ﻣﺒﺮﺭ ﺧﻴﺎﻧﺔ الحلقة الرابعة.. الكاتبة هامي | القلم الناجح
روايات ليبيه كاملة

ﻣﺒﺮﺭ ﺧﻴﺎﻧﺔ الحلقة الرابعة.. الكاتبة هامي

ﻣﺒﺮﺭ ﺧﻴﺎﻧﺔ الحلقة الرابعة.. الكاتبة هامي

العِشق المُحرم 2

التغيير

شنو كان قصده بلي قاله؟! ..واي وعد وانتظريني لشنو!!! زعما كان يغني بصدفه وهو خاطم جنبي ؟!
وليش يتهرب مني؟!!

قاطع تفكيري ياسين ينادي في
هيييي وين سااارحه لي ساعة نكلم فيك؟

هزيت رأسي
أااهااا …لا لا مافي شي…
ياسين شنو معنى أنتظريني على وعدنا خليك ماتنسيني هي أغنيه صح؟

ياسين 😒
وشنو تبي في معنها توا قعدتي تسمعي في اغاني🤔
مايسمعهن غير الغاوي الاغاني هذن..كيفي هكِ😇

-واووووو عليك مبردك خلاص معش نبي نعرف معنها نبي نروح 😑

ياسين يضحك مسكني من ايدي
تعالي هنا والله نسمعها لك…

-امممم يعني عندك توا

ياسين:: هي دسكه متاع يعقوب واغنية لمعيلف …تعالي فهميني درس phonetic بكره عندي مباره مش فاضي نقرا

-والله ماعندي راس نشرح نعسانه …عطيني دسكه نشغلها على سي دي خالد .

ياسين:: باهي خلاص ارجي شوي ونجيبها

__________

خذيت دسكه وروحت مع خوتي
خشو رقدو وانا قاعده بروحي عبدالسلام وخالد مروحوش

خذيت سي دي من مربوعه لداري وقعدت نسمع فيها نبي منها الأغنيه هذي بس

سمعتها مره… واثنين …وثلاثة …وعشرة
كتبت كلماتها حبيتها مع اني نص كلام مش فاهمته … لحد ماخداني نوم …

صحيت على خالد يرفس في رجلي
صبي يلا ومن قالك تاخذي سي دي

جاوبته وفي عيوني النوم
كنت نسمع لدرس …..

خالد:: يلا نوضي حطيلي فطور مع صاحبي بايت هنا امس راكي تخشي لمربوعه … وجهزي الغداء

طلع حتى بدون ما يسألني شن ناقص عشان نجهزه ليهم …. صبيت بدون حول مني ولا قوة صليت وحطيتله الفطور قدام باب المربوعة ومعرفتش شن ندير غداء مافي شي قعدت نبرم وخلاص… وبديت فيه لما يأست انه يجيبلي حاجه …

سقدت علاء ويحي لجامع …و
صليت ظهر جمعه وقريت سورة الكهف… وعبدالسلام راقد وخالد مطلعش من مربوعه …جا وقت غداء حطيتا زي فطور …

بعد شوي قربع علي مطبخ وانا نظم فيه

خالد:: توا هذا غداء ينحط لي ظيف 😠

-ملقيتش ماندير وانت ماجبتلي شي كن…

ضربني كف
تردي على ياحيوانه

-والله مارديت …انت لخشيت بدون ماتسأل حتى شن ناقص

ورد ضربني كف اخره ومسكني من شعري
هششششش صكري فمك هذا لما نتكلم تنخرصي قليلة أدب

سكتت وخلاص احسن مايقتلني ومافي من يدافع عني… يحي وعلاء صغار اول مايسمعوا صوته يتغطوا من الخوف يتباكوا على حالتي وخلاص…

قعدن دموعي ينزلن ….ليش تنزلن حرام حتى تعبري عن ألمك تستاهلي ليش رديتي عليه …هو انا رديت ؟! اكيد غلطت لو ماغلطتش مضربنش … اصلاً لاكانت اول مره ولا اخر مره … ليش مازال دموعي ينزلن متعودوش زي جسمي ماتعود على ضرب وإهانات….

مشى يومي عادي زي كل حياتي ماعدت قلبي ينغز في وخوف مسيطر على في اي لحظه نتوقع ننضرب ليش ومِن من منعرفش لكن هكِ كان شعور المتلازم لي….

مرن الأيام واحتياجاتي كا بنت تكثر ومفش من يعطيني …. جتتي بنت جيرانه اسمها عائشه كانت اكبر مني بسنتين هدرزت عادي وبعدها قالتلي خوي مصعب يسلم عليك … رديت عادي سلمك وسلمه….

قالتلي عادي نوصل سلامك قتلها عادي مصعب ولد جيرانا ونتفكر كيف كنه نلعبوا مع بعض …

طلعت بعد هدرزت بنات …

______

ثاني يوم في عشيه مافي حد حتى خوتي صغار يلعبوا في كوره في ساحه مدرسه …خشيت ندوش وطلعت نسمع في باب لجوا يطق استغربت فكرته سلوى ولا ياسين لانه باب لبراني مفتوح من خوتي …

طلعت شعري كان مبلول ولابسه بجامه خفيفه .. لقيت قدامي مصعب …

انت شنو تبي خش هنا

مصعب؛: نبي خالد

– مش قاعد خالد .. ومافي حد ياريت تطلع

مصعب زاد خش جو
بصراحه نبيك انتِ

سمعت صوت قدام باب

-شنو في من معاك ؟؟

مصعب :: خشي جوا مدخلكش

– هييي انت شنو تبي ومن معاك

مصعب:: خلاص توا نحكوا بكره صبح

طلع وصكر باب لا عرفت شنو يبي ومن معه حي كان شافه حد !!!

الكَاتِبة هَامِي 

ثاني يوم كلعاده مشيت مع ياسين المدرسه ومصعب مع شله لتوقف قدام باب يستنوا في بنات ويبدوا يعاكسوا …

ياسين قعد يلعب في مباره وانا روحت مع بنات جيران ومصعب معه وحد اخره يلحقوا فينا … خفت سرعت خطواتي جا جنبي

نحكي بخوف وارتباك-أرجووك بعد توا يشوفني حد يفهمني غلط لو سمحت

مصعب:: متخفش انا معجب بيك ودزيتلك مع عائشه

– يااأنت .. اختك قالت يسلم عليك بس وانا نيتي نظيفه في ردي …ياريت تحول من طريقي توا تسببلي مشكله

ومشيت نجري ….

وصلت الحوش وخايفه ونرجف …كنت بريئه لدرجة مفهمتش سلامه مع اخته ولا جيته ولا حتى ملامح اي شاب معجب نفهمهن عقلي طفولي مزال مااأستوعب قذارت تفكيرهم…

مشيت يومي عادي عند الليل يجي خالد يبدا في ضرب وسب ….

ياصايعه تبي تجيبلنا العار تخشي في الولاد بعد نمشوا والله الا مانغسل عاري يا ………@#$$ سمعت أوسخ كلام وانا مظلومه لكن منقدرش نتكلم لأنه مستحيل يصدقني هم هلي هكِ اي كلمه تجي علينا من برا يصدقوها طول بدون دليل بدون ما يسمع ردت فعلك ثقته فيك مايفهمش غير انه يضرب ويعيط ويسب…

جا سراج بعدا بالغصب مني …

خلني نقتلها والله مافي مدرسه وتتجوزي كيف خواتك هذا كان في حد رضي بيك

كامشه في روحي نرعش ونبكي …والله والله مافي حاجه لا معه ولا مع غيره ليش متسمعش مني حسبي الله فيكم

خشش كندرته في فمي ضربني بيها صكري فمك كلبه وتناقش وتحسبن يااعار والله الا مانقتلك شن تبي تحكي مع الاولاد مصعب جاني قالي تحكي مع اولاد ويلحقوا فيها شافك الراجل فضحتي بينا

سراج:: اااااطلع والله الا انك عيل يافرخ تصدق صايع هذا وتكذب اختك لمربينها مش فاهمه حتى ليش انضربت امشي اطلع …

تعاركوا مع بعض وانا في عالم اخر انا ياناس ميته لي امتا هكِ لي ااااامتا ظلم سااااد ياربي

جا سراج …
براء احكيلي وانا نتفاهم عادي شنو في بينك وبينه عشان يجي هنا

رفعت راسي نشوف لعيونه بخيبة امل
حتى انت ياسراج شكيت في

سراج:: مش شك يابراء … في واحد شافكم وقالي … جاك للحوش وقاعد يحكي على باب ومافي حد غيرك شن تبيني نفهم … وهذا مش اول واحد يطلع كلام هذا ونعرف كيف نصكر فمه

– لا اقسم بالله مافي بينا حاجه والله مافي حرام عليك الا انت …. انا جتني عائشه هنا قالتلي يسلم عليك مصعب قتلها سلمك وسلمه عادي ثاني يوم يطق باب لجوا فتحت عادي والله والله فكرته سلوى ولا ياسين طلع هوا قتله اطلع مافي حد وطلع قال نبي خالد بعدها قال نبيك ومشى …. اليوم هذا كان في مدرسه ياسين مروحش معي قعد يلحق في ويقول في كلام وانا هربت منه والله هربت محكيتش لا معه ولا مع غيره

“وانهرت بعدها بكا كأنه بعد تبريري رفعت الرايه البيضاء هذا لعندي وهذا دليلي تاخذو او ادينوني بجريمه انا والله مالي ذنب فيها غير اني براءه منها..””

سراج:: خلاص معش تبكي مصدقك الحقير لأنك رفضتي يشوه في سمعتك ويطلع عليك في كلام لكن والله نربي…

طلع سراج وخالد ان شاء لله تقطعيله على القرأن مايصدقك …مستحيل يتنازل ويعتذرلك ويقول سامحيني ياااختي ظلمتك كان لازم ثقتي فيك تكون اكبر… اهلي كسروني … شوهوا برائتي … خلوني نتغير…

_________

كل اهانه وكل كسره او ظلم تعرضتله عكس على خلاني نغير جلدي … نتماشى معاهم هم هكِ اوكيِ خلاص نكون زي مايبوا….

_______________

يعقوب يقرا في مدينه ….وانا
نجحت من صف أول ثانوي ومعي ياسين وفي سنه ثانيه ياسين رسب كرهه قرايا وقدم في جيش …. وانتقلت الثالثه وحدي وهنا كان التمرد

جتنا طالبه جديده جميله لفتت نظر الكل ….

أسمها هند تعرفنا عليها وقعدت معي في الدرج….

-تهبلي انتِ

هند:: عيونك ياروحي حتى انتِ تهبلي … بنقولك نبي دروس لفاتوا عادي تجي لحوشنا و تشرحيلي

-منعرفش والله كان انتِ لتجي خير …

هند:: توا نشوف وضعي…

طلعت من المدرسه معها لقيت ياسين يستنى في

فوتي بنت هذي مش تمام

-ياسلام ومن وين عرفت انت؟

ياسين:: منطقه صغيره ومايخفى عليها شي … كمشة بنات من صياعتهم بوهم جاته جلطه …فوتي امهم أحسن ماندير شي مايعجبكش

-ريحلي روحك مش ناقصني ليعطي اوامر انا خلاااااااااص انخنقت من حبس لعايشه فيه وحرام عليك تجيب في اعراض الناس هكِ

ياسين:: والله هم لخلوه سيرتهم على كل لسان ..ومتعندش بنت هذي نشوفك معها نهارك احرف

– بنقعد معها واعلى مافي خيل هلك اركبه طززززز

قلت كلامي وطلعت للحوش معصبه …

في العشيه قررت نكلم بوي نمشيلها بما انه خالد مش قاعد وعبدالسلام كيف قلته … وافق نمشي ويوصلني يحي ..

طلع عارف وين شارعهم لأنهم جدد هنا وبناتهم طروف ف كل شباب منطقه حفظوا حوشهم 🤦🏻‍

__________

خشيت الحوش كان كله اثاث عصري ومرتب وهادي

كانوا 5بنات وبوهم حالته كويسه ماسك منصب في دوله …شن جابه لمنطقتنا ؟؟

فتحتلي اختها وخشتني لدار ظيوف ..بعد شوي خذتني هند لدارها

تهبل هذي كلها لك وحدك

هند:: اااهاا .. فرحت لما جيتي

– وانا فرحانه بتقعد عندي صاحبه حلوه زيك… تعرفي معندش صحبات مفش بنت مقربه مني

هند:: نعرف كلهم قالوا عندك خوك هذا بس لقريب ليك

– ياسين متربيين مع بعضنا ..واكثر حد فاهمني

هند:: ربي يحفظكم … على فكره اسمك حلو

في عقلي لو مسميني اهلي أبصر شنو كان اسمي توا؟🤔
تسلمي …خلني نبدالك دروس لفاتوا هم مش واجد …

قعدت نشرحلها وكل شوي موبايلها يرن ولاحظت عندها اكثر من واحد 🙄

هذو كلهم لكِ

هند:: ااها ..توا نعطيك رقمي

– لا انا معندش

هند:: بجديات في وحده توا معندهش موبايل!

– اغلبنا معندنش اصلا تغطيه مليهش سنه كيف جت هنا ..

هند:: انا جبتا من اول مانزلن كنت في2اعدادي … وتوا عندي اكثر من واحد كل صاحب ديرتله رقم بروحه … وخطيبي رقم علني

– قصدك انتِ مخطوبه وتكلمي في غيرا😲😲

هند:: شنو فيها جو ممل تكلمي واحد بس …

سكتت وانا مصدومه محسيتش براحه بس قعدت نشرحلها لعند كملت

خلاص توا نمشي

هند:: مزال بدري خلك قاعده

-طولت خايفه خوي يديرلي قصه

هند:: اقعدي شوي …تعالي نوريك ملابسي
تفرجت على حاجتها كل بنت تحلم بيهم … كل شي راقي وذوق حلو …

هند عطتني كيس
خوذي هذا

– هذا شنو لا منقدرش ناخذه

هند:: لا والله تاخذي ملبستهمش ونحنا مقاسنا زي بعض وانتِ حلوه غير لبسك هذا ظالمك عيشي شبابك يابنت

– خذيت منها الكيسه وانا فرحانه واخيرااا حاجه جديده وحد قالي اني حلوه… بجد انا حلوه ؟!!

جيت الحوش لزدت وكرهته اكثر من بعد مشواري لي ….هند ونفس الاسطوانه مع خالد لنرفضه يكذب عليه يضربني ويهدد يبطلني غير عمي صافي وبوي مره مره يدير موقف…

في ليل طلعت كيس وشفت المرايا نتلمس في ملامحي ونشوف لجسمي … يعني ممكن نكون حلوه صح .. مفش حد قالهالي من قبل!

ادوشت وقعدت نقيس فيهم كانوا كأنهم مفصلين علي برزو جسمي لي انا صاحبته ومكنتش عارفه شنو يميزه نرفع في تيشرت نشوف في بطني متشوها من اثار الحرق والضرب في طفولتي نبكي من قهر على حااالي

منكم كل لي انا فيه منكم ذنبي في رقبتكم انتوا عطيتوني مبرر لكل شي …

الكَاتِبة هَامِي 

الصبح لبست جاكه سوده تحت قميص أبيض من ملابس هند وسروال اسود ضيق وخذيت سبيدرو ابيض عطتهولي معاهم ولبست وشاح وطلعت … بدون محد يشوفني

لقيت يعقوب برا شافني عصب

شني لي لابسته هذا

كنت خايفه بس قررت نوثق بروحي ونتغير شوي
وانت شنو دخلك

شد ايدي خششني جوا صور حوشهم

شنوا ماسمعتش؟؟؟ من لمدخلش ؟؟!!!

– انت مدخلكش …مش بجوك يعقوب وقت لتبي تعزقلي كلمه وقت لتبي تفوت … وينك من سنتين وين تعرف حالي تعرف حياتي شنو ولا عيشة مدينه وبناتها غير نساتك تهتم بِ اختك براء

يعقوب:: هششششش اسكتيييي متقولش حاجه غبيه كيفك وغيري لخرا لي لابستيه

– معندش غيره ومش مغيرته

يعقوب:: شنو تبي براء ؟

– “سكتت معرفتش شنو نرد”……….

يعقوب:: انا عارف شنو تبي

رفعت وجهي فيه بنفهم شنو قصده كان اسرع مني وحضني…

ياسين شنو دير انت….

#يتبع

لمشاهدة جميع اعمال الكاتبة: رواية الكاتبة هامي

لمتابعه اهم واخر الاخبار : القلم نيوز

اترك رد

زر الذهاب إلى الأعلى