاشت زينا وانظلمت … الأهل لما مايكونش سند يكسروك يخلوا الكل يطمع فيك ويدوسوا عليك ماتقدرش حتى تجرب شعور الكرامه وانت ماعندك على من تسند وتقوي روحك …

ولا انا ظلمي اقوى طفله عمرها6 سنوات عاشت بس تتكوى بنار الحامي وبلذعات الفلفل الحار وعقاب بدون سبب ومسئوليه اكبر من عمرها وظلم وظلم وظلم ….

ولا خوتي شباب … ياترى كيف ح تكون نهايتهم في مجتمعنا …. ضعاف زينا ولا يقدروا يكملوا زي ماقالت امي رجاله ماينخفش عليهم…!!

أتقوا الله فينا فا الظلم ظلمات عند الله… توا نلاقيكم يوم الحساب ومش ح نسامح ياامي ومش ح نسامح يابوي ومش ح نسامح يامجتمع و يااكلام الناس مش ح نسامح 💔

___________________

-مستحيل نرضى يديرو في زيكم

فتحية :: غير اعبى انتِ كل يوم يهددو يبوا يبطلوك ويحلفوا ماتخشيلها جامعه

– وديني وإيماني الا مانخشلها ونتخرج ونسافر ونعيش حياتي بطول والعرض ويجي يوم الكلاب يتمنوا فلس مني ماني راحمتهم ..

فتحيه:: بديتي تخوفي براء احلمي على قدك سلم بنتي مترفعش رقبتك فوق توا تنكسر ههه مفش حاجه ح تتغير نحنا هم نحنا

جتني بنتها صغيره تجري
خويله كيف يعني خلقنا ربي

ضحكت عليها وشفت لي فتحيه
شفتي دار زمان وبنتك توا تسأل في زي ماكنت نسأل فيك وانا صغيره …وتوا يدور زمان ونخليهم تحت رجلي مافي شي يقعد على حاله ….

فتحيه :: ربي يستر منك هههه

________________

مشيت مدرسه وعطيت لي هند الفلوس عطتني نصهم

– واوو هذا كله لي😍

هند:: ديري بيهم لتبيه … ومزال كل مانبي نبيع نعطيك تبيعيلي وتاخذي حقك ..

– حي علي نخاف ياسين يشوفني

هند:: والله حبيبه هذي مصلحه ليك الا انا نقدر نعطي اي بنت تبيعلي بس لأني عارفه ظروفك نبيك تستفيدي…

مااأبشع الضعف والصاحب لنعطوا نقاط ضعفنا ويلوينا بيهم💔

_____

فتحيه خذها بوي لعند حوش راجلها كسرها لما جابها بروحه من بعد ماقالها منبيكش … وكسرينها عيالها لتخاف تنحرم منهم ويعيشوا متشردين زي ماعشنا💔

مرن الأيام وبدا تغيير يبان في نخاف صح لأنه الخوف مزروع ومتغلغل في …. لكن هما بكل الأحوال يضربوا ويعاقبوا في من دون ولا سبب … فا قعدت ندير اي شي لي هند وناخذ في مقابل نقرا ونغششها نبيعلها لتبيه يضايق في صاحب محل نتحمل.و نكتبلها لتبيه ناقص نخدم في حوشهم بس …

عبدالسلام عزق على سروال متاعه
حدديلي هذا توا ندوش نطلع نلقى واتي

بحتت فيه
باهي توا نديره… كنهن عيونك حمر هكِ

عبدالسلام:: وانتِ ايش دخلك … ديري لقتلك عليه وسخنيلي حاجه ناكلها يلا

-باهي خلاص

حددتله وظميت دولابه لقيت فيه حاجات غريبه وقتها مفهمتهنش شنو ؟💔

_____

في المدرسة … كانت هند مع مجموعه بنات فصل وكل وحده معها موبايل …

هند:: والله مافيك جو شوفي بنات كل وحده عندها صاحب شنو انتِ مش بنت متحسش

– لا لا هند كله الا هذي … معندش نيه ومنفهمش في جو هذا والله منعرف نحكي حرف

هند:: طيح سعدك سنه جايه جامعه يابنت وتلاقي جميع طبقات مش منطقه معفنه هذي لازم ماديري جو روحك شوي ولا تجيك صدمه حضاريه😄😂

– كيف يعني

هند طلعت موبايل:: خوذي هذا

– عزقتا عليها 😳😳
لا ياهند لا توا يشوفني حد

هند:: فكيني من غبائك هذا درهتي كبدي … امسكي كلها تهلت جت غير عليك ارقام اساتذه لهنا كلهم عندي متخفش لنبيها يديروها 😏

– واوو لدرجه هذي

هند:: خوذي يابت تعالي نوريك شن نديرو …. الارقام ليرنن علي ومنعرفهنش نعطي فيهن لبنات لهنا وهن نفس شي رقم لميعرفنش ويرن عليهن نعطوا فيهن لبعضنا فهمتي كيف وتوا انتي نعطيك رقم يرن علي منعرفش جربي ومشي جوك معه … هاااا شنو قلتي؟؟؟

انا ……

#يتبع

لمشاهدة جميع اعمال الكاتبة: رواية الكاتبة هامي

لمتابعه اهم واخر الاخبار : القلم نيوز

اترك رد

زر الذهاب إلى الأعلى