ﻣﺒﺮﺭ ﺧﻴﺎﻧﺔ الحلقة الرابعة عشر .. الكاتبة هامي | القلم الناجح
روايات ليبيه كاملة

ﻣﺒﺮﺭ ﺧﻴﺎﻧﺔ الحلقة الرابعة عشر .. الكاتبة هامي

ﻣﺒﺮﺭ ﺧﻴﺎﻧﺔ الحلقة الرابعة عشر .. الكاتبة هامي

غموض🌺

ليتني لم أثير إعجابك منذ البداية !
ليتني لم أملك من الغموض شيء . .
كي أثير فضولك وإهتمامك
فتسعي جاهداً بكافة الطرق للتعمق في تفاصيلي
ليتك ما عبرت حدودي وكنت لك مجرد حلم جميل صعب الوصول إليه ..!

___________________

همام فجأه ابتسم …أوووو جيت في وقتك مزال نعرفك على المدام

براء شوفي هذا  اغلى من الأخ ….

التفتت نشوفه وهنا 😳😳

لا يا دنيا لا متعاودش لعشتا من جديد 💔

“”عمر كيف  هكي ؟!!!”””

عمر مد ايده يسلم

ارتبكت وخفت وكل مشاعر اختلطت عندي

همام:: معلش المدام خجوله شوي🙂
برااااء

نقذني صوته من سرحاني ومديت ايدي نسلم

همام:: وينك ابن العم من امس بعد سهره ماشفتك

عمر:: اهاا،، انت كنت مشغول مع جماعتك وانا كنت تعبان طلعت نتريح …

سمعنا صوت عالي برا

طلعنا شفت بنت واقفه مع يقين وفريده وفي ايدها اوراق….

همام عصب  مسكها من مرفقها
شن جيبك هنا .. انا مش قتلك منبش نشوف وجك ولا مستغنيه على عمرك

البنت:: أااااه وجعتني همام انا حامل

كنت واقفه وجنبي عمر مش فاهمه شي وكلهم يشوفولي وفي وجوهم الصدمه!!

همام:: بطليي كذب واطلعي أبرار والا وربي ماتشوفي شمس بعد اليوم

ابرار:: مانكذب والله مانكذب خوذ تحاليل …همام انا قاعده نحبك انت ظلمتني انا مستحيل نخونك

ضغطت على ايدي … قلبي وجعني …مش حباُ  ليه بس وجعني حظي 💔

طلعت من وسطهم ، منبش نعرف من هذي ولا شن يقرروا حتى الخلاص منه رحمه لكن شن بيقولوا الناس براء ؟ وح يتشمت في يعقوب اكيد💔

طلعت الحديقه برا نبي هواء قعدت  على كرسي …حسيت  بحد  قعد جنبي …

التفتت كان عمر نزلت راسي وخفت يعرفني ولا يشك في صبيت  قالي …

نور …..
مالتفتش وزاد دقات قلبي وتوتري كيف عرفني ؟؟

جا قدامي وانا نمشي كنت منزله راسي…

براء ليش تهربي مني ؟؟

– انت شكلك متوهم من شن بنهرب ..انا بس منحبش نحكي مع حد غريب

عمر:: انتِ لي لو سمحتي متعبنش وتنكري انا اخترقت الإيميل وشفت مسجاتك مع صاحبتك عرفت عليك كل  شي… غير نبي نفهم كيف تعزقي روحك  هكِ متعرفش من همام؟

-من سمحلك تدخل في وتفتش وراي ارجوك بعد عن طريقي انا توا متجوزه و….

قاطعنا صوت …

همام :: اطلعي نبيك  معلش عمر  تعرف لصار مع ابرار شغلني عنك شوي

عمر:: فاهمك ..نتحاكوا بعدين

طلعت لجناح ولحقني همام

همام:: لتوا جت هذي مرتي السابقه و…

-منبش نعرف شي ومن فظلك لهنا وخلاص طلقني وشوف حياتك اعتبرنا متجوزنش عادي…

همام يضحك… مش انتِ لتقرري ، انا وقت مانبي ننهي كل شي توا عاجبتني اللعبه معاك

رن فوني…
خذا من ايدي …. من مهند ؟؟

بلعت ريقي .. خوي

عزق الفون على سرير … ومسكني من رقبتي تستعبطي انتِ ولا شنو؟ من امتا مهند خوك لنعرفه انه ولد راجل امك؟!!

-بما انك تعرف ليش تسأل ..

همام زاد ضغط علي:: لي امتا نعلمك متردش علي بسؤال…وخرا هذا معش يتصل ولا تردي عليه

شال ايده من رقبتي و مرديتش عليه مكنتش في مزاج لنقاش …عندي رغبه نتغطى ونرقد وبس وعلى الله نخش في غيبوبة ولا نفقد الذاكرة…!

مشيت من قدامه تغطيت وغمضت عيوني …حسيت بيه طلع فتحت عيوني دمعت بِ ألم  …برود… بدون احساس ….

خذاني النوم ونضت على الباب يطق فتحت كانت …

يقين:: وين اختفيتي … متزعلش من لصار

-لا مافي شي كنت تاعبه رقدت بس

يقين:: تعرفي اني تريحتلك انا مش من النوع لي يختلط ويثقل على حد ههه بس والله نحس فيك قريبه مني سامحيني ديما زاعجتك

ابتسمت لها
شنو فيها من ازعاج منحبش رسميات انتِ اخت زوجي يعني زي اختي خشي جوا خلنا نهدرزوا

يقين :: تمام نقول لي ميري تجيب نسكافيه والحلو هنا ولا تحبي تشربي شي ثاني

-لا زي ماتحبي متفرقش

كنه قاعدين في بلكونه واسعه على اطلالة الحديقه لبرا جو رائع مريح هادئ عكس كل العواصف والألغاز لدور جوات القصر هذا….

يقين:: في شن سرحانه عيونك فيهم لمعة حزن مع انك صغيره باين عليك

حطيت مق على طاوله …
العيون الحاجه الوحيده لمتكذبش مهما ابتسمت واخفيت وجعك وبينت انك اقوى واسعد انسان عيونك بيفضحوك …

يقين:: معاك الحق لغة العيون متعرفش تخبي ، كيف تعرفتي على همام صح خوي بس نحسه مش ليك اول مره يتجوز وحده زيك بنت ناس

-ليش كم مره اتجوز همام؟!!

يقين….. ماردتش”””

-انا وهمام مكنش نعرفوا بعض يعني طلبني من اهلي وافقت بدون مانعرفه … بمعنى جواز تقليدي

يقين:: غريبه وحده حلوه زيك وتخدم في افخم شركة  طيران  كيف مانعجبتي بحد وارتبطتي بيه

-تنهدت بتعب :: كل شي نصيب السنين بسرعة مامشوا ماحسيت الا وعمري 25سنه ومجبوره نتجوز نسكت اهلي و الناس

يقين:: لو مهما صار مايهمونش الناس مستحيل ناخذ واحد بس عشان نراضي الناس

-شنو تفرق اخرتها موت هههه كان تجوزت لنحبه ولا غيره….

يقين:: اوووف ،، شن اليأس هذا ..مزلتي صغيره تفألي خير

جت شغاله… مدام العشاء جاهز سيد همام خبرني تنزلوا..

-قوليله منبش

يقين:: يلا براء ..صدقيني همام ميجش معه العناد

طلعت معها كانوا امه ومرته وعمر جالسين في الصالون يهدرزوا

قعدت جنب امه …

أبرار حطت ايدها على بطنها وتشوفلي :: ميري امتا العشاء البيبي جيعان

فتتها ببرود شفت نظرات همام  ليها … اشر على ميري بمعنى تمشي

يقين:: مبروك همام

همام مردش الصمت كان سيد الجلسة  كسرها عمر لما قعد يتناقش مع همام في امور شغل! ابرار نظراتها لي كلها شر وغيرة !!

لاحظت همام من النادر يحكي مع امه كأنها مش موجوده بينا !

جلسه غير مريحه نهائياً حسيت اني مش منهم مش انتمائي هنا كأني متغربه عن وطني كل شبر هنا فيه ألغاز شيفرات صعب فكهن … وأبشع شعور ممكن تحسه لما ماتلقى ماتلوم إلا نفسك انتِ سبب براء بإيدك رديتي روحك لنقطة صفر بعد مابنيتي كيانك وشخصيتك وهيبتك قدام الناس بقرار غبي خربتي كل شي …. وأنا نفسي غير سوية لتحمل العقاب!

بعد العشاء طلعت  لحقت همام كان يدخن برا

-انا جايه لعندك بكل هدوء وتحضر نحكوا في موضوعنا

نفخ دخانه بكل برووود
اوكي تعالي نتمشوا

هزيت براسي بمعنى تمام رغم شعوري بعدم الأمان معه “

مكتوبلي نعيش شعور الخوف  لكبر معي طول عمري من طفولتي لي عيلتي   لجوازي لي المفروض يكون النجاة من كل شئ لكن حكم على بإستمرارية شعور عدم الأمان”

______________

طبعاً عارفه روحي منقدرش نطلق الفتره هذي ، بس اقل شي في حاجات لازم مانفهمها

همام :: طلاق هذا بإيدي انا امتا مانبي نطيرك من القفص زي ماخششتك فيه …اما انك تبي تفهمي موضوع ابرار وحملها فا هي كانت جوزتي من شهر طلقنا …..

ميهمنش موضوعها وحياتك …في شي تعبت عليه ونبيه …

همام بحيرة..شنو؟؟!!!

-شغلي نبي نكمل فيه لازم مانرجع انا عشت اصعب سنين حياتي وانا نبني في روحي من الصفر بس عشان نحقق حلمي منقدرش نهد كل شي ونخليه

همام بتعابير غير مفهومه:: شغل شني هذا قصدك طيران  وانتِ مرت همام اللافي نخليك تخدمي وسط رجاله ؟  تحلمي ترجعيله شغلك هذا ولا انك تشتغلي اصلا

-همام اللافي!!

همام:: شني اول مره تسمعي اسمي؟

-خلنا نرجعوا الموضوعنا … متنظرش لموضوع من عندك بطريقه استعباد وتخلف انا تعبت في شغلي ومش ح نخلي

همام:: والحضاره يعني نخلي مراتي تخدم وسط رجاله وهي ماناقصها شي لو تبي من دينار لي مليون يكون عندك لكن شغلك ،مكانتك، تعبك كلام فارغ هذا انسي نهائي

-ومن قالك نشتغل عشان فلوس انا هذي الحاجه الوحيده لي تثبت اني تغلبت على كل لعشته … ومنك مانبيش حتى قرش نعرف كيف نصرف على روحي …

مسكني من ايدي بالقوه وضاغط على اسنانه بعصبيه
قتلك انسي موضوع هذا منعاودش في كلامي مرتين ..وانا لشايل اسمي ملزوم مني وكلام فاضي جو حقوق المرأه هذا ميمشش معي انا راجل متخلف ومنبكش تطلعي فهمتي ولا لأ…

-فعلا انك متخلف وهمجي وسكير والله اعلم شن مخلي اخره الله يلعنك ويلعن ساعه لعرفتك فيها

ضربني كف ….حقيرة وتافها طول لسانك هذا تتعاقبي عليه انا حذرتك من قبل لكن متفهمش عندي انا لازم الطاعه والا تتمني الموت وماطوليه

طلعت نجري ونبكي خبطت في حد رفعت وجهي كان ….

عمر :: براء كنها حالتك هكي…

دفيتا وانا نبكي … بعد عني انت الأخر

_________________________

مرت ليلتها زي كل ليلة جيت فيها للمكان هذا ظلام وشعور باالوحده … على قد ماالمكان كبير على قد ماحسيته ظيق وخانقني ….

نضت الصبح دوشت وطلعت للفطور كانوا ابرار ويقين يفطروا

صباح الخير..

يقين:: صباح النور اقعدي افطري معانه

ابرار لابسه كت وجينز ضيق تاكل بلا مباله….

يقين:: كان استرلك لو حطيتي شي خفيتي بيه رقبتك عيب عليك يعني تعرفي عمر  لو طلع وشافك شن منظرك قدامه..

ابرار تتحسس رقبتها بضحكه
حبيبي بس لي يدخل في ؛ ولا انتِ خايفه على مشاعر سنيوره لجنبك ؟

حسيت بقرف من موقف لنحطيت فيه …الغريب اني ماغرتش مع انه راجلي حتى انا حتى ولو كان على ورق؟

-صحه انا شبعت

جاني صوت رعشني ويلعن خوفي قد شني يبان علي !

همام:: اقعدي كملي فطورك … ابراااار شن لخرا لي لابستيه

ابرار تلبكت وطلعت بخوف بدون ماترد

امه خشت وعمر وراها يصبحو علينا…

طلعت منهم توترت من نظرات عمر وخفت يشك همام…

غسلت  وجهي في الحمام طلعت منه لقيتا قدامي

همام:: لي صار امس …

-لي صار امس ولي صار  قبله نوعدك ح يجي يوم وننهي كل شي همام

قرب مني بإستفزاز حط ايده يمشي فيها على شعري ..
شنو غرتي من لشفتي على أبرار ، لو  تبي هذا حقك

رفعت ايده بعصبيه طفح الكيل منه”

الإيد لتلمسني متلمسش غيري ….خبطت على قلبه والقلب لي يحبني ميحبش غيري  …. مستحيل نرضا  تشاركني فيه وحده لو كان يعنيلي

بعد ايدي وعصب
يعني ترفضيني برااااااااء

-ومستحيل نكون ليك همام انا خساره  في لي كيفك

رفع ايده بيضربني بس تراجع في اخر لحظه …
ح تشوفي كيف ح يكون جحيمك معي…. طلع وانا ابتسمت لأني قدرت لي اول مره نستفزه…

❤❤❤الكَاتِبة هَامِي  ❤❤❤

يمضن الأيام على نفس الروتين مد وجزر عقاب وجزاء ….. سافر همام في شغل كعادته لعرفته انه دائمآ  مسافر وعنده شغل في اكثر من دوله بس شنو معرفتش؟؟

عمر ولد عم همام … متربيين مع بعض زي الخوت وساكن معاهم في جناح خاص بيه …نسونجي هذا الكلام ليطلع عليه رغم اني مشفتش منه شي مؤذي لي …كل مايشوفني وحدي يحاول يحكي معي نهرب منه مخليتش ليه ولا فرصه …..

في يوم فريده ويقين طلعوا عندهم مشوار عائلي …وانا كنت في الحديقه نقرا  في كتاب …كان عمر واقف وفي ايديه قهوه

عمر:: متخلنش نشربها بروحي

صكرت الكتاب وجيت بنمشي مسكني من ايدي

عمر:: ارجوووك براء ..متخفش مش ح نأذيك بس اقل شي خلنا نحكوا زي قبل عادي صحاب ..حتى انا همام يهمني

-وانا مش عشان همام …بس مفيش شي يجمعنا عشان نحكوا  فيه

عمر:: لا في براء …نبي نعرف فضولي بيقتلني شن جيبك لي همام …وكيف ترضي تستمري معه وعلى ذمته وحده غيرك وانتِ مفروض عروسه

-نصيبي عمر ربي كاتبلي هكي

عمر:: سألت عليك لما عرفت اسمك وشغلك  عرفت كيف عانيتي عشان اتخرجي وتشتغلي في شي حلمتي بيه عرفت كيف عذاب طفولتك وعيلتك خله منك اقوى بنت ممكن تشوفها عيني… لكن  شنو صار براء ! كل لعشتي من دمار حولتي لي حديقة ورد وحب وأمل كبير لكل وحده عاشت في عنف وتفكك أسري  … كيف صار وقلبتي كل الأمور وتغلب عليك لعشتيه…

-دمعت عيني كأنه صوت لجواي في كل مره واقف قدامي … كنتي تمام براء شنو صار!!!

لصار اني عشت زي مايبوا هم ..الحاجه الوحيده لدرتها عشاني وعشت عليها هي شهادتي في كل مره كنت نضعف ونقول مش ح نكمل يتردد في وذني كلام الابله لما قالتلنا السلاح المرأة الوحيد في مجتمعنا هي شهادتها مهما صار معاك ضربوك هانوك ظلموك جرحوك إلا قرايتك كلمة إلا قرايتك وشهادتك سلاحك لتحاربي بيه هن لي خلني نستمر يمرن علي ايام من سهر وتعب والإرهاق مابين معاناة خوتي وشغل الحوش مفش وقت نقرا فيه الا في ليل نكون تعبانه بنموت من النعس ودم يقطر من خشمي من المرض و العذاب كل شي ممكن خيالك يجيبه انا عشت اضعافه ، ويوم لننجح منلقش حتى من يشاركني فرحتي من اقرب الناس لي من المفروض يكونوا سندي !

هو بس لحسيت معه بكل شي حلو …وقت لرخى بي موتني مات كل شعور وحب وامل كل شي إيجابي مات معه قلت خلني نتغير شن فيها كان تغيرت من بيلاحظ من بيهتم اصلاً  لوجعي وحاجتي ….

لكن لما تغيرت الكل طلع شايفني عكس ماكانوا قبل ! ليش وقت لنتغيرو بس تلاحظوا    !!!
هو ليتغير كان مكسد مثلاً  وقال يلا نتغير! ماهو كله من ايديكم كله من تصرفاتكم ناسيين انه لقدامكم بشر وليه طاقه ممكن تنفجر في اي لحظه …. تغييري الكل لاحظوا بس ليش مالاحظوا معاناتي ؟ ليش ماسهروا على في مرضي! ليش ماراعوا انه لكل فعل ردت فعل …..1

حتى انت فظولك بس لقربك مني وقت لي اتعرت جروحي قدامك بنكون بس مكان لشفقه لا اكثر…

عمر:: اكيد لأ …ماتفسرش من عندك مش معنى انه في واحد رخى بيك معنها كلهم زيه … لو وقتها حكيتيلي كل شي مستحيل نكونوا توا في مكان هذا

-شنو يفرق همام عن غيره انا بايعه خلاص  انا متت من هذك اليوم

عمر:: صدقيني يفرق واااجد همام شيطان بذاته العذاب النفسي لعاشه وهو صغير عكس على شخصيته  خله منه واحد مسيطر نرجسي مستبد شخصيه مريضه تتلذذ بتعذيب … الغريب في الأمر انك الى الأن المدلاله عندا

ضحكت بصوت عالي… مدلاله اهاااااا واضح بجد بعلامة اني نتصبح بكف ونتمسى بكف

عمر غمض عيونه بِ ألم… عطيني فرصه  نساعدك تتخلصي منه براء متلعبش بالنار ولا بعداد عمرك معه

-تصدق ..شوقتني نشوف فيه الجانب لغيري شافه

جيت بنمشي ….

عمر:: متعاندش وخلي نصلح كل شي

التفتت … عمر هو في شي اسمه حب ؟ بديت نشك انه في اصلاً شعور او الحاله هذي يعني بجد ممكن كل لعشته ميكونش شعور حب ممكن حب احتياج ؟ او حب الأمان ! اوكنت نبي نهرب من كل شي ليه هو…..

عمر:: كل لذكرتي هو الحب اذا احتياج او امان او رغبه مجرد ما يكون هو بحد ذاته مكانته تفرق على الأخرين وتتلخبطي اول ماتنجاب سيرته معنها حبيتي براء اذا كان بس تبي تحبي وقتها وخلاص كان حبيتي ياسين هو كان معاك كل الوقت ليش قلبك مااختاره اذا مش حب زي ماقلتي؟

-حتى ياسين عرفته! شن تبي عمر هو هك متعود تخش في حياة الناس وتسأل عليهم

عمر:: ياريتني كنت متعود ولا حاسس بلي فيه توا

معرفتش شن نرد عليه لأني المره هذي عكس الماضي تماماً… زمان مكنتش نعرف شي لا كلمه اعجاب ولا معنى اغنيه ولا شن تعني دقات قلبي لتزيد وقت لتشوفه … ولا حتى رقم موبايل زي ماصارلي مع صاحب محل ههه

قد شني كنتي بريئة براء 💔
وقد شني غيروك ويااعالم يادنيا شن مخبيتلي!!1

كنت عارفه وفاهمه كل كلام عمر بس درت روحي عبيطه ومش فاهمه شي ومنعرفش نرد🤷🏻‍

________________________

في الليل ….

رن فوني مكالمة فيديو من همام …. تنهدت وفتحت الخط …شفتا وفي حضنه وحده 💔

نزلت الفون

همام:: ارفعي نبي نشوفك ؟

رفعت نبين ليه انه ميهمنش …
انت اوسخ خلق ربي

ضحك بإستفزاز
شنو يابيبي غرتي على راجلك …

-من شنو بنغار يامريض انت،،،  انا نكرهك ياحيوااااان

همام::بطلي غلط وطول لسان وإلا تعرفي شن ندير…يلا كيف شاطره هك زي كل يوم وريني وين قاعده نبي نشوف دارنا😍

-بي اي وجه تبيني نثبت اني هنا وانت في حضنك وحده اخره يانجس

همام:: اممم باين مش حتمشيها على خير ؟!!

-برمت الكاميره لدار… شفت توا وتأكدت اني منخونش فيك؟؟

همام:: صكري فمك هذاااا … لو شاك واحد في ميه قتلك من قبل شنو كنت ح ندير… ويلا توا وجك عندي سهره

-لحظه نبيك

همام::نعم!

-نبي نزور هلي بكره انا من وقت اتجوزنا مشفتهمش

همام:: يوديك سواق ويجيبك ….
صكر الخط وانا نتحلف اني ح ندمه على كل شي

________________

ثاني يوم مشيت لحوش بوي … خذيت معي كل شي ممكن يحتاجوا جواتي فراحه وشوق كبير ليهم …شعور غريب كيف بعد كل لعيشوني فيه انا رايفت عليهم؟!!

مجرد مافتحت الباب بي مفتاحي …. غمضت عيوني نشم في ريحة انتمائي ونحضن وطني.. ملجأي..افكار..ماضي…وجسدي  كأنه روحي سيبتها هنا ومشى منى بس الجسد مجرد مافتحت الباب رجعت روحي من جديد ….

لاقوني خوتي حضنوني يبكوا ….

سلمت على سالمه وبوي لكان جسد على سرير بجسم متهالك قد ايش وقتها شق كبدي وقلبي وتمنييييت واجد نحضنه

اول مره في حياتي نحس انه عندي عيلة وبحاجة ليهم …

طلعت لدار لكنت فيها  قبل مانتزوج … فتحت دولاب ، كنت مخبيه فيه العابنا لكانت فتحيه تصنع فيهم لنا وصورنا حتى شكاير شكلاطه لكان يعقوب يجيب فيهم لي كل شي لمساته ايده حطيته فيه …فتحته وهنا مقدرتش نمسك روحي انفجرت بكى …..

ماقدرتش يعقوب مقدرتش قلبي يكون لغيرك … انت وباء ومنتشر في من كثر حبي لك كرهتك تعبت منك  ومن كل شي يذكرني بيك ….

انا لي أخلصت ليك سنين بدون ولا وعد منك …توا قاعده نخون في عقد زواجي بتفكيري فيك يعقوب!!

بتحاسبني ياربي على انا فيه ح نكون بجهنم الأخره زي ما كنت فيها في الدنيا !

فتحت سالمه الباب … مسحت دموعي وانا نصكر في البوكس  ….

سالمه:: مبيتش نعزقه قلت اكيد توا تردي وتأخذيه

-اهااا .. “ياريتك عزقتيه  ولا حرقتيه 💔

انا ماشيه توا اذا ناقصكم شي قولولي

سالمه:: خلك قاعده نكلم خواتك وتعشن هنا

-لا منقدرش نطول … زي ماقتلك اذا ناقصكم شي كلميني…

سالمه:: امس جا سراج هنا حالته تقهر

-كنه شنو لصار معه

سالمه:: ياسين مختفي من اخر مره مشى فيها الصحراء  ناس قالوا خاطفينه هذوك جماعه ..وناس قالوا قتلوه …وليقول هارب كل حد يقول في شي

نزل على الخبر زي الصاعقه … ياسين  مختفي أااااااااااه منك بتشيلني ذنبك وانا لغارقه فيهم …ياربي ميكونش صاير معه شي يارب يكون بخير ياااااارب مش عشاني عشان امه وخوته لكبدهم  كلتهم عليه يااااااارب ….مانتعقبش فيك ياسين💔

____________________

طلعت من الحوش  وفي ايدي  البوكس لي فيه كل شي من الماضي …وانا في حالة ماعالم بيها غير ربي …

وصلت لي سجني  …. لقيت هديل

حضنتها … من امتا تستني ليش مارنيتش علي

هديل:: لا توا كيف جيت متوقعتكش تكوني طالعه… تي كنه وجك هكي مفش نورت عروس بكل …

-تصدقي انك فاظيه هديل …. شنو تبيني ندير في روحي

هديل:: زي ما الصبايا يديرن حبيبتي ولا تبي راجل يزهد فيك

-فكيني من سيرته انا كان ندير جو لروحي توا يقول تغري في يمشي يروح مستحيل نهين نفسي قدامه

هديل:: توا بالله عليك هذا تفكير راجلك هذا شنو فيها من اهانه؟؟ ….  عاررفه نقتلك كان تقولي مزلتي تفكري في زفت يعقوب عيشي حياتك وفوتي مش سااااد سنين وانتِ تستني فيه وفي الاخر شن نتيجه وجعك وحرق قلبك توا انتِ متجوزه حتى تفكير فيه حرام

-استغفر الله ياربي وخلاص …. كاااافي هديل وربي تعبت شنو ندير قوليلي كيف نطلع شي مولود معي هديييييل كيف؟؟؟

انا شايله حمل ثقيل على كتفي ياريت يجي ويشيل معي شوي يحس بي زي زمان لما نقوله شنطه وجعت كتفي يشيلها علي ياريتنا ما كبرنا هديل ياريتنا ما كبرنا ولا فهمت شي ياريتني قعدت الغبيه زي مايقول علي ياسين  .. الحب هذا تعبني هديل انا بجد مريضه انا مش تمااااام

هديل حضنتني ياروحي فاهمه عليك والله … لكن صدقيني حاولي تعيشي من جديد ربي رزقك براجل وخذاك باالحلال براء انا نعرف قد ايش تخافي ربي في الغيب قبل الظاهر متخلش شيطان يجرك لي متاهه انتِ بِ الغنى عنها

وانا جايه شفت عمر عند الباب شن جيبه وشن علاقته براجلك

سمعنا صوت الباب  خفت من في  زعما سمع في سن نحكوا ؟؟

غيرنا الموظوع هديل مطولتش قعدت شوي وعدت وانا نودع فيها خش همام …

الحمدالله على سلامه

خش عزق جاكه فتح سوريته بدون مايحكي … شاف البوكس وانا هنا قلبي طاح من الخوف

جيت بناخذه مسكا قبلي فتحه شاف شن في 🔥

نظرت عيونه قعدت تخوف فهمت وقتها كلمة عمر لما قال مزلت المدلاله مزال مابدا عقابي🔥

عزقه على وجهي وكرني من شعري

مش قتلك خاينة هذن ذكريات ماضي يعقوب ولا ياسين؟

كيف عرف !!

همام:: انتِ لي اخترتي براء كيف يكون عقابك قرب مني وانا نتباعد لحد ماجيت لأخر ولصقت في ساس…

همام:: عشان هك كنتِ رفضتني ؟ اخلاصك لي ماضي ميت يعني  خيانة زواجك

توا بتكوني مراتي براء برضاك او غصبن عنك+

#يتبع

لمشاهدة جميع اعمال الكاتبة: رواية الكاتبة هامي

لمتابعه اهم واخر الاخبار : القلم نيوز

اترك رد

زر الذهاب إلى الأعلى