ﻣﺒﺮﺭ ﺧﻴﺎﻧﺔ .. الكاتبة هامي جميع الحلقات | القلم الناجح
روايات كاملة

ﻣﺒﺮﺭ ﺧﻴﺎﻧﺔ .. الكاتبة هامي جميع الحلقات

ﻣﺒﺮﺭ ﺧﻴﺎﻧﺔ .. الكاتبة هامي جميع الحلقات

الكَاتِبة هَامِي 

طفولتي المغتصبة

انا الجنين لتكون في رحم أمه بالغلط……

الطفل الي ماكان في الحسبان انه أمه تحمل بيه …وشاء القدر وأنولدت لِعائلة كانت لي أب عصبي لنخاع …وأم أُميه ليس عِلماً حاشا لله….فكم مِن أم أمية لا تقرأ حرف أنجبت وربت الدكتور والمهندس ….

لكن أمي كانت أميه من الأمومة …من الحنان…من الإهتمام…من أنها تناديني بِأسمي من أنها تشوفني بنظرة فخر وثقه…..

أنا الطفله بين ستة أخوات أثنين بنات وأثنين ولاد كانوا أكبر مني … وأصغر مني اتنين اولاد

يعني لا كنت الكبيرة ولا الوسط ولا صغيرة أنا كنت المهمشه….

كل يوم نوظوا الصبح عياط بوي وعرايكه مع أمي لي مانعرفش شنو سببها!!!…. ماكنتش نعرف هل هو روتين ولا فراغ ولا تعود..؟؟؟!

كانت أمي تلخبط في أسامينا……وأغلب الوقت تحكي مع روحها من كثرة المشاكل……

لا كان في عائلة ولا أمان ليش كان يجمعنا سقف واحد ؟!!

وقتها لأني طفلة بعمر الخمس سنوات كنت مفكرة كل المتجوزين حياتهم هكي ….وأي أخوة شباب يضربوا أخواتهم البنات…… صورة عيلتي وكل مافيها كانت تجسد لي أنه العالم كله هكِ.

كنه نسكنوا في منطقه أول ماتفكرت الطفولة وايام المنطقة وشارعنا رسمت الأبتسامة الحنين لأيام هذي رغم ألم طفولتي…

وضعنا المادي تعبان بوى ياخذ في راتب ضمان ومرات يخدم عمل حر …لبسنا كان فضلات ملابس الأقارب بس كنت صغيره نفرح بِ أي شي يجيني …

معندش ألعاب زي الأطفال كانت فتحية أختي تحب الخياطة تخيطلنا عرايس ودباديب وندير روحي نساعد فيها ونفرح بيهم ….كل همنا كان اللعب وبس.

راحتي النفسية كانت في حوش جيرانه عندهم 3اولاد وبنت

سراج خوي الكبير لانه هو وخالد قد بعض وأمي مرضعتها فا قعد خونا برضاعة

ياسين من نفس مواليدي92 …ويعقوب أكبر منه م 90 …سلوى أصغر وحده كانت م 94

الكَاتِبة هَامِي 

نضت الصبح على عراكهم زي كل يوم …

خالد :: اطلعي ياخرا نبي حمام

فتحية:: مش حمامك بروحك هو حتى انا عندي مدرسه

خالد يعارك ويتوعدلها… وهي تمكر فيه ماتبش تطلع

من صوتهم العالي سمعهم بوي ..وبدا يعارك ويلعن ويسب فينا… طبعاً لما تصير مشكله فا هي تشمل جميع كلهم ينضربوا كلهم ينسبوا …

ويتحول لعراك لي أمي يلومها على تربيتها وهي ترد عليه هذو اولادك مجيتش بيهم من هلي…….الخخخخخخ ،، وهكذا

كنت في زواية الدار من الخوف وصوت العالي كامشة في روحي وأيديا على وذاني جتني فريحه حضنتني قالتلي متخفش توا طلع بوي ونحنا بنمشوا مدرسه …

كل صبح يجوني ياسين ويعقوب عشان نلعبوا …ولأني مانشربش في حليب نطلع بدون مانفطر نلعب لعند نجوع وبعدها نأكل اي شي

كل واحد فينا عنده قطوس نلعبوا بيهم

-فتحية قالتلي سنة جاية نكون صف أول

ياسين:: وانا معاك ياغبية

يعقوب:: انا غلبتكم توا قاعد صف ثالث😝

-سمحة مدرسة نبيها في كرسات وألوان … فتحية توا عطتني كراسه وقلم قاعده تعلم في.

يعقوب:: لا لا يعييي مش سمحة كلها واجبات وتطبيقات والأبلة ديما تعارك وتضرب

ياسين:: لا براء قالت سمحة غير أنت الغبي

“أكثر كلمة على لسان ياسين كلمة ياغبي ياغبيه وكأنه هو الذكي الوحيد”

نطلعوا لشارع وسيارة لتخطم نضربوها باالحجاره ونتخبوا…. نطقوا على حواشين جيران ونهربوا …نتعاركوا مع اولاد شارع نخاف ونبكي منهم وهم يحموني …

كل شطانه والأفكار هذي من ياسين ..يعقوب كان اكبر بس هادي…

يجي وقت الغداء وكل حد يمشي لحوشه

______

بعد الغداء نشوف خوتي يقروا نطلع كراسه لعطتها لي فتحية ونبدا نتعلم …

– نبي بسبوسة

فتحية:: معندنش سميد حتى انا خاطري في حلو

فريحة :: توا نديرو الحلو متاعنا😄

تعرفوا فتحية كانت صف سادس وفريحة صف خامس …بس امي تعلم فيهن من هن وصغار على شغل الحوش وتطييب … كان عمري 5سنوات تخلي في نغسل مواعين ونكنس ونمسح … تقولي تقعدي ناشطه هكِ علمت خواتك.

صبت فريحه مطبخ قصت خبزه وحمرتها على غاز كانت واقفه على صندوق اصفر متاع كازوزه “جيل تمانينات وتسعينات يتفكروها 😂

طيبت العسل وبدت تغطس فيهم قتلها نبي نكلم يعقوب وياسين امهم طلعت مع امي لجارتنا وهم ماسكين سلوى وسراج وخوتي الولاد يلعبوا في شارع

ناديتهم جا ياسين ويعقوب شايل سلوى بدينا نعصرو

-اممم انها لذيذه وحلوه😋

ياسين:: تقولي فيها كيف رسوم متحركة😄

قعدنا نضحكوا … وفتحية خذت يعقوب غصب عشان تقري وهو ميبش

مع أني كنت صغيرة لكن ديما نحب وقت فتحية وفريحة يعلموني …كانو يلبسوا في وشاح وكندرة امي ويمسكوا توبوا ويطلعن طباشير ويكتبوا على دولاب … وانا ويعقوب ياسين وسلوي طلاب

وقبل ماتجي امي يمسحن ويردن كل شي نخافوا تضربنا..

كنت متشوقه امتا نبدا نقرا ونكبر …كأنه حياتي اذا كبرت ح تكون احسن ويموت الخوف لجواتي.

من تعب نخشوا نرقدو بدري كان في دار وحده نحنا البنات….ولازم قبل مانرقد متعودة نسأل فتحية

-من سماني براء

فتحية:: دكتورة لعطاتك لي امي سماتك براء
امي هكِ تقول

– شنو معنها براء وليش عندنا اسامي

فتحية::مانعرف معنى اسمك لكن كلنا عندنا اسامي عشان نعرفوا ليكلمنا أوووف منعرفش لخلبطتيني را خلنا نرقدو عندي مدرسه الصبح

– عندي سؤال اخره بس

فتحية بمللل
هممم شن هو

-عادي الخوت يتزوجوا

فتحية قعدت من نومها
عيب هكي من قالك الكلام هذا…. تخش امي تعارك كانت تسمع فينا

قعدت نبكي ..والله ما نعرف ياسين قالي توا لما نكبروا نتجوزو

طارت على امي زي الأسد لهاجم على فريسته ضرب وكفوف خنقتني عند ماغصيت…

كمية غضب وشر في عيونها شفتهم وهي تخنق في باهي ياأمي ياعرق الحن قوليلي في شنو غلطت احضنيني سايسيني عقلي متاع 5سنين مش فاهم اصلا ليش انتِ تضربي في … لتوا نظرتها هذي بين عيوني جسمي يتقشعر لما يتفكرها زي لما يتفكر هذك اليوم……

فتحية تبكي خلاص ياامي قتلتيها والله ماتعرف

امي:: مره اخره قسماً بالله نسمع كلام زي هكِ منك الا مانقتلك ياكلبه ،هذا كله من لعبك مع الولاد ..مسكتني من وذني شن دارولك ياوسخه احكيييييي

مقدرتش نرد عليها من الخوف ومش فاهمه هي على شن تحكي ضربتنا كلنا حتى فريحه لكانت راقده …

رقدت وانا نشهق ونبكي ونتوجع من الألم وليش امي ضربتني مش عارفه السبب …شنو معنى كلام ياسين ،، اكيد كان كلام عيب…زعما أمي معش تخليني نلعب معاهم..افكار يلعبن بعقلي الصغير ولأني طفلة رقدت بيهم… معندش جواب لي شي …انولد الخوف معي من عياط والضرب والعرايك ..هي هذي بيئتي وهذي نتيجتها علي….

نضت الصبح متبولة على روحي وأمي فوق راسي
ضربتني وقعدت تعارك وحكتلي بفلفل الحار على فمي

قعدت نعيط منه ونتنقز
خلااااص يااامي خلااص معش نتعودها

امي::توا تخشي تغسليهم بروحك…ومعش في لعب مع الاولاد ..والله نربيك .

جسمي صغير كيف نظفه معندش جهد لكن كان مغسلتهمش توا تضربني وتحطلي فلفل … قعدت نغسل وندير زي ماامي دير بعد تغسل تهرسهم برجليها .. ..

خوتي الكبار في المدرسه …ياسين ويعقوب مخلتهمش يلعبوا معي

عاقبتني خلتني نظف معها ولتقولي جيبيها نجيبها ليها تعلم في كيف نظف ونغسل وننشرهم…كأنها كانت عارفه انها مش ح تقعدلي …

نتفكر اني تعبت يومها رقدت وانا مصبيه من خوفي حرمت نسأل على شي….

نضت الصبح على صوتهم العالي وعرايكهم …بس مره هذي تختلف كان في صوت تكسير وكلام منعرفش…

من خوفي مطلعتش خفت يضربوني ولا نكون انا السبب في مشكلة… خشن فريحة وفتحية يتباكن

قربت منهن
خلاص متبكنش ديما يضربوا فينا

فريحة هزت راسها
لا مضربونش بس امي عدت خلاص بوي طلقها

#يتبع

جميع الحلقات

  1. ﻣﺒﺮﺭ ﺧﻴﺎﻧﺔ الحلقة الاولى
  2. ﻣﺒﺮﺭ ﺧﻴﺎﻧﺔ الحلقة الثانية
  3. ﻣﺒﺮﺭ ﺧﻴﺎﻧﺔ الحلقة الثالثة
  4. ﻣﺒﺮﺭ ﺧﻴﺎﻧﺔ الحلقة الرابعة
  5. ﻣﺒﺮﺭ ﺧﻴﺎﻧﺔ الحلقة الخامسه
  6. ﻣﺒﺮﺭ ﺧﻴﺎﻧﺔ الحلقة السادسه
  7. ﻣﺒﺮﺭ ﺧﻴﺎﻧﺔ الحلقة السابعه
  8. ﻣﺒﺮﺭ ﺧﻴﺎﻧﺔ الحلقة الثامنه
  9. ﻣﺒﺮﺭ ﺧﻴﺎﻧﺔ الحلقة التاسعه
  10. ﻣﺒﺮﺭ ﺧﻴﺎﻧﺔ الحلقة العاشرة
  11. ﻣﺒﺮﺭ ﺧﻴﺎﻧﺔ الحلقة الحادي عشر
  12. ﻣﺒﺮﺭ ﺧﻴﺎﻧﺔ الحلقة الثانية عشر
  13. ﻣﺒﺮﺭ ﺧﻴﺎﻧﺔ الحلقة الثالثة عشر
  14. ﻣﺒﺮﺭ ﺧﻴﺎﻧﺔ الحلقة الرابعة عشر
  15. ﻣﺒﺮﺭ ﺧﻴﺎﻧﺔ الحلقة الخامسة عشر
  16. ﻣﺒﺮﺭ ﺧﻴﺎﻧﺔ الحلقة السادسه عشر
  17. ﻣﺒﺮﺭ ﺧﻴﺎﻧﺔ الحلقة السابعه عشر
  18. ﻣﺒﺮﺭ ﺧﻴﺎﻧﺔ الحلقة الثامنه عشر
  19. ﻣﺒﺮﺭ ﺧﻴﺎﻧﺔ الحلقة التاسعه عشر
  20. ﻣﺒﺮﺭ ﺧﻴﺎﻧﺔ الحلقة العشرون والاخيرة

 

لمشاهدة جميع اعمال الكاتبة: رواية الكاتبة هامي

لمتابعه اهم واخر الاخبار : القلم نيوز

اترك رد

زر الذهاب إلى الأعلى