ﻣﺒﺮﺭ ﺧﻴﺎﻧﺔ الحلقة السادسه .. الكاتبة هامي | القلم الناجح
روايات ليبيه كاملة

ﻣﺒﺮﺭ ﺧﻴﺎﻧﺔ الحلقة السادسه .. الكاتبة هامي

ﻣﺒﺮﺭ ﺧﻴﺎﻧﺔ الحلقة السادسه .. الكاتبة هامي

موجة أحاسيس💕

مِن البدايةِ ، أخذت يدكِ إلى جراحي ، وعرفتُك بها واحدًا واحدًا ، هذا من غدر الزمان ، وذاك من بُعد المكان ، وتلك آثار الخذلان ، وهذه بقايايَ ، آخري وأولي ، كل ما لي ، التي لو جُرحَت فنَيتُ ، وإن سلمَت حييت ، أمِنتُك عليها ، وأنزلتُك بها ، فاأسكِّنها وأسكنها

___________^^

-لالا منبش اصلا منعرفش كيف يشتغلن

هند :: ييييي عليك انتِ امتا تبطلي الخوف هذا ، وبعدها توا نعلمك مفش حاجه صعبه غير خوذي

-لا هند متضغطش علي ..انا ماشيه فصل بعد تنهي معاهن الحقيني

طلعت نجري لفصل وقعدت نكتب نمنع في روحي من تفكير ومن اني نكون هكِ …

نهاية دوام روحت وياسين كان برا …

ياسين:: كنا وضعك مش عاجبني؟

رديت بدون انتباه
ااه ..لا مافي شي

ياسين:: مش عارف طول طريق ساكته وسرحانه مش عوايدك 🙄

– لا مافي شي مرهقه من قرايا وشغل الحوش بس

ياسين:: اذا على هذي ساهله متشلش هم 

ابتسمتله مجامله وخشيت الحوش….

محكيتش مع حد بدلت لبسي وصليت ظهر وخشيت مطبخ ندير غداء ….

يجيني خالد زي ثور يجرني مع شعري وفي ايده ورقه

من وينلك هذي يابت ال….

“”نهز في راسي مش فاهمه شي وخايفه جسمي يرعش اقسم بالله تعبت من شعور الخوف وغمة القلب لمسيطره علي …….””””

والللللللله ممممممش لي

ضربني كف وشد شعري من جديد
تكذبي اخره وتحلفي بربي ياصايعه انتِ وحده عار ياوسخه وبدا في ضرب

جت سالمه ومن علو صوته جت عمتي نواره ام ياسين وحولوا مني

ام ياسين:: حرام عليك قتلت البنت

خالد :: تستاهل الكلبه والله نربيها

كمشت في روحي ونبكي
والله مانعرف على شن نظربت ولا شنو فيها الورقه

ورد بيضرب مع خشت ياسين ويعقوب طلعوه
شفت عيون شر في يعقوب وغضب ياسين مفهمتش نظراتهم حتى هم صدقوا انِ انا هك ِ؟ !!!!

صبتني ام ياسين وانا نتحلفلها اني والله مادرت حاجه

سالمه:: الورقه طلعها من شنطتك ايش جيبها لها نكان مش لكِ

– كان تأمنوا بالله وجلاالة الرحمن مش لي ومش فاهمه قصتها ياهووو والله تعبت ينعليييي ياعمتي انا معش نقدر حرام عليكم ناس تسمع فيكم توا يصدقوا كل يوم مضروبه بسبب حاجات مدرتهنش وكلهن تبلي حسبي الله فيكم الله لا يسامحكم

طلعت لدار ونهرت بكى واعر ظلم ياناس مر والله مر غصة في وِمن هلي؟! لي مفروض كانوا سندي وعزوتي يصدقوا الغريب ويكذبوني انا محطمه من جوا منهم جواتي عقد نفسيه من لعيشوني فيه كرهتكم كررررررررررهتكمممممم

_____

ليلتها مرقدتش ومشفتش حد قعدت كم يوم محرومه من المدرسه لحد ماعمي صافي قنع باتي اني شهاده وحرام نوقف واخيراً تكرم ورضا وانا عايشه في عذاب واهانات من ذنب انا بريئه منه ….

طلعت للمدرسه ولقيت بنات وحضنتني هند وقعدت نبكي وتهدي في قديش ماكنت بحاجه حضن وقتها وحد يمسح دمعتي…

هند:: عطا ضربه يعطي دا ان شاء لله في مكسورته الحيوان الهمجي

– الله ياخذهم كلهم ويريحني والله انا قعدت نحسد في اليتامى

هند:: والله في وضعك هذا صدقتي اسملا عليك …ماقتلك انتِ تنظربي بسبب وبدونه

– ان شاء لله نموت ونتريح والله ماعاد تفرق عندي حتى لقرايا لي كان املي فيها نيه منها طاااارت خلاص

هند:: مغير وسعي بالك خلنا نفطرو ونغيرو جو مع بنات عليش تطمري في روحك من الناس تقول دايره جريمه

صبتني وطلعت معها مكنتش واعيه لي شي ولا حتى عندي رغبه في شي بنت مراهقه عمرها 17سنه عز شباب والضحكه المليانه حياه اما انا العكس العمر كانه 71جسمي ونفسيتي متهالكه في شي جوي ميت مفش شعور عارف مرحله اللاشعور؟؟؟؟!!!

فطرنا ونهدرزو ونكتب في لفاتني …

هند كانت تكلم وصكرت..
عارفه حالتك هذي والله مايطلعها لك الا جو تكسيد على الأرقام هههه

– ايوا اعدام مره هذي

هند:: ياخيتي وهي في شن تفرق اقل شي ضربه بعمله ديرتها ..جربي الحب وشعور الأهتمام بحد يسمعك ويخاف عليك ويحبك ياالهبله والله الا جو يهبل😍

– يحبني ، يهتم بي؟!! 😳

هند:: اااااهااا املا شن تسحابي حاجه تشغل تفكيرك بدل ماهمك كله امتا تكملي تطييب عشان تقري خوتك وأمتا تكملي قراية خوتك عشان تبدي في قرايتك وهكذا تستمر حياتك البائسة 🤷🏻‍

سرحت شوي وماننكر اني نبي نجرب ماهو في كل الحالات ننضرب خلني نشوف …لا يابراء لا مش لكِ كلام هذا …شنو فيها هي مكالمه مش لقاء😔

هند:: خوذي رني على رقم لقتلك عليه والله ساكنلي نبي نعرفه من 🤔

-عزقتا عليها ..ياهند مش هكِ يشوفنا حد

هند تضحك
يااربي منك شن لخليك ترجفي توا طاح سعدك متخفش قتلك كلهم عرفيني تعالي نعلمك كيف ترني وتفتحي على مكالمه وجو هذا

قربت منها وتعلم في وانا من الخوف مفش تركيز

هند:: خلاص مفش حاجه صعبه خوذي دسيه

– قصدك نروح بيه 😳

هند:: وشن رايك مثلاً رنيلي على رقم واعرفي لي من يلا قريب نروحوا…

خباته لي وطلعنا لما شفت ياسين تقول نكبت علي ميه ساخنه…انا مستحيل يصير مني اكيد توا يحس على وانا هبله ياربي ياريتني ماخذيته 😔

ياسين:: اطعلي للحوش طول كلموني جماعه يبوني نلعب مباره

-باهي تمام…
جيت بنمشي رديتله….. ليش ماسألتنش على موضوع الورقة

ياسين:: وشنو يبي يتغير كان سألتك ؟! عارف ومتأكد واحد حطها لك في شنطه واكيد مساعدته بنت وانا نحذر فيك وانتِ مصكره راسك متبنش ندخل عشان هك منبش ندير مشكله معاك

– وليش خالد مايفهمش هك عند امتا معامله هذي تعبت انا

ياسين:: والله راقيلي منه وياما قلناله غير هو عيال حرام برموا راسه بعد يجي سراج توا نفهموا ساهل مدورش ساد لي فيك …

-ان شاء لله خير اوكي توا نتلاقوا…

_____

لما وصلت الحوش شفت يعقوب برا مع شباب شارع خشيت الحوش محروجه منه زعما مصدقني ولا زي خالد فاهم غلط!؟

دسيت االفون في دولاب بين الملابس وكان مقفل وكملت روتيني اليومي في العشيه جو فاظي خطرلي نشوف الفون طلعته وانا ايدي يرجفوا وفتحته كان في رقم لعطتهولي هند في ورقه كتبته وقعد يرن من ثالث رنه …. رد صوت رجولي
ألوو …ألوو..الووو من معي؟؟

صكرت الخط قلبي ينبض بقوة وجسمي يرعش حالتي حاله صوت كان يجنن اول مره نجرب شعور ..وانا مزلت تحت تأثير الصدمه يرن الفون في ايدي قاعد يهز هو نفسه الرقم مقدرتش نرد قريت شوي وبعدها رجعت شفتا …. مجرد مامسكته رن قلت يااااارب وفتحت الخط وبنفس صوت رجولي لي هز كياني

ألوووو منو معي شن حركات هذي؟؟

رديت بخوف شعوره غريب مش زي خوفي لمسيطر علي من طفولتي …
الووو …انااااا

شاب:: نعلي من صوت يااانا

وجهي سخن حرارتي رقت دقات قلبي زادو لدرجه حطيت ايدي عليه نحاول نهدي حاسه انه سمعه..

الشاب:: تِ ويييينك قولي حاجه من انتِ صاحبة اجمل الو في دنيا💗

-ببببراء…اسمي برااء

الشاب:: ياحي علي وخلاص عذاب حتى الإسم ومن وين تعرفيني يابراء ؟

-احمممم منعرفكش درت رقم من راسي صدفه يعني

الشاب:: ااااأه واجمل صدفه مواليد كم براء ؟

-92 ووووأنت

الشاب:: واووو علي بجديات صوت هذا 92؟

-اااها والله

ضحك علي… وضحكته خشتني في دوامه وموجة احاسيس جديده علي شعور حلو حسيت روحي في دنيا اخره…

– ليش تضحك

الشاب:: لأنك أسم على مسمى😍

-شنو اسمك انت

الشاب:: أيمن م 89

-عاشت الاسامي..والعمر كله ان شاء لله

طولت وانا نهدرز معه وانطلق لساني مكالمه جميله عذريه كل مافيها احاسيس ومشاعر جديده مكنتش نبي نصكر لولا انه خوتي روحوا وسالمه جت ومشيت نطيب في عشاء وانا في عالم اخر سرحانه نتفكر كلامه نضحك قعدت نتخيل في شكله ولي نشوفه من هلي نضحكله زي الهبله شبعت مع اني ماكليت شي… شنو لي انا فيه مكالمه وحده تلخبطني هكِ ؟؟!!!

الكَاتِبة هَامِي 

الصبح لقيتا بعتلي مسج صباح الورد لي احلا صوت …ابتسمت وطلعت الحمام شفت وجهي في مرايه اول مره نشوف روحي حلوه هكي شن صارلك يابراء بس غسلت وجهي توضيت وصليت صبح وانا طالعه مدرسه يرن ملقيتش ياسين قدام باب طلعت جري للمدرسه عشان نكلمه وصلت ورنيتله فصل علي وعاودلي

ايمن::شنو الحلو يثقل علي ميردش 😔

-لا والله غير كنت في طريق منقدرش نرد

ايمن:: قصدك توا في مدرسه

-اهااا ..توا كيف وصلت وانت امتا تطلع جامعتك

ايمن:: مش توا محاظره غير متعود نوض بدري

-نشيط يعني 😄

ايمن:: حاجه زي هكِ😅 منعطلش عليك ديري بالك على روحك

-ان شاء لله اوكي

صكر الخط…ياريتك عطلت ليش تصكر شكله مل مني 🤔انا نعرفش نحكي اووف مني غير امتا تجي هند وتعلمني كيف نتصرف ياربي محلاه صوته واسئلته زعما كان شافني نعجبه 🤔 اكيد منعجبش توا يخليني هوا انا غبيه قاعده زي هبله نتوقع في حاجات وهو مش حاطني في باله اصلا🙄

جت هند وخذينا حصصنا وطلعنا نفطرو

هند:: طيح سعدك ياااالهبله انتِ في وحده حماره زيك تقول اسمها الحقيقي عطيتي سجلك مدني كله ياغبو

– 😳شنو فيها قصدك مفروض ماقلتش

هند:: اها ياحماره توا مشوار ساعه من مدينه للمنطقه وتلقي هنا يسأل عليك ويشهدر بيك

-لا لا ميدرهش

هند:: لا انتِ غبو ستيوبد دونكي رسمي مفش كلام 😳 توا انتِ لي ماحكيتي معه غير امس كيف تحطي فيه ثقه هذي ياهبله مفيهمش ثقه رجاله

-لا صوته محترم وحكاياته محترمات

هند:: مسرع ما حكمتي عليه وبعتيني😳

– لا والله ماهكِ 😔

هند:: مهم نعطيك رقم اخره كسدي عليه

😳😳للا مستحيل وايمن؟

هند :: اللهم طولك ياروح تِ اي ايمن هذا لمعرفتي غير امس زف مدرهش كبدي حتى هو لي أنطلق معاك في حكايته هك شكله متعود ويهلت مع كم وحده خوذي ورني عشان قلبك مايتعلقش بحد وفكرك يقعد مشغول

-منبش ياهند كنك انتِ خلني مع هذا بس ولو طلع زي ماقلتي منبش نكلم حد نهائي

هند:: خلااص بجوك نمشي نعطي بنات ترفسي في نعمه…. مشت وخلتني وكملنا باقي دوام لما طلعت فون يرن وياسين برا كان اظاءه بدون اهتزاز درتا لي هند

روحت الحوش ونحس في طريق بعيده نبي نوصل بسرعه ونبي عشيه تجي اسرع😍

جت العشيه وحكينا
تعرفي انك حلوه بككككككل ربي يحفظك

-وانت شنو عرفك بشكلي😳

ايمن:: نقولك متزعلش

-شنو احكي

ايمن:: اليوم جيت منطقه وشفتك طالعه من المدرسه يوصل فيك خوك

-ككككيف هكِ كيف عرفتني انت حكيت لحد …قعدت نبكي

ايمن:: لا والله متفهمش غلط متبكش ان شاء لله نموت ماهو قصدي متخفش صاحبي ميضرش مقتلش تفاصيل انت ملكش دخل موظوع شوري انا بس

فكرت انه كلام هند مرات صح خاصه مع لقطه لدارها …بس جوات قلبي العبيط على شوي نقوله ليش كنت بخيل وشفتني وماشفتكش خاطري نعرف ملامحه ونتحشم نسأله اوصفلي روحك … وفرحت انه شافني وعجبته

واستمر وضعي هكِ شهر كل يوم نتعلق بيه اكثر من قبل سرحانه على طول حبيت روحي لي اول مره نشوفها بحب ونهتم بيها شفت كل شي حلو فيا يهتم بي يخاف علي صح منحكوش واجد ممكن مرات مره في اليوم صوت لكن مكملينها مسجات ومطلعش من بالي بكل…

هند:: متعاندش لازم ماتطلعي معي على اساس انا عندك وانتي عندي والله منطولوا

-لا منطلعش مع حد ياهند بسيارته شنو جنيتي كان شافنا حد ولا مثلاً درنا حادث محلاك عار بنقابل بيه ربي فوووتي مخشتلش راس

هند:: معنها عطيني فوني

صدمني كلامه هي تعرف اني تعلقت بي ايمن كيف بتاخذه مني

هند:: يلا هاتي 😌

-خلاص هند تعرفيني منقدرش نعطي … وياريت منطولوش

هند:: تم بعد دوام طول نطلعوا

_____________

طلعنا من المدرسه ومشينا على طريق كان يومها ياسين ماسك …. نتلفت وخايفه سمعت حد ينادي في…

برااااااء ….التفتت كانت

سلوى راكبه سياره وليي يسوق يعقوب :: براااء ..وين ماشيه

ارتبكت وبان علي …كككك كككنت ماااشيه لييي هند

يعقوب بنظره حازمه اركبي يلا

هند:: بس انا نبيها

زاد عله صوته … مش فاظيه توا عندنا مشوار اخره ..

ركبت سياره وطلع بسرعه جنونيه …

رن علي خالد قاله طالعين مدينه وسلوى تبي براء خذينها معانه ….

– شن تبي فيها مدينه

سلوى:: تغيير جو ونبي سوق

– اهااا… رفعت عيني تقابلوا مع عيونه في المرايه غير مساره على طول …

تمتمت مرييييض😒
مهم انقذني من هند ومشوارها

وصلنا وبرمنا في سوق وسلوى لتعجبها تاخذها

يعقوب:: خوذي حاجه لروحك

– لا مفش داعي
كان مول كبير وزاحم كل شوي بدون مايحسو نتفقد فون في شنطه هل رن ايمن او لا ملقيتش رن ليه يومين مارنش علي رايفت عليه وخفت نرن تحشمت مرات ميبيش لي سريب … قعد يعقوب يختار ويشريلي وانا نتحلفله معدلش علي …طلعنا مستلزمات وخذت سلوى ويعقوب حلف ناخذ زيها… بعد كملنا مشينا مطعم طلبلنا غدا وتغدو وانا تحشمت ناكل قدام الناس هك مش متعودا …

يعقوب :: براء ماكليتي شي كنك

– مكنش معندش نيه بس

ضحك مزال لتوا ماكليتي شي كيف معندكش نيه متجوعش؟

– متضغطش على خلاص

طلعنا وخذا معه اكل وسلوى قالت نبي مكتبه

-منبش ننزل تعبت مش متعوده نلف واجد

يعقوب :: انزلي خذي حاجتك سلوى وانا معها

نزلت سلوى لمكتبه ….

يعقوب فتح كيس طلع طبق بيتزا وسندوتشات وعصير
حسيت بإهتمام خوي طفولي رجع في مشوار هذا 

يلا تغدي توا ماحد يشوف فيك 😄

– قتلك منبش….

حطا في ايدي وقربه من فمي رفع حاجبه بمعنى كووولي…

بديت ناكل بشويش لكن في غصه في رقبتي صعب نبلعها فقدان شي تعودت عليه رياااف قتلني ….

يعقوب :: شنو في ليش حزن هذا حتى وانتِ طالعه معانه!

-سامحني نكدت عليكم

يعقوب:: لا ليش هكِ نزعل منك… مش قاصد سؤال هذا نبي نعرف كنك في حد مظايقك …

وكأنه لمس جرحي وعصر عليه ليمه وانفجرت بكا … صدمته يمكن !

يعقوب:: براء كنك متخوفنش

-انا تعبانه حاسه روحي مخنوقه مش قادره نتنفس ……..

“”كنت نبي امان وعزقت روحي في حضنه زدت بكى على كسرة خاطري وخوفي من انه ايمن زي ماتقول هند زي شباب يتسلى …

يعقوب:: هششسس خلاص ياعمري اهدي والله مافي حاجه تسوى دموعك هذن غير قوليلي من مزعلك

-هزيت راسي مظايقه بس اااسسسسسفه سامحني

يعقوب:: متقولش هكِ تزيدي تبعدي مسافه بينا

جت سلوى
براء كنك

-لا مافي شي نبي نروح بس

يعقوب:: مزال مش مروح بيك الا لما تضحكي ناخذك ملاهي

سلوى :: ياريت😍.. وافقي براء ورااااسك

-تمام زي ماتحبوا…

طلع على ملاهي ويحاول معي انه جوي يتغير …وقدر انه يغير جوي ومنعرفش كيف كان جو طفولي على قد مافقدت ايمن فرحت برجعت يعقوب ….

كملنا وروحنا في الليل وايمن لا حس ولا خبر …منعت نفسي اني نكلمه اصلاً ماقليش نحبك ولا عمره حسسني لهكِ معظم مكلماتنا يطمن على ونطمن عليه عادي متعمقنش ببعض بس قلبي لتعمق من اول لحظه سمعت فيها صوته وهذا مش بإيدي…

_______

كنا في مدرسه لما مر اسبوع كامل ومسمعتش صوته … حالتي في نازل مفش طعمه لي شي فرااااااغ كبير حاسة بيه عايشه في عالم وحدي…

هند:: كنك انتِ ليك فتره مش عجبتني …

-ايمن ليه فتره ميكلمش حتى مسج

هند:: نهار اسود يابراء ان شاء لله الحداد لديرتا عشان هكِ طيح سعدك انتِ حبيتيه😱

سمعت كلمه دموعي نزلوا

هند:: يابت انا شن حذرتك قتلك متحكش معه هو وبس عشان متعلقش بيه بعدها الحقير يفوتك عطيتك عشان تسلي مش اكثر هاتي الفون …

عطيته لها
شن تبي فيه

هند:: خذي هذا رقم اخره عشان تأكدي من كلامي رني عليه اليوم ومتقولش انك براء شوفي حقارته توا طوول يسلك معاك

-لا فكيني والله منتحمل

هند:: املا كيف لتعرفي نيته يافالحه خذي بلا تمهتيك ضروري تنشفي ريقي قبل

مدت ايدي خذيت …لما روحت الحوش كنت نستنى في العشيه بفارغ الصبر طلعت سالمه ويحي وعلاء يلعبوا مع خوتي صغار في شارع…. عبدالسلام مع٥ىفتش وين وخالد مع صاحبه في مربوعه…

رنيت عليه فتح سمعت صوته وهنا كل شعوري تلخبط

ألوو من معي

مسكت روحي وندعي ميطلعش زي ماقالت هند
الو انت لي من

ايمن::براء؟

فرحت وخفت وكل شي
لا غلطان انااا….

ايمن:: تِ بلاااا جو صوتك نطلعه من 1000بنت

رديت بعتب:: لا باين لأنك ديما تسمع فيه شابع منه وحافظه

ايمن:: تصدقي وتأمني بالله … اقسم بربي مرايف عليك للموت وقاعد نقاوم اني منرنش عليك نخاف تعرفيني من

تعرفوا شعور المش مفهوم موجه ادور بيك 100شعور تحسه في دقيقه… مش مصدقه حتى هو حس بلي حاسه بيه❤

-مفهمتش من شنو تخاف كيف يعني

ايمن:: بصراحه انا اسمي مش ايمن انا نعرفك وخفت تكشفيني وتكرهيني حبيت نحكي معاك لكن خايف لو تعرفيني توا ترفضي وتكرهيني وتهربي مني

-لاااا مستحيل تصير غير قولي من انت يعني كيف تعرفني
“كان خاطري نقوله نحبك لو كنت من ❤❤
عددت قائمه في راسي بكل شاب تعرضلي وكل حد من معارفنا لكن راضيه لو كان من انا نبيه حبيته خلاص❤

ايمن:: لا منقدرش والله عارف مستحيل ترضي بي

-لا قولي ارجوووك والله مانخليك غير قول من بس

ايمن انا…..

مابين سمعت اسمه وقف العالم بي من صدمتي ومابين فتح باب يطيح الفون ويشوفه خالد..

#يتبع

لمشاهدة جميع اعمال الكاتبة: رواية الكاتبة هامي

لمتابعه اهم واخر الاخبار : القلم نيوز

اترك رد

زر الذهاب إلى الأعلى